心情矛盾

比稅局掠咗筆嬲得滯洩咗度氣, 搞到人都謝埋.  

禍不單行, 過完農曆年大陸 team 竟然有一半人辭職, 扣埋啲年假兩個禮拜通知就走得人, 鬼死咁 L 多 projects, 請人都要時間, 成壇蘇州屎真係唔知點埋尾.  

跟住收到好親嘅親戚過身 + 老朋友父親患癌消息, 再加上三月頭落雨潮濕天氣, 覺得自己好似有啲憂鬱, 起身基本已經心情唔靚, 仲要睇埋啲把幾火公事 email, 全部乜撚都係爆鑊爆鑊再爆鑊, 連 0.000000000001 個好消息都冇 !  終於知道一個人點解會變成 [ 一 pat 屎 ], [ 散漫 ] 同 [ 頹 ] .  

憂鬱更上一層, 係因為訂花牌而我又有少少要求, 所以不停上網搜尋有關資料, 希望可以搵間又好又可靠, 送啲靚花向先人致最後敬意.  

原來香港有好多長生花店, 個個都話自己口碑好, 真係睇到眼矇.  好彩啲網上討論區踢爆不少黑店 : 唔係甩底就係啲花牌送到嚟由大縮小擺明細咗個碼, 或者係完全變態 ( 變咗造型/花顏色 ), 最離譜係擺明執人啲花嚟 recycle 造嘅殘花甩皮甩骨花牌. 

綜合各種意見, 揀咗間叫 Give.Gxxx 嘅網上花店, 雖然每個貴 100+ 蚊, 但花牌 design 加花種其實有啲另類, 就算想都冇可能喺大酒店附近執到啲啱用二手花去組裝吧.  同埋佢哋 follow up 真係好好, 收到 order 好快已經 whatsapp 聯絡相談細節, 非常有交帶.  

今日親戚喪禮見到 Gxxx.Gift 啲花牌啲花好新鮮, 造型同 size 完全脗合, 冇出事, 希望 " 伯娘 " 您都會鍾意啦, RIP 🙏  多謝您年年送嘅酒芯朱古力, 不過其實我唔飲烈酒㗎, 不過會儲起 😉.