高下立見

舊工轉新工之間嘅三個禮拜空檔, 諗住狂騎馬, 特訓減肥, 點知幾乎日日落雨, 計劃完全泡湯不特止, 最大鑊係日日喺屋企百無聊賴, 好自然會不斷諗住食嘢. 簡直係意志本能大激鬥!

放假期間, 打算做好多嘢
1. 睇晒一本 600 幾頁嘅 wine encyclopedia; 
2. 自學拉丁文 ( N 世前買咗本Teach Yourself Latin 書);
3. 練習烹飪;
4. 抹吓架一月尾之後完全冇清潔過嘅車.

結果
1. Wine Encyclopedia 睇咗 40 頁, 太悶, 放棄.
2. 本拉丁文書, 實在太催眠, 每次睇唔夠 3 頁已經瞌著, 一共睇咗 9 頁.
3. 跟網頁整咗個越式椰菜雞沙律, 都唔好食嘅!
4. 車抹咗.

呵呵, 只係做到一樣, 我嘅執行力實在太差喇.

點唔想, 始終都要面對
前日, 終於返新工, so far so good, 個 office 雖然遠, 環境同同事都 ok, 最重要係 5:30 就放工, 太好喇!

呢間公司同我上一間都係意大利公司, 唔知點解會差咁遠.  我意思係大家都係 "意粉", 呢間比上間 organize 同 efficient 好多!

上間公司, 我返工齋坐咗 3 日, 都未有電腦電話用!  呢間就乜都準備好晒, 竟然連咭片都印好.

除此之外, 員工福利比起上間公司, 簡直可以用 "豪" 字去形容.  
買牌子有 staff discount 外, 每年仲有 clothing allowance, 不過要過 probation 先用得.  點知老闆知我要出 trip, 同 HR 講, 叫我去舖頭攞個袋同對鞋用住先.

今日下晝落咗舖揀咗呢兩件貨, 都幾靚㗎!

白馬王子

收到風, 今朝有電視台嚟學校拍嘢, 同班師兄仲會係被訪對象. 即刻借意 book 堂騎馬, 乘機八吓.

一度傳出係陳淑蘭嚟做訪問, 原來係流料.

End up 嚟咗個個樣幾 sweet 嘅後生女, 仲正啦!  後生啲又fresh 啲,  騎上隻馬度吸睛過蘭子好多.  佢人仲幾有禮貌, 同佢打招呼, 佢都微笑 say hi 應番你.

呢個靚女幾大膽, 上馬一啲都唔驚, 一路 roll 機, 馬場旁邊地盤有部挖泥機 "硼硼" 聲嚇到隻馬扎扎跳, 佢都全冇恐懼之色, 好嘢!

示範完騎馬, 跟住戲肉係訪問校內 3 位同為 <專業人士> 嘅男馬友.   唔好以為好易搵, 其實香港騎馬嘅大部份係女人, 因為騎馬係一個要好有 commitment 同長時間作戰, 先會有成績嘅活動. 男人要搵食, 又要顧家 / 溝女, 邊有時間!   就算過到時間同金錢兩關, 但冇體能, 一樣唔掂. 

所以呢, 嚟得打躉嘅男士, 都係非等閒之輩.   

訪問內容都幾搞笑, 除咗 "騎咗幾耐", "點解學騎馬" 等一般問題之外, 就問佢哋有冇 "因為識騎馬而喺溝女方面無往而不利", "會唔會想好似馴服啲馬咁馴服埋啲女人",  3 個男人都結晒婚, 你叫佢點答!

中間雪白美腿嗰個就係導演

唔玩得

http://programme.tvb.com/variety/theconquerors/

以前做嘢嗰陣, 好少星期日晚睇電視, 因第日要返工, 無謂浪費精力睇埋啲無聊節目.

尋晚整嘢整夜咗, 順便睇吓 TVB 套之前勁 sell 同一般遊戲節目與別不同嘅 <快樂聯盟>.

唔睇尤自可, 一睇勁扯火.

成個 show, 簡直就係 politically incorrect 嘅實證 :
一班唔適當嘅人  +  喺唔適當嘅場合  +  做唔適當嘅事
極度荒誕愚蠢!

港鐵 MTR, 竟然可以比班歌星喺佢哋核心地帶搞搞震, 蒙眼拉龍入總控制室 wee哇鬼叫玩埋啲低級遊戲, 仲喺九龍塘車站廣播系統開咪發噏風.

我諗可以思考嘅人, 都會比眼前嘅景象嚇親!
睇到呢度, 覺得好反感, 一啲都唔 interesting, 完全唔可以繼續睇落去, 爆粗熄機.

如果港鐵 PR 諗住咁嚟提高 MTR 嘅透明度而更得民心, 我想話佢知 : 超錯!  

若然你係長隆水上樂園, 或者雅居樂花園, 搵班藝人做吓特輯, 絕對 OK.  堂堂一個公共運輸機構, 成個冇醃雞籠, 任人自出自入.  咁兒戲, 唔怪得近來事故不斷, 鑊鑊新鮮鑊鑊甘.

個節目仲要揀正而家呢個風頭火勢嘅 perfect timing 出街, 呢班 '天才' 真係抵比人小!

如果民航處有樣學樣, 又嚟個 TV show, 比班藝人去機場控制塔噤吓制, 玩吓.   咁就真係要講句 : Good Luck! 天佑我們了.