破壞王

買嘢至怕壞, 維修貴, 最老土係啲維修部唔知做乜都係喺埋晒啲山卡啦地區, 要攞舊壞嘢老遠去整, 整好又要走多轉攞番.

"錶面可以翻轉用"嗰隻牌子, 咁貴賣得比人, 換電專門店竟然話要個客自己攞隻錶去長沙灣, 頂佢, 所以我隻停咗成年都仲hea咗喺度.

通利維修部喺荃灣, N年前去過, 睇怕冇耐又要去喇, 因為支笛無端端有兩個音吹唔響.

部Sony老爺laptop, 2006年買用到而家, 只係壞過兩次, 算係咁. 前幾日見咁多塵, 忽發奇想, 諗住攞部吸塵機去吸吓, 點知部機吸力強大, "卜" 一聲就比佢吸咗C同V兩粒制走, 真吹漲!

之後剪爆個塵袋攞番C & V, 但有啲細parts 唔見咗, 兩個制鑲唔返實, 而家郁郁吓好似兩隻比人打鬆咗嘅門牙咁, 樣衰!!

拖馬

大嶼山"地膽發展商" (840) 新項目, 包括一個馬場, 提供馬車服務, 比人影結婚相, 或其他商業用途.

因新馬場仍在施工, 所以佢哋喺外國進口嗰四隻拉車馬 (draft horses), 要暫居喺我騎馬嗰度兩個月, 仲做埋Marky鄰居.

佢哋係兩男兩女, 男嗰兩隻好怕醜, 唔啋人, 女(黑色)就比較熱情, 鬼妹果然唔同啲.

班馬全部都係體重超過二千磅嘅龐然巨物!  

剩係個頭, 都有差唔多成三尺長, 對一啲原本連賽馬都覺得大隻嘅人, 一定會好驚嚇.

Marky原本都算大隻 (左), 點知拍埋佢哋度, 竟然好似縮咗水咁.

千米窺秘

租樓嗰陣, 喺地產度得悉黃宗澤同胡幸兒住喺同一屋苑.

(橙色箭咀 : 胡幸兒 / 紫色箭咀 : 黃宗澤)

同管理員八, 問佢哋有冇見過Bosco 胡幸兒真人, 佢哋話Bosco有, 胡幸兒冇, 胡小姐非常厲害, 識隱身.               其實我住嗰度對面冇樓, 佢哋住高層, 若然要影到啲露股全相, 真係要用天文望遠鏡先得. 

早兩日, 終於水落石出......  噢, 原來喺嗰度影.

<東方日報 - 3月29日>

私隱署的職員曾到黃宗澤寓所調查，發現《忽然1周》的攝記分別於去年五、六月三天的黃昏及晚上，從火炭樂蓮徑拍攝黃在家中的一舉一動，拍攝距離達一公里，等同由尖沙咀文化中心望向灣仔會展中心的距離。

職員以一般焦距150mm的相機從樂蓮徑拍攝黃的高層單位，結果只能拍到大廈外觀；職員其後再到黃宅往外望，發現視野開揚，住戶實難料有人從極遠處偷拍。