識食之人 . 揀成都

機場巨型 PANDA 歡迎你

一年一度, LB 舊同事都會嚟個 reunion 旅行, 今年落腳 "天府之國" 成都.  

酒店門口

成都確實係個好地方, 一個喺大陸少數我唔介意重複去嘅城市. 

全靠 PM 之王同事打人情牌,我哋俾 1/3 價錢就可以入住成都太古里一間高級到爆嘅酒店 https://www.upperhouse.com/tc/chengdu/, 連日行程 / 餐廳 / 包車 / 導遊 / 景點門票都完善安排, 果然係 project management 界頂尖材料 ! 💪

夜色 . 美女彈琴

同行有幾位原來係第一次去成都, < 破身之夜 > 值得紀念唔可以馬馬虎虎, 必須去最 iconic "寬窄巷子" 裡面一間融合 美食 | 美女 | 川劇變臉 | 峨眉功夫 | 龍行茶藝元素 (好似好多範數 😆😆) 嘅 "小龍翻大江文化火鍋", 整個正宗成都麻辣鍋, 隆重其事打開序幕.  

兩磚牛油食落肚

火鍋上枱, 應該係個港人絕對唔可以接受嘅場景 : 兩大磚橙色牛油, 唔係大紅蘿蔔, 嘩好肥呀大佬 ~~~ 😮😮😮

東京大食之旅後, 喺香港努力經營嘅 168 diet 成果, 隨著眼前兩磚牛油熔化, 迅間清零化為輕煙.  但與此同時, 牛油紅湯噴發出陣陣四川麻辣撲鼻激香, 又真係幾令人難以抗拒. 

冰山一角食物

狂性大發叫到成枱都係嘢, 心諗呢個又唔食牛, 嗰個又唔食羊, 我最衰格乜都唔食 😜, 實搞唔掂.  

碟中熊貓超得意

點知原來諗多咗, 最後枱面全部食物被 KO 晒不特止, 有幾樣特別好味嘅同事仲加單添, 食力非常驚人 !  

我哋包房有變臉 "到會" 表演, 四川變臉好多年前睇過, 但企正喺面前變就係第一次.  金精火眼𥄫到實, 都仲睇唔到佢哋搞咗啲乜可以秒速換面, 不過今次亮點係加咗個變面嚇人環節, 連環嚇親同事兩次, 可能係 Halloween special ? 😂

東京結界

睇網上討論, 香港人話近年去日本, 日人對港客態度冇以前咁客氣, 有時甚至會惡劣添, 所以今次出發東京前已作好被人西面嘅心理準備 😆 

記得人生第一次搭飛機, 就係去東京, 仲鬼咁好彩被 JAL upgrade 上 business, 除咗有蒲燒鰻魚飯飛機餐, 成程機簡直就係目不暇給, 因為當年日航空姐真係靚到 '揼' 一聲, 舉止優雅笑容甜美, 我唔係麻甩佬都望到眼甘甘. 

從始愛上東京, 年年飛幾次, 最癲嗰陣仲打算走去讀設計添 ! 當年未過廿歲留學日本要搵保証人, 老竇話大阪有個 friend 可以做我保証人叫我不如去大阪.  吓...... 大阪 ? 大阪都唔係東京 😮 No laa.

計劃擱置, 我漸漸減少飛, 久而久之就冇再去, 轉軚投奔法國了.

近年為公事多番啲去東京, 但認知障礙基本上鑊鑊都會喺 [東京車站] 迷路, 拖住大型行李, 從車站地下迷宮趕路中嘅人潮裡逆流而上, 今次仲行錯方向走咗一大段冤枉路添 ! 絕對係體能大作戰.

鮮肉的哥

好不容易, 抽住行李狼狽地爬上廿幾級樓梯, 終於到達地面出口, 的士站排頭位嘅司機喺車內側頭睄咗我一眼. 心諗 : " 來吧, I am ready, 西我面吧 !"  拉行李走到車尾, 見到的哥真身先發現原來係一件笑容可掬, 態度親切有禮嘅小鮮肉, 真係怪錯咗佢喇 😝

讚 👏👏  搭得相當愉悅的一程車, 第一天總算開咗個好頭 !

貌似嚴肅 . < 豪德寺 > 呢個收銀原來好玩得 😂

跟住喺東京嘅飲食同購物體驗, 真係完全絕對冇被任何日本人待薄 / 西面過, 一般店員招呼都好好禮貌, 有幾個仲熱情又玩得, 加上而家啲 yen 平, 成件事, 比起香港真係正 N 倍 ! 

爐端燒 . 氣氛真係超正 !

同埋, 今次東京去咗兩個一直好想去嘅地方, 成就感好高. 

成就 1 : < 豪德寺 > 招財貓

成就 2 : 淺草 < 雷門 > 大燈籠

東京秋季旅行の大食

一年一度年尾 12 月, 魚翅航空都有 vantage pass 套票優惠, 上年買定今年飛嘅 [香港 | 羅馬] + [香港 | 東京] 來回各一 set, 價錢基本上係短嗰程免費.  

日本人 graphic design, 可唔可以唔好咁靚呢 ?

羅馬五月去完, 十月中輪到東京, 諗住嚟個 4 日 3 夜快閃, 一條友四圍逛逛打吓咭, 買啲餸自己煮食就搞掂, 點知同酒友噏噏吓佢哋又有興趣 join, 實在太好了, 人多就可以食多好多好嘢 ! 而餐與餐之間係自由活動時間, 各自各精彩, 咁嘅形式遊東京, 實在最理想不過.

Photo credit : 朋友影嘅 WIP 廚師靚相

更high, 係 friend 竟然提議再去 2024 年尾食過嘅 [Hakunei 白寧 https://hakunei.com/en], 哇好呀 😍 !!  真係求之不得開心都嚟唔切, 因為真心覺得 [白寧] 出色地好食, 上菜過程簡潔俐落, 職員服務零瑕疵. 同埋價錢定位仲要唔高, 如果香港要近似 level, 唔計酒水每位唔擺低 $2,800 都唔使旨意行出門口.

MENU

果然, 今次再踩場, 呢位 "日本最後生獲得米芝蓮一星廚師 - Dai Hayashi 林大" 嘅出品完全冇令人失望, 每度菜依然都做到驚艷嘅效果, 材質配搭全部經過深度思考同設計, 我哋幾條友成晚真係食到連環 O 咀, 讚嘆不已.

所有嘢都極度好味, 但講到個人最愛, 有呢 3 樣 : 

魚湯

1) 魚湯 Soupe de poisson - 新鮮海產, 魚味濃郁嘅清澈高湯, 飲幾啖直頭覺得自己好似食咗用幾十斤魚提煉嘅精華咁滋潤 💪💪💪

Red bell pepper | Stracciatella

2) 紅燈籠椒 | 意大利乳酪芝士 Red bell pepper | Stracciatella - 賣相靚到不得了, 乳酪芝士衾住嗰塊千層酥啲 texture 好食到嚇人, 個紅燈籠椒醬仲有少少余均益 feel, 成件事超級惹味 !

Pigeon

3) 一鴿兩食之金時草乳鴿湯 Pigeon - 餐廳事前電郵再三確認我哋食唔食鴿, 心諗鴿之嘛, 又唔係貓/蝙蝠/老鼠, 冇問題喎. 後尾得知原來日本人唔太接受食鴿, 所以餐廳要問清楚 😶  

頭一碟鴿肉已經正到反白眼, 點知跟住嘅 [金時草鴿湯], 簡直係法國名物血鴨個 friend, 好少食嘢會食到咁激動, 心裡面不停講粗口 !  真係搞唔掂, 比啲湯拉高晒我對其他西湯嘅底線, 走上不歸路. 

坐到咁上下, 係時候同侍酒師表白 😆, show 張兩年前到訪影落嘅相, 證明我哋係非常支持同欣賞 [白寧] 嘅回頭客, 侍酒師話其實都認得我哋, 仲行去同廚師咬耳仔通水.  咁開心, 當然要再影沙龍留念, 其實佢哋同之前個樣分別不大, 不過廚師就堅稱自己老咗, 有咩 ?

侍酒師 (唔係 AI 合成)

 

廚師 (唔係 AI 合成)

 

投訴有門

樣衰囉 !

得到特別行政區政府大力支持, "全力推進新基建, 融合新要素, 激發新動能, 助力提升香港國際信息樞紐地位, 支撐粵港澳大灣區數字經濟蓬勃發展" (新聞稿原文. 我邊有咁好文彩).  

X 移動用 60 幾億投咗屋企對落, 塊貴絕全港嘅工業地皮, 起座自稱綠色低碳數據中心.

2021 年開始大興土木, 橫跨足足 5 年嘅動土剎, 終於喺 2025 年十二月完工 😠. 以為有好日子過, 點知原來係另一惡夢開端 😓😓

 投訴前 . 屋苑幾棟樓比佢打到發晒光 (攝於 4am)

座 PK 數據中心天台啲機組晚晚燈火通明, 強光𥋇眼𥋇到一個點, 冇誇張, 喺屋入面真係唔駛開燈都食到飯. 諗住短期試燈啫, 點知唔係, 係晚晚開通頂 😡😡😡  

環保的風彩 : 嚴重光害不特止, 天台巨型風機, 冷卻塔同柴油發電機日間運行嘈到飛起, 臭氣熱氣噴晒出嚟, 搞到連想打開窗唞啖氣都唔得, 仲話自己 "實現全生命周期 + AI 綠色節能, 材料, 節水, 能源及大氣保護, 智慧園區, 空間管理及空氣保護六大維度開創綠色「低碳」新生態" (新聞稿原文. 唔知噏乜春), 全部 9 吹 !

住新界都係鍾意靜同空氣清新啫, 估唔到而家比個綠色低碳數據中心搞成咁, 超嬲, 呢吓唔出手唔係人. 

真係好想好似拍電影咁攞支迫擊砲一嘢轟過去, 但現實冇可能, 所以今次搵 1823 投訴, 交俾政府部門去執番自己搞出嚟嘅屎.

我係 1823 熟客 😆, 啲人成日話 1823 反應慢效率低, 唔係喎, 幾次投訴完翌日已經收到電話, 今次都唔例外, 跟住仲時不時有 follow-up calls 詳細交代進展添. 環保主任話收到好多附近居民對數據中心投訴, 但因天台機組聲音冇超出環保處法定嘅 (住宅區) 噪音標準, 好難執法. 而光污染喺香港就更加冇王管, 所以只可以勸喻數據中心作自願性質嘅改善. 

最搞笑係主任爆料, 中心負責人答覆話 唔知 自己天台原來晚晚通宵着晒燈. 唔係掛, 一句 唔知 就想甩身, 真夠厚顏 😂  個乜春綠色節能 AI 呢 ? 死 Q 咗去邊 ?!   

我當然唔會就此罷休, 半年嚟盡情發揮連番狙擊, 但數據中心天台啲燈總係熄啲唔熄啲, 有時明明熄咗, 得閒又開番, 死唔斷氣.  直至上個 weekend, 所有燈終於熄晒 !

唉...... 內卷文化真係搞唔掂 😒  做一次唔乞香港人憎嘅嘢, 乜真係咁難咩 ?!

投訴幾個月後 . 終於熄燈收皮 !

記憶番晒嚟

油尖旺日落 . 又真係幾正 

後生嗰陣, 公司有人劈炮, 成班同事都會笑住玩話 :  [永遠懷念].  不過對我嚟講香港真正值得 [永遠懷念] 嘅, 只有哥哥 Leslie.

利申, 我唔係哥哥 fan 屎, 但睇過好多佢嘅戲同電視, 連當年 [麗的電視] 重播 "甜甜廿四味", "浣花洗劍錄", "對對糊" 都有 😆. 

張國榮靚仔做戲好係肯定, 歌呢...... 就唔太符合個人口味, 唯有 [風繼續吹] - 雖然係 cover, 真心覺得好聽過山口百惠原作. 

對 [風繼續吹] 另一深刻記憶, 係以前讀設計教 design fundamental 個阿 Sir, 成日騎劫課堂喺 lecture room 迫學生聽佢表演唱歌 (CLS 自己仲準備埋 BGM 嗰隻 😂😂😂), 變態, 虐兒 !  但有次唱 [風繼續吹], 嘩又真係幾鬼好聽. 

尋晚去大南街打邊爐, 難得出九龍, 順便去尖沙咀 Fun Space 睇陳淑芬搞嘅 [繼續寵愛空間], 欣賞佢多年珍藏, 張國榮演藝回憶. 

雖然場地細, 個展覽都幾好睇 👍, 最 like 嗰 part 係啲金唱片, 獎座, 尤其歌衫 !  舞台服裝靚同浮誇預咗, 但當實物 1:1 近距離展現, 幻想哥哥真人著起呢啲歌衫, 妖豔又前衛 !  

發現 Leslie 應該幾瘦, 目測啲褲管同腰圍都好窄吓, 我都未必穿得落 😭  

展出服裝其中有幾套係法國時裝設計師 Jean-Paul Gaultier 特別為哥哥演唱會打造.  講起 "喪波", 回憶突然番晒嚟, 當年讀設計年紀少少已經貪慕虛榮, 缺乏金錢痛感, 1989 年 0 收入竟敢走去海洋中心狼死買咗件過千嘅 "喪波" 恤衫 !  唔記得之後點收科, 總之而家諗番起都心寒 😵

有兩位朋友同哥哥曾經近距離相處過, 讚不絕口, 話天皇巨星就算對身邊啲二打六都全冇價子, 好人一個相當難得. 

紅色高跟鞋 (我第一次見男人著高跟鞋, 係喺德國柏林 👀)

上海食力

上星期二, 終於可以親身到訪 LV 上海嗰隻鐵皮船 [路易號], 上艇食個漂亮飯.  

個人覺得隻船外觀奇醜, 好彩只係臨時建築下年就拆, 當地朋友話唔知係咪咁啱得咁橋, 自從隻 [路易號] 落 "地", 上海市區一落大雨就不停出現大水浸, 之前唔會個喎 😆 

餐廳訂位食飯可免排隊參觀埋 LV 展覽館, 瀨都瀨嘞, 又唔使錢, 順便睇埋吧  (車~~ 去到根本都冇人排隊 😂 ). 

LV 在線客服建議客人用餐前預留 30-40 分鐘時間參觀展館, 我專注力缺乏, 諗住快閃 10 分鐘打幾個卡就算, 點知入到第三展廳 "溯源 The Origin" 門口, 就比個靚女導賞 mark 實, 落力介紹啲 LV 古董篋淵源.  

心諗, 大鑊喇, 實有排玩 😬  同場成 30 幾人, 為何偏偏選中我?!  打算同靚女講, 我其實喺 LV 做過 10 年對品牌非常熟識, 叫佢過主搵第二個, 但咁講又好似唔係幾好, 辜負人哋一番熱誠. 

結果最後乖乖聽晒女導賞對幾十隻篋逐一介紹, 仲同佢互動交足差不多 30 分鐘戲, 算係咁 lu 掛. 

哎吔, 比個展覽殺個措手不及, 搞到大遲到, 嗱嗱林跑上 3 樓餐廳, 好彩朋友仲未黑面 😛 

餐廳疑似係郵輪主題設計, 不過成世人未上過郵輪, 所以都唔太肯定. 又或者呢啲就係而家所謂嘅 "潮奢" 風格?  哈, 咁我一定唔潮啦, 因為我覺得餐廳環境同氛圍其實好老餅, 仲係阿伯嗰隻.

可幸員工服務同食物水準相當一流, 俾到真正 fine dining 質素, 呢間係去過嘅 LV 餐廳中 (巴黎.曼谷.上海) 至全面 ok 嘅. 

去得 LV 食大部份人主要目的都係打卡, 咁呢方面應該冇客人會失望, 因為枱面杯碟碗筷都印滿 LV monogram, 連飲酒侍酒師話隻杯都有得揀 : 刻晒 logo 款同冇 logo 嘅正統酒杯, 咁梗係嚟個 LV 全套沉浸式體驗啦.

因為主打飲酒, 我哋只係叫咗少量食物:

1) 魚子醬牛油果吞拿魚 TACO - 巨好味 ! 

2) LOUIS HAO 路易號 鯛魚薄切 - 味道屬正常發揮, 但擺盤就真係靚到無話可說 💖

3) 帝王蟹意粉 - 叫嗰陣冇乜祈望諗住都係意粉一碟, 點知成晚最驚艷原來係呢個, 意粉掛滿由蟹熬製嘅濃汁, 鮮味滿溢, 啖啖帝王享受.

4) MONOGRAM 義大利餃 - 牛肝菌菜肉餃, 綠色 monogram 餃皮蒸到變晒形有啲樣衰, 但中西合壁嘅味道又竟然得喎.

望見隔離枱食緊 LV 暗花造型法式甜點, 靚到不得了, 可惜我哋都唔係甜食鐵粉所以冇 order, 臨走前走去甜品 counter 打個卡當食咗.

台北食力 (II)

台北週日下晝食完日法創意料理, 按吓腳唞幾粒鐘, 好快又再出去 [香色 XiangSe] https://www.facebook.com/xiangse/?locale=zh_HK  繼續食食食.

[香色] 位處博愛警備管制區嘅一條巷弄裡面, 出發前上網踩線, 見個地方 rustic 裝修有啲似歐洲老宅, 好期待. 

我哋 7 點半到達, 落車一望佢個殘破門面, 已經心心眼 😍😍😍  

穿過石子路庭園, 餐區昏黃燈光氣氛神秘優雅, 古董掛毯加埋啲道具擺設, 幻覺自己去咗歐洲. 後來得知餐廳老闆原來係開歐洲古董傢俱店嘅, 唔怪得有咁多靚嘢啦.

大頭仔主廚 Steve, 三十出頭, 曾經喺番邦頂流餐廳學廚, 煮嘢食同擺盆賣相都有番兩吓散手.

西式料理帶點南洋 + 藏族風情 (奇怪組合 😆), 11 道菜 dinner tasting menu 算番港紙每位一千有找, 一啲都唔貴.  

網上圖片

除咗食得好, 整個用餐過程確實相當有儀式感.

Chef 搵插畫師 friend 根據自己靈感作畫 : 今次係佢老婆藏族家鄉主題, 再搵印章公司做不同印模, 每枱一張空白咭紙, 每上一道菜 waiter 就會喺咭紙扱一個唔同顏色嘅印 (當然有解釋用色嘅意思, 不過我國語屎聽唔明), 印印印層層疊, 食到最尾就會組合成一幅西藏風景畫.  呢個 idea 幾特別, 要俾贊 👍

當晚另一彩蛋, 就係招呼我哋枱嘅其中一個侍應, 識講啲唔鹹唔淡嘅廣東話, 原來佢老豆係香港人 😀.

揸流灘 : 因為啱啱唔覺意食咗個大早餐, 喺超飽嘅情況下, 要再仔細描述每度菜, 真係有啲難度 😆  總之成晚 [香色] 冇一樣嘢唔好食啦 !