呢排, 枕住見到啲關於鼻嘅異象.
星期一同個靚女同事食晏, 食食吓, 唔知做乜, 佢左邊鼻突然走咗粒, 好大粒, 好濕潤, 好淺色嘅鼻屎出嚟.
救命, 我食緊嘢, 佢一路同我講嘢, 唔望佢又唔得, 見住佢粒鼻屎郁吓郁吓, 反胃.
前日去北京, 一上車, 恐怖畫面重現!
大陸男同事, 同樣地左邊鼻亦有一粒好大, 好深色嘅鼻屎. 嘩, 點會咁蹺, 咁多大鼻屎㗎?
如果係女人, 若干時候之後, 必定會發現粒鼻屎, 因為女人會不時照鏡. 男人唔同, 唔會成日左照右照, 最終可能夜晚返屋企, 臨瞓嗰刻刷牙照鏡, 先見到粒屎, 到時已經太遲.
所以我同佢講, 夜晚約咗人食飯, 唔同佢食喇.
我壇數未夠, 唔可以一個禮拜兩次, 一路望住粒鼻屎, 一路進食, 寧願返酒店叫 room service.
尋日, 同個港人大陸判頭, 喺大董食北京填鴨. 判頭有個好誇張嘅插蘇鼻, 佢邊食邊講, 兩個圓形大鼻孔, 就好似兩個黑洞, 將啲填鴨吸晒入去.....
好驚呀!
 |
| 北京大董烤鴨 - 22 日 BB 鴨 |
 |
| 酒店窗外景觀 |
好耐冇去東京了, 有成 21 年.
唔知點解, 個個聽到我 21 年冇去過, 第一反應都係哈哈大笑!
 |
東京鐵路路線圖
|
 |
| Suica card |
出發前係網上搵資料, 見到唔同款嘅東京鐵路路線圖, 又 JR, 又metro, 又 subway, 密密麻麻.
當時冇在意細節, 以為 metro 等於 subway , 只係唔同叫法.
我最怕煩, 去到第一時間買咗張東京八達通 "Suica", 四圍去好方便, 一咭通行, 搭車轉車唔駛次次買飛.
點知個 friend 嫌要比 500 yen (hkd 33) 按金, 寧願每日買張日票.
唉~~ 原來東京各條鐵路由唔同公司運作, 啲飛唔可以互相通用㗎.
佢哋買嘅係 JR 日票, 點知想去嘅地方, 全部都只得 metro 去到. 每程車, 都要另外買票, 張 JR 日票只係用得一次, 因小失大.
第日以為醒啲 , 轉買 metro 日票. 點知,天意弄人, 去嘅地方又要 subway 先得, 結果都係要死死氣再另買 subway 飛, 你話係咪攞嚟搞?!
最後嗰日仲誇張, 有人老羞成怒, 明明搭 JR 可以 7 個站直到嘅目的地, 竟然堅持搭 metro : 17 個站轉 3 次車!
買張 JR 飛, 都係 160 yen (hkd 10.4) 啫. 我覺得為咗 "非士" 而要花多一個鐘轉嚟轉去去搭車 (比我, 一個鐘嘅時間一定貴過 hkd 10.4!!!). 落唔到台, 唔肯認衰, 要全部人一齊陪葬, 好戇居.
谷到成肚氣, 以形補形, 食雞泡魚最啱. 除咗雞泡魚干, 我未食過真正河豚, 好期待......
 |
| 涉谷 |
去到涉谷, 意料之內, 個個話自己識, 好肯定行得啱喎, 左行右行, 愈行愈遠.
 |
| 就餓死前見到嘅河豚肚 |
我已經喺街行咗成日超過 10 粒鐘, 又大風又凍, 仲要上條大斜路.
行到斜路盡頭, 見到呢個河豚肚, 真係怒極而泣, 滴咗滴眼淚出嚟.
哈, 入到去, 啲氣氛又幾得喎. 我哋嗱嗱臨坐低, 叫咗支白酒同幾個餐 share, いただきます(itadakimasu / bon appetit) 正式啟動!
雞泡魚食法好多 : 刺身, 灼魚皮, tempura, 燒, 鍋物, 粥, etc.
我哋驚死蝕底, 試齊晒, 口感有啲像田雞, 不過啲肉晶瑩好多, 火鍋啲雞泡魚上嗰陣仲口擘擘, 好嚇人!
所有菜式有好多大荵伴食, 可能腥掛, 但又唔覺..... 全部嘢都好好食, 而家諗起都好回味, 下次嚟東京, 一定要再食!
 |
| 店舖外貌 |
東京臨走嗰晚, 豁出去, 豪吓, 食懷石料理.
間嘢喺惠比壽住宅區一條窄巷裡面. 好在我哋醒目, 喺涉谷打的去, 如果唔係, 肯定出咗地鐵成個鐘都搵唔到.
 |
| 我唔係好飲嘅 sake |
間嘢唔大, 嗰晚得我哋四個客. 廚師係個後生仔, 佢施展渾身解數, 好努力哋用英語同我哋介紹每一道菜, 雖然所有葉都係叫 mountain vegetables, 不過 ok 喎, 就算佢講到個真正英文名, 我都未必識啦.
話明懷石料理, 餐具同食物 presentation 梗係極度精緻, 味道方面, 較為清淡, 但完全表現到食材嘅質感, 烹飪方法嘅特色同風味.
啲friend 嚟東京前喺另一個地方食懷石料理, 覺得勁行貨, 全部菜都係預先整好, 飛機餐貨色, 甜品竟然係街都有得賣嘅包裝雪糕, 好失望. 好彩呢間挽回不少分數.
我哋 order 嘅係中價餐, 應該冇正統嗰種有齊咁多道菜, 但係都已經好多.
上菜順序 :
- 先附（Sakizuke，さきずけ）
- 開胃小菜，調味輕盈和質感清新。
- 向付け（Mukōzuke，むこうずけ）
- 季節性魚生片。
- 炊き合わせ（Takiawase，たきあわせ）
- 蔬菜、肉、魚、豆腐等食材切小塊悶煮。
- 蓋物（Futamono，ふたもの）
- 有蓋食器裝盛的食物，通常為湯，或茶碗蒸。
- 焼物（Yakimono，やきもの）
- 季節性魚類燒烤。
- 強肴（Shii-zakana，しい ざかな)
- 主菜，烤制或煮制的牛肉、禽肉、鱼等等。
- 御飯（Gohan，ごはん）
- 以米飯為主要食材的菜。
- 香物（Kō no mono，こう の もの）
- 季節性醃製蔬菜。
- 止椀（Tome-wan，とめ わん）
- 醬湯，以大醬為主料的湯，會放入豆腐、蔥花。
- 水物（Mizumono，みずもの）
- 餐後甜點，蜜瓜、葡萄、桃等甜美多汁的傳統高級水果。
食到最後, 綠茶時間到. - 廚師攞咗四個木盒出嚟, 裡面放住唔同造型嘅碗. 落啲茶粉, 用竹掃狂搞, 起晒泡, 飲落甘甘哋, 過癮!
 |
| 目黑夜櫻 |
四月頭東京游.
朋友早幾日出發, 自駕遊喺日本四圍睇櫻花. 我就淨係想買嘢同食魚生, 所以中途先喺東京 meet up 佢哋.
到達嗰日天不做美, 落雨.
之前講好話當晚食雞泡魚, 整到我鬼咁期待, 點知班友臨時改變主意, 話去目黑睇夜櫻, 吓! 夜櫻? 要睇幾耐㗎...... 我好肚餓呀, 朝早 10 點喺飛機食咗早餐之後就冇食過嘢, 就嚟餓死, 連發火嘅力都冇. 肉隨砧板上, 唯有死跟.
 |
| 我哋飲限量版櫻花味 sparkling wine |
好彩去到, 有另一番景象.
 |
| D 燒牛舌好香嘅呢 |
喺櫻花盛放嘅 2 km 河堤兩岸, 擺滿各式小食灘檔, 燒肉香腸炸物乜都有, 仲有香檳同不同酒類.
去嘅人, 大部份係放咗工同事一班人, 或者一對對小情侶. 霸個地盤, 一路賞櫻吹水開大食會, 正呀.
應該叫 <夜櫻 . 劈酒 . 嘉年華> 就真. 頂佢, 咁好玩, 一早講清楚嘛!
 |
| 街上嘅櫻花 |
一早收晒風, 第日會好天.
所以行完街, 就喺便利店買小食同好重要嘅酒, 去新宿御苑野餐.
原來公園 4:30 pm 關門, 我哋去到嗰陣已經 3:55pm, 太晏, 唯有嚟個高速版 picnic, 半粒鐘食晒啲嘢兼行埋公園睇花.
 |
| 新宿公園 |
D 花開得好行, 一片花海, 簡直係怒放! Friend 話我係 lucky bastard, 去到東京適逢開花全盛期, 佢哋早幾日喺日本其他地方, 花未開, 得啲花蕊.
因為咁, 佢哋決定繼續追櫻, 跟住嗰日去咗靖國神舍隔離, 皇居周邊嘅河道賞花.
奇景! 樹上掉落嘅花瓣, 喺水面形成粉紅色泡泡 (下圖), 好香艷, 好想落水浸吓嘅呢.
 |
| 皇居周邊河道 |
