喺呢一年內, 我見識咗好多嘢. 記得 2013 年12月見工嗰陣, 老闆比咗兩個忠告我 :
1. 間公司好亂;
2. 間公司冇乜 politics, 啲人好 friendly, 好似成家人咁.
佢冇呃我, 間公司真係好亂.
亂, 皆因有兩個職位權力相等嘅老闆, 一男一女, 各持己見, 向左走, 向右走, 每天互相大鬥法. 結果玩死同佢哋做嘢班人,包括我.
公司啲人真係好似家人咁, 不過唔係一家, 係好多家. 幾個人一組, 表面冇乜聲氣, 其實楚河漢界, 各施各法.
但係最厲害係, 我學曉咗好多同事口中, 談及公司 / 公事嘅專有名詞, 例如 :
ALIGN - 啲人寫 email 同講嘢, 尤其喺大陸同事, 特別喜歡用嘅字.
意思係處理一啲事嘅時候, 香港同大陸兩地嘅人要夾口供, 以防老闆問起時露出馬腳, 被問責!
THINK OUT OF THE BOX - 呢句咁深嘅英文, 係今年初 kick-off meeting, GM 比大家嘅建議.
意謂 : 做事唔好墨守成規, 要大膽創新, 括出去, think differently.
但眼見公司一路發生嘅事同政策, 我懷疑當日聽漏咗 think out of the box 之前嘅一個字...... GM 應該係講 : DON'T think out of the box 至真.
MISTREAT - 呢句真係金句! 基本上, 隔日就聽到人講.
某同事如果覺得另一同呢 (level) 或高級啲啲嘅同事點佢做嘢, 而佢自己條氣唔順, 但又死死氣做咗.
跟住佢就會開口埋口, 話比人 mistreat.
人情味 - 有 senior grade 人辭職, 原本要 3 個月通知, 但佢想割禾青, 早個半月走, 公司唔肯, 一定要佢補足個半月錢走人.
佢好嬲好唔高興, 話公司完全不近人情. 話鬼佬老闆知道佢辭職, 一啲表示都冇; 亞洲人女老闆就唔同喇, 立即慰問佢, 仲話要同佢食飯, 好有人情味喎. 我覺得條友脫離現實, 自私兼幼稚, 淨係要自己攞著數.
公司點解要冇條件比你早閃? 點解老闆要同你食飯, 慰問吓你係咪做得唔開心要走?
戇居!
