等定唔等？等得到先好等

成日喺街笑人啲 PVRM ( 自訂車牌 ) 無聊, 改啲名不知所謂, 轉頭自己又走去申請, 2017 年入紙, 抽足兩年 2019 年頭先抽中, 諗住進入拍賣程序應該可以好快套個牌上 [ 新車 ] 啦, 點知又撞正社會運動同 Covid - 19, 運輸處拍賣無限延期 stuck 咗喺度.

一拖再拖, 結果搞到今年年頭拍賣重啟, 終於 2021 六月個牌先到手.  由入紙計, 等咗足足 4 年, 由 40 幾等到 50 😆

[ 新車 ] 開唔郁 -> 拖車費 $900 😠

 

我等到, [ 新車 ] 紅顏薄命等唔到, 可能被股屯積多年嘅殺氣沖正, 自訂牌到手冇耐 [ 新車 ] ABS 就壞了, 車齡兩年半, 又唔係成日揸真係好雞囉 ......  把幾火, 一於 trade-in 換架新嘢順手套埋個 G1EG1E 牌. 

G1EG1E 出車中 . sales 攝 😁

giegie . 攝於 199幾

giegie 其實係年青時期曾經養過隻情鳥 ( lovebird ) 個名, 佢好搞嘢, 同人類極之有互動, 識發嬲不特止, 仲會食人字拖 ( 啲塑膠邊 ) 同飲法國白酒 😂 , 飲醉就趴喺度.

點解改隻雀個名做 giegie ?  如果冇記錯, 應該係 N 年前同妹妹搭小巴, 唔知坐前面定後面有個阿伯同佢親戚傾偈, 講咗幾次 gie 唔 gie ( 應該係鄉下話 " 知 " 唔 " 知 " ) 😅  我哋覺得好搞笑, 跟住就玩嘢有樣學樣 gie 嚟 gie 去, 順理成章, 屋企有新雀到, 咪順口叫佢做 giegie 囉, 一叫就十幾年 😄  

乜都 gie gie gie, 漸漸地成家人代號 / 暗號都變成了 giegie, 身邊人, 同事, 連外國朋友亦知此事. 

所以, 我一定要捍衛 G1EG1E 呢個屬於自己同家人嘅代號, 絕對唔可以落入別人手中.

從見天日

九月遙控連搞澳門兩間臨時店, 忙到巔, 上禮拜終於搞完, 而家回復心情寫 blog, 首先嚟篇短嘅.

新公司做咗差不多 5 個月, 雖然返工為咗個白痴上司 ( 乞兒 ) 成日發脾氣, 但係咪真係惡頂到要擗炮唔撈呢 ? 又未至於.  同埋十一月搬 office 去太古坊, 都好想睇吓嗰邊啲新設施點靚法.  

仲有一樣嘢, 實在萬分期待 : 就係到時所有 directors 都要坐 open office 同其他 staff 平起平坐 !  哈 ~ 今次有戲睇, 平時一日到黑閂埋門匿喺房, 上網炒股玩手機唔知做乜嗰班茂里, 查實份工有冇嘢做 / 係咪真係做緊嘢, 去到新 office 做乜講乜都冇遮冇掩俾人一眼睇晒, 今次仲唔見光死 ?!  

乞兒 擺咗個好似要入去坐十幾廿碌嘅死人樣, 搏同情話自己坐咗房坐咗十幾年, 新 office 要同其他人一齊坐, 驚唔慣.

收皮啦, 唔慣. 我之前夠坐房啦, 而家坐大廳又唔見我唔慣 ?  正乞兒 ! 果然冇同佢改錯名冇屈佢, 佢老味擺明歧視我哋, 坐 open office 好失禮你咩 ?!  我冷漠回應 : 咁有日輪到你做 VP 咪有房坐囉.  乞兒 笠晒水, 皆因自知冇料, 出到天橋底一定唔夠其他乞兒揪.