路霸

 

呢輪做嘢好多阻滯, 個人特別燥.  今朝晨早溜溜, 八點三都未到, 就已經講咗第一句粗口.

事緣揸車去騎馬途中, 前面嗰架大種 Mini,  行緊成 70km, 喺毫無先兆下, 竟然突然勁 brake, 之後施施然轉入路口,  我已經跟車唔貼, 都耷到成架車彈起, 如果後面嗰架係大貨櫃, 一早轆扁佢!

比起大陸, 香港人開車都算施文.  但有啲人嘅駕駛態度, 真係好有問題.

最討厭嘅係轉線唔打燈, 話 cut 就 cut, 老馮要人避佢嗰啲粉皮.   其次係開得慢, 有中線唔行, 一味死 <迓> 住條快線嘅 '極品', 喺東九龍走廊最多, 而且九成九係女人, 真係映衰晒.

一物治一物.   對付呢啲阻住地球轉嘅 '極品', 好多時會係啲 <釘尾霸>.  佢哋會開到架車好貼前車, 一路推, 一路用大燈好似鐳射激光咁狂閃, 閃到 '極品'頂唔順, 走返去中線為止.

另一類, 係喺隧道裡面開高燈嘅人渣.  喺倒後鏡比嗰啲強光 <撜> 親, 直情好似比人攞支電筒照完你對眼, 跟住要你開車咁危險.  每次遇到呢啲人渣, 都好想喺自己車尾裝對高燈, <撜> 番佢轉頭!

 不過有次我都做咗人渣, 因為唔覺意開咗高燈開車, 直到返屋企停車場先發現.

搵食難

不經不覺, 喺新公司做夠三個月, 試用期滿.   大步檻過, 梗係要慶祝吓.

星期一, 搵食真難, 因為好多特式西餐星期一都唔開. 我哋 shortlisted 嗰幾間, 唔係 fully booked 就係關門休息, 頂~

用咗成個 lunch time 上網查探, 好不容易先找到間似樣啲嘅, 叫 NUR.





中國人識滋補, 原來老外都曉, 嗰度 sell 
"nourishing gastronomy".   講真, 都唔知係乜?  
不過見下面網頁出 cap 嚟張構圖, 幾靚吖, 應該係好嘢掛...

大鄉里出城, 好耐冇行街, 食之前仲喺 PMQ 走咗轉, 嗰度幾得意喎! 

餐廳環境氣氛唔錯, 我哋六點半上到去, 係第一枱客, 班廚師企晒喺 open kitchen 度等開工.

諗住快快趣趣叫支酒慢慢 dap , 點知竟然比 waiter mark 住, 冤魂不散喺周邊徘徊, 好似好想我哋快啲落 order 咁.  

好吧, 就 order 吧, 你哋快啲過主喇...

鬼節都過咗, 但介紹每度菜嘅時候, 啲 waiter 講嘢細聲過鬼食泥, 直情要讀唇先知佢哋噏乜.

好彩啲嘢食得, 賣相精緻, 用料優質新鮮,  層次鮮明.   既能彰顯個別食材特性, 同時又可以令佢哋水雨交溶, 軟硬兼施, 互相磨合.

唯一要彈嘅, 係上菜速度奇快.  浪接浪, 七度菜竟可以喺一個鐘內上晒.  雖然係咁, 下次有公數出, 一定會再嚟!

不恥下問

尋日千載難逢, 可以參觀神秘嘅馬醫院, 有我覺得至 man 嘅馬會獸醫, 六呎幾嘅 '阿發' 做嚮導, 仲要喺正屋企樓下, 唔去就真係對唔住自己.

馬醫院面積唔大, 應該只有一萬呎左右, 設備同醫人嘅差唔多, 有內窺鏡, 心電圖, X 光, MRI, 藥房, 手術室, 麻醉室, 甦醒室, 解剖室, etc.         

不過啲房就寬敞好多, 要預獸醫, 馬, 同一班捉住佢嘅人, 一齊塞晒入去.

馬唔似人咁, 識講自己有乜唔舒服, 所以斷症方面, 要花好多功夫.  

馬醫院要服務全香港一共 1800 隻馬匹 (1200 隻現役競賽馬 + 600 隻退役馬), workload 都唔嘢少.

全程英文講解, 加上 '阿發' 嘅澳洲口音同啲醫學名詞, 好迷幻, 有時講乜, 真係要靠估.

論語有句 :  <不恥下問>.

同行有對 couple, 不停咁問啲白痴無聊問題, 阻住晒啲進度.   問啲蠢問題, 曝露低智, 又完全不覺羞恥. 呵~  呢啲就係 <不恥下問> 嘅另類演繹.

除咗醫院, 我哋仲參觀埋騎師學堂馬房, 馬泳池同釘甲房.

 

釘甲房係同馬訂做馬蹄鐵嘅地方, 裡面冇冷氣, 幾個熔爐, 加上熊熊烈火, 派咗個肥仔釘甲師傅, 大汗疊細汗同我哋講解.

正當肥仔施展渾身解數, 示範點將條火紅紅嘅直鐵打成馬蹄形咁款嘅與此同時, 有條帶住黑超嘅中女問 :  "哇~  呢度咁熱成個 sauna 咁, 點解你仲可以咁肥嘅?"

我覺得呢啲又係 <不恥下問> 囉!

特長午餐

入呢間公司做冇耐, 已經有人明示暗示, 食 lunch 時間好 free.

實在太麻煩同太懶, 加上放飯時間搭電梯又要大排長龍, 所以我連落樓下買外賣都費事, 通常會朝早買定啲好難吃嘅嘢, '哩' 喺位食.

經連日觀察, 啲人 12 點出去 (大條道理話要搭車去香港仔搵食), 成 2:30 先施施然咁返, 犀利!

星期四, 有同事走, 食 farewell lunch, 去設計師變廚師再變明星嘅 Jacky Yu 間天台私房菜, order 八人套餐.

睇睇個 menu, 咁多度菜, 冇兩個鐘, 點食得完?  

心諗...... 你班友食 lunch 食咁耐, 你估你哋係 CEO 咩? 

點知轉個頭, 隔離枱真係坐咗我哋姊妹公司嘅 CEO! 

吹脹.

嗰度地方唔錯, 環境佈置, 招呼同食物水準都非常好.  






 
食完參觀四周, 睇吓名廚 Jacky 有時上電視露兩手, 同喺週末 '搵食' (開班教 fans 煮餸) 嘅舞台.

有幾個女同事知 Jacky 返咗餐廳, 鬼咁雀躍, 猛話要同佢合照.  哇~ 唔係嘛...... 唔好啦...... 
好彩卒之 Jacky 都冇泡頭!


睇到咁上下, 差唔多成兩點半, 人哋 CEO 一早都埋單走咗.

佢哋真好嘢, 仲磨爛蓆同經理吹水 : 連包場費用, 燈光音響, 廚藝班有邊個教, 學乜, 邊度有分校都問埋.

嘩, 周身唔聚財, 又唔好意思話走先, 結果等到兩點九, 影埋幾張大合照, 終於肯埋單走人!

唔等都等咗咁耐, 行緊出去嗰陣, 輪到我玩吓嘢.

我話 : "咦! 平台啲 plants 好靚呀, 等我影番幾張沙龍先!"   哈~ 一如所料, 啲人又停低跟住影, 搞搞吓, 成 3 點先返到 office!  哇哈哈, 笑爆咀!