Horsey is fun: 2018

2018年12月25日星期二

一啲都唔簡單

就快踏入 2019 豬年, 係時候睇吓 office 流年風水.

來年公司大門同領導層位置恰巧喺五黃二黑全年最差方位; 啲好位就比二打六坐晒, 加上是非位喺正大門入口條走廊, 同事日日川流不息, 想掂都難.

加上覺種其他因素, office 2019 年飛星評語係 < 值得擔憂 > 同 < 差到可以做風水教學 case study >. 師傅話同我熟先講咁白, 如果有其他同事在場就未必, 因為唔係人人接受到.

最爆笑, 佢同我講幾乎每個高層 ( 包括我 ) 都問下年轉唔轉得成工 😂😂😂 可想而知, 公司情況係幾不堪. 呢啲, 真係唔可以比老闆聽到囉 😭😭.

learn & try to remember

同師傅食 lunch 講起佢成 " 師 " 之路, 話當年演藝事業發展平淡, 剛好認識到 " 馬尾 M 字額 " 肯收佢為徒, 學習期間得知風水術數原來有超多嘢記, 所以報讀好多訓練記憶嘅 courses 去加強記憶能力.

Jim Jim

學成試執業, 發覺自己原來唔鍾意 / 唔叻 / 亦都唔識講嘢, 好大鑊 ! 咁啱理工有 Jim Jim 教嘅課程, 讀完一個又一個, 交咗十幾皮學費, 先提升到自己成為一個可以自然流暢表達嘅人.

師傅今時今日嘅業績, 一個月 28 日唔 do 淨係 heah 睇兩日風水, 都已經可以搵到十幾皮, 回晒本有凸啦.

香港懂風水嘅人 N 咁多, 但識武裝自己去殺出一條血路嘅, 冇乜幾個.

2018年12月22日星期六

公司喜療妥

終於喺本月 3 號, 成功炒咗隻馬.

唔係有舖炒人癮, 而係公司以前實在請埋太多廢柴, 個部門有成隊兵就話可以隻眼開隻眼閉啫, 而家連埋自己都係得 3 條友一年開 30 幾 40 間舖. 隻馬成個植物人咁, 踢一踢郁一郁, 吓吓都要人開聲先識 action, 仲要好多甩漏做錯晒.

日日比佢拖我後腿, 咁落去唔得啦.

仁至義盡, 佢 12 月 1 號生日, 根本十一月尾已經可以 K.O. 佢, 不過我都叫 HR 等佢過埋個 happy birthday, 3 號先派信.

HR 話佢收信嗰陣冇乜反抗, 只係想攞番公司個手機號碼自用, HR 當然 say no 啦, 點知幾日後問佢攞 password 開機, 竟然玩嘢唔比喎, 哈 ~ 咁緊張部手機一定身有屎, HR 問我點, 我話 : 洗 Q 晒佢啲嘢, reset 部機比新人用 !

好戲在後頭, 佢個 email account 我而家可以 fully access. 哇, 原來自從上年 9 月公司由 Lotus notes 轉做 Outlook 後, 有史以來所有出入電郵佢完全冇管理, 連啲 junk mail 都 keep 晒 !

最精彩, 就係佢喺每日收嘅公事 email, 原來唔超過 15 個, 仲要其中兩三個係 from 我嘅. 回覆呢 ? 最多 4 個 !!! 跟住就惡性循環, 好似比大耳窿追數咁, 日日收比人追佢覆佢唔答嘅 email.

平日 office hours 埋頭埋腦, 然後晚晚開 OT, 究竟喺度做乜呢 ? 睇埋落去就知.

基本上, 唔計啲 junk mail 佢每日 incoming mails 分類如下 :

40% 旅行社宣傳 / 酒店訂房 / 旅遊會藉月結
20% 自己 free-lance ( 設計咭片, event 場地佈置 )
10% Manchester 地產樓房買賣信息
10% 各種亞太所謂高級管理層 summit / conference 嘅 invitations
10% 朋友聯誼聚會
10% 公事

真係冇誇張, 公事原來只佔 10%, 簡直離晒大嫂 ! 如果早知佢正職係旅遊達人, 根本就可以唔駛賠踢佢走啦 !

不過啲錢係公司又唔係我嘅, 有錢炒人冇錢加人工, 咪當公司當年冇帶眼識人, 而家買個教訓囉 😂

2018年12月15日星期六

台北裝置藝術

巨型風鈴 (現有)

前日喺台北 101 附近開完會, 冇事幹, 迫隻馬同我過隔離 Grand Hyatt 𥄫嘢. 𥄫乜 ? 𥄫佢啲 < 裝置藝術 > 囉.

台北君悅貴為全球 10 大猛鬼酒店, 舊公司同事半夜聽到怪聲, 但好僥倖, 我住嗰幾次乜鬼都冇. 話雖如此, 每次見到 car drop-off 天花巨型風鈴同電梯口左右嗰兩度符, 都會不寒而慄.

電梯兩度符 (之前)

難得酒店多年堅持, 死撐係 < 裝置藝術 >.

大佬, 咁明顯, 唔識寫符都知呢條係符啦, 仲要咁大條.

聽聞近年 < 裝置藝術 > 隨着酒店御用大師仙遊而失效, 所以 < 裝置藝術 > 亦因應作出改動, 兩條符不見了, 取已代之, 係一個像真度極高 1:1 真人比例嘅食蕉 ( security guard ).

食蕉 (現在)

呢個食蕉擺設同四周環境格格不入, 真係怪到一個點 !

雖然酒店將佢 present 成一件藝術品, 仲擺埋 artist 水牌喺旁邊, 但我覺得成件事根本非常牽強, 好夾硬嚟.

2018年12月5日星期三

雪梨揼骨

上次去 Sydney 發現 Qantas lounge 裡面竟然有個 spa, 可惜唔夠時間試.

今次提早啲去, 終於得嘗所願, book 到一 part 咁多.

呢個 spa 唔係普通就咁搵間房, 比你坐低, 剩係按吓膊捽吓腳嗰隻, 佢係一個堅嘅香薰水療, 有 10 種每 part 廿分鐘 treatment 可以揀, 仲完全免費.

幾日嚟行咗好多路, 最想 foot massage, 但去機場前因為實在有太多時間, 所以喺沙灘走咗轉搞到成腳沙. 都係做 ' 頭頸肩 ' 算喇, 費事浸腳嗰陣泡出成盆沙嚇親人.

入到房, 有張床. 趴喺度聽住柔和音樂, 一路比外籍靚女用香薰油推背, 真係正到冇朋友 ! 20 分鐘實在太短唔夠喉, 不過識貨之人多的是, spa 已經 fully book, 冇得加鐘啦.

Relax 到爆, 按完上機從來未試過可以咁熟睡, 瞓到唔願醒嗰隻.

2018年11月25日星期日

CX vs SQ

驛馬繼續星動, 北京飛新加坡, 因飛行時間超過 6 粒鐘, 公司皇恩浩蕩比坐 business class. 今次有幸搭乘 SQ ( Singapore Airlines ), 星航被譽為亞洲最佳航空, 真係非常好奇, 佢有點好.

飛行生涯真係好悶, 最鍾意食飛機餐消耗時間. 上 SQ 網睇佢啲餐乜料, 哇 ! 厲害, 原來可以 < BOOK THE COOK > : 中 / 西 / 新加坡料理 16 款菜任選其一, 驚死蝕底, pre-order 定個 Laksa 試吓先.

< BOOK THE COOK > BANNER

上機當日完全忘記咗訂餐嗰回事, 望吓餐牌, 唉吔 ~ 做乜剩係得早餐㗎 ? 生果麵包乳酪 muesli, 全部我都唔食 😩

正當想等空姐行過同佢講聲唔駛 serve 我早餐之際, Laksa 已經送上. Oh, Laksa ! 差啲唔記得, 我訂咗個 Laksa 添 😎

早餐冇嘅 LAKSA

可惜, 碗 Laksa 嘅味道同溫度, 令人失望, 不過比起個早餐, 必定好咗 N 倍.

不得不讚空中服務員, 極度話頭醒尾, 例如 : 比件衫佢掛, 唔會要你摷個 boarding pass 做識認, 而係佢自己用紙 mark 低乘客資料, 再放喺衫袋. 同埋空姐 top up 香檳速度一流, 全程機冇乾過塘. 除此之外, 我發現佢哋同乘客對話, 無論大小事務, 一定用好 firm 嘅眼神, 呢個 CX 冇囉.

話雖如此, 都唔係 SQ 威晒. 論機倉新舊, 燈光, 坐位設計同私隱度, CX 其實唔駛輸.

THE MENU 餐牌

幾欣賞 CX 近期長途 business class 新推出嘅 < The Menu >, 唔駛再好似以前咁要 heat 好晒所有食物, 擺喺手推車上面推嚟推去比客揀, 浪費食物之餘又唔衛生.

而家 made to order, 食乜先整乜, 頭盤主菜飲料一次過送到埋坐, 仲轉埋用圓形陶瓷碟添, 如果攞走個托盤, 淨係見塊白枱布, 成件事簡直係直逼 first class ! 😂 唯一分別, 係 first 有魚子醬食同埋落單時可以 precise 埋上菜時間.

Wonton noodle in soup

Chicken in sesame dressing & glass noodles

Pork congee with noodles

2018年11月11日星期日

北京的北歐

馬不停蹄, 星期五啱啱上京做嘢, 天氣超好, 零污染一舊雲都冇, 但有啲凍.

一落機行李未擺低已經要立即趕去工地, 開會期間不慎吸入燒焊氣體, 搞到心翳. 工程進度毫無起色, 負責人又愛理不理, 妖 ! 好㷫.

好大陣怨氣, 就算鼻塞都聞到, 啲人見勢色唔對, 提議儘快離開工地, 放飯. 呵, 當刻先猛然醒起, 早餐直踩 8 粒鐘未食過嘢, 唔怪得咁燥啦, 原來肚餓......

放工時間遇著塞車, 6:30 上車, 兩公里路要行差不多成個鐘, 7:20 先到.

Restaurant Exterior

呢間 Georg Jensen 開嘅 " The Georg " 早前已經想試, 點知突然關門. 最近重開, 因怕佢又再曇花一現, 今次抓緊機會仆到去.

餐廳坐落地安門東大街一條小河旁邊, 雖然喺市中心, 但周邊環境出奇地寧靜.

Very Stylish Directory

未去過, 唔知間嘢得唔得, 不過見到門口個咁有型格嘅水牌, 就知今次冇揀錯 😂😂😂

Atrium Skylight

餐廳由四合院改建, 分酒吧, 餐廳同 private room 幾個部份.

超高樓底玻璃天窗下嘅內庭, 空間感懾人.

Sitting area in Private Room

Library in Private Room

Our table (so elegant before seated 😂😂😂)

Minimal tableware & decoration

其實我懷疑間嘢唔知係咪真係做生意, 據觀察 ( 唔計嗰一千零一間 private room 同酒吧幾張枱 ), 咁大個場, 坐滿都只係坐到 32 人.

黑掹掹, 浪漫之餘仲好有氣氛, 四周都係一 pair pair 情侶. 而我哋呢班老粗, 竟被安排喺房間正中央打晒燈嘅 signature table, 呢啲正一係 " 擺上枱 ", 做乜都比人睇晒, 醜態完全無所遁形 😆😆. 枱面擺設北歐簡約, 乾淨俐落, 全部 Georg Jensen 產品.

The Menu

諗住咁嘅格局, 實比人掠一頸血啦. 我錯喇, 佢哋所有菜色菜一律 130 人民幣一碟, 真係抵到爛.

The Georg 主打北歐菜, 味道不但有驚喜, 精美賣相更加係 IG 恩物.

我食咗 < 西洋菜伴鰲蝦 >, < 魚子醬帶子 >, < 紅加倫乳鴿 > 全部超好味, 而家諗起都回味無窮 !

同枱啲佬食生蠔食得好 high, 話撈埋隻生鵪鶉蛋簡直 " 超讚 ", 啪完一隻又一隻, 咁補, 似乎係為飯後更精彩嘅夜生活作好準備 😂 唉吔, 快啲閃避返酒店先, 唔阻人 happy 喇.

Beautiful Scandinavian Dishes

2018年11月5日星期一

淋花神器

呢排大驛馬, 狂飛, 屋企冇乜 cash 唔怕比人爆格, 淨係成日心掛掛, 擔心騎樓啲花草.

短 trip 冇問題, 啲草冇水都捱到兩三日, 最慘係有幾次飛一個禮拜以上, 返到屋企見到啲極度乾枯, 樹搖葉落, 瀕臨死亡邊緣嘅植物, 心痛之餘亦覺得好內疚 😲.

屋企位置比較隔涉, 唔想叫人特登上去淋花, 但慘劇亦唔可以再發生. 想盡辦法, 搜尋自動灑水, 可惜市面淨係得農場同球場草皮大水炮, 家用嘅, 其實係冇囉, 仲話香港乜都有.

幾經辛苦, 喺花墟搵到啲所謂自動滴水器, 以為有救, 點知適得其反比佢冼, 啲花死得仲慘. 真係想講 : 明知自己產品流, 就唔好誇大其詞去害人啦, PK !

有盆新寵 ' 紫雪花 ' , 七月買返嚟嗰陣好靚, 啲花開完又開, 點知九月中比 ' 山竹 ' 打殘東歪西倒, 如果再唔護理, 死硬 ! 跟住要出長 trip, 無論如何一定要處理呢個隱憂, 不斷喺淘寶搜索, 我唔信搵唔到我想要嘅 😠 !

神器

好彩摷咗陣, 比我找到淋花神器, 連運費都唔駛兩百港紙, 速速買. 神器其實係個可預先設定淋水時間 ( timer & intervals ) 同長度 ( duration ) 嘅方盒, 可 USB 或電池運作.

出 trip 前

法國搭機返嚟嗰陣諗起屋企啲植物有啲心寒, 唔知會唔會死 Q 晒呢 ? 打開大門除鞋後, 第一時間仆去騎樓睇吓啲花死得未, 哈 ~

出 trip 後

紫雪花爆放 🎉🎉🎉 好靚.

淋花神器, 多謝晒 💖

2018年11月4日星期日

One night in Bangkok

曼谷有間好巴閉 ( Asia's 50 Best Restaurants 排名 No.1 / The World's 50 Best Restaurants 排名 No.5 ) 新派印度餐廳 GAGGAN.

開業以嚟日夜 full house, 老闆搵夠, 幾個月前宣佈做埋下年, 2020 年收皮歎世界.

Beautiful colonial style building

原本已經一枱難求, 消息一出, 成個 booking system 立即淪陷, 幾經辛苦, 喺 3 個月前執死雞攞到張枱.

Awards & trophies

本來訂咗 6:30pm, 點知臨去前幾日收到通知, 1st round dinner 改由 5:30pm 開始 😨 咁早開飯? 後來發現, 佢哋應該係太多 booking, 所以每晚改由一輪變兩輪疏導人潮 😱

曼谷勁塞車我哋夠鐘未人齊, 以為可以食住等, 點知侍應話唔得, 因為要齊人先啟動得.

Emoji menu

枱面見到張牛油紙, 上面印咗 25 個 emoji. 原來係 menu, 代表我哋將會食嘅 25 道菜.

侍應賣關子, 唔透露食材真相, 話有興趣可以食後自己估, 估完佢就話我哋知估得啱唔啱 😆

Music Player

因為我哋起步比其他枱慢, 等候期間, 已聽到四周強勁音樂響起.

Lick it up

輪到我哋, 侍應攞咗個喇叭仔埋嚟, 播起 KISS 嘅 Lick it up, 跟住上個有 3 " pet " 汁嘅碟嚟, 話道菜食法就係要用條脷由下至上去 " lam " 晒啲汁 😂 , 好搞嘢.

值得讚嘆嘅 25 道菜, 賣相同味道極為破格, 完全推翻我對印度菜觀感, 廚師將印度風味同其他各國烹調特色融合, 想像唔到嘅 sushi 刺身餃子同炸物都有, 確實非常非常非常之美味 ! 人均價錢大約 HKD 1,200 ( 即每道菜都唔駛 50 蚊 ), 用呢個價錢就可以品嚐到亞洲第一廚師嘅 cooking, 好抵呀 !

但份量實在多得驚人, 加上我哋仲人出錢我出命, 狂劈香檳紅酒, 唔死一身潺.