大陸驚奇

盒碧林酸梅湯,  細細盒 100ml 都成 147 cal , 打死唔飲 !!!

一年一度, 又可以食到國航嘅飛機餐喇, 唔係講笑, 幾懷念.  國航飛機餐好 cute, 每人派兩個盒 :

• 紙盒裝住冰凍咗嘅餐具, 紙巾, 開胃鹹菜, 水果, 飲料同甜點.  
• 錫紙兜就裝熱菜, 通常係炒麵或飯.  
• 跟住, 空中服務員仲會 serve 一啲唔凍嘅汽水, 好彩色嘅果汁, 茶水 etc.  

國內同胞會將鹹菜撈飯食, 老實講, 成個 set 最好食, 就得呢啲鹹菜 😂.   啲人身在福中不知福, 成日話港龍國泰飛機餐難食, 尋日食完呢個 MU ( 南方航空 ) 套餐, 今朝坐港龍, 覺得佢啲餐不知幾好味 !

三條光管 ...... 不過爛鬼 iphone 影得唔清楚

今次去大陸, 咁啱得咁橋, 住兩間酒店都比人 upgrade.  西安嗰間房大到驚, 入到去覺得有啲怪, 但又講唔出. 

終於, 發現有乜怪喇, 係大廳天花有三條外露嘅光管, 好明顯唔係原來設計, 係後加嘅.  

左望右望, 成廳都係燈, 冇理由唔夠光吖......  唔緊要, 熄咗佢咪得囉.  點知 ' 啪 ' 到個掣爛, 都熄唔到, 試吓拔咗張 ' 插卡取電 ' 喇, 成房冷氣同其他地方嘅燈都熄晒, 但個廳啲燈仍然着住 😨😨😨    大佬, 唔好嚇我呀, 我好驚㗎, 同埋, 咁樣好嘥電囉.

加上房號 1111, 驚到一個點.   
1111 有乜咁出奇 ? 皆因成層樓都係 10 字頭, 夾住我嗰兩間係 1004 同 1006, 咁我應該 1005 嘛, 點解無端端會變咗 1111 ? 都唔知搞乜.

可能諗多咗, 結果當晚一覺瞓到大天光, 平安無事.

別人的公仔

別人的行李

好喇, 去到上海, 又有得 upgrade, 太好了.  可惜打開門嚇咗跳 -- 點解會有行李同公仔喺度㗎 ?  以為入錯有人住緊嘅房, 但間房又明明係執好晒嗰喎.

哇, 唔係咁玩我嘛, 搞到心理唔平衡, 冇晒安全感.  震撼度, 同返屋企打開門, 發現有陌生人若無其事咁行行企企, 過之而無不及 !

黑色恐怖

返嚟成個禮拜, 都仲未 jet lag 完, 日頭死魚咁, 夜晚好鬼生猛, 橫掂有排都未眼瞓, 不如寫吓 Florence 第一晚一個恐怖回憶.

唔係酒店有污糟嘢, 而係同事帶咗我去間好匪夷所思嘅餐廳, 間嘢好紅㗎, 不過唔開名喇, 總知解 ' carousel ( 旋轉木馬 ) ', 好奇 / 有興趣的話, 麻煩自己 google translate.

撞正 6 月 ' Pitti Imagine Uomo ' ( 國際男裝展 ), 全城潮人氾濫搵食艱難.  據聞同事用咗佢 10 幾年喺 Florence 做 buy 嘅功力, 碌盡人情咭, 先可以 book 到枱.

太子爺

 











去到門口, < 皇孫 > 太子爺棟喺度 ( 冇錯 ! 佢老豆係意大利一個真正王子 ! ), 注意力立即落咗去佢兩隻手勁大抽嘅手鈪 😱   基本上, 好似將廟街尼泊爾攤檔啲銀器一次過戴晒上身, 好臂力 !

佢呢個招牌造型, 陰陽怪氣, 靚咩 ? 

餐廳招呼 ok , 可惜全場遊客, 除咗侍應同太子爺, 連一個意大利人都冇 !  成晚比前後左右美國人啲鼻音談話同極度誇張嘅笑聲轟炸, 加上餐廳奇異裝修, 真係有啲煉獄感覺.

Burrata

食物一般, 同樣菜式, 喺 Florence 其他地方食過更好味, 唯有呢個 Burrata ( 水牛芝士乳酪 ) 有啲睇頭.   但唔明點解甜嘢會攞嚟做頭盤囉 😆

差啲唔記得講點菜驚魂 !

 







 


唔知從幾時開始, 黑松露 ( black truffle ) 變得深入民心, 身邊所有食得入口嘅, 幾乎都有黑松露口味.  

以前都 ok 黑松露味, 點知啲人漸漸唔理好醜, 夾硬嚟, 自創恐怖配搭, 個個講到天上有地下無咁正.  得罪講句, 我覺得市面啲所謂黑松露產品, 啲味好假好難食.

講番同事點菜, 佢哋一窠蜂話要點黑松露 pasta, 唔係講笑, 當場真係嚇到滴咗滴汗出嚟.  好彩侍應話冇, 因為唔當灶.  天呀, 逃過一劫.

羅馬回魂記

熟人都知我有個怪癖, 就係每次去羅馬, 都必定要抽個時間, 返去以前住嘅地方, 喺樓下同附近流連吓.  視乎出 trip 次數, 每年回魂一至兩次. 

' 陰魂不散 ' 係最佳形容詞. 

有時喺街見到啲人漫無目的逗留, 徘徊, 望吓望吓, 會覺得佢哋好怪, 可能精神有問題.

哈, 原來我同佢哋一樣 😆 ...... 都係好怪, 同埋可能精神有問題.

上個禮拜去到, 賣大包 !  因為有住客冇閂好大門.  正, 可以乘虛而入.

踏入門口當刻, 百般滋味, 又驚又喜.  

呢條已經完全忘記咗係點樣嘅走廊 : 八級石級, 殘舊信箱同架古董老爺𨋢 ......  

老套講句, 滿載住羅馬生活美好回憶.

 










記得呢座大廈冇看更嘅, 咁仲唔快快入𨋢, 感受吓遺忘已久嘅樂趣 ?!  

當年住 6 樓, 住咗半年從未遇過其他住客.  記得有次返屋企, 一千零一次同對住 3 樓嘅年邁住客一齊入𨋢, 佢哋撳完 3 字, 我咪撳 6 字囉, 點知佢哋突然目露凶光, 仲用羅馬話鬧我添呀 !

原來部低能𨋢 program 咗, 如要service 唔同層數, 部𨋢會一直上到最高嗰層, 之後先續層派番落去, 變相搞到佢哋要遊𨋢河 😂    唉吔, sorry 囉, 我唔知羅馬搭𨋢有咁神奇嘅邏輯嘛.

戰戰兢兢, 搭咗 6 層𨋢到達以前屋企大門, 極速打咭 !

心裡面其實好驚, 話晒都係擅闖民居, 如果咁啱有人打開門出嚟, 問我點解喺度, 咁就支吾以對, 講乜都冇人信.

原本諗住行樓梯行番落地下, 不過真係驚到腳軟, 唯有原𨋢落.

意大利遊花園

BOBOLI - close up

意大利公幹得自己一條 ' 冷 ' , 唯有 set 個主題玩, 費事做完嘢無所事事, 嘥晒啲時間.  搞乜好呢 ? 難得今次夏天去, 咁就遊花園啦 !

出發前睇天氣預告, 去到邊, 啲雨就落到邊, 唔通個天真係唔鍾意我 😆😆😆 ?

BOBOLI - view to Tuscany countryside 係咪好靚呢 ?

 
DAY 2 . FLORENCE

今次誓要去 Florence Giardino Boboli (Boboli Garden)  💪    點解 ?  因為上年十一月去, 竟然都可以碰着佢一年只有兩度嘅閉館 😤 


DAY 3 . FLORENCE

第日開完會, 同事極力推薦 玫瑰園 Giardino delle Rose , 仲 call 埋的士車我去, 好似唔睇就係我損失咁. 

FLORENCE ROSE GARDEN - 肉蟲 😂

去到, 被眼前景象嚇倒 ! 啲人個個赤條條, 以為自己去咗天體營 😂  一路行, 一路比人眼望望, 鬼咩 ? 全場著得最多衫, 咪係我囉 !  嗰度啲玫瑰差不多開完, 根本係水尾, 不過再望番落山 Florence 小城個靚景, 都算值得嘅.

VIEW TO FLORENCE FROM ROSE GARDEN

開心完大鑊喺後頭, 原來嗰度有上冇落, 冇公車的士搭落山 !  

攞住幾斤重嘅文件 laptop, 喺 33℃ 比太陽兜頭曬住, 著到成身開會行裝, 半粒鐘人肉身水身汗行落山...... 他媽啲, 做乜 Florence 冇 uber 㗎 !

ROSETO COMUNALE  💗💗💗💗

DAY 4 : ROME

去到羅馬天陰陰, 要把握仲未行雷落雨嘅時間, 衝去 玫瑰園 Roseto Comunale  打咭. 

嗰度比較有良心, 事先講明花期快完, 再過兩日就關門, 所以冇期望, 去到反而有驚喜.  

玫瑰陣陣飄香, 超過 1100 品種, 有啲仲係幾百年前嘅老樹種, 大開眼界.

ROSETO COMUNALE

玫瑰同傘形松樹 (umbrella pines) 拼埋好得意, 不過嗰度二次大戰前原來係猶太墳場, 唔怪得周圍環境有種入土為安, 好祥和嘅感覺啦.  驚 👻 嘅朋友, 你哋唔好去喇.

DAY 5 : ROME

VILLA BORGHESE - LITTLE TRAIN

原本諗住去 Villa Borghese 公園裡面一間博物館買手信, 點知賣晒, 正當失望之際, 一出門口竟然有架觀光小火車咁啱埋站, 恨咗好耐, 今次終於可以搭到喇 !

基本上, 呢班車會用龜速行勻全公園各個景點, 係懶人恩物.  我除咗懶, 仲有大把時間, 唔係我搭邊個搭 😆 ?

SECRET FOUNTAIN OF SECRET GARDEN

SECRET GARDEN

遊完車河, 喺博物館旁邊亂咁行, 無意中發現咗個秘密花園, 驚喜到爆.

GALLERIA BORGHESE

DAY 6 : ROME

5 日行咗 4 個花園, 淨番個要 out town, 喺羅馬 30 km 外 Tivoli 嘅  Villa d'Este 莊園 .   

其實最冇興趣就係呢個 -- 又遠, 又難去 ( 要搭十幾個站地鐵, 再轉巴士, 坐 50 分鐘先到 ! ).  網上睇人影嘅相, 又唔係好係自己杯茶, 心諗, 如果起身落一滴雨, 就 cancel.

點知嗰朝晨早比個香港仆街 cold call 嘈醒, 冇陰功.  望吓天, 嘩一舊雲都冇, 橫掂瞓唔番, 渣渣臨出去吧 !  為咗避開 7 點幾地鐵上班人潮, 決定豪比佢, 打的直接殺去地鐵尾站搭巴士.

上到巴士, 全車都係趕住出城外返工嘅人, 沿途風景超醜, 一啲都唔靚, 心諗, 我究竟去緊個乜地方 ?  到站落車, 乜指示牌都冇, 好彩發現有幾個遊客, 做跟尾狗, 順利到達目的地.

BALCONY WITH A VIEW

PANORAMIC VIEW FROM BALCONY

入到莊園冇祈望, 直至行到花園個露台入口, 一望出去, 比個 270° 景觀嚇 L 死 ! 

咁靚嘅 ?  0 咀定形成分鐘, 個口擘到最大同最耐, 應該係呢次.  好可惜張相影唔到現場嘅立體感, show 唔到有幾咁震撼.

去到時間尚早, 成個
莊園得嗰小貓三四隻, 如入無人之境, 可以為所欲為, 狂影沙龍.

唔駛半秒, 已經完全推翻自己對呢個地方嘅偏見.  都怪網上啲人亂 post 啲醜相出嚟, 影響晒, 等我差啲放棄咗呢個 4D 超級景點 !

點 4D ? 

( 眼 ) 睇園林噴泉瀑布
( 耳 ) 聽潺潺流水 
( 鼻 ) 聞草木芳香
連 ( 皮膚 ) 都可以感受四處飄散嘅水氣, 有時大風吹啲水會兜頭淋

咁仲唔 4D ?  5D 都嚟緊啦 ...... 如果我飲埋啲泉水 😂

見人飲, 其實好想試吓, 不過第日要搭機返港, 搞到肚屙就 no good.

可能太精彩, 不經不覺行咗兩粒鐘 ( 對我嚟講好少有 ), 大量遊客已經湧入, 係時候走人.   

回程途中, 又係搭人迫人巴士, 望住啲奇醜無比嘅沿途風景, 最後仲冇的士, 侷住要搭地鐵返回市中心.  不過我都仲笑得出, 陰陰咀嗰隻, 實在太回味.

因為呢個係我呢廿年嚟見過最靚地方.