午市大鬥法

open kitchen & counter

尋日試咗間新開咗排, 想去幾次都 book 唔到嘅意大利嘢, 餐廳位處西營盤一條窄巷裡面, 非常鬼鼠.

同一地點之前去過, 食海鮮西餐嘅, 執咗笠而家比兩條意粉 ( 意大利人 ) 頂手, 換過招牌同啲櫈, 嚟個借屍還魂做生意.

初頭坐低好地地, 但好快就比條 waitress 辣㷫, 問我飲乜水, 我答 : " tap water 吖唔該 ", 佢就話 : " 我哋只賣樽裝水 ", 咁我話 : " 咁唔駛住喇 ", 佢竟然立即擸走我隻水杯, xy#@z !

轉頭派餐牌, 唔明點解佢要一字不漏地讀一次囉, 又唔係加插啲乜解釋, 介紹乜時令, 又或者比點菜建議, 全無 added value.  我又唔係文盲, 做乜 7 要你讀個餐牌比我聽啫 ?  咁鍾意讀, 早知叫佢讀埋最底嗰幾行餐廳地址 / 電話 / 電郵, 然後問佢係乜菜. 😂

Brunch $380 包任食 3 款沙律 + 芝士 cold cuts 連一款甜品, 餐酒就兩粒鐘內任飲, 都算抵.  但條女同時狂 sell 成 1kg 重嘅燉牛膝 ( ossobuco ), 我話 lunch 好少食得咁重型, reject 咗佢.

Friend 遲到少少我劈住等, 問可唔可以上啲意大利腸送吓酒先, 佢話唔得一定要順次序, 上完沙律先可以再上 cold cuts, 叫我食沙律先.   Diu ~ 呢嘢真係火都嚟, 我食乜先, 關佢撚事 ?!   忍唔住爆佢 : " 咁你乜都唔好上喇 ", 條女呆咗半秒打咗個突, 然後黑面行開.  心諗 : 係呀, 乜都唔要呀, 連你都唔要, 快啲行 L 開啦 .

Cold cuts

朋友嚟到, 又全個餐牌由頭讀一次, 黐 Q 線 ! 好彩沙律同 cold cuts 味道唔錯, 間嘢都仲有一件可取之處.

既然一場來到意大利餐廳, 冇理由唔試吓啲 home made 意粉, 所以決定加錢 order, 我食肉醬, 朋友要蜆肉.  點知條女又喺度呀支呀 jor, 話兩碟太多驚食唔晒, 不如叫一碟兩個人 " 些 ar " ( 佢嘅發音, 我諗佢意思係 " share " 掛 ).  

雖然當時已經有啲飽, 但我係都要同佢唱反調, 企硬堅持要兩碟 !  係呀, 係特登玩嘢呀, 吹咩 ?

明明係條女精神分裂先囉 ! 之前 hard sell 個 1kg 燉牛膝一個人食就唔飽嘅, 我哋叫一人一碟意粉竟然會係 too much, 都唔知乜邏輯 ?

和你呻

前日有個 work from home 咗十九幾世嘅舊同事同我呻 : ' 哎唷 ~ 天天 WFH , 在家真的很無聊啊 ~~~ '  ( 佢係台妹, 請用國語想像 ).  頂佢, 完全唔理我感受, 講埋啲風涼說話.

唔知搞乜, 近排真係多咗好多人走嚟同我呻 : 同事, 朋友, 馬場啲人, 連餐廳食飯啲伙記, 清潔阿姐, 大廈看更都會同我呻 !  咩料呀 😂 , 唔通我個樣真係好平易近人好善良 ?

最好笑開場白一定係 : ' 冇嘢㗎, 都係想同你呻吓 ...... '   

呻嘅內容包羅萬有, 最 hit 當然係關於疫情失控驚癩嘢 + 媽叉政府仆街無能 ;  Office 就離唔開投訴老闆點賤, 唔公平, HR 勁廢, 或者眼紅別人之類 ;  其他就擔心市道簫條, 好快裁員失業冇工開.   

最意想不到嘅內容仲有家事, 例如 : 生極都係仔, 想追女結果又陀仔 👶 ;  姑奶點出陰招喺老爺奶奶面前同弟妹爭家產 ;  條仔返屋企啲衫褲鞋襪亂擗, 老馮咁次次旨意條女執 ;  嗰女同新菲傭唔妥, 困獸鬥日日喺屋企大鬥法, 咁嘅時勢冇新外傭供應又唔炒得.

初頭以為啲人走得嚟呻, 都係想有第三方角度去分析拆解某些困局, 原來唔係, 你開解完比晒建議, 兩三日後佢哋又會走嚟再呻過 !

都怪自己多餘, 人哋開頭已經表明立場, 剩係想呻.  把幾火試吓轉玩法, 啲人再走嚟 repeat repeat 再 repeat 同一件事嘅時候, 決絕回答 : ' 無辦法㗎, 如果你唔去改變自己, 或者你做唔到任何嘢去改變嘅話, 呢件就係事實, 咁你要去接受, 去面對啦...... '  之後啲人一定會咁回應 : ' 我知...... 不過都係諗住同你呻吓啫.....  ' 😆😆  頂佢, 你話係咪吹吖 ?!

放暑假

八月唔駛做, 賦閒在家 !  唔係老鼠 🐀 轉死性比我哋 WFH, 而係佢變本加厲, 迫員工喺九月尾前清晒 2020 年一半嘅 annual leave.  搞乜大家心中有數啦, 無非係為第二波炒人鋪路, 炒嗰陣唔駛賠咁多 $ 囉.

因之前 6 個月 probation period 唔比攞假, 連 2020 半年 annual leave quota, 再加埋每月 5.5 日 NPL, 結果八月只需返 5 日 ( 九月好啲, 應該會返 7 日嘅 😂 ), 但條死 🐀 依然咬住唔放, 扮晒慘話希望我可以喺假期嘅時候繼續 support 佢, 明知我放假, 仲 send 埋晒啲開 video conference 嘅 invitation 嚟, DKLM 仆街我當然 reject 晒佢啦 !

放成三個禮拜假冇得飛, 香港啲沙灘食肆又唔開, 仲成日落雨搞到冇馬騎, 嘥 Q 晒 !  不過唔緊要, 喺屋企狂劈狂 online shopping 狂煲 netflix, viutv 同 youtube, 好日子都係一樣咁過.

啱啱個 weekend 撳去 J2 睇咗幾個台灣飲食 / 旅遊節目, 內容 ok 同埋啲後生女主持都幾索, 但 J2 班女配音...... my god 😠   以為廣東話飇高 8 度, 再極度誇張地嗲聲嗲氣, 就可以演繹到台妹嗰種溫柔, 都唔止. 

如果節目主持有兩個或以上 ( 組合 : A + B 或 A + B + C ), B C 嘅配音就會好似賣武咁, 重複 A 剛剛講完嗰句嘅最尾幾個字, 即係同一句會有不同聲音演繹 2 - 3 次, 勁有幻聽 feel.  同埋班配音小姐唧出嚟嘅雞仔聲真係好尖, 聽到人好煩同好頭痛囉 !  

如果有興趣, 可以挑戰下圖呢幾個 J2 配音節目, 一嘗煩, 頭痛, 同幻聽滋味.

牙的啟示

NPL 被困家中, 消磨時間無限 online shopping 買買買, 有日輪到買家庭電器, 為求達到免費送貨最低消費, 搭單買埋個電動牙刷.   記憶中有用過電動牙刷, 十幾歲嗰陣老豆攞咗個 Oral B ( 當年應該好犀利 ) 比我哋幾條細路玩, 後尾因為補充刷頭太貴, 所以玩殘咗個原裝就冇下文.     

陌生的電動牙刷, 遺忘了的感覺, 心中忐忑, 不過買得就要用 !  好彩最後由驚變喜, 原來刷牙可以不費吹灰之力, 不單止唔痛, 連牙膏都用少好多.

新屎坑三日香, 享受刷牙當中, 不知不覺進入了 trance 境界, 憶起人生關於牙嘅兩件奇事 : 

小甜甜水壺

奇事 # 1
1976 年小學一年級返上午班, 下晝回家喺廚房洗我當年至愛嘅小甜甜水壺期間, 水龍頭 " dak " 一聲跌咗隻牙出嚟 😱😱😱 !  

應該唔係阿嫲整蠱, 塞隻牙喺龍頭裡面嚟嚇我咁絕掛 ? ( 佢有時會整蠱, 嚇我㗎 ), 而家諗番起好驚囉, 應該係水箱藏屍啦.

相撞地點

奇事 # 2
1977 年小學二年下午班, 小息 15 分鐘, 目睹兩個相反方向全速奔跑中嘅同學喺走廊互炒, 膨一聲 !  五秒過後兩條友先識反應開口大喊, 一個揞住個咀, 一個揞住額頭.  

扐開手, 原來揞咀嗰個冇咗隻牙, 揞頭嗰個額頭半 inlaid 咗隻牙, 畫面非常戲劇性, 不過 1000% 係堅 😂