故作懸疑

平時揸車, 少出入大廈大堂,  今日唔記得帶八達通, 上唔到樓, 焗住要叫看更(女人)拍咭.

點知佢無啦啦問咗我條好懸疑嘅問題 : "咦, 郭小姐, 你住八樓個呵? 夜晚..... 有冇聽到啲"咩"呀?"

哇~  當堂打咗個突, 唔係有"嗰味嘢"嘛?

我問佢咩"咩"啦?  佢最初唔講, 之後就吞吞吐吐話 : "有冇聽到好大聲?"

搬嚟咁耐, 我聽過 3樣好大聲嘅嘢 :

1) 半夜瞓瞓吓, 比唔知樓上定樓下好悽厲嘅男人叫床聲嘈醒, 不過只係試過一次 ;

2) 自己飲多兩杯, <炸機> (呵呵, 而家應該冇人用呢個term) ;

3) 隔離屋 (綠色箭咀) 嗰兩個同居女人嘈交, 佢哋耐唔耐就會喺走廊吵鬧推撞, 𠹶嚟𠹶去度大門, 啀晒要報警!    通常嘈完, 半夜兩三點仲有下聞, 喺屋裡面再炒, 隔幾度門都聽到.

好彩個看更係講緊 no.3 啫, 幾驚個佢話我炸機嘈呀.