澳門之大食 (一集完)

今年香港打風特別多, '米娜' 啱啱走咗, 隔幾日 '樺加沙' 又殺到, 而好彩我哋又偷到雞, 喺兩個風之間嘅罅隙整咗個澳門遊. 

呢個快閃同以往不同之處, 就係朋友有澳門車牌, 除咗由香港出發直剷澳門, 仲可以喺澳門街道四處游走, 去邊度都點到點完全唔駛人肉走動, 簡直高級享受.

去澳門唔係賭就係食, 喺 youtube 睇到小肥 ( 澳門歌手 ) 介紹一間新餐廳 https://www.youtube.com/watch?v=Hnq-Tz7AKfg, 主打土生葡菜, 地方同食物都好似幾有睇頭, 一於去試吓.

餐廳叫 [ 土生公館 Casa Maquista ] https://www.instagram.com/casamaquista, 位於氹仔龍環葡韻, 超近官也街. 一直都好鍾意殖民地風格建築, 多年前參觀已經覺得好有氣質, 估唔到而家仲可以喺佢哋嘅葡式百年別墅裡面食飯, 超期待 😀😀😀

大宅前身係高級官員官邸, 牆上掛滿官員當年生活照, 加上懷舊裝飾傢俱擺設, 感覺真係好似去咗大戶人家屋企食飯咁. 

餐牌有 [ 土生菜 Macanese Gastronomy ] 同 [ 葡國美食 Portuguese Cuisine ] 兩部分, 我哋每邊都 order 咗啲.  

頭盤 : 1) 黑毛豬咖喱角  2) 馬介休球  3) 燒葡萄牙腸.

馬介休球 | 黑毛豬咖喱角 | 燒葡萄牙腸

嘢食方面very ok, 先講個 [ 馬介休球 ], 完全唔同平時喺澳門食嗰啲一味得個鹹字.  [ 燒葡萄牙腸 ] 仲正, 望個樣好油但食落超香口完全唔覺油, 都係嗰句, 因為唔太鹹囉 😆😆  [ 黑毛豬咖喱角 ] 點嗰個汁甜甜地, 幾惹味.

(右上角起順時針) 焗鴨飯 | 焗肉餅 | 烤焗八爪魚 | 黃薑雞腿 | 蒜蓉雜菜  

主菜 : 1) 焗肉餅  2) 黃薑雞腿  3 ) 蒜蓉雜菜  4) 焗鴨飯  5) 烤焗八爪魚  

[ 焗鴨飯] 香味四溢, 鴨汁滲透飯粒, 有少少飯焦添, 真係一流 👍   [ 烤焗八爪魚 ] 唔止夠入味, 仲一啲都唔韌.

[ 黃薑雞腿 ] 同 [ 蒜蓉雜菜 ] 正常味道, 反而個 [ 焗肉餅 ] 就一般, 好 '漏', 應該冬天食會適合啲.

綜合以上, 原來都係葡國菜係比較啱我. 同人一樣, 我鍾意純種, 唔鍾意混血兒 😂😂

回航途上

狂噴四葉水

自從 DiDi 出現, 去大陸城市對我嚟講已經變成 easy job, 除咗唔駛再周街追 / 同人搶的士外, 仲可以免卻同當地司機溝通不良嘅麻煩.

上海有個相當重口味嘅地方, 一直都好想去, 但地點有少少辟, 當年未有 DiDi, 我怕入完去冇的士出番嚟, 咁就大鑊, 所以最後冇成行.

啱啱個禮拜一時機終於到喇, 喺酒店 DiDi 一嘢車過去都唔駛 68 人仔, 爽 !  我諗個地方應該唔係太多香港人知 : [ 1933老場坊 ] 原本係個大屠房, 由英國建築師 Balfours 設計, Brutalist 粗獷派混凝土建築, 堅靚.

出發嗰陣落咗場特大雷雨, 好彩之後出番猛太陽咋, 如果唔係個場氣氛應該會相當詭異......  不過落完雨出太陽嘅 bonus, 就係蚊螆洶群而出, 咬到我成手蚊赧 !

平面圖

建築物由內外兩部份組成 : 

內 : 圓形建築 (紅色) 為 [ 屠宰室 ] 

外 : 方形建築 (灰色) 為 [ 牲口畜養區 / 圈舍 ]

內圓外方由多條縱橫交錯嘅露天天橋連接.

天橋唔同闊度, 用嚟分類, 俾唔同 size 嘅動物通過由 [ 牲口畜養區 / 圈舍 ], 送到中央區 [ 屠宰室 ] 屠宰.

[ 屠宰室 ] 舊照

動物唔識行樓梯,所以四層

嘅屠房各層由斜道連接, 地面為石仔防滑水泥物料, 防止啲豬牛羊喺滿佈血水嘅斜坡上走動時跣倒 😰  

斜道旁仲有急轉灣超窄嘅樓梯, 作用係俾員工喺牲口發癲嗰陣, 可以快速閃逃 ! 

設計實在太周詳了.

好有成功感, 等咗多年, 終於可以參觀呢個咁另類嘅 '景點' 😆.  不過事後先諗起, 原來而家仲係農曆七月囉, 哎吔....... 七月去埋呢啲殺戮, 怨氣咁重嘅地方, 都係快啲狂噴四葉水先得 😛

吹佢唔漲

2025 盂蘭翌日, 參加咗一個喺中環海濱耗資成 3 千萬, 籌備咗 8 年嘅 "香港熱氣球 (水魚) 節" 盛事.

事前已經收到風, 大會因高溫天氣關係, 早上時段熱氣球只會限時快閃,  所以今朝晨咁早 8 點未夠就趕去.  還好, 到達當刻仲可以目擊到充咗氣嘅熱氣球, 打得切咭.

說時遲那時快, 8:12am 已經見到啲熱氣球好趕住收工逐一摺埋倒下 😫, 曇花一現簡直快到冇朋友.

水魚節星期五六日舉行, 想問, 夠竟有幾多人 weekend 會趷到起身 8am 前去到 ? 遲過 8 點 3 基本上就連一個氣球都睇唔到, 唔係諗住啲人隔住圍欄遠眺啲攤平晒喺地上嘅波皮, 就過到骨吖嘛 😆😆😆 ?!

咁差勁嘅垃圾安排, 連日被人瘋狂圍剿狂屌, 兼大叫回水 !  大會竟敢厚顏死撐 : 就算睇 / 坐唔到熱氣球, 場內都仲有好多其他嘢可以食同玩 ( 乜春嘉年華, 攤位遊戲​, 電單車特技表演, 海洋公園 "加加" "得得" 充氣熊貓......), 真係 WTF 無話可說 !

最搞笑, 係入場嗰陣聽到兩個工作人員哥仔對話, 好重怨氣, 極度明顯佢兩個喺呢幾日連環俾客狂屌 3000, 真無辜.

正 chook 鷄

每次去 Sydney, 如時間許可的話, 必定會到邦迪海灘 Bondi Beach 一遊. 今次都唔例外, 雖然冬天冇得落水, 但醉翁之意不在酒, 我哋目標其實想試嗰度一間人氣餐廳 Sean's Bondi https://seansbondi.com/.

Sunday lunch@Bondi, 一路上見途人無論朋友 / 情侶 / 寵物 / 一家大細個個勁 chill, 搞到心情都靚咗, 哈 ~ 原來我咁容易受人影響個喎 😂. 

無辦法, 香港生活實在太 chur, 已經久違咗呢種週末放假休閑 feel.

餐廳藍調海洋風, 手工貝殼吊燈 / 天花鯨魚裝飾, 加上牆上老闆 artwork 收藏, 襯埋 rustic 傢俬餐具, 我真心覺得收貨 😍

酒店食完早餐冇耐就出發, 因早餐份量實在太豐盛, 去到 Bondi 我哋仲未落隔, 而餐廳又冇散叫只 serve 3-courses set, 諗住要用意志 KO 啦, 點知啲嘢實在好味, 雖然大碟, 我哋毫無難度就清場照晒鏡囉 !

我當日嘅餐單 :

1) 頭盤 - 鵪鶉沙律 - 好抵啦, 一碟有成六隻肶 ! 身為鵪鶉控, 呢個係我喺法國境外食過最美味嘅 !

2) 主菜 - Grassland chook 走地雞 - 原來澳洲 slang 雞叫 "chook", 學到新嘢 😆

3) 甜品 - 鹹味嘅澳洲芝士 😆 - 冇計, 香港人叫甜品, 要走甜嘛 😆😆

哇 ~ 餐廳個 signature dish : Grassland chook 走地雞, 色香味俱全近乎完美 !  記憶所及, 呢碟係我 2025 年度暫時食過至掂嘅雞 💪💪💪  肉滑嫩 juicy 兼彈牙, 啲雞皮仲薄過燈影牛肉, 唔係講笑, 真係好味到我唔介意每個月去幫襯食一次 !!

最佳伴侶

差不多成個月冇寫 blog, 因為忙, 不過講呢啲冇人信吧, 再加上最近公事激心搞到血壓勁飆, 所以真係收晒皮, 唔七街應酬唔食嘢見人, 生活平淡自然就冇乜好寫啦.

蠔殼失蹤前

上個 weekend 終於偷雞飛咗 Sydney 轉, 記得上次去, 已經係 2019 年 4 月中撞啱 " 安心偷食" 事件, 時光飛逝, 話咁快就 6 年了.

哇 ~ 今次同行個 friend 勁猛料 ! 其實 10 幾年前旅行已經領教過佢嘅厲害, 今次再 "拍乸" 佢都感覺有啲係自虐, 找死. Friend 話自己未去過澳洲, 全個行程交俾我安排.

根據往績, 都預咗條友難搞 ( 記得當年旅行, 食飯開酒夾錢嗰陣, 佢連自己飲咗支酒嘅幾份幾, 都同我算到盡 ! ), 講錢傷感情, 費事勞氣一於豪俾佢 : 全程免收酒 + 的士錢, 點知呢個人原來咁多年都未化, end up 不斷做出好多騎呢兼怪異嘅行為, 令身邊人非常尷尬 :

- 搭早機約 7:00am 喺香港機場集合, 6:25am 電話响起已心知不妙. 果然, friend 話唔知醒啱啱先起身, 約佢 7 點就 7 點先出門口去機場 ! 遲到, 連 sorry 都冇聲, 仲夠膽死同我講趕得切因為 [主] 幫佢 😆😆   信耶穌得永生, 乜都佢講晒.

- 千叮萬囑, 澳洲係唔可以帶食物入境, 佢喺飛機都竟然擸咗人哋兩個 yogurt, 一罐 perrier 同兩個蘋果袋走, 好彩最後冇被海關捉到.

- 8:30pm 落機, 發現自己香港嗰張 sim 咭喺澳洲用唔到, 喺機場 arrival hall 走嚟走去, 間間嫌貴喺度磨爛蓆同人講價, 結果搞到差不多 10 點先去到酒店, 一入房就嗌肚餓 (人哋 room service 晨早收晒工啦), 我建議佢食自己喺機上 "噠" 嗰啲糧, 佢黑我面.  最搞笑係 complain 間房嘅廁所太大, 我話細就話唔得啫, 請問大又有乜問題呢 ?! 佢話我語氣重, 鬧佢 😂😂😂

- 第朝打車, 突然攞支紫花油出嚟搽 😱😱😱😱😱 好大陣味呀大佬, 我真心覺得臭同戥個 uber 司機慘, 問佢係咪唔舒服, 佢話唔係, 咁搽油動機係乜呢 ?!

- 去到 Sydney 不斷提住要食龍蝦, 好啦, 搵咗個出名食龍蝦地方 (要特登去嗰隻), 坐低竟然玩嘢, 話都係唔食, 叫人攞個 plant base green menu ! 嗰刻, 真係好想車巴佢 ! 😡😡

- 終極騎呢, 係佢之後叫咗半打生蠔, 食完撻走 4 個蠔殼直接放入自己個 Celine 手袋入面 😱😱😱  蠔殼唔食得, 問佢攞嚟做乜, 唔答.  我話咁腥, 至少用水沖吓先攞啦, 唔睬. 結果 waiter 嚟收盤嗰陣, 見到剩兩番個蠔殼, O 咀之餘仲啤咗我哋一眼 !  OMG, 真冤枉, 好想尖叫 : " it's her, not me ~~~~!!!!!!!!! "  簡直人生大尷尬, 想問 waiter 有冇膠袋賣, 俾我笠住個頭.

一分鐘的朋友

份工原本好地地, 唔知點解自從六月尾就突然勁多嘢做, 連日激戰, 真係做到趴喺度 !  堅 chur 咗足足兩個幾星期, 最近米已成炊, 得就得, 唔得就七.  

今朝, 終於有機會休息吓約朋友出嚟飲早茶, 地點係 < 阿飛正傳 > 阿飛 Leslie 同 Maggie Cheung 蘇麗珍 " 一分鐘的朋友 ", 扮南華會個鐘嘅真身所在地 : 舊中銀停車場, 樓上嘅中國會.

中國會多數晚黑去, 日光白白幫襯, 真係第一次 😆   

終於有機會日頭一窺全豹, 原來餐廳情懷相當懷舊, 如果唔係望出窗外見到隻 Zaha Hadid 飛機杯, 應該會幻覺自己喺上海.

大鄉里, 唔知嗰度除咗點心, 原來仲 serve 西式早餐, 不過我哋當然堅持吃中式啦.

得人驚, " 盲盒 " 點心紙冇 show 價錢嘅, 會所地方問人收幾錢又好似有啲 cheap, 斷估唔駛兩百蚊碟掛...... ( 下面開估 ).

最後叫咗 4 樣嘢 : 蝦餃 | 牛肉腸粉 | 蘿蔔糕 | 皮蛋瘦肉粥 - 但識我嘅都知我唔食嘢, 所以我食完半碗粥同少少點心已經飽晒, 辛苦個 friend 埋尾清枱 😂  

全部點心味道都唔錯, 唯一遺憾, 就係嗰度上午冇酒飲 😂 同埋我叫咗碟潮州辣椒油, 原來要收 28 蚊碟 😑

結論 : 整體經驗唔錯, 非常 ok, 可以再來. 

蔡 san & 三文魚生 friends

成日比人笑我唔食嘢, 無可否認呢個係事實, 其實超鍾意食, 但怕肥, 因為我係食少少就勁肥嗰隻底 !  

7 街食, 望住身邊嗰啲每次瘋狂食食食, 食多過我 N 倍但都仲保持到小蠻腰嘅中女, 真係羨慕又妒忌.  同人講笑, 如果食嘢唔肥, 我一定 24 / 7 不停食, 因為食材俾人類適當發揮嗰陣, 真係可以好 x 好味 ! 

易肥體質唔應該再浪費 Quota : 因為食乜都只可以蜻蜓點水, 要不停地珍惜, 久而久之, 引爆咗我對食物質素極高要求小宇宙 !  

人肉 AI : 自己八卦, 再加上當年做品牌時期同班 PR | Eventing 高人們搭上, 所以世上 ( 發達國家 ) 邊度有超靚超好食嘅地方都知, 朋友只要講清楚 budget, 要求同人數, 我都一定可以 pair 到個 95% 或以上適合 & 滿意嘅 venue, 勁過 AI ( 講笑啫...... 有乜可能吖 😂 ).

蔡 san : 多年前, 冇意中發現蔡瀾個花花世界網頁 https://www.chualamscolorfulworld.com/ 裡面除咗有佢寫嘅 blog https://bobostory.wordpress.com/ , 仲有好多飲食見聞, 雖然未必認同所有觀點, 但時不時參考, 都會有驚喜, 多次因為跟佢推介而搵到真正好嘢食.

蔡瀾堅持每日一篇, 有時寫唔切仲會喺 FB 同網民交代. 但自從 2024 起, 就愈寫愈少, 跟住仲突然 switch channel 轉寫全英文.......

三文魚生 : 港人必備, 香港食魚生一定會有三文魚, 我由細到大都食唔少, 不過幾年前睇到蔡 san 一篇文章, 話佢從來唔食三文魚生, 因為當年喺日本留學時期, 啲日本人話佢知三文魚生有超多寄生蟲, 日本人自己唔會食 !

唔理真定假 ( 蟲係我嘅世界第一驚 ! 仲驚過冇錢 | 鬼 | 冇酒飲 ), 就喺當刻, 我就完全冇再掂任何三文魚生. 每次去日本, 都會喺啲食肄餐廳觀察吓, 噢 ~ 原來日本人, 真係唔食㗎.

[學] 牌神棍

近期公司接咗單喺海港城嘅裝修工程. 

某日, 個天龍人客人 send 咗張物體俾我, 話係佢哋國內大師對新店嘅風水建議, 想麻煩我開舖前幫手買啲風水擺設. 一睇張 plan 就知流 : "雙龍護主", "珍珠鍊", "福納貔貅", 乜春嚟㗎 ?!   

CLS, 一於耍吓佢先 😆. 

我扮嘢話買嘢冇問題, 但要現場 set up, 唔識個喎.  問天龍人大師幾時會落嚟香港新店擺陣, 佢答 : [ 應該不會了, 因為師傅沒收錢 ].  哈哈哈, 一分錢一分貨, 我懂了......

完全唔駛睇坐向同量度方位, 好佩服大師可以隔空整合個風水陣 😂.  又或者佢係用 [ 奇門遁甲 ] 啦, 但擺嘢嘅 "日期 + 時辰 " 就應該更加有嚴格要求, 講究起上嚟, 連去擺物件嗰個人嘅 " 生肖 " 同擺陣嗰個 "日期 + 時辰 " 有冇沖剋, 都要計埋 ! 

咁 casual, 壇嘢堅極有限.  不過又真係吹佢唔漲, 而家就算擺到明流, 竟然都會有人 buy, 所以我要調節吓自己心態, 唔好踢爆人 😛, 反而要去偷吓師, 向神棍之路, 再邁進一步. 

晚食過一戙

5月 21日起, 一連 19 天晚晚七街食, 唔止飽, 仲好攰, 因為馬拉松連環躝街都需要有番咁上下體能. 

今個禮拜頭唞咗兩晚, 星期三四又食過. 

中環安蘭街呢間日系割烹料理 Ryota Kappou Modern https://www.ryota.hk/ 其實開咗七年, 出奇地一次都冇幫襯過.  

啲 friend 痴線唔知做乜咁準時, 我早到 5 分鐘都已經係最遲嗰個 😆😆😆

場地黑𠵼𠵼環境相當有格調, 接過 waitress 餐牌, 哇 9 道菜鮑參翅肚樣樣齊, 同去飲差唔多 😂

香港市道差, 但星期四嗰晚餐廳坐無虛席 full house, 可惜地方細, 人均 $3000 計, 就算坐滿成晚頂多做到 6-7 皮.

出嚟之前公事不順, 心情欠佳, 未能專心品嚐食物及欣賞廚師們喺 open kitchen 創作料理之樂趣. 一日後回魂, 先醒覺起有 4 道菜其實特別好食 :

1. 鮎香魚春捲 RIVER AYU SEETFISH SPRING ROLL 😋😋😋 - 炸到脆卜卜春卷皮包住鮮嫩多汁白色魚肉, 日版 fish n' chips. 

2. 魚翅鮑魚湯 HOKKAIDO ABALONE SHARK FIN MINI HOTPOT 😋😋 - 因為本身好鍾意食翅, 未打先贏, 日式高湯帶出非常豐富的口味, 可惜鮑魚 😑 我麻麻, 所以冇俾滿分.

3. 魚生拼盤 SEASONAL SASHIMI  😋😋😋 - 擺碟勁靚, 每片魚生配搭不同調味, 啖啖都係驚喜.

4. 毛蟹素麺 HAIRY CRAB SOMEN WATERSHIELD 😋😋😋😋 - 當晚食物總冠軍, 成件事可以用 '清新芳香' 呢四個字形容, 兩片薄薄嘅青檸簡直畫龍點睛.

JAPANESE WHITE PEACH SCALLOP KYOTO TOFU CREAM CAVIAR | RIVER AYU SWEETFISH SPRING ROLL 😋😋😋 | HOKKAIDO ABALONE SHARK FIN MINI HOTPOT 😋😋 | COLD EGG CUSTARD

SEASONAL SASHIMI 😋😋😋 | WAGYU & UNI SQUID SUSHI | SIMMERED KINKI SMOKED EGGPLANT

GRILLED OMI WAGYU WAFU SAUCE

HAIRY CRAB SOMEN WATERSHIELD 😋😋😋😋

MELON CREAM SODA

其實個燒和牛都好香,不過我只係食咗一塊,幫手食埋我份嗰個人仲一路食一路潤我 😆, 話多年前問有乜嘢嘢食, 對我嚟講係一定唔可以喺呢個世界消失 ? 

佢笑笑口話我當年答佢 : 牛肉 ! 因為牛好好食, 真係好鍾意食牛 ! 估唔到, 今天嘅我竟然少食.

諗諗吓, 又好似真係有咁講過喎 😜 哈, 條友又會咁好記性嘅 ?! 

不留港消費 L

啲人成日話自己唔飲得, 其實唔係㗎. 除非真係唔鍾意酒嘅味道又或者對酒精過敏, 飲酒, 係有得學. 酒量, 係可以訓練㗎. 

當年考酒牌結識到志同道合嘅酒友, 自從 2011 年尾大家定期舉行酒局, 風花雪月不在話吓, 最正佢哋大部份係 i-banker, 時不時俾貼士我去 "趨吉避凶" 😆, 都咪話唔爽.

葡京風水陣實在太明顯

成班酒鬼喺香港飲咗十九幾年, 有 free corkage 或特式嘅地方都已經去勻, 真係有啲悶. 

Entrance to Wine Cellar

最近其中一個酒友因公務同澳門葡京入面葡國餐廳侍酒師 (sommelier) 搭上咗, 話可以特別安排我哋去參觀餐廳嘅酒窖 = 全亞洲最大酒窖.  親身欣賞已故賭王 Stanley Ho 嘅超級收藏, 呢啲機會唔係時時有, 諗都冇諗𦧲飯應. 

可能日頭去, 沙圈冇乜雞

爆房 table setting

尋日, 我哋一行 7 人衝出香港過大海, 12:30 先參觀酒窖, 跟住食 lunch 大劈 💪💪💪 

可惜葡國餐廳啱啱裝修緊 ( 都市傳說 : 葡京總有一瓣裝修緊, 因 [裝修] 同 [庄收] 同音, 用意好明顯啦 😉 ), 我哋被安排爆房食日本菜, 好彩食物 / 招呼都唔錯, 眾人非常收貨.

個場真係好 Q 大 . 比例上我哋都係咁細粒㗎 ja

酒窖喺葡京雀籠頂個位, 據聞現時收藏超過 50 萬支酒, 大部份仲係法國一級莊, 如果當每支 HK$1,000 ( 哈哈其實冇可能咁平 ), 保守估計市值五億港幣.  何況, 多數酒其實支支過萬, 超 rare 嘅仲三四五六十萬起跳 + 最貴嗰啲球幾嘢 --> 咁即係五億 x 10+倍啦.  

貧窮限制想像 😂  只能講句 : 何生, 你真係好 L 有錢呀 ! 

問酒窖啲人賭王生前鍾意飲乜酒.

噢, 原來係 : 法國 Chateau Palmer 1962 同 Riesling ( 德國 / 奧地利白酒 ).