CX vs SQ

驛馬繼續星動, 北京飛新加坡, 因飛行時間超過 6 粒鐘, 公司皇恩浩蕩比坐 business class.  今次有幸搭乘 SQ ( Singapore Airlines ), 星航被譽為亞洲最佳航空, 真係非常好奇, 佢有點好.

飛行生涯真係好悶, 最鍾意食飛機餐消耗時間.  上 SQ 網睇佢啲餐乜料, 哇 ! 厲害, 原來可以 < BOOK THE COOK > : 中 / 西 / 新加坡料理 16 款菜任選其一, 驚死蝕底, pre-order 定個 Laksa 試吓先.

< BOOK THE COOK > BANNER

上機當日完全忘記咗訂餐嗰回事, 望吓餐牌, 唉吔 ~ 做乜剩係得早餐㗎 ? 生果麵包乳酪 muesli, 全部我都唔食 😩  

正當想等空姐行過同佢講聲唔駛 serve 我早餐之際, Laksa 已經送上.  Oh, Laksa !  差啲唔記得, 我訂咗個 Laksa 添 😎

早餐冇嘅 LAKSA

可惜, 碗 Laksa 嘅味道同溫度, 令人失望, 不過比起個早餐, 必定好咗 N 倍.   

不得不讚空中服務員, 極度話頭醒尾, 例如 : 比件衫佢掛, 唔會要你摷個 boarding pass 做識認, 而係佢自己用紙 mark 低乘客資料, 再放喺衫袋.  同埋空姐 top up 香檳速度一流, 全程機冇乾過塘.  除此之外, 我發現佢哋同乘客對話, 無論大小事務, 一定用好 firm 嘅眼神, 呢個 CX 冇囉.

話雖如此, 都唔係 SQ 威晒.   論機倉新舊, 燈光, 坐位設計同私隱度, CX 其實唔駛輸.

THE MENU 餐牌

幾欣賞 CX 近期長途 business class 新推出嘅 < The Menu >, 唔駛再好似以前咁要 heat 好晒所有食物, 擺喺手推車上面推嚟推去比客揀, 浪費食物之餘又唔衛生.

而家 made to order, 食乜先整乜, 頭盤主菜飲料一次過送到埋坐, 仲轉埋用圓形陶瓷碟添, 如果攞走個托盤, 淨係見塊白枱布, 成件事簡直係直逼 first class ! 😂  唯一分別, 係 first 有魚子醬食同埋落單時可以 precise 埋上菜時間.

Wonton noodle in soup

Chicken in sesame dressing & glass noodles

Pork congee with noodles

北京的北歐

馬不停蹄, 星期五啱啱上京做嘢, 天氣超好, 零污染一舊雲都冇, 但有啲凍.

一落機行李未擺低已經要立即趕去工地, 開會期間不慎吸入燒焊氣體, 搞到心翳.  工程進度毫無起色, 負責人又愛理不理, 妖 ! 好㷫.

好大陣怨氣, 就算鼻塞都聞到, 啲人見勢色唔對, 提議儘快離開工地, 放飯.  呵, 當刻先猛然醒起, 早餐直踩 8 粒鐘未食過嘢, 唔怪得咁燥啦, 原來肚餓......  

放工時間遇著塞車, 6:30 上車, 兩公里路要行差不多成個鐘, 7:20 先到.

Restaurant Exterior

呢間 Georg Jensen 開嘅 " The Georg " 早前已經想試, 點知突然關門.  最近重開, 因怕佢又再曇花一現, 今次抓緊機會仆到去.


餐廳坐落地安門東大街一條小河旁邊, 雖然喺市中心, 但周邊環境出奇地寧靜. 

Very Stylish Directory

未去過, 唔知間嘢得唔得, 不過見到門口個咁有型格嘅水牌, 就知今次冇揀錯 😂😂😂

Atrium Skylight

餐廳由四合院改建, 分酒吧, 餐廳同 private room 幾個部份. 

超高樓底玻璃天窗下嘅內庭, 空間感懾人.

Sitting area in Private Room

Library in Private Room

Our table (so elegant before seated 😂😂😂)

Minimal tableware & decoration

其實我懷疑間嘢唔知係咪真係做生意, 據觀察 ( 唔計嗰一千零一間 private room 同酒吧幾張枱 ), 咁大個場, 坐滿都只係坐到 32 人.

黑掹掹, 浪漫之餘仲好有氣氛, 四周都係一 pair pair 情侶.  而我哋呢班老粗, 竟被安排喺房間正中央打晒燈嘅 signature table, 呢啲正一係 " 擺上枱 ", 做乜都比人睇晒, 醜態完全無所遁形 😆😆.   枱面擺設北歐簡約, 乾淨俐落, 全部 Georg Jensen 產品.

The Menu

諗住咁嘅格局, 實比人掠一頸血啦.  我錯喇, 佢哋所有菜色菜一律 130 人民幣一碟, 真係抵到爛.

The Georg 主打北歐菜, 味道不但有驚喜, 精美賣相更加係 IG 恩物.

我食咗 < 西洋菜伴鰲蝦 >, < 魚子醬帶子 >, < 紅加倫乳鴿 > 全部超好味, 而家諗起都回味無窮 ! 

同枱啲佬食生蠔食得好 high, 話撈埋隻生鵪鶉蛋簡直 " 超讚 ", 啪完一隻又一隻, 咁補, 似乎係為飯後更精彩嘅夜生活作好準備 😂   唉吔, 快啲閃避返酒店先, 唔阻人 happy 喇.

Beautiful Scandinavian Dishes

淋花神器

呢排大驛馬, 狂飛, 屋企冇乜 cash 唔怕比人爆格, 淨係成日心掛掛, 擔心騎樓啲花草.

短 trip 冇問題, 啲草冇水都捱到兩三日, 最慘係有幾次飛一個禮拜以上, 返到屋企見到啲極度乾枯, 樹搖葉落, 瀕臨死亡邊緣嘅植物, 心痛之餘亦覺得好內疚 😲.

屋企位置比較隔涉, 唔想叫人特登上去淋花, 但慘劇亦唔可以再發生.  想盡辦法, 搜尋自動灑水, 可惜市面淨係得農場同球場草皮大水炮, 家用嘅, 其實係冇囉, 仲話香港乜都有.

幾經辛苦, 喺花墟搵到啲所謂自動滴水器, 以為有救, 點知適得其反比佢冼, 啲花死得仲慘.   真係想講 : 明知自己產品流, 就唔好誇大其詞去害人啦, PK !

有盆新寵 ' 紫雪花 ' , 七月買返嚟嗰陣好靚, 啲花開完又開, 點知九月中比 ' 山竹 ' 打殘東歪西倒, 如果再唔護理, 死硬 !    跟住要出長 trip, 無論如何一定要處理呢個隱憂, 不斷喺淘寶搜索, 我唔信搵唔到我想要嘅 😠 !

神器

好彩摷咗陣, 比我找到淋花神器, 連運費都唔駛兩百港紙, 速速買.  神器其實係個可預先設定淋水時間 ( timer & intervals ) 同長度 ( duration ) 嘅方盒, 可 USB 或電池運作. 

出 trip 前

法國搭機返嚟嗰陣諗起屋企啲植物有啲心寒, 唔知會唔會死 Q 晒呢 ?  打開大門除鞋後, 第一時間仆去騎樓睇吓啲花死得未, 哈 ~

出 trip 後

紫雪花爆放 🎉🎉🎉  好靚.

淋花神器, 多謝晒 💖

One night in Bangkok

曼谷有間好巴閉 ( Asia's 50 Best Restaurants 排名 No.1  /  The World's 50 Best Restaurants 排名 No.5 ) 新派印度餐廳 GAGGAN.   

開業以嚟日夜 full house, 老闆搵夠, 幾個月前宣佈做埋下年, 2020 年收皮歎世界.

Beautiful colonial style building

原本已經一枱難求, 消息一出, 成個 booking system 立即淪陷, 幾經辛苦, 喺 3 個月前執死雞攞到張枱.

Awards & trophies

本來訂咗 6:30pm, 點知臨去前幾日收到通知, 1st round dinner 改由 5:30pm 開始 😨   咁早開飯?   後來發現, 佢哋應該係太多 booking, 所以每晚改由一輪變兩輪疏導人潮 😱

曼谷勁塞車我哋夠鐘未人齊, 以為可以食住等, 點知侍應話唔得, 因為要齊人先啟動得.

Emoji menu

枱面見到張牛油紙, 上面印咗 25 個 emoji. 原來係 menu, 代表我哋將會食嘅 25 道菜.

侍應賣關子, 唔透露食材真相, 話有興趣可以食後自己估, 估完佢就話我哋知估得啱唔啱 😆

Music Player

因為我哋起步比其他枱慢, 等候期間, 已聽到四周強勁音樂響起.

Lick it up

輪到我哋, 侍應攞咗個喇叭仔埋嚟, 播起 KISS 嘅 Lick it up, 跟住上個有 3 " pet " 汁嘅碟嚟, 話道菜食法就係要用條脷由下至上去 " lam "  晒啲汁 😂 , 好搞嘢.

值得讚嘆嘅 25 道菜, 賣相同味道極為破格, 完全推翻我對印度菜觀感, 廚師將印度風味同其他各國烹調特色融合, 想像唔到嘅 sushi 刺身餃子同炸物都有, 確實非常非常非常之美味 !  人均價錢大約 HKD 1,200 ( 即每道菜都唔駛 50 蚊 ), 用呢個價錢就可以品嚐到亞洲第一廚師嘅 cooking, 好抵呀 !

但份量實在多得驚人, 加上我哋仲人出錢我出命, 狂劈香檳紅酒, 唔死一身潺.

Appetizers (1-9)

Appetizers (10-16)

Main course (17-20)

Desserts (21-24) . sorry 1 photo is missing

Chefs at work

Menu unveiled  😂😂😂

仲有幸參觀廚房, 見到廚師們手忙腿亂, 為下一輪客人準備食物, 真係要比個 like 佢哋.

餐牌真相 ( 下圖 ), 不過有好多字唔識解, 都係算吧啦 😂😂😂 

玩轉巴黎新食法

今次巴黎之行, 主題係食.  不敢怠慢, 出發前幾個月已經開始資料搜集. 

好頭痛, 唔得辜負別人祈望, 自己對食亦有要求, 想搞驚喜, 但又唔可以太貴太另類.  幾經辛苦, 終於搵到兩個食得又玩得嘅, 大家齊齊做白老鼠, 因為我都係第一次 😅

 
1. Bustronome ►►► 巴士上嘅米芝蓮一星

Chef

一架穿梭於巴黎 18 個地標嘅豪華 double decker, 上層餐廳下層廚房, 麻雀雖小五臟俱全, 廚師喺呢個豆膶煮出米芝蓮.

Bus routing

佢哋 serve 午餐同晚餐, 我哋幫襯晚餐.  7:30pm 開始但到 7:30pm 喺集合地點都未見車蹤, 唔會中伏吧 ?   好彩再等陣, 有個黑人走出嚟, 話架巴士因為改道泊咗喺另一邊.

Panoramic skylight

上到車, 眼前一亮, 燈光同環境完全係 fine-dining 格局,
好得囉.

最正係個玻璃天窗, 我哋成班人仲好好彩被編排坐正車頭大銀幕, 巴黎夜色全包圍盡收眼底.

固定膠架

全程兩個半小時, 行車穩定, 但為安全起見, 枱頭所有酒杯都要卡喺個固定膠架度.

食物方面, 以為係預先煮好喺車上翻熱, 味道大概頭等倉質素啦.   不過我錯喇, 佢兩度主菜, 鴨胸同魚好味到飛起不特止, 竟然係即場煮, 廚師實在太厲害 !

Bustronome - 6 courses menu

La Tour Eiffel at 10pm

呢個兩個半小時嘅巴士餐除咗食得開心仲有驚喜, 就係回程途中我哋可以落車同巴黎鐵塔打咭 😍😍😍.

法國米芝蓮 6 度菜 Eur 100, 唔計酒水每人唔駛 920 港紙, 真係抵到爛.

下次去巴黎, 一定要試埋佢嘅 lunch !

2. Ducasse sur Seine ►►► 上艇遊塞納河

Electric cruise on Seine

原本諗住喺巴黎鐵塔上面 Le Jules Verne 吃飯, 點知撞正餐廳裝修, 嬲爆之際, 喺網上摷摷吓搵到同主 (法國名廚 Alain Ducasse) 新玩意, 佢買咗隻超級電動船喺巴黎塞納河上撈埋高級餐飲.

The Captain

The Deck

隻艇 26 Sep 新船下水, 唔好講笑, 快快 book 嚟試吓先.  訂咗 6 度菜 + wine pairing, 每人 Eur 250 ( 即 HKD 2,300 / 位 ), 咁嘅價錢喺香港食 Ducasse, 淨食唔飲都 no way 啦.

當晚船上全部法國人衣香鬢影, 我哋幾個中國人著得最隨便, 好彩冇人歧視, 反而船長同餐廳經理好友善走埋嚟同我哋講笑添, 可惜除咗我根本冇人聽得明法文, 0 反應.

 



老實講, 食物都係嗰啲 : 香港一定冇可能食到, 玩汁玩食材玩到出神入化, 賣相精緻, 好 L 好 L 好 L 好味嘅 haute cuisine.  

但我就對佢哋 service 有啲唔滿意, 因為斟酒太慢, 道菜未上我已經飲完, 都 pair 唔到 😂

Restaurant prior to boarding + Fantastic food

唔飲得唔好飲

都話唔飲得唔好飲㗎啦.

啲後生, 當晚都係飲到爆晒, 喺食飯枱釣晒魚, 樣衰囉.