上周末, 報紙睇到 <香港 - 上海> 航班連環超級大 delay 新聞, 心中不禁一寒, 因為過幾日都要去上海一趟, 辦啲公事.
啲會 schedule 到 5pm 完, 其實應該過多晚夜, 第朝先飛.
但諗起香港有好多屎等住執, 懶勤力, book 咗即晚 7:40pm 機返歸.
當日仲奢想搭早幾班機, 急口令講晒啲嘢, 3 點幾就走人, 去到機場都係4 點半. 點知...... 喺 check-in counter 先知航班大擠塞, 連原本 2:30pm 嗰班都仲未起到飛. 唉也, 不妙...... 計埋呢班, 仲有成 6 班機先輪到我嗰班, 實有排 delay 喇.
上海浦東機場冇腳底按摩, 唯有去泡 lounge 啦. 入到去人頭湧湧, 好彩眼明手快, '笠' 到個有網上嘅位, 無限上網.
喺等候啲 delay, delay 又 delay 嘅消息嘅時候, 實在太無聊, 我不斷飲食, 走出走入攞吃, 至少劈咗佢 1 支半白酒同成打餃子, 盡顯港女本色.
等到 11pm, 悶無可悶, 離開個 lounge. 出到去, 啲舖頭閂晒, 走投無路, 就坐喺登機閘口大覺瞓.
00:45am 終於可以上機, 呵~ 仲 upgrade 埋添, 今次你仲唔死? 一路睇新紮師兄, 一路飲晒你啲香檳!
不過, 返到香港已經係 4am, 攰死!
尋晚黑色星期五, 喺屋企會所約埋啲馬友酒友 cross over, 請咗四川美女 (馬友個 friend 嘅賢妻) 到會, 親自下廚, 搞四川私房菜.
美女好 organized, 事先 send 咗需要預備用品嘅 list 比我 (下圖).
噢! 真醜! 原來屋企除咗鹽同豉油, 乜都冇!
鑊, 煲, 生油, 糖, 生粉都要問阿媽攞.
 |
| Preparation checklist |
菜單有成 13 道菜, 有啲係涼菜, 可以預先做好. 其餘即場烹飪, 我哋一路食, 美女一路煮.
唔知點解, 平時無辣不歡嘅我, 竟然覺得啲嘢好辣辣辣辣辣辣.....
食第四道菜 '麻辣牛肚'已經頂唔順, 條脷辣到痺晒, 飲乜酒都覺得冇味.
最神奇係平時一啲唔係咁食辣嘅朋友, 竟然大啖大啖咁食!
唔通我條脷變咗?!
好戲在後頭
差不多 10 點, 正當各人酒酐耳熱之際, 會所啲人話夠鐘要交場, 好鬼掃興!
不過全場最㷫, 應該係我, 因為啲清潔工 'gee gee 疙疙', 話我啲沙煲冷橕阻到佢哋洗嘢. 妖~ 搞到我要即場洗晒啲油淋淋嘅鑊同煲先走得. 對住個鋅盆一路洗, 聽住外面啲人嘻嘻哈哈, 突然覺得自己好似灰姑娘.
洗完後表演變臉, 當眾大發雷霆, 發晒脾氣, 話乜 Q 都唔要! 𨂽晒啲煲!
其實今朝諗番, 又唔係好大件事, 但唔知點解當刻又真係覺得好嬲, 十成十係發酒癲, 冇品冇 EQ!
不過尋晚發洩完, 而家又覺得幾舒服嗰喎.
上禮拜大陸地獄之行終於結束, 先唔好講飛機 delay 呢啲衰嘢, 連跑 6 日, 真係人都巔, 臨尾嗰兩日, 攰到連眼都矇埋, 睇唔到嘢.
同行有一大班人, 其中兩位公司女同事, 係頂級工作狂.
尤其我隻馬, 簡直 '人機合一'!
任何場合, 總之雙眼可以向下望, 兩隻手可以揸住個 iphone, 佢就會不斷寫或者覆email, 超強.
好彩夜晚佢都仲識得食嘢, 唔係我就真係好大壓力.
由成都去天津, 喺機場冇嘢做, 用廿蚊人仔買咗本大陸版 Food & Wine, 諗住上機刨吓. 哈, 點知咁啱有天津飲食特輯, 太好了!
根據本書介紹, 揀咗兩間靚啲嘅餐廳, 點知打去一間比人包咗, 另一間休息唔開, 唯有去間 local 嘢啦, 照睇篇嘢嘅形容 (上圖) : 四合院, 文化氣息, 小橋流水, 魚兒漫游.... 好似 ok 卦.
點知去到, 笑爆咀!
原來 '小橋流水, 魚兒漫游 ' 就係呢啲.
 |
| 小橋流水, 魚兒漫游 |
 |
| 恐怖田雞 |
我哋包咗間房,枱中有個大鑊, 喺魚枱 order 啲魚, 跟住就有個阿姐入嚟喺我哋面前煮, 都幾有風味.
一路食一路諗, 寫稿條友真係吹得, 又乜顧問, 乜把關...... 呢間簡直完全就係地痞餐廳啦!
 |
| 魚枱 |
