Art of 蠢

呢幾日, 連環比啲人同事激到彈彈吓.   唔關啲馬事, 佢哋好生性, 不過馬會個死投注網頁唔得呢!    臨門落注先嚟網路大塞車, 唔接受我投注. 第 5場揀嗰 3隻馬全中入三甲, $30注位置Q 可以收成千!   洩咗呢度氣, 跟住就場場輸, 頂~

今日心情暴躁, 食晏仲要比人話我蠢!

蠢! 可能背後成日比人講, 但係兜口兜面話, 呢生人真係第一次.

不過諗落有"so",  因為我覺得女人最忌就係叻 (純粹個人意見), 女人可以強同有見識,  但 show 晒出嚟, 逞強乜都自己做就最戇居.    我最羨慕嘅女人, 係明明得但唔做, 扮弱, 挑起男士英雄感仆倒嚟幫, 爽呀! 

傻人有傻福, 蠢都有, 話我蠢嗰個offer 咗一系列 jek-so, 教我嘢呀.

分甘同味

成個夏天, 喺屋企飲Spanish Cava, 貪平, $68/支, 百佳買6支仲有15% off, 抵!    不過飲足成季有啲悶, 所以尋晚轉番飲Prosecco.
睇完 <萬凰之王> 胡幸兒生仔, 整咗個Kir Royal, 跟住入房繼續睇 <天與地>.

今朝起身, 發現一隻生勾勾嘅曱甴, 飲緊杯裡面剩低嘅 Kir Royal......  嚇得我一手將佢由個杯fing咗出街!   頂佢吖, 咁識歎.

話時話, 我以前隻雀都識飲酒㗎, 但係佢唔飲紅, 淨飲白, 有時飲開隊啲比佢"depp", 你一啖我一啖, 飲大咗, 佢會袱喺碌棍度, 好搞笑!

有個friend啲鸚鵡仲勁, 食肉!  飲茶食剩啲山竹牛肉, 炒飯同腸粉, 都會打包比佢哋食. 痴線.

P

今日好老土, 兩個appointment, 都臨時"被"取消.

夜晚嗰壇最唔抵,  舊同事約喺iSquare 打邊爐,  上網睇,  泊車最近係 <中間道停車場>.  

九龍啲路, 我完全唔熟.   尖咀, 我連行都唔識, 何況揸車?   不過, 始終都要克服, 由沙田出嚟一步都冇錯, 點知入到中間道, 臨尾香.

發緊夢, 見到個P字就剷㗎車入, 衝咗落斜去到閘, 先發現原來係 private parking!

最慘喺要倒後上番斜出.   以我咁屎嘅技術, 死硬  :  唔"dum"又溜前, "dum"又勁飆. 

果然一"dum",  就車咗落欄度, 車尾花咗啦!

Ok, 過對面, 入到真正嘅 <中間道停車場>.    

OMG, 啲車位......  一定細過法定嘅 2.5M x 6M.    初頭想泊嗰個位, 仲要有條柱頂住,  再窄10cm.    泊咗兩次都唔得, 最衰係後面有車等, 好大壓力.  

夠喇!  一於U-turn + 逆線行車, 行到我覺得安全嘅地方, 泊低架車.  跟住, 就啱啱好收到電話, 啲人話屋企有事或者唔舒服, 邊爐取消! 

牽一髮, 動全身

爆完光都幾日喇, 傷口好痕, 應該係就好嘅徵兆啩.

眉尾嗰 5 針, 好厲害 -- 搞到我半邊面戚住, 明顯高低眉!   橫睇掂睇, 個樣同以前都有啲唔同.  哈, 唔知可唔可以還原呀.

我而家確信, 拉面皮嘅效力.  落幾針, 可以做到好多嘢.

大花面

每次返娘家食飯, 都會攞走啲舊週刊.

有時揭揭吓, 都會見到某啲名人塊面比人畫花晒, 好明顯, 係我阿媽嘅傑作, 代表佢好唔likey嗰個人.

上星期六返屋企, 攞老豆份馬經睇, 一打開睇到呢幅阿叻, 笑爆咀!

唔知道原來佢都興呢味.

今年不斷血光之災

以為最安全, 原來最危險.

尋日入完場, 同 friend 喺屋企繼續飲嘢開餐, 只係飲咗半支白酒同一支Port, 估唔到出事.

Friend 走咗後, 我喺屋行嚟行去執番啲嘢, 點知PK, 成個人插水式趴咗落地, 額頭先着陸, 爆光成地血.

抹咗啲血, 執埋啲嘢, 洗面都冇望真個傷口就瞓覺.  飲到成肚水半夜起身去廁所, 一望鏡, 嚇死!   面上由左至右, 有一條乾咗嘅大血痕劃過!  望真, 眉尾爆開咗, 成個哈哈笑咁. 

但係又唔係好痛喎, 太眼瞓, 決定瞓醒先去醫院. 

結果聯咗五針, 盛惠3千6百幾. 同我打破傷風針個姑娘個名好搞嘢, 佢姓夏, 英文名叫Haha HA!!!

Halloween過咗, 唔好嚇人啦.

每次喺報章雜誌見到甘比就頭痛, 攞Hermes袋襯鄰家女孩look!  我知佢有好多, 不過襯喺佢身上......

 攞膽嘅, 仲有呢三個組合 :

1. 千年不變清湯掛面髮型 + 惺忪 "加菲貓" 眼 ;
2.  Ball 裙 + Legging ; 以及
3.  絲襪 + 露趾boot.

若果佢想掩飾對粗壯嘅腿, 唔該唔好著反光物料.

女人, 果然係妒忌心重, 如果唔係, 佢個時裝達人老友徐濠瀅, 有乜理由見佢著成咁都見死不救, 唔出聲?! 

有時, 太陽眼鏡真係女士嘅恩物.   你睇? 戴咗副超再加對耳環, 當堂成個人貴氣晒.

再度劈炮

而家喺台北, 啱啱email 咗辭職信比老闆, 係呀, 係頂唔順到連返香港都等唔切!

呢份工同自由行嗰啲搵笨團根本冇分別.

見工嗰陣老闆吹到大一大, 話隻牌子會係亞洲大展拳腳, 又話香港TST Gateway個office勁正, 12個人坐3000呎. 原來係虛擬嘅!

臨上工, 先話我知要返荔枝角工廠大廈, 仲要係寄人籬下.

食第一餐lunch, 同事已經同我大吐苦水, 話佢跟開個Managing Director阿姐, 之前嗰個禮拜突然比公司炒咗, 佢10月入嚟, 已經炒咗兩個staff, 點知今日...... 輪到佢!

我冇咭片架, 因為管admin個同事話隨時會搬喎.  

結果尋日通知, 下禮拜搬去TST一個serviced office, 問佢攞個floor plan睇吓啦, 一望, 原來只係租咗兩間150呎嘅劏房比8個人share!!  啲枱面對面坐連partition都冇個, 影印逐張計, meeting room要同人爭, 咁同報團<六星變地踎>, 有乜分別?!

晏晝仲可笑, 老闆嚟咗香港, 約我哋喺舖頭, 佢攞起個display嘅袋拼埋我同另一個尋日啱啱上工嘅同事身上, 話 : "你哋應該要用公司嘅product", 跟住問個sales個袋幾錢, 同staff discount幾多, 半價咗都成3千幾,  痴線架, 原來佢喺度<強迫購物>.  個袋, 送都要考慮用唔用啦, 要我買,食屎啦!

去New York開會, travel policy話可以飛business, 點知check咗價錢又嫌貴, 要我駁腳喺Seoul停5個鐘, 都算啦, 估唔到連住都騎呢過人, 為咗慳錢要我同新同事兩個人住apartment (唔係酒店), 一間房兩人share, 搞x錯!

辭職導火線, 係今朝發現星期二先開會, 但係我要聽晚就飛, 咁早去, 托塔咩?! 我叫同事改遲, 佢話唔得, 原來係為咗用特平discount, 所以限住要喺聽晚飛.

佢老味, 我唔做喇!

故作懸疑

平時揸車, 少出入大廈大堂,  今日唔記得帶八達通, 上唔到樓, 焗住要叫看更(女人)拍咭.

點知佢無啦啦問咗我條好懸疑嘅問題 : "咦, 郭小姐, 你住八樓個呵? 夜晚..... 有冇聽到啲"咩"呀?"

哇~  當堂打咗個突, 唔係有"嗰味嘢"嘛?

我問佢咩"咩"啦?  佢最初唔講, 之後就吞吞吐吐話 : "有冇聽到好大聲?"

搬嚟咁耐, 我聽過 3樣好大聲嘅嘢 :

1) 半夜瞓瞓吓, 比唔知樓上定樓下好悽厲嘅男人叫床聲嘈醒, 不過只係試過一次 ;

2) 自己飲多兩杯, <炸機> (呵呵, 而家應該冇人用呢個term) ;

3) 隔離屋 (綠色箭咀) 嗰兩個同居女人嘈交, 佢哋耐唔耐就會喺走廊吵鬧推撞, 𠹶嚟𠹶去度大門, 啀晒要報警!    通常嘈完, 半夜兩三點仲有下聞, 喺屋裡面再炒, 隔幾度門都聽到.

好彩個看更係講緊 no.3 啫, 幾驚個佢話我炸機嘈呀.

大閘蟹

後知後覺, 上個禮拜先食今年度第一餐大閘蟹.

去咗跑馬地 Crowne Plaza <海都>, 格局高檔, 招呼唔錯, 但價錢竟然非常合理, 六人套餐共12隻四兩重大閘蟹 $1688 (除開每人都係$280左右), 不過我哋花雕 + rosé wine 起孖, 埋單當然唔止呢個數.

唔知咩日子, 90%客都係女人. 

嗰晚鯨吞咗三隻蟹, 成口成手成身蟹黃味, '漏'到爆!   不過都忍唔住要打包個食唔晒嘅糙米糯米飯, 因為超好食.

前日帶咗返 office當 lunch,  叮好出嚟香到震, 肯定周圍啲人都羨慕.   加上綠色呢支"好嘢", 呵呵......

份工...... 咩料?

尋日都未正式 report duty, 新老闆已經要我飛台北.  不過ok, 因為可以見吓嗰度啲好耐冇見嘅朋友嘛.

去到, 打的去緊酒店途中, 突然收到 call, 話個 meeting取消咗!  咁都得?!  心諗...... 一定唔會咁筍, 淨係請我嚟打個白鴿轉嘅.

果然......

跟住個 CFO 就 call 嚟, 叫我 stay 喺酒店再等 call, 睇吓 next step 係點.    妖, 唔係嘛...... 做特務咩?  我最憎 stand-by同埋冇了期嘅等! 

以我嘅性格, 緊係唔會留喺度等, 一於出街.   點知外面天黑黑, 風大雨大, 我著住件短袖tee, 好寒吓.  但唔係太凍嘅天氣 (大約19-20度), 竟然有不少人著羽絨, 真誇張!

今日回程返香港班機, 隔離個法國佬著住套青蛙衫扮青蛙㗎! 

可惜影唔到佢全相.