我唔係 Charlie

呢個 <我係查理> logo 係人都識.

喺呢單 Charlie 爆鑊嘢後去巴黎, 自己唔係太驚, 不過周圍啲人好緊張, 話最好唔好去, 去到都唔好周街走.

Hotel de Ville 市政聽

唉...... 駛咁多錢, 飛十幾個鐘, 去到唔通俚喺酒店睇電視咩?  就算係酒店, 啲恐怖份子都可以用架飛機撞落嚟啦.

唔去敏感地帶?  
班 IS 喪嘅, 邊度先安全呢?   所以我決定街照行, 嘢照食, 有乜事, 執生吧! 

巴黎同平時一樣, 只係喺市中心猶太區多咗啲荷槍實彈嘅軍警守衛.  

唔理喇, 最緊要食咗我至愛嘅鴨脾先, 呢間 au Petit Fer a Cheval (馬蹄鐵) 餐廳嘅鴨脾簡直一流, 外皮甘脆香口, 內裡肉嫩多汁, 香氣撲鼻, 真係好食到要講粗口!  餐廳就喺我以前住嗰條街後面, 夠晒想當年.

Cuisse de Canard 鴨脾 - Au Petit Fer a Cheval

臨走前一日, 行完 flea market, 決定去食海鮮併盤.
原本想去以前章小蕙同陳耀旻幽會比人影到嗰間 La Coupole, 不過諗落嗰度太老態, 所以轉呔去咗會旺啲嘅 au Pied du Cochon (豬腳).

噢, 果然係明智嘅決定!  
嗰度氣氛熱鬧, 充滿巴黎情調, 隔離坐咗個阿伯, 喺度自得其樂, 好滋味躪 (豬) 腳趾. 

我哋 order 咗個冇蠔嘅海鮮併盤, 嗰啲鮮味甜味海水味, 縱橫交錯, 連我呢啲冷感晒嘅老薑都撻得著!
再下一城, 整多隻豬腳,  加個 Napoleon (les milles feuilles) 做甜品, 正正正正正正正正正正正正正正!

au Pied du Cochon

真威尼斯

Venice view to Rialto

成 10 年冇去過威尼斯喇, 舊地重遊, 發現澳門威尼斯人真係抄得好似, 只係真威尼斯啲建築物殘舊好多.

旅遊淡季, 除咗周街少咗好多著得懶性感嘅肥/姣婆遊客之外, 就係可以用勁抵價錢, 租咗間歷史建築靚 apartment, 180m2 兩房一聽, 樓底廿呎高, 窗外騎樓下面就係條小河, 啲船來來往往, 好夢幻, 最緊要冇 "污糟嘢' 喎, 簡直超凡體驗.

Venice Apartment

除咗喺威尼斯亂行之外, 我哋仲搭 45 分鐘船, 去咗個叫 Burano 嘅離島, 嗰度啲屋間間五顏六色, 好搞鬼. Burano 又名 lace 島, 上幾次去周圍有啲阿婆周街織 lace, 今次可能太凍, 鬼影都冇隻.

雖然呢次已經係 4 第次去, 但次次帶唔同 friend, 其實都幾有樂趣. 尤其係可以喺 my 非佛嘅Gatto Nero (黑貓) 餐廳食 lunch.

Burano

搵食艱難, 而家 marketing 好緊要.  記得以前去, 同啲阿叔侍應雞同鴨講, 大家都好辛苦先落到單.   

今次入到門口, 阿叔侍應見勢色唔對, 立即 "sip" 咗聲, 叫太子爺過嚟.   太子爺流利英語, 招呼周到, 等位期間, 醒咗兩杯 prosecco 比我哋歎, 真識 do.

叫咗海鮮湯同燒烤小龍蝦, 極度鮮, 真係好味到爆.  餐廳廚師係個老伯伯, 雖然唔識講英文, 都會親自去同每枱食客打招呼, 感覺到佢嘅誠意同對餐廳嘅熱誠.

我哋再叫咗個 tiramisu, 最後仲有免費甜點同 dessert wine, 隊咗成支酒, 埋單每人都唔駛 340 港紙, 咁平, 搞錯呀!

Trattoria di Gatto Nero

樂極生悲

上次講到, 寫完 blog 出街睇醫生, 按腳剪髮shopping 直落, 好得戚.  估唔到, 過唔到醫生嗰關...... 

成日心跳諗住去check 吓, 驗完血, 按埋腳, 搭巴士去中環, 途中醫生打嚟, 話我血色素低要入院輸血, 但佢話佢醫院 (養和) full 咗喎, 我問咁即係點, 等多幾日等到佢醫院有位得唔得, 佢話唔好等喇, 叫我快啲打電話問吓其他醫院有冇位, 有就速速去.  

乜而家入醫院, 要訂位架?!

原本除咗心跳同行得快氣喘, 都冇乜嘢, 聽完個電話, 唔知係咪嚇親, 當堂有啲頭昏腦脹. 
打去 Canossa 冇位, 諗起呢首 "兒歌" :

1+1, 2+2, 3+3, 4+4, 5加皮，6死你，7隻馬騮8條尾，9龍醫院唔收你，10個肥婆澤死你!

哈哈, 打去聖保祿, 好彩有, 6 點半睇完門診同專科, 護士叫我即刻入院, 我話 : "吓? 我兩手空空, 乜都冇, 點入呀?" , 佢話 : "咁你儘快啦, 最遲 8 點好返嚟喇".  
哇, 好趕呀! 要個半鐘內來回火炭仲要執埋行李!

出咗院第朝, 養和打嚟, 話而家有位仲要唔要, 啋~~~

偷閒

過咗兩日天昏地暗,令人不寒而慄嘅日子, 太陽終於出來了.

今朝起身望住個一舊雲都冇嘅藍天, 心諗 : 唔請番日病假, 真係對唔住自己.

而家真方便, send 個 email 比 HR 就可以, 唔駛好似以前咁, 要打電話請假, 連整起把聲扮病都慳番.

今日節目已經安排好, 早上先喺屋企享受吓和暖的陽光, 睇吓電視 (啱啱睇完亞視一年前播過, 而家又再重播嘅變色龍). 食完晏去跑馬地按腳, 順便喺養和睇醫生, 跟住落中環剪頭髮, 之後同朋友去舖頭買 staff discount, 然後飲嘢. 

無聊, 心血來潮網上 search 吓舊老闆個名, 竟然比我發現咗佢喺某土炮室內設計月刊, 客串寫嘅 blog.

佢係我事業上嘅超級貴人, 啟蒙我對美學嘅見解思維, 如果公司冇嘢做, 佢會偷偷放我出去, 周圍練習影相, 跟住交功課比佢睇. 

佢仲令我衝出香港, 發現歐洲新大陸, 預支出糧 (要還), 比我跟佢同屋企人一齊去英國法國旅游, 大開眼界.

當年紅極一時, 得獎無數. 而家佢已經冇做室內設計 lu, 主打開 boutique 做時裝, 話好好賺喎.

http://www.modernhome.com.hk/blog/zh/author/allankwan/