北京恐怖熱線

安縵酒店 - 客房外庭園

五月尾去完北京, 唸唸不忘, 患上北京強迫症. 

趁有 project 喺嗰度, 乘機抽水, 翻 "cheuk", 再去多次.

今次目標明確兼腐敗 : 食! 買!

酒店大堂

第一晚, "懶" 精選, 去頤和園旁邊, 安縵酒店裡面 <Naoki> 吃日本 + 法國 fushon 懷石料理.

Aman 安縵酒店系列, 選址通常遠離一般旅遊大街, 特色就係要唔方便, 低調, 難搵!

酒店會所

目的營造一個清幽, 隱世嘅格局, 比啲非等閒之輩, 使成皮嘢一晚房租, 去洗滌心靈, 一嘗禪修滋味.



去到酒店, 到處參觀, 真係好靚.  

不過對我嚟講, 裝修太古舊, 又暗, 日頭還可以, 夜晚要喺度瞓, 真係有啲驚.

懷石料理 - 餐廳外貌

Naoki 直樹懷石

不過最驚, 就係入到餐廳嗰刻, 個知客望吓我同我後面, 跟住問 : "是不是你們小孩 3 個人?"

3 個人?!  我哋明明兩個人喎......   我本能反應答佢 : "不是, 兩位!"

坐低咗, 四圍望, 小孩??? 成間餐廳根本冇細路仔!

再諗, 哇~~~~ 好驚!  
但見朋友完全冇反應, 所以我就冇再 elaborate 呢件事,  費事嚇親佢.

食飽返酒店, 講起呢壇嘢, 原來朋友根本完全聽唔到我同知客嘅對答, 因為佢當日太早起身, 太眼瞓, 當刻已經 switch off 咗.

聽完之後,  你眼望我眼, 毛骨悚然, 大家都知發生乜事啦......

西安

兵馬俑, 氣勢磅礡.  

尋日, 終於有幸到呢個世界八大奇蹟之一見識吓.

北方人(左) / 南方人(右)

兵馬俑同秦墓, 全部都係 2000 幾年前嘅高科技產物, 動用 70 萬工人, 歷時 40 年, 做完就殺人滅口, 有入冇出, 非常殘忍.

一齊去嗰班係判頭同 project consultants, 聽完導遊講, 好驚!  話如果做完每個 project 就要滅口, 搵鬼做. 哈哈!

戰馬 / 射箭手

明知送死, 唔怪得工丈造出嚟, 個個兵都苦口苦面啦.  加埋殉葬妃嬪, 唔計其他暴政, 淨係呢個墓/俑 project, 秦始皇一個人已經要幾十萬人陪死, 積埋咁多怨魂, 咁多怨氣, 所以秦國咁快滅亡.

導遊可能趕時間, 成個兵馬俑, 唔駛兩個鐘11:30am 就行完.  我哋下晝四點機, 大把時間, 喺附近食吓當地農家菜.

西安有種地道麵叫 "麵" (油潑扯麵), 寫法請參考左圖, 讀音 :  "biang biang" 麵.  

因價錢唔貴, 如果唔識死, 每人叫一個, 就非常之大鑊! 

因為個盆係 40cm 大, 闊麵條口感好像意大利 lasagna, 湯汁完完全全就係羅宋湯!

把幾火 - 匯豐正仆街!

三月頭得知 HSBC 發行 150 週年記念鈔, 貪得意上網抽, 點知抽到單一張同三連張各一套, 沾沾自喜, 以為自己好好彩.
換領時間 : 上星期二 (Jun 9) 11am. 

當日下午要飛上海, 想像得好完美, 覺得朝早攞完後可以打的去中環搭機鐵.

10:45am 到達會展現場, 即被眼前景象嚇倒! 

會展新翼門口迫爆, 好不容易, 先喺側門攝到入去, 點知喺裡面先知, 排隊個龍頭原來喺灣仔地鐵站.

妖! 當刻想走人, 但諗起事先張揚, 話咗比老豆知會送張 $150 佢, 騎虎難下, 唯有行番出去地鐵排啦.

死死氣行出地鐵站, 行咗都未到一半, 已經流汗流到全身濕晒, 件衫前後貼住個身, 成條海豚咁.  
條隊幅蓋灣仔北! WTF!

地鐵站  >  稅務大樓樓下打蛇餅  >  跟住中環廣場樓下又打一次  >  之後繞出鷹君中心  >  再到新鴻基  >  又要屈番轉頭落去會展一期門口, 再喺街排入去..... 

一路排心中一路咀咒, 有乜可能會咁安排, 要人喺烈日下曝曬?!  我都叫中年, 頂得吓, 身邊有好多老人家, 真係戥佢哋辛苦.

會展裡面咁大, 點解唔比人喺裡面排?

明知賣咗幾百萬 set, 就唔好 plan 喺兩日內要人攞晒啦 PK! 

排到鷹君中心, 已經 11:45am, 我搭 1:55pm 機, 趕唔切, 要 drop out. 上到的士, 愈諗條氣愈唔順,  打去 HSBC 熱線投訴. 

超! 點知話原來可以安排喺另外日子囉嘅, 咁你就唔好話唔喺指定日期時間, 親身去攞, 申請會作廢啦, 正粉腸!

混吉

從後生到現在, 時不時都發啲關於 '落空' 嘅夢 :  
夢見上堂, 考試, 開會遲到, 好心急, 趕餐死, 但又去極都去唔到!  諗起人哋唔等自己, 好驚.

好彩醒番, 發現只不過係一場夢......  

不過, 惡夢發得太多最終都會成真.

太極難得今年開 show,  懶期待, 懶緊張, 晨早幾個月前買定飛. 

上禮拜日, 約咗去完歐洲工幹, 啱啱下晝落機嘅朋友 8pm 喺紅館集合.

見到面, 比張飛佢, 行緊去入場嗰陣, 朋友個樣好迷網問 : 我哋坐邊個閘口? 



張飛明明有寫, 點解問呢?

我以為佢 jet-lag, 點知攞佢張飛嚟望真啲, my 吉! 原來我只係帶咗張 receipt 比佢.   張真飛, 漏咗喺自己屋企!! 

(好邪,之後返到屋企張飛人間蒸發, 搵極都搵唔到!)

End up 我哋冇睇到演唱會, 去咗紅館對面 Hotel Icon 飲嘢. 

希望太極會再開演唱會啦, 如果唔係, 我真係千古罪人, 好對個 friend 唔住.

北京游

今年驛馬星動, 頻頻出 trip.  
其實都唔介意, 因為日日踎喺個咁悶, 啲人連日常 expression : 妖! 都當係粗口嘅 office, 可以行開吓, 絕對係件好事.

五月尾去北京, 特地到紫禁城一遊.



 












急步快行又不忘影吓沙龍, 欣賞呢個完全根據風水理氣而策劃出嚟嘅氣勢建築群, 真係好有意思.

身處其中, 想像600 年嚟帝皇們嘅生活, 宮廷裡面各懷鬼胎, 明爭暗鬥, 仲要驚兵變, 比人落毒做低, 謀朝篡位.

其實諗落做皇帝都唔係咁過癮.

厲家菜環境

參觀完故宮, 食飯時間到. 
地點係后海附近, 羊房胡同裡面嘅  
'厲家菜'.

佢哋做宮廷菜, 每位價錢由 RMB 298 起至 RMB 2,998!

RMB 298 套餐

我哋叫最平嘅 RMB 298 套餐 (每人), 10小碟 + 8 度菜, 四個人 share, 都飽到阿媽都唔認得. 唔知RMB 2,998 個 set, 會有乜好嘢食呢? 


翌日午飯, 安排咗對正故宮東門護城河旁邊嘅 Courtyard. 

Courtyard 外貌 / 內觀

餐廳地點同格局, 真係無懈可擊!  一路食, 一路望住窗外紫禁城景色嘅感覺, 好夢幻.

而食物嘅味道同賣相, 完全超出預期, 睇得又打得.

唔食甜品嘅我, 都不禁叫咗佢哋馳名嘅 '兵馬俑'.
喺大概 2/3 隻手掌咁高朱古力兵馬佣外殼入面, 有清新, 甜而不膩綠茶 semi-freddo.

兵馬俑 - 出水, 標晒冷汗!

午餐價錢, 一啲都唔貴, 可以的話, 我會再去試佢哋嘅晚餐. 早少少去 happy hour, 飲住香檳睇城牆外嘅日落.