| Marky 當年都要出嚟拋頭露面 😆 |
唔知有冇人留意到呢個 blog 嘅標題 : [ 我除咗騎馬同飲酒, 就係賭馬 ] 呢 ? 估唔到而家整整吓, 好似只剩番飲酒.
Marky (隻馬) 兩年前仙遊, 自此決定掛靴, 馬場 (騎術學校) 由每星期去 3-4 次, 變成每月 3-4 次, 最後, 每年 3-4 次.
比起十幾年前, 香港真係少咗好多人騎馬, 以前週末個個爭崩頭連 waiting list 都幾百人, 淪落到近年冷冷清清小貓三四隻. 生意不景學校苦撐多年, 可惜最終都頂唔住, 月尾關門大吉 😱😱😱
得知呢個消息, 喊唔出, 但好無奈, 話晒個地方俾咗我 18 年美好回憶, 不但遇到個好教練, 一隻好馬 (Marky), 仲認識到班志同道合 (騎馬, 飲酒, 賭馬) 嘅馬友, 大開眼界目擊勁多奇人奇事, 見識過乜嘢係 身高 / 禿頭掩眼大法 😂
話說當年, 成日喺馬場見到啲後生女心心眼望住啲麻甩佬騎, 因為啲佬無論喺地平線上個樣點衰, 就算又矮又冇頭髮, 只要戴上頭盔, 著對長靴, 攞條馬鞭, 一擒上馬跳幾個欄, 就會 magic, 立即變 "型" 😆😆😆
雖然個場比起馬會同香港啲鬼佬騎術學校唔算乜高級學府, 但至少夠 raw 唔作狀, I like 💞早幾日趁馬場休息, 打算到此一遊, 最後回顧 say farewell 😩.
唉......
去到望住啲馬, 馬房, 吉場同以前自己曾經時常出沒嘅角落, 一草一木一事一物, 都將會好快消失, 百般滋味 😩😩😩.














