破壞王

買嘢至怕壞, 維修貴, 最老土係啲維修部唔知做乜都係喺埋晒啲山卡啦地區, 要攞舊壞嘢老遠去整, 整好又要走多轉攞番.

"錶面可以翻轉用"嗰隻牌子, 咁貴賣得比人, 換電專門店竟然話要個客自己攞隻錶去長沙灣, 頂佢, 所以我隻停咗成年都仲hea咗喺度.

通利維修部喺荃灣, N年前去過, 睇怕冇耐又要去喇, 因為支笛無端端有兩個音吹唔響.

部Sony老爺laptop, 2006年買用到而家, 只係壞過兩次, 算係咁. 前幾日見咁多塵, 忽發奇想, 諗住攞部吸塵機去吸吓, 點知部機吸力強大, "卜" 一聲就比佢吸咗C同V兩粒制走, 真吹漲!

之後剪爆個塵袋攞番C & V, 但有啲細parts 唔見咗, 兩個制鑲唔返實, 而家郁郁吓好似兩隻比人打鬆咗嘅門牙咁, 樣衰!!