又到聖誕

大嶼山塘福

好少去大嶼山, 唔計赤鱲角 (機場), 幾廿歲人, 應該少過 10 次.   尋日聖誕佳節, 幾條麻甩佬 / 婆, 無無聊聊入去一日游. 

成日聽人話喺塘福露營, 終於可以一睹呢個露營聖地嘅風采.   

企喺崖邊, 腳軟 (好驚跣腳跌落海) 同時亦不禁驚嘆, 香港都有呢啲咁 '海枯石爛' feel 嘅景緻. 



陣陣烈風加上澎湃浪聲, 他媽的! 挑起我山盟海誓嘅衝動.

但對住麻甩佬 / 婆, 又諗唔起有乜盟誓可發.

成打 (12 隻) 牛

去下個目的地途中, 遇到成打牛喺度休息, 有老有嫩, 近距埋身經過, 啲牛都面不改容, 悠然自得話之你.

人生第一次, 覺得牛可愛, 終於明白, 點解有人話見過劏牛後就唔食牛喇.  與此同時, 諗起幾年前, 大嶼山有人揸車撞死牛, 不顧而去嘅事件.  嗰條人渣, 而家一定晚晚發惡夢, 喺嚟緊收尾嗰幾年, 報應一浪接一浪.  

計劃有變, 原本行埋大澳先吃午飯, 但有人喊肚餓, 所以都係改 plan 食咗先.

非常好吃嘅午飯

識途老馬帶路, 大澳漁村另一面有個食小菜好哋方.  一見餐廳招牌 '素食' !?  聖誕喎, 又唔係過年, 又唔係初一十五, 食齋......

噢, 坐低打開餐牌先發現 '素食' 原來除咗齋, 仲包括豬牛雞鴨羊, 魚蝦蟹.  我實在太膚淺, 太冇智慧喇.

揚侯古廟

隊埋紅酒香檳, 朋友話食飽成肚水, 最好喺大澳周圍行消化吓, 去揚侯古廟拜吓神. 

祈福後有人提議坐艇出海睇中華白海豚. 

大澳漁村

每人廿蚊, 25 分鐘船程, 可以喺水上瀏覽大澳棚屋風景, 又幾抵喎.  不過最最最抵, 就係包埋睇 (未必一定有嘅) 中華白海豚.  

駛到離大澳唔遠嘅海面, 朋友話去過幾次都冇, 海豚係畜牲, 好難講喎.  點知話口未完, 船上有人起鬨, 噢, 有白海豚出沒, 四條分兩組喺船前面跳嚟跳去 !  原來白海豚成隻肥豬乸咁大, 全身淺粉紅, 肚有灰色斑點.

呢刻, 船上互不相識嘅人, 你一言我一語為海豚而傾起上嚟, 勁搞笑.

冇諗過懵吓懵吓, 就可以見到白海豚, 但仲好彩, 就係朋友架車有大嶼山許可證, 可以直接喺大澳載我哋返市區.  望見旁邊巴士總站條過百人等車人龍, 心想, '出外靠朋友' 呢句係真堅, 冇呃人.

服務態度

品牌 2016 年香港生意插水, GM 完全冇嘗試做任何嘢力挽狂瀾, 日日喺 office 坐, "呢" 喺自己房做宅女, 煉仙, 永遠唔落舖指導 / 打氣 / 谷 sales, 用晒啲精力去管埋啲雞毛蒜皮嘅小事, 例如 :

1. Challenge 某 staff 用公司電話 download 收費 apps. 

2. "炳" HR 上次開 kick-off meeting 準備咗太多 refreshments, 食唔晒嘥嘢.

大才小用呀, 陰功 !


高層會議, 每當要會報自己一歇不振嘅業績, 都黑面擺出一副事不關己 < 香港個市係咁, 冇晒大陸客, local 人又唔鳩嗚, 我都冇符 > 嘅姿態. 

哈, 表現咁差, 老闆都冇咋形, 好嘢 !

物似主人形, 店舖員工, 都與 GM 有同一 DNA.

尋日下晝喺舖頭走咗轉, 7 : 0 ( sales 同人客比例) !  差唔多離開嘅時候, 有 3 個客入咗嚟, sales 竟然 9 秒 9 同佢哋講 : " 減價貨喺呢邊 ! ".
哇 ~ 冇聽錯吧, 咁嘅 greetings ?  話晒都係名店, 唔係 H&M 喎.

今日食晏同同事講開, 原來佢哋都曾經遭遇不快事故.

男同事 (當時冇表態係公司員工) 想試 9 號鞋, sales 答佢 : " 9 號鞋要上倉攞喎, 不如你試住 8 號先啦, 睇下得唔得 ?"  8 號就 8 號, 9 號就 9 號, 乜有得搏嘅咩 ?!   佢老婆聽到當場黑面, 走咗出舖.

女同事睇中對陳列嘅鞋, 但 size 唔啱, 攞住隻鞋企咗成分鐘, 都冇 sales 問佢係咪想試, 有乜要幫忙.

而我就除咗 " 減價貨喺呢邊 ! " 外, 另有幾個 unbelievable 嘅體驗開心 share :

1. > 50% 女 sales 喺舖踢住鞋跟 "kwak kwak"  聲行. 同 operation director 反映, 佢覺得冇問題, 話因為啲鞋太大啫.  
My 吉 !  品牌好似係賣鞋起家, sales 連自己對鞋都唔 fit, 點 sell 客呀 ?

2. 有 walkie 唔用, staff 喺店內破口大嗌, 呼叫另一 staff.  嗌咗幾嘢, 終於回應 : "唔得閒呀, 做緊嘢呀 ~~~~~~~~"   
妖, 唔望仲以為喺文輝魚蛋添 !

3. 某女 sales 同佢個探班師奶 friend, 喺有其他客人嘅貨場, 公然討論點樣可以制止老公同姐姐 (外籍女傭) 搭上嘅要訣同心得.
Girls talk 超過 10 分鐘, 超級離譜 ! 

4. 有國內同胞買皮褸, 想改短個袖, sales 好唔耐煩咁向店舖經理用廣東話大嗌 : " 佢話想改短個袖喎 ", 經理亦都大嗌回應 : " 你叫佢舉高隻手睇吓點, 係咪真係要改先啦 "
毫冇尊重可言.

咁嘅 service 同銷售環境, 錢多都唔益你啦, 點會做到生意吖.

東京

Tokyo Tower from Roppongi Hills

十二月標尾會, 竟可以公事為由, 走轉東京三日兩夜, 心中暗喜. 

乘機叫埋上海隻馬同大鼻孔判頭 (蘇德華) 去, 一石二鳥.

上海隻馬少出國, 從未去過日本, 今次可以去東京公幹, 都唔知幾 happy, 當正我係大恩人. 

點解叫埋蘇德華 ?  
畫公仔唔駛畫出腸, 唔通佢型英帥靚正, 可以保護我咩? 緊係貪佢疏爽, 出發前從來唔準備做任何 research, 去到目的地等你發板. 最重要係佢永遠都要威, 爭住找數.

問佢兩個有乜地方想去 / 想買 / 想食.  呵, 答案竟然係 : 唔知 / 冇所謂 / 都冇乜特別.   咁冇要求, 一於話之你, 唔貴唔食, 出街直頭唔攞地圖, 的士去到邊截到邊, 一個字講晒 : 豪 !

Omotesando

蘇德華 噏得就噏, 成個日本通咁.   好奇問吓, 原來條友對上一次去日本喺廿幾年前, 仲要係跟團去大阪咋.   

從來未去過東京, 都可以作到咁大, 第日唔做判頭, 可轉行做作家, 編劇, 娛樂記者, 靈媒.

佢唔知我同隻馬都學過日文, 家陣就算唔識聽, 單睇字 <平假名 ひらがな > <片假名 カタカナ > 加埋 <漢字>, 起碼都估到大意係乜.  佢乜七都唔識竟喺我哋面前班門弄府, 太好笑喇.

終極騎呢, 就係每次坐上的士, 都問我去緊嘅地方遠唔遠, 近邊度.  你當我係 Google Map 咩!

大佬, 咁抽象. 每個人對遠近嘅定義都唔同, 15 分鐘車程對我嚟講算近, 可能你會覺得好遠呢 ?

近邊度 ? 你又唔識東京, 根本噏乜地標對你嚟講都係冇意思啦.  

最後耍佢, 答咗等於冇答 : 唔塞車15 分鐘到, 塞就成個鐘都唔到.

懷石料理 . 秋冬版

今次再去食念念不忘嘅兩個晚飯 : 雞泡魚全餐 & 懷石料理, 大家都食到成個豬頭咁, 好滿足.

其實都好期待朋友介紹嘅一個 lunch 地方, 點知去到太晏, missed 咗 last order, 真嬲 !

之後蘇德華 話求其吃, 銀座咁多餐廳, 都比佢揀到間專做大陸遊客生意嘅大型鏈鎖啤酒屋, 最恐怖裡面周圍可以抽煙.   哇, 唔得呀, 寧願紮炮唔食, 自己返酒店, 等佢哋食完再 meet up.


最後, 想講今個 trip 深刻感受到嘅兩件事 :

1)   東京實在有太多野買, 有選擇困難症同密集恐懼必須作好心理準備, 可能會發癲.  例如同一個 item 香港有 5 隻色, 喺東京你就會見到 5 隻色 x 百九幾個 variations.

去到啲靚貨比香港多 N 倍嘅店, 不其然雙眼放光, 心跳加速, 極度抗奮.  多得杜如風 (我唔認識佢, 只係喺雜誌睇到佢嘅推介), 知道日本有 Lanvin 副線, 設計 chic 得嚟又唔太貴, 入咗啲貨, 勁得 !
 

Lanvin en Bleu 收穫

2)   東京餐廳 / 商場廁所超級潔淨, 企理到好似屋企廁所咁 (雖然回港後發現自己屋企廁所都冇東京嗰啲咁乾淨).   

喺東京入到任何廁所, 我都唔駛閉氣, 可以正常呼吸. 因為啲人唔會好似香港人咁缺德, "啡 " 到一地 / 成塊廁所板都係, 洗手整到成地成枱濕晒, 廁紙四圍拋.