都話公司冇秘密㗎啦

上年11月底 "繡花拖鞋" 被炒, GM 喺攤牌嗰日同佢做咗場大龍鳳, 兩個女人 '瞇' 埋喺 conference room 成 3 粒鐘, 愈講愈傷心, 聽講話 end up 搞到大家相擁, 抱頭痛哭咁誇張.

當時心諗, "繡花拖鞋" 喊, 明嘅 ...... 一路以為自己好巴閉, 平日對人呼呼喝喝, 突然被炒當刻嘅震驚 + 徬徨 + 羞辱 + 憤怒, 真係好難接受架. 

但炒人嗰個 GM, 你又喊 ?! 喊乜春 ?

跟住, 恍然大悟, 因為 GM 住港島區, 一定有經過跑馬地馬場後面個 St Michael 天主教墳場, 留意到門口 <今夕吾軀歸故土, 他朝君體也相同 > 對對聯. 

GM 喊, 應該係怯, 心靈感應到懷中淚流滿面嘅 "繡花拖鞋" , 內心深處嘅一鼓怨氣 : < 今天我被炒了，並沒有什麼大不了，明天 GM 你被炒的時候, 也會和我一樣 >.

同埋唔好唔記得, "繡花拖鞋" 對拖鞋係紅色, 佢好猛㗎 GM ~~~

事隔數月, "繡花拖鞋" 果然堅猛, 顯靈, 返嚟攞債. 尋日突然收到可靠消息, 老闆決定炒埋 GM !  

可笑係 GM 而家身處意大利出緊 business trip, whatsapp share D 同老闆同枱食飯嘅相, 得意忘形之際, 身旁老闆原來密謀緊隊冧自己 !

最最最可笑, 係佢自己一啲都聞唔到𤓓味, 而香港呢邊都已經有某啲人知, 包括我.

都話公司冇秘密㗎啦.