打個突 botox

久唔久會同舊公司 🐓毛同事聚會, 高層嗰班, 大概一個月一次.  大家年資有番咁上下, 最後生嗰個都四張.
飯局成 8 點, 我早放百無聊賴, 多數會約女高層 C 出嚟 happy hour 先.  

上次喺中環大館間 bar 坐低冇耐, C 非常容光煥發地現身, 但我就比佢嚇親打咗個突, 佢塊面...... 嘩 😒   唔到 3 分鐘 C 已經急不及待, 問我覺唔覺得佢有啲乜嘢唔同咗.  仲駛問 ? 盲咗睇唔到都聞到好大陣膠味啦.

應該係個有精神分裂或者強迫症嘅 designer 先可以設計到咁嘅 bar

跟住往後粒幾鐘 C 滔滔不絕分享心路歷程, 原來 botox 唔夠皮仲要打埋 filler, 打完痛咗幾日, 要食止痛藥先頂得順.  望住佢塊面, 得對眼識眨同個口識郁, 喺酒吧綠色燈光下, 幻覺自己去咗杜莎夫人蠟像館.

原來 C 係被 N ( 另一女高層 ) 影響走去打 botox, 佢話 N 打得更狠, 出手 ( $$$ ) 更重.  噢 ~ 好想快啲 8 點啊, 睇吓 N 食唔食到嘢.

如果隻鴨打 botox 可以更好食, 你食唔食 ?

同想像 100% 脗合, 冇驚喜.  N 幾廿歲人面上一條幼紋都冇, 超級膠到硬, 連咀唇都打埋, 唔知仲以為佢好餓, 孖潤腸連北京填鴨一齊咬.

N 係極端健康飲食主義者, 樣樣要時令新鮮純天然, 平時食乜都度過算過, 呢樣 toxic, 嗰啲對身體唔好, 得閒仲 fasting 去排毒咁話. 日搞夜搞 detox 但又打番咁多 botox ? 不過女人自相矛盾, 係正常吧 😂

天下第一 (賤)

今年雖然冇得飛, 驛馬依然強勁, 入公司七個月已經搬咗 3 次位, 認真誇張.

我的遷徙圖

1 號位 : Nov 2019 - Feb 2020
2 號位 : Feb 2020 - May 2020
3 號位 : May 2020 - present

除非老闆係個一等一好人, 又或者你同佢八字好夾, 若然唔係, 坐喺老闆視線範圍內都應該冇乜運行.
 

條罅好大個維港景呀 !

2 - 5 月我就瀨晒嘢 ( 2 號位 ), 話就話係 office 裡面唯一有維港景嘅房, 其實都係望到條罅仔, 但同 🐀 近在咫尺, 殺氣甚重, 行開一陣條友已經 chur 自己 PA 同我啲馬, 問我去咗邊.  佢哋知條鐵咩 ? 未聽過上司行開要同下屬或者其他部門同事交代囉.    
第日 🐀 比人剁咗 ( 應該好快 ) 可以做食蕉懲教署呢啲啦, 咁 Q 鍾意一日到黑巡嚟巡去, 𥄫實啲 staff.

除此之外, 2 號位仲要比 office 大門同條長走廊大直路

直

直

直沖 ( 上圖紅色箭嘴 ), 老實講唔係個個頂得住 !  所以知道要搬離當刻心中暗喜, 同時亦默默對下家送上祝福, 希望佢可以大步檻過, 唔會犯小人 ( 🐀 ) 同被 🐀 陷害.

犯小人，被人陷害

而家 3 號位 much better 啦, 因為有成條後樓梯阻擋 🐀 視線, 佢完全望我唔到, 最正係房前有個相當開闊嘅明堂, 藏風聚氣, 旺中帶靜, 私隱度高.

講開房, 有樣嘢真係唔爆唔得 !  Office 所有房落地玻璃設計, 金魚缸象徵透明度高, 做事光明磊落.  點知上禮拜 🐀 搵我, 叫我同佢間房 ( 上圖紫色 ) 貼單面反光 film, 要佢睇到人, 人哋睇唔到佢, urgent 喎 😠 

佢變態㗎.

Flex 屎 hours

三十歲嗰陣, 成日幻想四十幾可以退休, 結果而家成五條嘢都仲要捱.  不過今時今日五十歲嘅我, 竟然寧願日日返工, 都唔想吽喺屋企終日無所事事.

後生嗰陣覺得世界咁大無奇不有, 退休大把嘢玩, 得閒去旅行, 食吓嘢, 簡直人生樂事.  估唔到現在式嘅我, 想法已經完全改變 !  可能大蛇嘔水見得多, 家陣仲可以激發到我興趣嘅事物, 已經買少見少, 而家好容易就覺得悶.

講起悶, 呢排坐喺 office 真係悶到一個點 !  我近期 8 點返工, 因為公司行 flexi-hours, 返 8 點就可以名正言順下晝 5 點閃人, 最適合我早退風格.

咪以為 8 點返工好早, 原來大有人在.

不過據連日觀察, 班友根本喺度搵笨實, 返到 office 用 10 分鐘抹枱消毒開電腦, 半粒鐘喺 pantry 食外賣早餐睇蘋果動新聞, 之後 ' 呢 ' 喺屎坑屙屎 15 分鐘 ( 有次入女廁, 5 格有 3 格喺度開大, 臭氣沖天離哂譜 !  傳聞中嘅 ' 留番啲屎返工屙 ' 原來真有其事 ), 坐得番埋位做嘢已經係 8:55am, dum 咗成粒波鐘, 好嘢.

所以今朝我都有樣學樣, 用 10 分鐘抹枱消毒開電腦, 5 分鐘飲咖啡, 屎就屙唔出, 不過就用咗 40 分鐘望住個 screensaver 發呆慢食 8 隻喺屋企預先烚好嘅鵪鶉蛋, 完成時間啱啱好, 都係 8:55am 😂