閉氣

以前學校閉氣潛水, 要一口氣潛個 12.5M 橫池先合格.  所以平日無聊, 會練吓閉氣.  

吸啖氣, 成個人舂落水, 頭向下, 雙手抱膝, 捲埋一舊, 閉氣數 1... 2.... 3..... 4...... 5........ 忍忍忍, 忍到忍無可忍, 用盡最後一口氣, 先彈上水!  

我比較渣, 最多閉到 30 - 40 秒. 

勢估唔到, 中學時期訓練嘅呢個技能, 原來喺職場上用得着.

公司有個女同事特別口臭, 好臭!  濃烈到連合埋口呼吸唔講嘢, 喺附近都聞到陣臭味.  佢一出聲, 簡直係惡夢, 再望見佢唔包裝嘅外表加上疏罅嘅門牙, 救命!

尋日出香港仔食 lunch, 坐公司車坐着佢旁邊, 災難.   佢途中不斷講嘢, 車廂空氣唔流通, 真係比佢臭到想嘔, 原本好肚餓, 但吸咗幾啖佢啲口氣, 已經完全冇胃口, 乜都唔想食.  

期間我嘗試閉氣, 但係最多頂到 30 幾秒, 換氣嗰陣反而仲大力吸多兩啖佢嘅口臭, 當刻嘅感受, 我只可以用四個字形容 : 人間煉獄 !

Neat freak

剛剛去完個無謂 trip, 上咗上海 3 日, o徙哂啲時間.
上去嘅目的, 係參加公司一個 party event.

上海天氣都幾涼, 晚黑得嗰 13-14 度.  有個女同事, 竟然只係著住件幾單薄嘅連身裙上機, 我哋問佢做乜著咁少衫, 點解唔著褸.  

佢話大陸好 dirty, 啲車又邋遢, 每次去完, 佢都要將啲衫全部洗過哂, 好煩, 所以今次唔帶褸, 費事整污糟, 要攞去乾洗.
聽完大家都 吓 ?! 咗聲, 之後無言......

見到佢都戥佢凍.
跟住落嚟嘅 3 日, 佢都係著住同一條裙, 冇換衫.  My 吉, 原來佢剩係帶咗一千零一條裙上上海!   

連續 3 日著同一條裙, 咁叫乾淨?!

呢單嘢, 勾起我好頂佢唔順嘅其他怪行 :

1) Office 佢個位必定有一 roll 或以上嘅滴露濕紙巾.

每朝返工坐低, 佢必定會用滴露濕紙巾抹勻哂枱面各樣物品.


2) 佢啱啱搬咗出嚟自己住, 話個聽好迫, 洗完衫晾哂喺聽, 冇路行.

我話 : "你有騎樓, 做乜唔晾出去?"  
佢話 : "唔攞出騎樓啦, 因為外面好多塵"
 
妖~ 痴線!

3) 佢同我講好辛苦先喺無印搵到個冇手柄嘅湯匙.
問佢點解要冇手柄?
佢話有手柄嗰啲, 用耐咗個接口位會有啲黑色蹟, 好污糟.

真係反白眼!

浸大廚房

尋晚, 同馬友 (人! 唔係鹹魚嗰隻馬友) 去咗廚神 Ricky Cheung 喺九龍塘浸會大學嘅餐廳食飯.  餐廳主要招待浸大師生, 但夜晚有tasting menu, 街外客可以 book.

Tasting menu 要兩天前預訂, 每位 $550 + 10%, 比起 Ricky 以前柴灣 / 灣仔上樓私房菜起碼 $1,400 位, 而家簡直係大割引.

同埋以前上樓私房菜多數都係徒弟煮, 食到尾聲, 佢就著件花恤衫出嚟同你打個招呼.

Ricky & his team

6:15pm 去到浸大, Ricky 竟然已經喺 open kitchen 出現!  經理話, 而家如果有人 order tasting menu, Ricky 一定會現身. 

Tasting menu 唔計甜品 / 咖啡 / 茶, 共有 9 道菜 :

Tasting Menu

5 個前菜 + 2 個 pasta + 2個主菜, 份量十足.

坦白講, 材料唔係貴嘢, 但食得出好有心機煮, 每道菜各有特色, 豬雞鴿牛魚蝦蟹蜆, 海陸空乜都有, 完全達到 tasting 目的.

好好味 - 不過真係好飽!

四川黃酒花椒慢煮乳鴿

我最欣賞, 係呢個 <四川花椒黃酒慢煮乳鴿>.

肉質滑嫩, 每片鴿都帶清幽嘅酒香. Daap daap 吓...... 啲花椒味好 subtle 咁喺脷邊滲出嚟, 每人得五片, 實在太少喇!

我哋太低估自己, 4 個人竟敢帶 3 支酒, 未食主菜, 已經飲完.   間餐廳原來冇酒賣, 而最近嘅酒舖, 要去到又一城. 

Ricky 請飲嘅酒

馬友立即發揮小宇宙, 因佢識個二廚但又唔太記得人哋個名, 打電話問人確認後就走去相認, 憑佢特殊技能, 竟然可以整到 Ricky 私人醒咗兩支紅酒我哋飲.

我覺得呢件事, 真係超級厲害!

最後, 廚神合照唔少得, Ricky 傾落好 nice, 乜都吹到吓, 原來佢好鍾意香檳, 同每朝 7 點已經會喺浸會餐廳打點早餐.  
做飲食真係好辛苦.

不能不說的秘密

今日重陽佳節, 天朗氣清, 大好時機, 同大家分享吓公司嘅秘密 : 就係冇秘密!

同事對機密 / 保密嘅意識, 極度薄弱.

1)   X 同事計劃另謀高就, 同我透露會過檔去邊, 千叮萬囑, 話 confidential, 叫我唔好講出去.

點知兩日後就喺 Y 同事口中, 得知 X 嘅去向!

我問 Y 點知,  Y 話 : " X 嗰日食飯自己講嘅......" 
超 ~~~~ Confidential.

2)   今年 5 月, 女老闆飛去意大利總部做 buy, 瞓醒 check email 見到個好簡短嘅 announcement, 比晒全世界, 宣佈同佢原本同 "呢" 嘅同事升咗職, 做上家, 自己被削權不特止, 仲要 report 番比佢.

聽番身在意大利嘅本港同事講, 女老闆勁嬲, 再加上一啲唔識 do 嘅意粉喺 office 當眾問佢 are you ok?  佢塊面黑到 "令", 黑過包公!

呢個有組織同預謀嘅 <被降職> surprise, 我喺總公司出 announcement 之前三粒鐘 (即香港時間早上 6:30), 已經收到 whatsapp, 早過當事人.

3)   大陸開舖裝修, 報建 / 報消防好多時啲文件要公司法人簽名.  代表我公司嘅法人係某發展商集團高層.

有次填 form 我話唔知法人全名係乜, 話咁快, 大陸同事已經 email 法人個護照 scanned copy 比我, 個人資料一目了然.

啲咁私隱嘅嘢, 竟然可以隨意 circulate!

4)  女老闆最終經不起打擊而辭職.  新嚟 replacement 老闆上工唔夠兩日, 全 office 已經知道佢幾多歲!
攞命.

失禮

上星期同兩女一男 consultants去咗意大利開會, 一肚火!

因為冇直航機, 要取道羅馬, 再坐火車上 Florence, 同佢哋講好, 班機朝早 6:20am到, 搭 11:45am火車, 仲有大把時間走棧.
  
點知有人擅作主張, 出發前一日至話我知, 怕班機 delay, 所以幫成條 team 訂咗下晝 4:30pm火車!  
喺電話問佢 : 你成班人拖住行李, 喺羅馬市中心10 粒鐘去邊?!  佢答唔出.

把幾火!  費事喺香港集合, 我同佢講 : 各自各搭機, 喺羅馬機場攞行李度見.

去到, 見佢 3個人嘅巨型拉喼, 高過條腰! x#y@z......!!  我以前去讀書都冇咁大個.  包埋坐飛機頭尾得嗰 6日, 駛乜春咁大個喼呀?!

講番火車, 因佢哋啲飛改唔到時間, 最後唯有死死氣排長龍再買過早啲班次嘅票, 正一 On 9!

上火車, 前世未食過咁, 話要買麥當勞, 唔係嘛? 侷住晒, 咁大陣味, 同喺地鐵車廂裡面食嘢有乜分別?!  找死, 仲竟然敢問我食唔食! 我勁黑面, 佢哋終於 sense到, 冇買.

成班騎呢怪, 蛋散, 發緊夢, 完全唔 pro!  
做嘢嗰陣激嬲晒我啲意大利同事, 食飯嗰陣就係咁出醜, 人哋 serve 嘢嚟, 照樣大聲講廣東話, 連 thank you都冇聲. 

Hoodie

喺戶外餐廳食, 又話大風又話凍!  
陽光普照廿幾度, 兩條女已經著住件帽衫 (hoodie), 仲要笠晒頭攬頸巾, 縮吓縮吓.
屌~~  你哋身子有冇咁虛呀?!  簡直係國恥, 搞到周圍啲人眼超超, 嗰刻真係好想搵窿捐, 下次同啲咁嘅人出 trip, 一定要帶定紙袋笠頭.

口是心非

自從做咗呢份工, 差不多每朝都會去大圍一間叫 <大師傅> 嘅粥店食粥, 跟住搭廠車返工.

因為係熟客, 想食生滾粥 (雞, 鮮牛肉 or 豬肚) 嗰日, 會先打電話去 pre-order.  喺搭火車途中, 師傅開始煮, 等碗粥可以攤一陣, 唔駛去到要超級滾熱辣咁食, 食完上廠車, 時間啱啱好.

又因為係熟客, 粥店已經劃定咗一個梗位比我, 哈哈...... 幾有 face!

今朝去到, 同枱有兩個男人, 一老一嫩, 叫到成枱嘢, 老嘅喺度開支票, 嫩嘅就喺一張好明顯係手寫借據嘅 A4 紙上面簽名.

心諗...... 7 點 8 咁早就要借錢 ?

交收完, 佢哋並冇開始食, 個老嘅不斷咁同個嫩嘅說教, 每講完幾句, 就問 : "你明唔明我講乜呀?". 五分鐘重覆咗 "你明唔明我講乜呀?"  超過八次, 好 Q 煩!
因為有求於人, 個嫩嘅每次都低聲下氣咁回應 : "明..... 明......"  
跟住, 突然冇晒聲.

一望, 噢!  原來佢哋要食嘢喇 : 佢兩個瞌埋眼對住碗粥祈禱, 感謝神.

憑佢哋對話內容, 知道嫩嗰個嘅細佬, 因為亂花錢買名牌, 爭落好多咭數.  個老嘅, 不斷發噏風, 講埋以下呢啲無謂理論:

• 做人搵幾多唔重要, 最緊要有錢剩 :  我有朋友每月搵十一二萬, 駛 13 萬!    有朋友搵萬二, 儲 8 千! 你話喇?!
• 千祈唔好比名牌牽住走 : 李嘉誠咁有錢, 都係戴 Casio, 我十幾隻勞力士, 都係擺喺屋企, 我而家戴呢隻喺英國買㗎, 九百幾, 英國牌子香港冇人識, 其實英國錶好出名, 用英國錶褥.    而家啲乜牌物牌, 賣幾千蚊隻, 其實最多咪直千二?!  賣咁貴,  都因為廣告費之嘛.  

聽見呢啲, 真係想笑.  佢將自己同李嘉誠比!

阿叔, 講講講, 睇住呀!  你胸口插住嗰支名牌 Mont Blanc 筆, 就跌落盆粥度喇!

你係宇宙中心呀？

早排, 香港 Karl Lagerfeld (謝老四) 扯巴曾江, 已經好想寫 blog, 贈吓慶.  可惜天時暑熱, 唔願郁, 寫唔出.

不嬲有睇開黃秋生 D 論文金句, 覺得好正, 好到 point.  尋晚佢 fb 串 Q 嗰條退咗休, 死剩把口嘅前政府規劃師薛國強, 笑爆咀, 真係令人心曠神怡, 為之一震.

反駁強叔 <電車存廢>, 字字珠璣.
黃秋生, 辯論比賽有同你一組, 唔駛輸 !!

黃秋生金句 :

• 「荒謬」應該用「荒謬」回應 

• 「塞車係咪啲車停晒喺度呀？係咪香港唔應該行車呀？塞車係咪爬行都快過法拉利呀？冇人同你拍拖啫，仲有好多後生仔拍拖嘅，你唔睇書，係咪等如啲書唔駛印呀？你係宇宙中心呀？」

• 「人力車冇廢到，係冇人拉咋。八十年代，天星碼頭仲有幾部車」

• 「鏟平個太平山，填平個維港，大把地，交通順暢」

• 「一架電車有兩架半私家車咁長，一架私家車坐五個人，兩架半坐十二個半人，一架電車裝九十人。乜x嘢顧問公司呀？咁都唔識 計？」

強叔, 唔明你點解想淘汰電車.
  
慢...... 有乜問題?  唔同人有唔同生活節奏, 有人快, 有人慢, 各適其適.  你快唔代表你叻, 電車, 係比啲唔趕時間, 有空間去欣賞港島沿途景致嘅人, 與及遊客去乘搭. 

你邊位 ? 規劃師, 咁有高見, 未退休嗰陣做乜唔搞啲好嘢出嚟?

九龍冇電車都咁塞, 強叔你成日咁趕, 我建議你都係儘快離開香港, 走把啦 !  況且, 你留低, 同電車一樣, 作用都不大.

流動吹波仔

上面支嘢 (約 10cm 長), 大家覺得似乜呢?  揸車嘅朋友, 有冇覺得面善, 仲咁好彩, 用過呢?

成日比人話好彩嘅我, 當然行運一條龍, 中獎.

今朝 7 點幾, 比平時提早咗出門口, 其實一啲都唔趕時間, 就係唔知點解, 可能晨早空氣清新, 個人開車爽咗, 唔覺唔覺愈開愈快, 50 行 80, 仲喺燈口位衝咗個尾燈添!

正當 'dum' 緊上大埔公路中大後面條大斜路時, 遠遠見到個 roadblock, 心諗......   "千祈唔好截我, 千祈唔好截我".

話口未完, 已經有個阿 Sir 行出路中, 做咗個 give me 5 嘅手勢 (示意我要停低).  妖...... 唔係比人埋伏, 影咗相嘛......

打開車窗, 阿 Sir 先叫聲早晨, 然後問我攞駕駛執照. 

喺銀包摷極都摷唔到. 噢 shit..... 唔通上次出trip, 多手執咗出嚟?   我口窒窒話冇帶, 阿 Sir 望吓我銀包 : "嗱! 呢張綠色咪係攞, 唔駛咁緊張喎".

阿 Sir, 呢啲唔係緊張, 係心虛.

跟住原來係做酒精呼氣測試, 哈, 都冇咁驚, 今朝未飲.

阿 Sir 比咗支膠管, 叫我攞支管套入部吹波機後一口氣吹, 吹到佢叫停為止, 大約 3 秒 (好似左圖夏韶聲咁).  

等幾秒, 部吹波機會立刻分析.  結果係 pass, 所以走得, 支膠管亦留番嚟記念.

烤完一鴨又一鴨

北翔鳳胡同裡面嘅 '利群烤鴨' ...... 人聲鼎沸

拷緊...... 同烤好嘅鴨

今次去北京, 歇斯底里, 無烤鴨不歡, 殺!

下晝去完 '大董' 食 22 日雛鴨, 夜晚再去 '利群'.

'利群' 唔易搵, 記得多年前同妹妹, 冬天 7 點幾天黑黑, 兩個人膽粗粗喺胡同裡面四處亂行.   想問人, 但又勁樣衰連 '烤鴨' 兩個字都講錯晒!  搵咗成粒鐘, 先搵到 '利群'.

小心地 (carefully) ...... 滑 (slide)!

當年 '利群' 賣點除咗烤鴨有木香外, 就係班服務員 (伙計) -- 個個都係十幾歲年青人, 充滿幹勁同活力咁話.

今次一個後生仔都見唔到, 不過啲鴨 皮脆肉嫩, 真係同當年一樣咁好味!  除咗啤酒, 仲加設咗紅白酒添, 果然不枉此行.

雖然餐牌有外語, '利群' 其實係個超 local, 枱凳牆壁充滿油蹟, 好多塵, 地下又油又跣, 又冇廁所嘅四合院. 有潔癖者勿試!

帶朋友去, 一定要講清楚,  費事嚇親.

套餐好抵食, D 鴨...... 真係好香!

北京恐怖熱線

安縵酒店 - 客房外庭園

五月尾去完北京, 唸唸不忘, 患上北京強迫症. 

趁有 project 喺嗰度, 乘機抽水, 翻 "cheuk", 再去多次.

今次目標明確兼腐敗 : 食! 買!

酒店大堂

第一晚, "懶" 精選, 去頤和園旁邊, 安縵酒店裡面 <Naoki> 吃日本 + 法國 fushon 懷石料理.

Aman 安縵酒店系列, 選址通常遠離一般旅遊大街, 特色就係要唔方便, 低調, 難搵!

酒店會所

目的營造一個清幽, 隱世嘅格局, 比啲非等閒之輩, 使成皮嘢一晚房租, 去洗滌心靈, 一嘗禪修滋味.



去到酒店, 到處參觀, 真係好靚.  

不過對我嚟講, 裝修太古舊, 又暗, 日頭還可以, 夜晚要喺度瞓, 真係有啲驚.

懷石料理 - 餐廳外貌

Naoki 直樹懷石

不過最驚, 就係入到餐廳嗰刻, 個知客望吓我同我後面, 跟住問 : "是不是你們小孩 3 個人?"

3 個人?!  我哋明明兩個人喎......   我本能反應答佢 : "不是, 兩位!"

坐低咗, 四圍望, 小孩??? 成間餐廳根本冇細路仔!

再諗, 哇~~~~ 好驚!  
但見朋友完全冇反應, 所以我就冇再 elaborate 呢件事,  費事嚇親佢.

食飽返酒店, 講起呢壇嘢, 原來朋友根本完全聽唔到我同知客嘅對答, 因為佢當日太早起身, 太眼瞓, 當刻已經 switch off 咗.

聽完之後,  你眼望我眼, 毛骨悚然, 大家都知發生乜事啦......

西安

兵馬俑, 氣勢磅礡.  

尋日, 終於有幸到呢個世界八大奇蹟之一見識吓.

北方人(左) / 南方人(右)

兵馬俑同秦墓, 全部都係 2000 幾年前嘅高科技產物, 動用 70 萬工人, 歷時 40 年, 做完就殺人滅口, 有入冇出, 非常殘忍.

一齊去嗰班係判頭同 project consultants, 聽完導遊講, 好驚!  話如果做完每個 project 就要滅口, 搵鬼做. 哈哈!

戰馬 / 射箭手

明知送死, 唔怪得工丈造出嚟, 個個兵都苦口苦面啦.  加埋殉葬妃嬪, 唔計其他暴政, 淨係呢個墓/俑 project, 秦始皇一個人已經要幾十萬人陪死, 積埋咁多怨魂, 咁多怨氣, 所以秦國咁快滅亡.

導遊可能趕時間, 成個兵馬俑, 唔駛兩個鐘11:30am 就行完.  我哋下晝四點機, 大把時間, 喺附近食吓當地農家菜.

西安有種地道麵叫 "麵" (油潑扯麵), 寫法請參考左圖, 讀音 :  "biang biang" 麵.  

因價錢唔貴, 如果唔識死, 每人叫一個, 就非常之大鑊! 

因為個盆係 40cm 大, 闊麵條口感好像意大利 lasagna, 湯汁完完全全就係羅宋湯!