飛機餐 tasting

返咗香港成個禮拜仲 jetlag, 日與夜都可以不停覺得好眼瞓, 前所未有.

CX HK - Paris 獅子頭 . 麥奀雲吞麵 . 牛肉粥點心早餐

我係個完全唔抗拒食飛機餐嘅怪胎, 幾年冇飛, 上到機有種久別重逢嘅感覺, 好期待食飛機餐 😆  睇完 menu 整個獅子頭吃吓先.  

味道 ? 當然唔係上海菜館嗰啲咁正啦, 但我比合格喎, 因為餐飲服務搭夠. 一直好想同 [ 魚翅航空 ] 平反, 個人認為, 喺大機構迂腐環境限制下, 班員工已經盡最大努力滿足客人要求, 例如我上機冇帶叉電插頭, 空姐會出動私伙借用, 咁嘅 service 仲想點.

BA Paris - London

BA London - Florence

之後兩程 [ BA 英航 ] 歐洲內陸短途機, 冇期望反而有驚喜, 嘢食味道算係咁, 以前坐 BA 空姐又老又惡, 而家好似有啲改善.

Air France Rome - Paris

跟住搭 [ Air France ] 羅馬飛巴黎, [ Air France ] 當年空服顏值非常高, 有啲個樣古典到好似雕塑咁靚, 點知今班機嘅組員外貌水平唔多掂.  

飛機餐亦 surprised 到我, 因為塊肉好嚡, 真係分唔出係雞定係柴魚, 好彩有大把時間慢慢𡁻, 同埋啲餐具好靚, 最 like 嘅係空姐大方地不停 refill 香檳, 拉上補下整體都算合格.

CX Paris - HK

咁多程機, 回程香港班 [ 魚翅航空 ] 最滿意.

下晝機一啲都瞓唔著, 上到機坐喺度冇嘢做唯有喪劈 🍾🍾🍾

由登機 --> 起飛 --> 鬆開安全帶, 起碼飲咗 4 杯 😂   跟住開始無限食, 手撕雞, 魚蛋麵, 飲大兩杯醉醒剛好到晚飯時間, 口痕叫個 burger 試吓, 諗住都係嗰啲頹包頹肉頹菜之類啦, 點知咬落又 ok 喎 - 牛肉唔嚡, 番茄生菜新鮮, 薯條仲好似有啲脆, 點整㗎 ?

CX 手撕雞 . 魚蛋麵 . Burger . 牛肉粥炒麵

要失禮人 . 先失禮自己

等咗好耐今日終於可以返香港了, 如果呢次尾站係羅馬嘅話, 一定會好唔捨得, 可惜訂機票之時仲未有直航, 唯有喺巴黎飛, 所以真係一啲都冇唔捨得, 仲求之不得快啲閃添.

呢張已經係我覺得巴黎最 funny 嘅相 😂

如果有 take 2, 一定唔會留巴黎 4 日咁耐, 唔係講笑兩日都嫌多 !  

人人話睇完 Emily in Paris 巴黎勁正好想去, 做乜要無鞋挽屐走 ?  因為巴黎對我嚟講好悶, 可能因為 covid 影響變得非常俗氣, 冇晒 character ! 以往嘅古典優雅, 流住浪漫血統嗰啲巴黎靚人都唔知死晒去邊 !?  而家成街連鎖店同爛身爛世後生仔, 仲臭狐添 !  呢啲, 應該係佢哋 ( 法國人 ) 多年嚟夢寐以求 globalization 嘅後果吧.

BEFORE . 一片平靜

媽叉完法國, 輪到媽香港同胞.

香港人成日笑 big 6 失禮, 不如等我反拍吓眾人醜態, 睇咗, 自己反省吓先好去嘲笑人哋啦.

拍攝場地 :

AFTER . 香港人高矮肥瘦 . 拉篋背囊去搶食 !

巴黎 CDG airport terminal 1 CX c/o Extime lounge

我比較早到達 lounge, 當時人客只得小貓三四隻, 呵 ~ 竟然有香檳, 一於唔客氣飲番杯先.  

點知坐坐吓突然大量港客擁入, 廣東話大抄大鬧, 個個攞住拉篋背囊, 衝晒去食物 counter.  油麵雞粥腸仔, 大減價瘋狂勁搶 !  

有相為證 : 左手攞拉篋右手搶食, 好 L 肉酸.

河馬身型香港阿姑, 大大聲話自己係 marco polo 金咭可以帶 friend 入 lounge . 睇完佢專容, 我決定好好警惕自己, 千祁唔可以變成佢咁 !

但咁都唔止喎,

Lounge 裡面仍然堅持孭背囊著羽絨飲 4 杯的神奇女子

奇怪港人行為仲有 :

• 攞完嘢一路食 jap jap 聲一路行番埋位, 以為自己喺旺角女人街 ?
  
• 碟碟嘢堆到成座山咁高, 以為自己食緊自助餐 ?
  
• 一人同時攞 4 杯唔同嘅 cocktail, 驚死蝕底, 每杯最後飲半啖就唔飲, 折墮 !
  
• final call 10 分鐘登機都仲要淥個 MAMA 杯麵嚟食 !
  
• 擸大量生果, 水同 MAMA 杯麵上機 😦

Lounge 嘢食味道其實一般般, 搞乜咁都要搶 ? 一句講晒 : 貪心怕蝕底.

咪當我係病夫

[ 又老又醜 ] . [ 又老又殘 ]  呢兩組形容詞, 大家應該唔會陌生, 咁 [ 又老又懶 ] 有冇聽過呢 ?

[ 又老又懶 ]  咪係我囉 !  

呢個歐洲之旅, 好多地方出發前多多諗頭, 但永遠喺臨門一腳, 如果冇約實人而自己又可以決定行程的話就會突然縮沙, 唔只一次㗎喇, 因為覺得將會行好多路, 好攰, 好辛苦 😆

[ 又老又懶 ]  除咗展現喺行為方面, 仲有語言溝通. 後生啲啲嗰陣 ( 唔係好耐世紀, 只不過係 4-5 年前 ), 去法國意大利都肯講吓意文法文.  而家 ?  咁辛苦要用腦, 所以如無必要真係睬佢都傻.

暫時整個行程, 除咗 hello / 多謝 / 唔該 / 拜拜, 能夠令我開金口講完整句子, 只有兩次.

 2019 年嘅舊相

#1 地點 : 羅馬 

事件 : 參觀意大利總統府 

https://palazzo.quirinale.it/visitapalazzo/prenota_en.html

4 年前 2019 因遲到兼冇帶 passport ( 自己 on9 ) 而被拒門外, 白行一趟.   4 年後 2023 深深不忿回魂一擊, 準備充足, 點知行到總統府附近已經俾警察截住話唔准入, 妖 ~ 嗰刻真係著咗 🔥🔥🔥, 竟然流利意文話 : " 我有預約參觀總統府個喎, 點解唔俾入 ? "  講完自己都打咗個突, 一定係特異功能, 因為而家叫我成句講多次都講唔番. 

咆哮之後當然入到啦, 成個參觀仲有兩個 6 ' 3" 意大利型男帶領, 特別醒神.

一如所料全團意粉 ( 唔明點解 website 英法意對照, 原來最後係意文導賞 😅 ), 得我一個亞洲人, 但冇人懷疑喎, 可能個樣西呃到吓人, 其實就算好留心聽, 都明得一半㗎咋 😂

爭輸位的法國女人

#2 地點 : 羅馬飛巴黎航機

事件 : 登機發現有條法國婆坐咗我個位 ( 6A ), 佢初頭以為我唔識, 大大聲講法文話航空公司可能 double issue 堅持自己坐啱.  不幸地, 我識法文喎, 我非常有禮貌請佢攞張票出嚟對吓, 咁就知龍與鳳啦.  

法國婆原來 6F 囉 !  跟住仲同我死撐 6A 同 6F 都係一樣窗口位, 叫我坐 6F, 痴孖筋 !  一 L 樣你自己又唔坐 ?  睬佢都傻, 我話唔一樣堅持坐 6A 😆, 條法國婆唯有死死氣坐番去對面, 欺善怕惡想同我玩嘢, 食屎啦. 

歐洲唔使戴口罩, 認住我啦, 亞洲惡人呀.

巴黎躺平再彈起

巴黎好彩冇限電令, 酒店房暖笠笠, 搞到晚晚都好好瞓, 尋晚仲破記錄瞓到成 9 粒鐘添, 真係好耐都未試過 !  其實可以再晏啲, 不過晨早 5 點幾睇咗個 whatsapp 之後就極度 hyper 再瞓唔番.

做乜咁高興 ?  因為我條賤 ex-老闆 ( 乞兒 ) 俾人炒咗, 三月尾到期, 咁佢當然同人講話係自己辭職啦, 想多啲時間同家人一齊喎, 我呸 !  上年已經出公數飛咗歐洲成 4-5 次同家人見面, 仲唔夠皮 ! ?  

條友乜都唔識所以乜都唔做, 喺香港擺明呃飯食, 呃都唔緊要, 唔好煩到我就得, 點知條乞兒老虎頭上釘蝨乸, 做埋佢嗰份倒轉頭仲要受佢氣俾佢大支嘢串串貢.

條氣 chok 咗 : 足足成年 !  

 

同自己講, 無論如何一定要忍, 要親眼睇住乞兒點收皮.  

 

今日終於願望達成, YES 💪💪💪

可能 covid 關係巴黎變咗好多, 變得好悶好平凡, 好多特式小店都執晒笠, 剩低嗰啲都係香港有嘅連鎖法式品牌, 行兩日街行到腳痛都買唔到心頭好. 發爛渣, 都係返酒店躺平 : 飲吓酒, 睇電視暖吓好過 ( btw, 法國電視幾好睇㗎 ).

今日呢個喜訊俾到我好大激勵, 嗱嗱聲仆出去買香檳同魚子醬, 嚟個自 high mini-party 先 🥳🥳