北京. 我又嚟喇 !

咳足 4 個禮拜, 啱啱好番又要飛. 

真係唔明, 北京塞車持久力點解可以咁強.  三環以內去所有目的地, 除咗半夜至清晨時段, 無時無刻塞到爆.

人生有幾次搭車途中突然肚屙, 嗰種勁攪肚標冷汗, 一除褲就瀨但又落唔到車嘅無助感覺, 好陰影.
   
喺北京機場打的去市中心途中, 作肚屙, 大佬...... 唔好呀 😨, 高速塞到陷, 萬一瀨出要停低處理, cut 線都要兩個字先 cut 到埋路邊.  期間, 只好不斷諗其他嘢分心, 同埋祈求神 🙏 赦免我 ( 瀨 💩 ), 好彩最後都係虛驚一場.

北京冇上海咁 " 姣 ", 靚裝修好食又要有酒飲嘅餐廳, 來來去去得嗰幾間, skip 埋西餐, 大部份我哋都已經去過.  今次出盡九牛二虎之力, 喺建築雜誌摷到間睇得又食得嘅養生私房菜, 叫 < 三里六七 >. 

< 三里六七 > 門外 100m 跑道 😮

完全冇概念嗰度喺邊, 大陸同事話好近, 距離我哋所在地大約 2.4 公里.    
好近, 咁即係幾遠呢 ?  上網 check 吓, 行路去的話要 48 分鐘.  結果我哋打 " 滴滴 " ( 大陸 uber ), 因為塞車, 車行仲慢過人, 要成粒鐘 😬.

OPEN KITCHEN

去到好彩一啲都冇失望, 環境雅致, 食物根據一年廿四氣節設計, 我哋吃嘅係 " 大暑 " 套餐, 餐牌書法秀麗, 不過 大陸同事好囂張, 話自己寫仲靚, 我超 !  
好...... 下個 proposal 你用毛筆寫啦, 如果唔係我唔批囉 😆

" 大暑 " 套餐

鴨湯

第一度菜係 < 冬瓜鴨湯 >, 廚師走嚟吹水話啲湯冇落鹽同味精, 我唔信 😆 ! 又話旁邊個碗係用嚟吐骨, 一定要擺到埋個口先好吐.
心諗, 如果我擁有  " 唔攞隻碗埋身離遠都吐中 "  嘅奇技, 一早出咗去表演搵食, 仲駛係度踎 !

薰魚黃桃

 < 薰魚黃桃青瓜啫喱 > 
對薰魚興趣不大, 但食落又幾唔錯喎, 最搞嘢係個黃桃, 裡面注入清新青瓜啫喱, 連唔鍾意水果嘅我, 都另眼相看, 覺得 very ok.

25 日乳鴿 👍👍👍

哈哈, 呢隻 < 25 日乳鴿 > , 香噴噴, 皮脆肉嫩又多汁, 非常好味, 可惜紅顏禍水, 令我 consultant 受氣 😂   因為上菜嗰陣廚師特登走入嚟建議我哋, 隻鴿原隻上要用手撕開食, 如果用刀切會破壞 texture, 令啲肉汁流失晒.

我有潔癖, 唔鍾意用手攞食物, 訓練有素, 所以用刀叉技巧還可以, 神不知鬼不覺切開食晒.  Consultant 話自己都係潔癖, 不過未夠班操控唔到隻鴿同刀叉, 最後死死氣, 叫廚房幫佢切隻鴿食.

差唔多食完, 廚師又衝咗入嚟 ( 可能收到風, 有人堅持要切嚟食) , 笑裡藏刀, 重申隻鴿手撕先可以試到真味, 期間凌厲眼神直射 consultant, 盲嘅都睇得出係針對緊佢啦 😂😂😂.

雖然唔係乜米芝蓮, 個餐好味唔太貴, 9 道菜每人 RMB 490 唔駛加一, 最 impressed 係 < 豆腐奶酪 > , 見 open kitchen 啲人逐片餅碎砌落去, 如果有機會都想學吓點整. 同埋呢度我一定會再來, 因兩個禮拜轉一次餐牌, 唔怕悶嘛.

豆腐奶酪

簡約生活

飛到趴街, 七月終於可以歇息吓, 加上老闆由即日起至八月頭放大假, 冇王管 !  

自從六月尾去完大陸, 起痰失聲咳到今日, 我認為係工傷, 所以有必要唔返工, 留喺屋企養病.

愈老愈深閨, 以前每日都要躝吓街, 而家天氣咁怪, 前一秒藍天白雲, 下一秒風雲色變特大暴雨, 出街帶遮又要帶太陽眼鏡, 咁精神分裂咁麻煩, 喺屋企食瞓痾, 飲住檳覆電郵, 仲正啦.

不過留家時間太長亦有隱憂, 就係好易變肥.  郁動少, 又成日口痕諗住廚房啲炸雞, 鰻魚, pizza, 雪糕...... 要忍住唔食, 係意志大考驗.   有人會話, 唔好買食物, 減低誘惑囉 !  又唔得喎, 因為風水學上, 廚房除咗代表女主人, 亦代表家人嘅財富, 得閒要開火煮食.  同埋廚房裡面, 一定要長期有食物, 雪櫃絕對唔可以空空如也.

冇辦法中嘅辦法, 就係為食發作嗰陣, 將雪櫃裡面啲嘢想像成我最害怕嘅食物, 如下 :

1. 水果
水果無罪, 我係比人煩到唔想食 !  成日話食水果有益, 防癌抗衰老. 食就食啦, 又要不斷喺旁邊口噏噏話食生果幫助消化, 朝早飲果汁清腸胃, 痴線 !

2. 雲耳 / 木耳
唔吃原因同上, 再加上陳醋做法, 又酸又孱, 怕怕.










 

3. 鮑魚 
由細到大, 都感受唔到食鮑魚嘅樂趣, 覺得同咬橡膠車呔差唔多.

記得 10 幾年前有個判頭請食 lunch, 問都唔問就叫咗隻一頭鮑我食 😱   知佢想答謝我哋多年來嘅幫襯, 但咁大隻鮑魚, 真係無福消受, 食成粒鐘都係食緊同一隻味, 有啲滯同悶, 不如用啲錢買支邋遢豬 ( La Tâche ) 我飲仲好啦.

邋遢豬

4. 韭菜類
以上食物, 如果真係要, 都可以食啲啲, 但韭菜就真係終極不可能 !  認真覺得韭菜有臭狐, 仲係生臭狐再加濃烈汗味嗰隻, 對我嚟講, 食韭菜就等同咬, 或者將一件臭狐人著過嘅衫嘅胳肋底位擺落口. No No !