求定唔求, 還得到先好求

新一年開始, 又到還 / 求神時間, 好神心, 上個禮拜特登請咗一日大假入大澳侯王廟參拜.

有冇聽過拜神要飽肚 ?!  冇 ? 啱㗎, 因為我 9 噏之嘛 😆  但我哋參拜前的確走咗去醫吐, 喺東涌舊碼頭岸邊某海鮮酒家食咗餐請客朋友口中 [ 粗粗哋 ] 嘅午飯.

朋友實在太客氣了, 如果 lunch 食龍蝦伊麵 | 鮑魚 | 大種瀨尿蝦 | 成斤重嘅蒸魚 + 香檳 ( 自攜 ) 呢啲叫 [ 粗 ], 我真係唔識乜係 [ 幼 ] 囉 😂 

好喇, 食完 [ 粗 ] 嘢已經兩點幾, 係時候往大澳出發, 因拜神唔可以太晏, 最好 4pm 前.  比起 2020 年就算連閒日都人山人海, 拜神祈福都要鬥快嘅景象 :

http://shirliek.blogspot.com/2020/03/blog-post.html

今年 ( 2022 ) 大澳已經淪陷不再, 侯王廟亦回歸以往平靜.  一場嚟到拜完神, 當然周圍行吓, 順其自然地走去文物酒店嗰邊, 休息吓, 查實飲番兩杯 relax 吓 😅   信我啦, 拜神呢件事心理同肉體上真係攰㗎.

途中石仔埗街嘅 [ 勝利香蝦廠 ] 對面有個花棚, 一年四季好吸睛, 因為永遠都有不同花期嘅花種盛放, 今期係怒放中嘅炮仗花.  驚喜係終於可以見到栽花人嘅真身, yeah !

黑眼圈

以前冇得 WFH 好恨, 而家一個禮拜有兩日就覺得一啲都唔過癮.  如果唔係公司咁遠, 真係寧願日日返工, 起碼有得同同事互動, 講吓笑玩吓嘢, 好過痞喺屋企宅度日.

好似今日冇太陽天氣有啲冷, 仲撞正初十五要食齋, 平時完全唔怕凍 / 甚至喜歡凍嘅我, 雙重夾擊下竟然坐坐吓覺得寒要開暖風機 + 連續九粒鐘着住兩個 ' 芒 ' + laptop + 打印機 + 兩部電話 ! 連電都蝕埋. 

唔係眼影, 唔係家暴

上回講到月頭晚市禁堂食 last call 嗰晚出去飲大咗, 明明返到屋企樓下都可以喺的士裡面撼頭埋凳, 搞到右眼尾同田宅宮 ( 眉同眼之間位置 ) 瘀瘀青青腫起一大舊, 過咗成 10 日而家 ' 嗨 ' 吓都仲痛, 好彩冇撼盲. 

週末騎馬見到馬友, 提起自己飲醉酒撞頭撼眼瘀事, 諗住開心 share 大家笑吓啦. 馬友好認真地望, 跟住好認真地講 : " 眼角反而唔覺, 但眼下面真係有啲瘀喎 ".

WTF 我頂 ~ 眼下面唔係瘀, 係我對黑眼圈囉 !!!! xyz@#$.....!!!😠

感覺很好 ?

夜蒲 last call 荷里活道風光

上年生日冇得晚市堂食, 今年諗住有, 點知又嚟個緊急煞停, 一月慶祝活動連環收皮, 睇怕嚟緊晚晚都要喺屋企玩手指玩到過埋農曆年.  

 

好彩 6 號晚仲上得切尾班車, 全靠 friend 一早 book 定喺中環某窄巷內某地牢, 嚟咗過個劈到九彩, 斷晒片 ( 好耐冇試過 ) + 第朝瞓醒發現唔知點解右眼尾會起咗個 ' 樓 ' 嘅歡樂晚會 😂

一個非常好 mood 嘅地方

[ 窄巷地牢 ] 實在係個近年難得一遇嘅好地方, 因為係酒吧所以要有針咭先可以進入, 我冇喎 ! 但你有張良計, 我有過牆梯, 當夜用另類方法混入, 但再咁落去都唔係辦法, 因為而家個勢係要搞到啲唔打疫苗嘅人好似冇值入晶片嘅無牌狗一樣.

 

唔出街食飯其實還可以, 但係冇針咭唔騎得馬 ( 進入運動處所 ) 就一億個 NO !!! 最後就犯, 今朝死死氣走去打咗第一針, 終於攞到喺香港做人要領嘅牌 ( 針咭 ).

影完先見到大大個牌寫住 [ 不准攝影 ] 😆

打針等候時間唔耐, 流程暢順, 望住個綠色體育館場景同職員嘅制服, 忽然諗起 [ 魷魚遊戲 ] 😆   打針過程還好, 冇乜特別痛但又未到林鄭 ' 感覺很好 ' 咁嘅壇數, 打完坐多 半粒鐘就走得, 點知出門口嗰陣突然覺得隻右手臂有啲麻痺......  超 ~ 原來有樣嘢真係叫心理作用, 我打針係打喺左手喎.