T10 面埋伏

上年八月興高采烈寫咗個打 T10 嘅 blog, 當日一朝起身, 知道打 < 天鴿 > 唔駛做, 心情異常興奮. 

打風前夕

一年後, 世紀巨風 < 山竹 > 襲港, 尋晚又本住無比興奮心情等待第朝來臨, 特登唔較鬧鐘, 星期日喎, 打風又唔駛騎馬, 乘機瞓晏啲囉.  可惜事與願違, 大概潛意識太關心幾時掛 8 號, 結果成晚輾轉反側, 醒咗 N 次.  
6 點幾仲自然醒埋添, 眼光光, 望吓出面, 風平浪靜, 心諗 : 天文台, 你都好流啫.

自鳴得意咗大約個幾鐘, 情況突然急轉直下, 風雲色變打到嚟, 窗外狂風暴雨, 地動山搖, 先驚覺今次 < 山竹 > 唔係 lulu, 天文台終於少有哋威番次.

與此同時, 意想不到嘅事情發生 : 屋企 5 個喺唔同位置, 日久失修, 平時只可以虛掩嘅窗, " 蓬 " 一聲好似拍鬼片咁, 同一時間比大風吹開晒 !  因為窗嘅開關制已經鬆脫, 扯風嘅時候就完全閂唔番, 大雨狂湧入屋, 認真大檸樂 ! 

冇辦法中嘅辦法, 就係飛撲攞絲帶, 全壘打去將窗嘅開關制綁實喺傢俬度, 非常狼狽.  做乜用絲帶 ? 因為就手囉.   啲繩 ? 到而家都仲未諗到擺咗喺邊.

跟住 < 山竹 > 最接近嗰幾個鐘, 騎樓門同大門雖然已閂, 但因氣流關係, 不停咁澎澎聲, 外面全方位烈風颳到 bi bi 聲, 好似四面有人吹哨子咁, 層樓又震.   當刻極度擔心騎樓玻璃門會大爆破, 同埋啲窗最終會頂唔順被扯甩, 屋企又冇大木板擋風, 真係唔知點應付.   

好彩最後平安無事, 只係好驚嗰隻虛驚一場.   

My 吉, 連留喺屋裡面都可以咁驚嚇同 vulnerable, 搞成咁, 只怪自己平時疏懶, 明知咁多嘢壞都唔去搵人修理.  但萬幸就係打風當時自己在家, 可以即時行動作出補救, 如果出咗 trip, 屋企啲門窗又咁不堪一擊, 後果真係不堪設想.