啱啱TVB東張西望, 訪問港產女小丑, 勇奪第30屆世界小丑錦標賽全場總冠軍嘅Ashida.
佢又跳又笑, 話點樣去將啲快樂同歡笑帶比人, 轉頭影住佢去到間幼稚園, 兩三吓功夫, 就嚇到兩條細路喊晒.
可能鏡頭影住, 落唔到台, 跟住佢夾埋啲老師, 將嗰兩條細路搬埋一角, 迫佢哋同自己近距離接觸. 我見個小妹妹一路用紙巾抹眼淚, 一路被迫接住小丑比佢嘅氣球, 仲要喊住咁講唔該. 真係慘冇人道!
之後佢仲懶有心得, 話要同受驚嘅小朋友講嘢, 要有眼神接觸, 又要唔好企得高過佢. 超~ 話明驚, 就係驚啦! 你做乜姿勢都冇用. 唔通撞鬼, 隻鬼趴低身唔高過你, 你就唔驚喎?!
講起小丑, 我都有童年陰影.
我十幾歲嗰陣, 同friend 喺灣仔集成中心間麥當勞門口行過, 點知比個扮麥當勞叔叔嘅人跟住, 嗰條友見我哋驚, 仲特登追住我哋尾跑到商場樓上嚇我哋, 變態!
嗰陣我哋純情, 淨係識走冇聲出, 比着而家啲後生女, 仲唔問候佢祖宗十八代, 揼佢一身?
Pierrot Love 小丑畫系列, 80年代好興, 同我咁上下年紀嘅人一定見過. 但當年自從比麥當勞叔叔嚇親, 我就好怕小丑, 所以當身邊同學用住呢啲小丑文具系列, 我覺得好恐怖. 不過而家睇番, 原來畫得幾靚.
