掹機邊



朋友學有所成, 可以自己揸飛機四維去, so cool.

好榮幸, 尋日可以參加佢第一次載客嘅"處女"行.   計劃航程係順時針, 由新界北開始 -> 經吐露港 -> 繞道西貢 -> 飛過港島 -> 再喺大嶼山回航.

點知天氣唔得, 能見度低, 前面仲疑似行雷, 所以飛到去西貢就已經要返轉頭了......

其實坐小型飛機都幾過癮, 因為比民航機飛得低啲, 可以睇得清楚啲地下嘅景色.

呢件就要當腰包咁孭嘅救生衣, 孭咗個肚腩唧晒出嚟, 簡直表露無遺!

耳筒除咗比機師乘客溝通外, 乘客仲可以聽埋機師同控制塔嘅通話, 不過全部都係航空術語, 唔明. Haha.

我哋架"LUV"

紮行馬嘅加油哥哥

飛過馬場上空  -  其實啲馬都睇得幾清楚㗎
西貢海面有好多遊艇呀

零進度

新屋8月12日收咗鑰匙, 屋苑啲乜乜住戶證, 泊車咭, 裝修許可......   麻xxxxxxx煩!    Management office搞搞搞, 竟然可以搞足兩個禮拜!!  實在匪夷所思, 痴線!

好彩係自己嘢, 比着以前做project, 拖咁耐?  比人炒10次都唔得掂.

諗住9月4日入伙, 今時今日, 仲係得張凳! 要褪啦......

又流

今日食完晏, 諗住行傢俬舖搵新屋食飯枱, 點知都行唔完第一間, 就要腰斬!  因為睇睇吓, 突然流鼻血.

招呼緊我嗰兩個80後哥哥仔好好人, 叫我坐低休息, 跟住遞咗好多紙巾同水, 仲請咗幾粒糖我食!

佢哋嘅關懷(敬老), 我好impress, 我會send email去佢老闆度表揚.

雖然啲人話我因為"燥"同熱氣所以流鼻血, 但今個夏天已經係第三鑊! 因此我會去醫生度check吓.



見識

尋日, 有幸踏足九龍塘一所屹立以久嘅時鐘酒店, 雖然唔係去偷情, 不過行入去嗰吓, 又真係覺得有啲尷尬.

以下係"維基百科"對呢間著名酒店嘅description, 寫得好搞笑 :

X酒店是一所位於香港九龍塘站附近的一家時鐘酒店。這一家酒店之所以在香港聞名，並不是因為它的服務或環境特別優越，而是因為它地點適中，剛剛好在港鐵兩條線的鐵路站和巴士站之間，使它變成了一個約人的「理想」地點。

有個<客滿>牌㗎 日光日白冇乜客, 只係泊咗部車

X酒店在1980年代是香港很多富豪和明星的偷情勝地，因為地方寧靜而不受打擾。這亦使這家酒店變成了當時人暗指去偷情的代名詞，儘管在九龍塘其實還有不少其他類似性質的情侶酒店。然而，自從鄰近的香港浸會大學擴建及香港城市大學的落成，使九龍塘變得愈來愈熱鬧，而該酒店的門口亦成為了學生舉行活動前出發的集合地點.

< 成事>後可選擇走後門,條特別通道eye-level仲有圍檔遮住, 以防身份曝光.

再會了

住咗而家間屋差唔多4年, 老實講, 景觀一流, 但我覺得呢度其實暗藏煞機, 因為搬咗嚟嘅3年內, 入咗兩次醫院!!

之前嗰間, 反而人人都話煞氣重(對正"養和")但我又住得ok -- 3年升4次職, 不可思議啩!

如冇意外, 我就快搬喇, 跟住嗰度風水點, 夾唔夾我, 容後再談.     不過, 我一定會好懷念呢個景......

 

如果我有$$, keep埋呢間屋, 兩邊住就好喇, 不過我冇啦.

 

 

 

 

 

 

陳太

尋日趁好天, 去深水灣游早水, 見到奇景!

可能早, 沙灘主要泳客都係老人.  游游吓, 見到海面有幾個藍色頭載浮載沉, 好驚嚇.    睇真, 原來係啲阿嬸怕曬, 笠住個塑膠頭套喺度游.  

最吊詭, 係完全睇唔到樣, 個個雪櫃咁嘅身型, 啲friend都可以認得出落緊水嗰個...... 係"陳太"!!!   果然寶刀未老, 勁 !

鹹魚翻生

我有一個<雪藏牌>.

1993年考牌後, 只係頭兩年有喺香港揸同埋喺外國highway飆過吓, 跟住就完全冇.   十幾年後嘅今日, 假若叫我揸, 係危害社會.

不過適逢其會, 好快要揸番車喇.  所以, 要將藏埋喺內心深處嘅駕駛記憶喚醒.

補咗三堂, 因太耐冇揸, 同埋未揸過自動波, 都幾怯...... 但係師傅竟然好放心, 仲叫我跑東廊! 嚇死.

尋日好友同我嚟個私伙<金牌路路通>, 攞部堅嘢嚟practice.   無驚無險, 又到終點, 但係途中嘅<蝦碌> , 完全暴露我處事求其嘅特式, 笑爆咀!



1)  喺回旋處直接剷過中間安全島直去;



2) 上落斜轉急灣, turn完放晒汰, 攞唔番汰, "pin"晒灣嚇親對面線;



3)  停車場閘口停唔正, 要開門落車先噤到card;



4)  視路邊凸出物為無物, 唔減速, 掂行掂過.

精裝馬蹄鐵

上禮拜比部壞鬼電腦玩殘, 加上睇唔順眼Yahoo Blog新板面, 所以停寫一週.

無聊冇嘢做, 攞咗Marky啲馬蹄鐵去電鍍, 一金一銀, 尋日攞番, 效果好得, 個人覺得金色仲靚過銀色.

我諗..... 呢個idea, 其實有發展空間, 因為其他馬主(無論養馬同賽馬) 見到都一定會心動, 想同佢哋嘅愛馬整番set, 送禮自用, 唔止高貴大方, 仲獨一無二tim!