香港人天生註定要捱

我係個活於現在嘅人, 過去...... ? 將來...... ?  有時會諗, 但唔會花太多時間.   

記得一篇女神高 Ling ( 高海寧 ) 訪問, 比佢一言驚醒夢中人.  佢話假設人活到 70 幾, 如果每日儲一蚊, 香嗰陣其實得兩萬幾蚊.

全靠高 Ling 將生命量化, 至知一個人只有兩萬幾日, 好少咋.  人生苦短, 最好過得開心啲.

原本帶住一股怨氣去悉尼, 但從行出機倉至上番機飛走, 落咗地嘅 56 小時, 100 個遇到嘅澳洲人 98 個都係勁 nice, 去到無啦啦 happy 番.   哈, 夠竟搞乜澳洲人可以咁好心情呢 ?

Sydney Harbour

後尾我知喇, 空氣好, 水好, 同埋 work-life 唔 balance 囉 -- 佢哋永遠 Life 行先.  Work ? 乞嗤啦 !

同澳洲同事明明約好 9am 喺地盤見, 竟然可以 9:45am email 我, 仲要唔 whatsapp ( 擺明搏我睇唔到 email 想放飛機 ! ) 話嚟過但不得其門而入, 所以返咗 office.  
唔會吧, 我外國人都比入, 佢澳洲人唔得 ?  好彩時運高睇到佢 email, 立即叫人去入口 " 的 " 佢入嚟. 

等到佢蒲頭已經 10:15 am, 講公事唔夠 10 分鐘問 lunch 想食乜 😂    11:30am 去到 Bambini Trust ( 餐廳 ) 人哋咁早未 serve lunch, 佢話不如喺門口飲住等, 人哋一開就入去食 😂😂

Bambini Trust - office hours 都坐滿飲嘢嘅人

食食吓問嚟緊 weekend 玩乜, 嘩, 星期四 ju 喎, 星期六咁未來嘅事, 未 plan 囉 😂😂😂    咁我反問佢又有乜節目, 佢話上禮拜因為去完成都好攰, 未復原, 諗住 weekend 兩日大覺瞓 😂😂😂😂 

Aqua S - Sea Salt Ice Cream

食飽飯費事阻住佢等屎屙, 亦都當比條生路大家行吓, 訛稱有急事要返酒店, 跟住 say goodbye 走人, 實情係閃咗去行街 shopping 同食海鹽雪糕 😂😂😂😂😂

成個澳洲 trip, end up 只係做咗幾粒鐘公事, 不過唔係我問題, 我係勤力底㗎 😂😂😂😂😂😂, 係對手未能配合而已 😂😂😂😂😂😂😂. 

4 點幾, 行到腳痛返酒店, 喺房望落樓下露天酒吧, full house 坐滿 office 打扮嘅人嘻嘻哈哈喺度劈酒, 日光日白唔駛 do, OZ 做人真歎記.

View to bar from my room

一覺冧到天光

尋日要為隻馬頂包飛 Sydney, 一早起身已經周身唔聚財, 行又唔係, 坐又唔係, 企又唔係. 總之, 成日中秋假期就比呢個夜晚要飛嘅珈瑣搞爆晒 !

今年三月喺 < 魚翅航空 > lounge 被種族歧視, 而家入親都有陰影.  成日車我嗰個 uber 司機, 話我唔出聲個樣勁惡, 係一定唔會比人蝦嗰種.   好, 今次先下手為強, 有理冇理一入去坐低即刻整個惡樣凶吓佢先.  呵, 又得喎, 招呼真係周到咗好多 !

我搭機通常呆滯, 唔會好似啲人咁日理萬機攞住部 laptop 猛做嘢, 仲因為太無聊要打發時間, 必定食飛機餐添.  

明知一陣上機又食, 竟然都忍唔住喺 lounge 叫個 medium rare 和牛漢堡 ( 好味喎 ), 同埋, 唔劈番佢幾杯香檳唔係人囉 !  加埋晏晝嗰啲, 應該飲咗兩支, 上到機成肚水 / 氣, 屙唔出嘔唔到, 完全唔想再飲, 出奇地成程 9 個幾鐘 end up 只係飲咗 半 ! 杯 ! 香 ! 檳 ! 真係 10 幾年都未試過咁節制.

最 amazing 係可以大覺 < 冧 > !   注意 : 係 < 冧 >, 唔係 < 瞓 > 😂    由食完宵夜 dinner 嗰刻立即失去意識, 一開眼, 已經派緊早餐, 陪住我嘅, 就係嗰杯擺喺枱頭, 飲剩一半 air 咗 6 個鐘又冇人收嘅香檳 😂😂😂😂

打救你

公司自從 6 年前搬入呢個 office, 從未睇過風水.  上兩個禮拜老闆下晝無端端懶緊張叫我入房, 入到去 CFO 同 HR Director 喺晒裡面, 心諗, 炒我都唔駛咁高規格嘛 ?

我就想喇, 唔係炒囉, 原來老闆見 office 諸事不順同好多人大病, 覺得要搞吓風水, 問有冇人介紹.  唉, 最怕呢啲, 搵着個好嘅就話啫, 整着個冇料扮代表, 亂咁嚟, 分分鐘衰多幾錢重.

結果搵咗舊公司睇開嗰個.  果然不出所料, office 輸在起跑線, 大門差到不得了, 財位落咗喺廁所, 桃花位缺角, 最大煲係 CEO / CFO 房都喺永久 ' 衰位 ' 😒    咁搞, 想發都難 !  

作為專業風水師, 同救護員一樣, 死人都要當生人救, 雖然個 office 咁差勁, 佢都比咗好多建議, 希望可以力挽狂瀾.  同埋呢個師傅唔 sell 啲什麼一條龍風水擺設服務再賺一筆.  壞處就係我要四出奔跑搜羅擺設, 不過我唔介意, 因為可以偷吓師嘛.

終於買齊風水物擺陣, 好多虔誠教徒竟然毫不抗拒.  但最意想不到, 係老闆秘書, 佢見到風水師覺得似曾相識, 後尾記起原來之前間公司都係用同一個, 所以咁熟口面.  話自己細叔都係做風水呢行, 仲收貴好多添, 又話風水其實唔係迷信, 係科學理據, 令人覺得更加心安理得. 

明知秘書亦係虔誠教徒, 但佢咁講, 覺得佢應該接受風水, 所以根據師傅建議喺佢枱底黐啲化病古錢, 點知隔咗陣, 佢搣走晒啲古錢, 走嚟同我講 : 唔好意思, 我嘗試過, 不過真係接受唔到.

六個古錢啫, 又唔係喺你枱底種生機, 唔駛咁大反應嘛 ? 嘗試?! 搞到我好似要迫你藏毒咁 😠 !   咁介意, 你一早就唔好噏乜春風水係科學理據啦, 痴線 !   

呢啲係第一類危險人物, 明明自己比晒 ok signal 人, 原來其實係 no 囉.

T10 面埋伏

上年八月興高采烈寫咗個打 T10 嘅 blog, 當日一朝起身, 知道打 < 天鴿 > 唔駛做, 心情異常興奮. 

打風前夕

一年後, 世紀巨風 < 山竹 > 襲港, 尋晚又本住無比興奮心情等待第朝來臨, 特登唔較鬧鐘, 星期日喎, 打風又唔駛騎馬, 乘機瞓晏啲囉.  可惜事與願違, 大概潛意識太關心幾時掛 8 號, 結果成晚輾轉反側, 醒咗 N 次.  
6 點幾仲自然醒埋添, 眼光光, 望吓出面, 風平浪靜, 心諗 : 天文台, 你都好流啫.

自鳴得意咗大約個幾鐘, 情況突然急轉直下, 風雲色變打到嚟, 窗外狂風暴雨, 地動山搖, 先驚覺今次 < 山竹 > 唔係 lulu, 天文台終於少有哋威番次.

與此同時, 意想不到嘅事情發生 : 屋企 5 個喺唔同位置, 日久失修, 平時只可以虛掩嘅窗, " 蓬 " 一聲好似拍鬼片咁, 同一時間比大風吹開晒 !  因為窗嘅開關制已經鬆脫, 扯風嘅時候就完全閂唔番, 大雨狂湧入屋, 認真大檸樂 ! 

冇辦法中嘅辦法, 就係飛撲攞絲帶, 全壘打去將窗嘅開關制綁實喺傢俬度, 非常狼狽.  做乜用絲帶 ? 因為就手囉.   啲繩 ? 到而家都仲未諗到擺咗喺邊.

跟住 < 山竹 > 最接近嗰幾個鐘, 騎樓門同大門雖然已閂, 但因氣流關係, 不停咁澎澎聲, 外面全方位烈風颳到 bi bi 聲, 好似四面有人吹哨子咁, 層樓又震.   當刻極度擔心騎樓玻璃門會大爆破, 同埋啲窗最終會頂唔順被扯甩, 屋企又冇大木板擋風, 真係唔知點應付.   

好彩最後平安無事, 只係好驚嗰隻虛驚一場.   

My 吉, 連留喺屋裡面都可以咁驚嚇同 vulnerable, 搞成咁, 只怪自己平時疏懶, 明知咁多嘢壞都唔去搵人修理.  但萬幸就係打風當時自己在家, 可以即時行動作出補救, 如果出咗 trip, 屋企啲門窗又咁不堪一擊, 後果真係不堪設想.

掛號警告信

講到口臭, < 廢柴 > 馬都係持續咁大遲到, 唔過 10 點唔蒲頭, 忍無可忍, 上星期叫 HR 出封警告信佢.

睇 draft 見 ' immediate termination ' 呢個字眼, 問 HR 會唔會激咗啲, 不過佢哋話係公司嘅 standard, 攞嚟大吓佢啫.  呵, 既然係咁, 是但啦.  再問 HR 派信嗰陣, 我需唔要需要在場, 答案係唔駛.

頂, 如果我堅持出席, 就唔會 miss 咗以下呢幕 :

據 HR 複述, < 廢柴 > 收信嗰陣, 定型呆 L 咗 10 秒, 跟住鬼食泥, 話而家咁, 即係公司想唔賠錢炒佢.   跟住連串辯駁, 話唔公平同咁樣覺得好尷尬, 佢唔會簽收封警告信.

毫無悔意, 離晒大譜.  HR 同我講, 佢唔肯簽, 咪寄比佢囉 ! 
 

結果今日食 lunch 前, office 出現經典場面, 有個郵差走到埋佢個位, 要佢簽收份掛號包裹.  < 廢柴 > 不如有詐, 簽收後拆開個紙皮盒, 裡面原來就係封警告信 ! 😂😂😂😂😂😂😂😂😂😂😂😂😂😂😂😂

 道高一尺, 魔高一丈.  HR 真係好嘢 !

火遮眼

幾年前準備轉做呢間公司之時, 啲 consultant 同我講個牌子好亂, project 啲人好廢.  我信, 因為見工前去咗舖頭𥄫, 設計出奇地醜同老土, 個牌子咁都收得貨, 要求高極有限, 心存僥倖, 諗住入去會好 easy, 可以 hea 住做.

點知黑仔, 上錯賊船, 原來老闆請我返嚟, 係想 180° 轉變, 整頓多年嚟嘅頹風, 工作量不但比以前多萬九幾倍, 仲要接手啲喺公司撈咗十幾廿年嘅劣質二手貨 ( 手下 ), 巧婦難為無米炊, 好惡搞囉.   

兩年前, 幾經辛苦送走 < 虔誠教徒 >, 上年七月合併, 又整條 1000% 冇靈魂嘅 < 廢柴 > 我哽.  喺呢行做咗廿幾年, 從未遇過一個咁行屍走肉, 連自己都管理唔到嘅男人.

三宗罪 :

1. 每日返工遲到 1.5 小時以上 

屢勸不改, 仲駁咀話係遲到但自己都晚晚 OT 啦, 打橫嚟講.

如果計番你每日遲大到 / 遊魂發夢做嘢慢 / 兩個半鐘食 lunch 同做 gym 嘅時間, 你返通宵更都未夠補鐘啦 !

2.  曠工 

六月去完旅行應該復工嗰日完全冇影, 下晝 5 點幾摷佢, whatsapp 回覆話班機 delay, 仲扮可憐講什麼 it's a real torture. 
  
哈, 你真係當我流 !  班機 delay 啫, 唔係飛咗上太空, 乜喺知道會 delay 嘅一刻唔可以 whatsapp 通知聲自己要遲返 ?

3. 冇責任感唔 take ownership

唔係唔比放假, 但佢今年已經放咗 3 次假, 八月中走嚟同我請第 4 次, 話同屋企人去北海道, 由九月中放到 25 Sep 中秋節.

無名火起三千 !!  自己負責嘅兩單工程起貨 ( 26 Sep @ Sydney, 28 Sep @ 印度 ), 之前幾日應該係最忙嘅日子, 竟然走去放假 ?  

我話 : " 你 25 號晚先返香港, 26 號朝點去 Sydney 收場 ? 你上幾次放假應承會跟嘅嘢都冇理, 今次又想我執手尾 ? "    佢呆 L 咗 10 秒, 跟住問咗個我發夢都估唔到嘅問題 : " 咁你可唔可以去印度 ? "  真大膽 !   就算我去印度, 你 26 號都係去唔到 Sydney 囉 !    都費事再嘥時間, 同佢講 : " 你去印度, 我去 Sydney, 係咁. "

比我炳完出去同人講, 話我其實係自己想去 Sydney, 真係想揼 X 實佢 !  仆街, 執你壇屎, 搞到中秋都蝕埋我都未出聲, 竟然仲毫無悔意同人亂噏.

前兩日去新加坡, 再次比佢吹到啤一聲, 入境臨過關先話未填 form, 都唔知佢成程機三粒幾鐘喺到做乜 7 !?   等佢填表排隊, 足足 15 分鐘, 都算.  行緊出的士站, 隨口問佢有冇換坡幣, 原來冇 !  我 diu 又嘥多 10 分鐘等佢走去找換, 原本 5 分鐘做完嘅事, 因為佢, 用多咗 5 倍時間 !


留條完全冇策劃同自理能力嘅人喺度, 簡直浪費時間, 當刻做咗個決定, 等佢去埋印度, OUT !