尋日下晝約咗個 potential consultant 喺舊文華 coffee shop 傾嘢.
叫咗杯茶, 由四點開始一路講講講, 唔知做乜春,無啦啦講到大陸, 想話 : "大陸掘起, 而家做設計最好喺大陸開公司, 出到發票收人仔".
點知口快快, 噏咗大陸勃起!
當刻, 真係覺得超級勁尷尬, feel 到成塊面發滾.
對手 (30 幾歲男人) 壇數高. 聽到大陸勃起, 雖然打咗個突, 不過佢竟然可以忍得住唔笑, 面不改容當冇事發生.
跟住嗰半個鐘, 我完全擺脫唔到勃起嘅陰影, 好不用容易, 至捱到埋單.
大家 say goodbye 後我等巴士, 攞塊鏡出嚟照吓, 哇~~~~~~~~ 原來我搽咗唇彩飲熱嘢, 啲唇膏化開晒, 成個 joker 咁!!
咁即係代表條友望住我呢個咁醜同咁驚嚇嘅樣成粒鐘, 都可以頂得住.
好嘢.
尋日公司放半晝, 但同我做嘢啲單位晨早已經收晒爐, 坐咗成個鐘, 一個 email 都冇!
隻馬放假, 老闆又唔喺度, 所以我決定唔好徙時間, 半晝之中再減一半, 十一點走人.
啱啱好, 返到沙田, 可以去中午先開嘅花市走轉, 買花過年.
可能陰天, 覺得花市啲花唔係好靚, 睇極都睇唔上眼, 想買牡丹, 又一支都冇. 鮮花全部都係菊花, 蘭花, 百合, 劍蘭...... 搞好耐, 先拼齊幾束另類啲嘅花.
攬住紮花上的士, 司機𥄫咗啲花一嘢, 問我駛唔駛一百蚊. 我話 : "司機, 你玩嘢吖?! 一百蚊? 廿年前都唔得啦! 紮花成四舊水呀!"
司機跟住話 : "哇~~ 唔怪得我 friend 話以家喺花墟買花, 閒閒哋要六七百啦!"
呢件事令我諗起廿年前嘅農曆新年.
放工同同事行維園花市, 買咗棵桃花, 諗住行吓桃花運, 點知走嗰陣, 成條街啲人都喺度搶的士, 大鑊! 我托住棵桃花, 一路打游擊, 爭咗成個鐘, 去到差不多炮台山, 先截到車.
的士司機好明顯係個 Rock 友 : 長頭髮, 鍋釘黑皮褸, 手戴三隻枯顱頭戒指, 聽 rock 歌.
沿途 Rock 友一路喺倒後鏡望望吓, 但又冇出聲. 差唔多到我屋企, 就話 : "小姐, 有冇聽過桃花依舊, 人面全非呀? 棵桃花咁重, 叫你男朋友托嘛."
真多事, 有仔就唔駛買桃花啦!
返到屋企, 拆開啲包裝, 桃花運就冇喇, 飛彈咗條黑色大毛蟲出嚟! 我最怕蟲, 嚇到我眼前一黑咗三秒, 頂佢!
 |
| 何猷君同老母 |
 |
| 超盈 |
做得賭王身邊嘅女人, 絕對唔會係 LuLu.
而何生同呢啲非等閒之輩所生嘅後裔, 相信必定盡得真傳, 加倍厲害.
喺巴黎機場愛馬仕名店內, 遇見四姨太呢家. 何公子孭住國內同胞外游必備嘅 MCM 背囊, 頭戴 cap 帽, 好不低調.
家姐超盈腳上著住對完全 baroque 風格, 斤兩十足, 勁誇張嘅黑色金線長靴, 好 fashionable 呀!
阿媽就同個四眼阿叔狂掃 SLG 同 accessories 做手信, 應該有成二三十件. 呢單大交易, 店員不敢怠慢, 三個人侍候佢哋. 我哋去完 lounge 再落番嚟, 佢哋都仲 pack 緊.
咁我再睇睇吓都有幫襯, 喺比錢中途, 隔離何家淑女好大聲對住個女 sales FCUK 咗聲!
噢 ~ 原來女 sales 忘記搣走 pack 好咗手信裡面嘅價錢牌.
咁多人望住, 我見 sales 個樣真係覺得好侮辱. 慘!
跟住去到閘口, last call 登機, 何公子發現漏咗嘢喺愛馬仕, 要返轉頭攞,
四太好緊張, 你估何公子同佢講乜??
佢一路走, 一路向住四太嗌 :
"老母 ~~~~ 唔駛緊張喎~~~~~"
果然勁!
