前兩晚, 舊同事火鍋聚舊, 其中包括一個已移民海外嘅前顧問, 我哋同佢洗塵暨送行 ( 返港後第一次見, 又係佢返歸前最後一次見 😆 ).
呢條顧問, 識佢超過 12 年, 正一溝女怪 ! 當年同佢去大陸出差, 無時無刻都正在搵食, 就算喺客 ( 我 ) 面前都完全不留情面咁聊女, 絕對唔收斂.
呢世人, 未遇過一個對女性咁 keen , 咁嗒糖, 咁有興趣嘅人. 如果香港冇王管, 可能佢真係會周街強姦人.
嗰陣以為佢風流成性, 個底會好花, 身邊大把女人. 但我錯喇, 原來佢有個拍咗廿年拖嘅固定女友 ( 現任老婆 ) , 仲係青梅竹馬一齊出國讀書嗰隻.
10 年前終於結婚, 生咗一仔一女, 成日 post 啲幸福家庭照出嚟, 羨煞旁人. 移民後冇乜動靜, 以為佢玩夠, 修心養性.
 |
| 豬扒 |
哈, 經過火鍋嗰晚 after dinner drinks, 我加倍感受到乜嘢係 ' 江山易改, 本性難移 '.
條友基本上由步入夜店當刻, 人狼程式已 auto-connect , 立即啟動, 跟住不由自主不斷覓食, 唔理好醜最緊要就手, 同我哋飲唔夠 3 分鐘, 已經過枱溝女.
睇見啲所謂被溝嘅女嘅質素, 肯定當事人一定醉咗, 但見佢其極為雀躍, 仲竟敢笠咗我哋枱支 magnum 香檳去請班豬扒飲. 呢啲, 咪係 ' 覆水難收 ' 喺夜店嘅演繹囉 !
第朝 send 張豬扒寫真比大家開心 share, 望真啲 ...... 😱 哎呀, 好彩人哋唔受溝, 而佢又冇同豬扒搞乜 ja ...... 如果唔係 🙈🙉🙊
2018 第 3 轉出差 ⇢⇢⇢ 曼谷.
已經幾年冇去了, 桃花依舊, 人面都竟然依舊 😆 只不過感覺有啲唔同.
有乜唔同 ? 就係各方面都覺得冇咁驚嚇囉.
第一次去泰國, 廿幾年前放暑假返香港, 個 friend 先斬後奏, 同我報咗團, 仲比晒錢, 騎虎難下, 唯有戇居居去一轉, 結果蒙上陰影, 睇 / 遇到畢生難忘嘅兩件騎呢事 :
1. 曼谷蛇園
平生同蛇最親密接觸只係食蛇羹, 唔明點解蛇園可以係觀光景點, 人蛇共舞表演, 好睇咩 ? 比條大蟒蛇纏上身合照, 好玩咩 ?
雖然過咗咁多年, 而家都仲好記得由進入蛇園, 到步出嗰刻, 嗰種驚慄同渾身不自在感. 萬一上到旅遊車先發現有條蛇走咗入自己褲襠, 真係好得人驚.
2. 芭堤雅性愛真人 show
匪夷所思, 個團男女老幼, 搞乜會帶我哋去睇呢啲 🙈. 泰妹表演特技, 下體放出一隻又一隻雀仔, 啲雀周場飛, 我哋四圍避. 哇 ~ 比佢兜頭撞埋嚟, 10 年都冇運行.
 |
| 小露寶 |
跟住戲肉真人 show, 條鬼搞極都唔起, 正當我戥佢兩個冇著衫凍之際, 後坐傳來一把女聲 : ' 小你露寶 ~ 搞乜呀, 含到牙都爛 L 埋都未 L 得 ! '
厲害 ! 擰轉頭望吓, 嘩 😍😍😍 有條同張柏芝出道嗰陣咁上下靚嘅靚女, 喺度咆哮 ! ( 後尾識咗, 原來佢係差婆 )
經此一役, 對泰國印象麻麻, 覺得啲嘢古靈精怪, 跟住每次去曼谷公幹, 都心緒不寧. 同埋唔知係咪聽得泰國鬼故多, 養鬼仔, 降頭, 又乜又物, 明明冇, 都自己嚇自己, 喺酒店未試過一覺瞓天光.
曼谷打的係另一噩夢, 溝通唔到係必然, 自己一個搭, 人生路不熟, 曼谷夜晚啲街又暗, 加上有時啲司機會喺倒後鏡望住你, 然後喃喃自語陰陰咀笑, 咪話唔驚.
好在幾年後嘅今日, 終於有救, 因為有 Uber, 明碼實價, 又平又正.
不過曼谷超塞車, 趕時間最好都係搭 skytrain BTS, 可惜現時覆蓋範圍未算多, 好似話呢一兩年會再開通多兩三條線, 希望會再好啲啦.
出完今次差, 發現
曼谷人其實好有禮貌, 好友善同好 nice ( 起碼比香港人 ), 只不過係自己之前一直戴有色眼鏡睇佢哋.
親身經歷 : 路不拾遺. 好多年前由酒店打的去夜蒲, 喺的士賴低咗部幾靚嘅相機懵然不知, 的士司機竟然車番部相機返酒店, 叫酒店交番比我 !
有次同朋友自駕, 半路中途爆呔, 路邊有陌生人走嚟幫忙換呔, 搞到身水身汗, 污糟邋遢, 事後竟然不收分文嘅奇事 ! 😱
我嘅驛馬年, 好明顯係 2018.
上禮拜啱啱跑完新加坡, 隔兩日就要飛墨爾本.
出發前上網摷旅遊資訊, 好似冇乜特別地標, 市內景點竟然 5 隻手指數得晒.
( 說明 : 個人對景點要求頗高 - 火車站, 動物園, 球場 - 唔算 ! ).
 |
| Hosier Lane 塗鴉 |
連去巷仔睇街頭塗鴉都可以係觀光必到之處, 潛台詞顯而易見, 真係要冇嘢搵嘢嚟做 : 悶蛋.
墨爾本被評為有良好生活條件, 貴為世界最佳宜居城市榜首.
T2 落機等埋行李已經半夜 12 點, 到去的士站, 人聲頂沸, 但的士只得小貓三四架, 好稀疏, 搞到啲人亂插隊, 全冇秩序可言, 羅湖都冇咁衰 !
排隊唔夠一分鐘, 已經目擊四班人因爭車上扯火嗌交. 其中一個推住 BB 車嘅四眼華裔女人, 好明顯爭輸咗, 向前面上緊車兩個鬼佬, 用廣東話粗口破口大罵 ( 係好粗好粗連男人都少講嗰隻 ), 佢老公就企喺旁邊觀戰.
初到貴境, 第一印象真係好緊要.
當刻腦海立即浮現 : ' 世界最佳宜居城市, 良好生活 ' 😂
 |
| 酒店天台泳池 |
跟住逗留期間, 好彩冇不快事件, 最最最僥倖, 就係避過咗高溫. 喺墨爾本嘅日半風和日麗, 十幾廿度好舒服. 同事話, 我哋到達之前啱啱嗰日, 都仲成 40 度㗎.
當地 UV 好勁, 陽光特別𥋇眼, 出街唔帶超, 一定好快白內障. 晨早 8 點太陽照落皮膚嘅灼熱感, 竟然同喺香港中午一樣 ! 唔怪得澳洲皮膚癌病發率世界第一啦.
酒店天台有個好搞嘢嘅泳池, 有小部份凸咗出街, 游游吓望落街, 應該幾過癮. 可惜我身材太差, 無謂獻醜.
2018 驛馬星動, 新一年都唔夠 5 日, 已經飛完新加坡.
自從 1997, 去過新加坡不下 30 次. 20 年後嘅尋日, 終於可以一嘗當地海南雞飯.
 |
| 好好好好味的海南雞飯 |
新加坡同事一路食, 一路話碟飯貴, 話大排檔食 5 蚊坡紙, 上樓就要成廿蚊. 大佬呀, 有冷氣喎, 同埋我覺得唔貴啦, 碟雞份量確實好多, 足兩隻髀㗎. 肉嫩皮薄, 肥瘦適中, 而家諗起都流口水, 況且完全冇嗰啲透明 / 黃色肥膏同恐怖血水添.
個飯最一流, 一啲都唔油, 每粒飯都被薑汁 + 香料包圍, 同香港嗰啲雞油撈, 食完個咀啲唇膏會油膩到化晒嘅飯, 完全兩回事.
秘製蒜蓉辣椒醬, 絕對係極品, 提升晒成個雞飯嘅層次 ! 一食鍾情, 立即買咗支返香港慢慢嘆.
 |
| Dempsey Hill - entrance |
 |
| Dempsey Hill Map |
好戲在後頭, 工作完畢晚上又出擊, 上咗山上面一個由舊軍營改建而成嘅泡點 Dempsey Hill.
噢, 嗰度成個山頭好大好靚, 仲好浪漫添.
車我哋上去個阿叔, 話佢後生就係喺嗰度服兵役 😆
 |
| 蟹, 又真係幾正 bor |
幾廿個 block 乜都有得食, 但我哋偏偏去咗燈光火著, 同場地浪漫氣氛極度唔夾嘅 " 珍寶海鮮 " 食胡椒 / 咖喱蟹, 畸形.
食食吓, 啲人無端端講出差鬼故. 頂, 平時唔驚, 但喺新加坡就真係有啲棹忌, 因為喺度賴過兩次堅嘢嘛.
新加坡同事以前星航做空姐, 台灣下屬美國出差失蹤, 原來喺酒店被男同事情殺, 下屬家人耿耿於懷, 落葬時同佢著紅衫紅褲, 擺明要佢報仇 😨
判頭話杭州半夜喺酒店見到有 ' 人 ' 坐喺床尾望住佢, 坐天光至走 😮 台北街頭落雨買把傘, 唔知點搞帶咗隻嘢返上海 😧 搞到而家出差一定同埋同事住 airbnb, 唔會自己一個瞓酒店房, 有乜事都可以立即互相照應喎 😖
唉吔 ~ 講呢啲, 想嚇死我咩 ?
返到酒店好心寒, 成晚輾轉反側, 兩個鐘醒一次, 瞓咗等如冇瞓, 起身嗰陣成條喪屍咁.
" 平生不作虧心事, 夜半敲門也不驚 "
我冇做虧心事, 半夜又冇人敲門, 但我好驚囉.
