半島樽鹽

咁個 view 又真係無敵嘅

前晚上海舊同事突然來港, 差不多夜晚八點先落機, 話約出嚟飲嘢, 成十點先開始, 對我嚟講真係有啲夜 😆  不過冇辦法, 鬼叫咁啱又諗住點佢去打電話, 幫我月尾喺深圳訂餐廳食飯咩 ?

選址亦係另一難題, 香港而家大部份食肆都早收, 要搵個踎得吓, 又唔太嘈傾到偈嘅地方, 原來非常之唔容易. 

充滿儀式感嘅電梯大堂

最後揀咗 N 年冇去, 半島頂樓嘅 "Felix" https://www.peninsula.com/en/hong-kong/hotel-fine-dining/felix.  

原來兩位 '貴賓' 都係第一次去 Felix, 覺得餐廳個維港景好靚同好震憾, 太好喇, 搵對地方.

餐廳當年風貌 (網上圖片)

餐廳 1994 年開業時期驚為天人, 引來各界設計人士洶湧朝聖, 我當然都有份隨波逐流. 

記得有次食完埋單, 等咗好耐張單都唔嚟, 好奇怪 👀  最尾 found out 原來個 friend 撻咗人哋枱面個鹽樽 😱😱😱 ( 好似一支花 🥀 咁嘅威尼斯玻璃樽非常精美, 明顯係餐廳特別訂造 ), 應該有職員發現咗, 但又唔想出口話佢撻嘢, 所以就用唔埋單呢招, 等佢自動自覺擺番出嚟.  極樣衰, 叫個 friend 快啲攞番出嚟啦, 果然, 當個鹽樽喺枱面重現, 唔駛 30 秒張單就到 !

話時話, 呢個人其實就係我上年八月 "最佳伴侶" 個 blog https://shirliek.blogspot.com/2025/08/blog-post.html, 喺悉尼某餐廳撻蠔殼嘅, 為同一人 ! 😂

一月一號之日常

HAPPY 2026 🎉🎉🎉🎉

馬會, 好多人想入但機關算盡入唔到 ; 入咗嘅, 原來想甩身退會都唔係咁易 😆😆. 正所謂...... 有人辭官歸故里, 有人漏夜趕科場.

當年, 全靠公司律師幫忙成功入會, 諗住喺雙魚河騎馬, 點知做咗會員, 先知嗰度騎馬原來要玩埋堆分黨分派, 哎吔最驚呢啲, 所以最終都係留返喺土炮私人騎術學校算數.

以前騎完馬, 時不時都會同啲馬友揸車過去雙魚河 hea, 食吓嘢, 環境好風水一流, 賞心樂事度過了不少開心日子.  但自從會所 N 年前取消咗非會員泊車制度, 就好少再去, 大佬, 我一架車車唔到咁多人, 同埋嗰度咁隔涉, 附近完全冇 parking, 叫人啲車擺去邊啫 ? 

每年一月一號, 早上通常都會嚟個新界北 new year kick-off 開運遊, 今年 2026 都唔例外, 心血來潮仲剷埋入雙魚河, 可能實在太多年冇去, 連喺會所裡面架車要點行同泊去邊都唔記得, 最樣衰, 係表演埋我最擅長嘅 "逆線行駛" 💪💪💪, 搞到職員要追出嚟, 防止我再亂揸, 叫我行番正路 😂😂😂😂 . 

啲 friend 成日笑我 "人車合一", 佢哋冇錯, 全對㗎 😅.