做乜要放煙花 ? ?
因為......
" 我得到重生 ! "
尋日, 終於請走咗個困擾我足足兩年嘅人.
從此, 呢個煩人將會永久地喺我工作同活動範圍消失, 我以後唔會再比佢啲為爭拗而爭拗, 翻來複去冇 point 嘅無謂 email / whatsapp 轟炸.
唔再需要為阻止唔到佢無理地去麻煩同勞役人, 而感到遺憾內疚 .
亦都唔駛每日再見到佢目中無人, 恃住自己係公司老臣子, 以為人人都要怕佢, x 口 x 面嘅咀臉.
最最最慶幸, 係唔會再 "被" 聽或 "被"睇傳教訊息, 可以過回正常生活 !
______________
經個多月嘅籌劃, 昨天就係叫佢 LAAN OUT 嘅大日子 .
諗番起, 過程刺激又緊張, office 及意大利同事裡應外合, 當事人蒙在鼓裡, 直頭好似搞緊 surprise party 咁.
眾多搞手中, 最投入最積極嗰個, 竟然係老闆 !
其實當初 3 月尾我提出取締呢個人, 原意只想公司調佢去其他部門 , 唔好再阻住地球轉. 老闆叫我 send 個 email 比佢, 佢會 follow up.
跟住都冇 send, 測隱之心作祟......
呢條友喺公司咁多年, 年年加人工加到有番咁上下. 出到去, 以佢咁嘅學歷本錢, 唔好諗 project 喇, 因為人哋見佢個冇料到 CV 一定唔請. 就算搵其他工種, 人哋頂多會比萬零蚊佢, 同佢而家攞緊個份高薪, 簡直冇得比.
點知有日放工同佢同 lift, lift 內亦有另外兩個同事. 落到大堂我同大家講 bye-bye, 兩位同事都有回應, 佢完全唔睬.
Diu 佢, 死到臨頭都唔知驚, 咁寸臭?
好. 當晚就決定送佢一程, 我用咗寶貴嘅時間, 精心鬥咗個 email, 第日 first thing in the morning 發比老闆.
果然係 CEO ! 老闆睇完 email, 即刻有反應, 叫 HR 同佢埋單計遣散 package, 炒 Q 咗佢 !
本 blog 主題 Alpha Dog. 呢個名詞, 尋日朋友教嘅.
意謂一啲鍾意喺人面前扮識, 扮"老闆", 扮 "領袖" 嘅人. 要注意, 係扮, 唔係真嘅.
經上年意大利公幹慘痛教訓, 今次飛起上次令我尷尬到爆嘅兩位美女 consultants, 換上全男班, 仲要一個係喺美國讀書, 浸過鹹水嘅, 以為今次唔駛輸.
點知死得仲慘烈.
首先介紹吓呢兩位男士, 佢哋共同特徵 : 就係上咗大陸打躉, 做咗好多年野嘅香港人 : 一個廿到抿,一個四十到抿.
廿到抿嗰個 outlook 都 ok 嘅, 只不過係奀瘦咗啲.
 |
| BLUE JEANS |
四十到抿嗰件 Alpha Dog, 同以前 80 年代 band sound 唱 '豈有此理' 隊 BLUE JEANS 個蘇德華, 簡直係孖生兄弟, 我同佢未熟嗰陣真係以為佢姓蘇.
Alpha Dog 同蘇德華一樣咁靚仔不特止, 仲要加個插蘇鼻.
 |
| (真) 蘇德華 |
Alpha Dog 自稱對 sight-seeing 全無興趣, 當年喺 New York 讀咗 6 年書, 都未去過自由神像. 佢果然冇講大話, 成個行程對所有景點零興趣, 成日淨係想 '鳩嗚' (購物) 同食.
唔記得講, Alpha Dog 什少旅行, 幾十年來淨係去過 美國, 德國, 韓國, 越南同大陸.
但佢食野嗰陣就厲害喇, 之前重來未去過嘅國家如法國, 意大利, 啲野食一嚟, 立即食神上身 :
 |
| Cold cuts platter |
1. 米蘭食 cold cuts 嗰陣, 曬自己上海屋企有部切肉機, 成日請朋友開 party.
- 天呀 ~ 但 cold cuts platter 上枱有人連 salami (腸) 同都 prosciutto (火腿) 都唔識分囉.
2. Florence 食意式肉丸, 佢話 : "嗱~~ 呢個似樣喇, 呢個同我喺 New York 住嗰 '屎' 啲意大利餐館 meat balls 做法差唔多喇, 不過呢度啲番茄醬就酸啲啫......"
- 食 '屎' 啦你 ~ 意大利煮餸用新鮮番茄, 唔用 New York 啲罐頭番茄醬㗎, 緊係酸啦.
3. 去到邊衰到邊, 過到巴黎, 喺餐廳見到送餐用嘅 baguette (法包), 佢話 : " 啲法國蕉 (佢對法國人嘅統稱) 抄足越南, 不過越南人就識食喇, 會夾啲肉呀, 菜呀喺包度 ", " 咦 ~ 喂! 乜呢間餐廳唔比牛油, 冇牛油搽啲包點食呀?! "
呢隻鴨脾, 放到咁大, 因為想你哋望清楚, 因為喺食嘅時候, Alpha Dog 已經到咗歇斯底里嘅批判邊緣, 亦係我容忍限度嘅試煉 .
4. 儘管事前多番嘗試, 同佢解釋喺歐洲食薯條, 啲人唔點茄汁點蛋黃醬 (Mayonnaise), 提醒佢喺餐廳唔好問人攞茄汁食薯條.
但佢依然置之不理, 問侍應攞茄汁, 仲要唔係點薯條, 係點薯仔. 侍應唸唸有詞, 同法文話佢侮辱法國飲食文化. Alpha Dog 叫我翻譯之後, 竟然發老脾: " 挑 ~ 啲法國蕉真係好鬼 stubborn, 我食薯條一定落 ketchup 先食得落喎, 唔鍾意人落 ketchup 就唔好擺個樽出嚟比我見到啦 ! "
- 呢吓, 真係好慶 .
- 忍咗 5 分鐘, 過咗啖氣同佢講: "個侍應唔係 stubborn, 以前你喺美國點食我話之你, 總之你而家喺人哋國家, 就要尊重當地文化. 你咁搞根本同食魚生嗰陣, 用麵豉湯淥 x 熟啲魚生一樣咁 Q 核突 ."
- 我知佢當野好想打我, 不過我係客, 佢冇符.
5. 當大家繼續食, 氣氛稍為緩和之際, Alpha Dog 又有發表 : " 呢隻鴨脾, 比起尋日晏晝食嗰隻乜雞, 好好多 ......"
- 雞鴨不分 ! 而且兩者煮法都唔同, 況且我覺得尋日隻雞好夠味好好食喎 .
- Alpha Dog : " 我意思係, 雪藏鴨嚟講, 都算煮得好, 真係可以再食多隻 ".
- 他媽的 ! 無名火再起三千丈 : " 雪藏 ? 你點知係雪藏 ?"
Alpha Dog : "全歐洲啲肉都係中央屠宰㗎啦, 冇新鮮肉㗎 ! ".
6. 忍咗 (佢) 好耐, 終於食完. 唔知做乜, 講起鹽.
我話出 trip 有時貪得意都會買鹽, 因為每度啲鹽都有特色, 有次仲買到藍色波斯鹽.
可能之前踩親佢條尾, Alpha Dog 咬住唔放, 話鹽唔健康, 自己煮餸 重來都唔落鹽, 淨落雞粉.
- 我話雞粉咪即係味精 ?! Alpha Dog : " NO!!! 雞粉冇 MSG, 健康過鹽好多."
-
我上維基百科, 節錄如下 :
-
< 雞粉，是烹飪常用的一種味精，在中国大陆一般叫做鸡精。主要採用雞肉為原料，經高溫高壓處理及科學調配而成，適合肉類調香增鮮。成份有谷氨酸鈉（味精）、谷氨酸、鹽、雞油、糖、薑、二鈉肌二酸、薑黃粉及白胡椒，是雞肉口味的味精。>
Delay no more, 雞粉冇味精 !
7. 經典, 應該算係呢舖.
第晚食飯, 叫海鮮拼盤, 當大家食得好開心之際, 佢又發噏瘋 : " 你哋知唔知法國啲龍蝦係喺美國嘅 Maine 度嚟㗎 ? "
- 你係咪有妄想症? 抑或你當我係流 ? 法國周圍都係海, 咁 x 多 blue lobsters, 駛等你下千里迢迢喺美國飛啲 Maine 龍蝦過嚟 ?
- 你第一次去法國喎, 知法國咁多野 ? 你估你係先知 ?
