中伏十月

呢個 blog 冇引子冇前戲, 寫嘅目的, 就係要鬧 !

10月19日, 星期一, 交易廣場翠玉軒食咗 2020 年度最伏嘅飯, 食嘅過程加埋單後愈諗愈㷫, 嬲到震嘅十級怒火, 足以令我成晚失眠 !

開名 ! 間嘢叫 888 Fatfatfat : 中菜 pop-up, 期間限定兩個月, 因為佢哋懶神秘, 好奇加好勝, 嗱嗱林 book 枱以為有jekso.

Lady in white @ entrance

踏入餐廳到坐低, 冇乜唔妥, 只係唔明點解食中餐但大部份侍應係外勞, 全部講英文, 100% 唐人街餐館 feel. 

第一次反白眼 : 係南亞侍應問有冇聽過 Penglai ( 蓬萊 ), 我話有, 跟住佢竟然問我有冇去過 !  台灣有地方叫蓬萊, 但餐廳個蓬萊 concept 係 ' 蓬萊仙境 ' 咁解囉, 仙境喎, 要死咗, 升咗仙, 先會飄去, 無啦啦生人一個, 點 Q 會去過呀 ?

Press for ...... 澳洲嘢

圖片 [ PRESS FOR 不醉無歸 ] 呢個撳掣, 第二挑㷫我 : 

#1, 坐低嗰陣完全冇人講個掣係用嚟做乜.  

#2, 喺間幾乎全英語對答嘅中菜廳, press for 之後出現 4 個中文字.  唔識睇中文嘅, 分分鐘以為係韓國大陸餐廳嗰啲 call button, 手痕一撳, 即籟 ! -----> order 全枱任飲紅白酒 1.5 小時, 每位 HKD 348.  追問下, 侍應話係澳洲嘢, 但又講唔出係乜.

Menu

第三個焫 ( laat ) 㷫位 : 餐牌 8 成齋唔緊要, 但最憎佢扮肉, 人生大忌 ! 什麼 [ 鮮魷 ] [ 羊肉 ] [ 黃酒煮雞 ] [ 填鴨 ] [ 豬肉 ] 😡😡😡😡😡😡😡😡

聽到隔離枱話 [ 填鴨 ] 成陣蒟蒻味勁難食, 我哋都唔好得佢哋好多. 腐皮白菜同大澳蝦醬陳村粉普普通通, 其實陳村粉好油, 不過算了吧.

腐皮白菜 / 大澳蝦醬陳村粉

, 觸發我 歇斯底里嘅原素係 signature dish [ 河南炸八塊 ] :

發誓, 一生人冇食過咁 Q 撚難食嘅雞, 無論以前細路自己煮而煮唔熟嘅雞, 超市雪藏僵屍雞, 7-11 方便餐, 大陸飛機餐, Starbucks 冇味烚雞柴皮, 都冇咁難食 !  難食得破壞咗我同雞嘅感情, 真係唔知點先可以再行落去.

河南炸八塊

最失敗係為討好鬼佬 / 竹升, 用 KFC 炸法去炸雞, 但個炸漿又調得唔好, 粉又厚, 雞皮一啲脆口都冇.  裡面嘅白肉, 炸完都仲好重雪味, 可能煮嗰個都知, 重手勁落南乳醬去掩飾, 但我覺得咁搞超級難頂, 咬咗兩啖, 已經投降完全唔可以再繼續. 

成餐飯兩粒鐘, 除咗啱啱坐低嗰 5 分鐘, 我應該全程西面, 英國口音華人侍應見我哋食剩晒啲雞, 問要唔要打包, 唔駛喇唔該, 丟喺秀茂坪街市, 啲老鼠都唔吼啦.