吃得到的葡萄

多得意大利同事好介紹, 得知離 Florence 不遠有個 Antinori 酒莊可以組團預約參觀, 品酒 + 食晏 3 道菜連 wine pairing, 每人 Eur 160 ( 餐廳仲係米芝蓮一星 ), 超值.  唯一難度就係冇公車去, 個個劈又冇人想開車, 最後只好包車.  

Spiral staircase

出發前上網𥄫過都知道 Antinori 酒莊唔嘢小, 估唔到去到落車當刻望見佢條旋轉樓梯, 竟然心跳 !  佢老味, 開瓶器形 5 層樓梯直徑 弧度 斜度全無重複 - engineering 至高境界.  
再望吓整個建築群, ultra-modern 設計同四周翠綠山巒全無違和感, 意大利建築師果然好嘢 💪   呢個正好推翻啲人話意大利人蠢嘅說法, 經多年相處, 我認為佢哋絕對唔蠢, 好多時只係被國民表徵 [ 凌亂思維 ] 同 [ 揗雞 ] 誤咗大事啫.

急不及待進入酒窖, 兩個字 : 震撼.   相中兩間凌空玻璃屋, 係品酒嘅 private suites.

沉醉之際, 有人突然專業上身, 問點解天花冇 sprinklers ( 消防嚨頭 ), 扯火答佢 : 呢度啲例唔駛囉 !   痴線, 井底蛙, 戇居, 各處鄉村各處例, 冇聽過咩 ?!

品酒前, 職員帶去葡萄園行轉, 太過份, 嗰度連 ☁☁ 都靚啲.   

十月葡萄成熟時, 職員話可以試食, 初頭有啲猶豫, 因以前學品酒阿 sir ( 粉腸 😂 ) 話葡萄皮好苦澀......  咬一口, 直頭甜過利賓立, 一啲都唔苦囉, 我哋搏晒老命試, 食咗人幾廿粒 😆.   呵 ~ 我知喇, 條粉腸咁寸, 應該係當年得罪人, 比人耍, 點佢去食啲 " 苦果 " 啦.

品完酒午飯時間到, 走上旋轉梯頂就係田園風格露天餐廳, 明明閒日坐無虛席, 有啲仲係食 business lunch, 厲害. 

不過諗諗吓都唔係咁出奇, 因為由市中心開車嚟呢度只須半粒鐘多少少, 2:30pm 食完再揸車返 office 頂攏都係 3 點幾, 坐陣扮覆 email 散吓酒氣好快又收工, very happy 啦.

3 courses set menu

餐廳好 flexible, 雖然我哋 package 包嗰個係 set menu, 但侍應話如果唔啱食其實可以喺 a la carte 餐牌揀另一道菜調換.

Beef tartare

我將羊鞍換成 beef tartare, 生牛肉成日食, 未食過咁有牛味嘅, 唔駛靠調味, 入口即溶有啲似中拖羅, 鮮味到唔識形容.

Seasonal cheese platter

而羊鞍喜獲全民激讚, 全枱個個隻碟照晒鏡, 連舊骨都吮到乾埋.  不過佢哋對跟住嚟嘅芝士併盤就唔多受落, 咁點解我開頭大大聲話食芝士, 問佢哋改唔改其他食物嗰陣冇人回應呢 ?  

後尾諗番, 應該係我漏咗翻譯餐牌嘅甜品部份, 所以冇人知自己想換乜所以冇提出 😅   大佬, 你哋其中一人曾經留學 New York 7 年, 另外 3 個喺 MNC 做高層, 日日英文電話電郵, 唔識睇 menu, 咪玩啦.

Solaia 2013

夠喇 ! 佢哋咁樣令我覺得好大壓力, 所以另外加咗支 Solaia 嘆吓, 喺酒莊現場就地正法呢支 Super Tuscan, 爽 !

困獸鬥

六月去羅馬搵到個喺正市中心但又鮮為遊客所知嘅地點住, 距離 via dei Condotti 名店街只有幾分鐘路程.  風涼水冷, 環境優美, 景觀開揚有河景, 冇鬼, 50 米內仲有超市同 3 個巴士站, 如果中六合彩一定立即飛撲去買呢個筍盤.
十月再戰羅馬, 網上發現喺同一棟大廈原來有 3 間由唔同 agent 經營嘅 B&B 出租.  太好了 ! 一行 7 人分別住哂喺 ( 圖中 A B C ) 3 間 B&B, 我喺 C, 另外班 friend 住 A 同 B. 

Apartment C

3 間 agent 經營手法各有不同, 有人 whatsapp 十問九唔應, 有人光速回應 ;  約好 check-in 時間, 有人早到, 亦有人會遲成 20 分鐘.

不過我最介意, 就係 A 同 B agents 都冇要求客人將垃圾分類, 又冇教佢哋大廈垃圾房點去.

Apartment B

我唔係乜環保份子, 不過實在睇唔過眼, 毫無責任感 !  意大利雖然殘, 但同好多歐洲大城市一樣, 多年前已經實行垃圾分類.  

好多亞洲遊客唔知, 意大利冇我哋咁幸福, 屋企晚晚有人上門收垃圾, 佢哋乜都要分日期自己攞落樓下垃圾房分類掉㗎.

Apartment A

咁勞嘈, 無非因為知道啲 Big-6 朋友嘅生活模式.

佢哋唔係潔淨一族, 食唔慣西式早餐, 朝朝喺廚房整罐頭煎蛋淥杯麵, 食完啲嘢唔執擗到周圍係, 唔開窗再加上一室人味煙味 ( 註 : 佢哋係重症煙民, 瞓覺都要擔住口煙先瞓得着嗰隻, 如果有日煙喺呢個世界消失, 佢哋亦會隨之滅種 ), 有次入去坐咗半個鐘真係頭暈, 嗰種臭, 同要你不停嗍人哋對著過嘅波鞋差不多 = 嘔 x infinity !

可以想像到佢哋退房後, 入去清潔嘅, 發現垃圾筒裡面根本完全冇垃圾 ( 因為幾日以來嘅垃圾冇掉不特止, 仲擺晒喺垃圾筒以外嘅地方 😂😂 ), 會有幾咁震懾.

最後一天

險境

尋日係我上班 last day, 終於等到 🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉  實在太 high, 4:05am 醒咗就亢奮到完全瞓唔番.

同埋, 終於可以逃出險境 😅 

點解咁講 ?  因為我坐正 2019 年 office 極高危嘅 < 二黑 > 區域, 風水師傅提醒我, 有得飛就飛, 唔好留咁多喺 office.  事實上, 由年頭到目前為止, 喺呢區 4 個坐房嘅走咗兩個 ( 包括我 ), 又有兩個同事有家人過身, 另一人阿媽最近突然發現 cancer 末期, 你話大鑊唔大鑊 ?

多得各人嘅厚愛, 尋日 last day 由朝食 + 劈到黑, 打破我單日飲香檳支數紀錄 !

Farewell lunch 同 dinner 好正常, farewell champagne breakfast  真係第一次, 朝早 10 點幾吃完返 office, 仲要撞正老闆突然衝入房同我 say goodbye, 成陣酒除, 自己都覺得有啲離譜 😜

雖然警告咗同事千祈一定唔可以搞 farewell party, 結果都係有, 仲要搵 HR 約我 4pm 扮交收, 諗住成班人喺 meeting room 比個 surprise 我, 點知 lunch 嗰陣已經有人唔覺意洩密囉, 冇鬼用 😂😂😂

farewell popcorn

呢個 farewell 一啲傷感都冇, 大家都好明顯感受到我能夠逃離嘅喜悅, 相比一個月前另一 director farewell party 當眾哭到死去活來嘅景象, 簡直天與地.  同埋我話不如乘機當埋個 P 喺戒酒會啦, 劈過今嘢, 相信以後都冇乜機會咁飲, 因為 office 裡面再冇人會咁 alcoholic 隨時隨地撩人隊囉.

晚黑都係出去繼續飲, 飲得更厲害, 斷片係必然, 今朝要睇番相先醒起食咗啲乜, 但當睇到以下呢幅 < 雞 >, oh my god ! 我記得喇 !!!  真係好 L 好 L 好 L 好食, 有興趣試吓, 可以去 PMQ 新開嗰間法國菜, 要預訂㗎.

farewell yellow chicken . YUM !!!

海陸交通大測試

受人所託, 幫忙帶佢 < Big 6 > 朋友圈加埋自己一行 7 人出遊意大利, 酬勞係免費商務機票連食宿.  正啦, 有人出錢比自己飽嚐私欲, 食想食嘅嘢, 去一直想去但又嫌貴嘅地方, 仲想點呀 ?

任務除咗安排行程節目, 買車票, 訂酒店, 預約餐廳, 仲要充當翻譯同埋幫全部人 order 嘢食 ( 因為佢哋少食西餐, 唔識睇餐牌 ), 聽落唔簡單, 但對我嚟講又唔係太難, 因為安排策劃同點人做嘢呢啲, 完全係我專業 😂

慶幸呢班人非常文明兼守規矩, 集合永冇遲到, 可能事前有人警告過佢哋, 我發脾氣唔係人咁品, 所以佢哋全程都比較 behave.

今次有人請客, 即管做吓啲奢侈行為, 例如 : 

1.  威尼斯機場搭 water taxi 去酒店 - Eur 120 程, 比平時搭船貴幾倍, 但成件事真係極度型, 又快, 慳成粒鐘.

2.  坐 gondola - 以前唔敢, 因為海鮮價分分鐘被斬一頸血.  好在近來實施 fixed rate, 日間收費 Eur 80, 幾歹都試吓啦 !  

唔怪得 gondola 咁多人坐, 喺威尼斯九曲十三灣嘅河道慢慢撐, 原來真係好平靜好好 feel.  仲有, 原來 gondolier ( 船夫 ) 牌好難考, 佢哋年薪過百萬港幣㗎 !

3.  翡冷翠 ( Florence ) 馬車 - 終於可以得償所願, 馬就騎得多, 坐馬拉嘅車係第一次, Eur 50 坐 25 分鐘, 慢慢欣賞雖然已經睇過 N 次嘅景點, 別有一番風味. 

我哋隻馬中途仲表演 high pressure 射尿, 引來大批途人圍觀拍照 😅

 4.  羅馬玩 segway - 好多大城市已經禁咗 segway, 趁意大利仲有, 快啲試 !  比想像中易操控, 而且馬力大, 上斜一啲問題都冇, 企上去周圍行簡直有騰雲駕霧嘅感覺.

Eur 56 可以玩 3.5 小時, 又有嚮導解說, 好抵吖.

賊巢

秋季大旅行, 第一天已經遇上滑鐵盧.  

臨上機, 千叮萬囑同行朋友睇緊身邊財物, 歐洲好多賊, 換嚟一句 : " 有冇咁犀利呀 ? "  Ok ok, 總知唔見嘢唔好煩到我, 要走去同你報警同去使館補領 passport 就得喇.

威尼斯機場搭 water taxi 到市中心, 落船再由碼頭推行李去酒店唔超過 50 米.  酒店 check-in 之際, challenge 我嗰個人猛然發現喺呢兩分鐘都唔夠嘅路程竟然比人打開背囊撻咗銀包 !

😱😱😱 唔係咁靈驗嘛 ?!  唔知仲以為我識特異功能, 同班賊夾埋去伏佢.  當刻, 亦感到可能會相當大鑊, 因為中國使館只得米蘭同羅馬先有, 如果條友真係比人撻埋本 passport, 全班 friend 都要陪葬同佢過去補領, 好彩最後冇唔見.

最令人驚奇, 係酒店職員嘅反應, 佢哋第一時間唔係叫我哋去報警, 而係問個銀包係乜樣, 跟住叫其他同事留意吓喺酒店附近街邊嘅垃圾桶, 話啲賊通常攞咗 cash 就會立即掉咗個銀包, 根本唔會用啲卡, 所以有機會搵得番.

哇 ~  聽完, 連對意大利最後嘅一滴安全感都冇埋, 不過亦要多得呢位朋友, 冇佢嘅犧牲, 就唔可以嚇到大家全程高度戒備, 看管好自己財物, 成就到跟住日日都咁 happy 嘅 trip.