放羊英倫

早幾日蛇王 Happy Hour 同事講起移民英國大計, 諗住一家五口揸本 BNO 入藉英倫, 講到好似攞個馬牌入馬場咁易.  同事五口家庭成員為 : 佢兩公婆同 3 個仔 ( 五歲, 兩歲半, 四個月大 ). 

問佢 3 條簡單問題 ( 如下 ) , 真心唔係潑冷水.

Q1 : 兩夫婦有冇試過喺外地生活或工作 ( 旅行或外國親戚朋友度短住唔算 )  / 去過英國未 ?

A1 : 冇 / 未.

Q2 : 過到英國諗住做乜 ?

A2 : 睇吓老公間公司肯唔肯調佢去倫敦啦, 如果唔得佢咪揸 uber 囉.

Q3 : 英國揸 uber 要有 UK driver's license,  BNO 人攞國際車牌揸唔到 uber 喎 ?

A3 : 咁我做陪月囉, 嗰邊咁多中國人應該有得做嘅.  一係就老公英國做太空人, 我留喺香港搵錢, 慳慳哋最多唔租屋搬返阿媽度住. ( 點解唔老公喺香港做太空人, 老婆喺英國湊仔 ? 因為老婆唔識揸車, 喺英國車唔到啲細路出入 😒 )

太天真 !

老公公司真的會勞師動眾調佢職去倫敦嗎 ? 你認為佢 ( 中級管理層, 非專業人士 ) 夠班同啲陀地爭食 ?  就算比個 UK 牌佢揸 uber, 識路咩 ?  陪月 ? 你都話嗰邊中國人多啦, 陪月又唔係獨門秘方, 冇口碑冇 connection, 輪都輪唔到你撈啦.

成日話為咗細路, 實情係你兩公婆羊群效應人走我走, 但諗得太理想, 堅離地, 老婆唔喺身邊老公又要揸 uber 又要湊 3 個仔, 得咩 ?  住落會融得入英國人圈子 ?  唔好啦, 連陶傑都唔得啦, 除非好似大劉洗米華咁疊水, 完全唔駛睇英國佬台戲啫.

冬季日短夜長

冬季日短夜長

冬季日短夜長

呢啲係抵死

保就業玩完, 收到公司指令十二月尾炒人第二波正式進行. 我部門要兜之前提過嘅 avatar ( http://shirliek.blogspot.com/2020/05/blog-post.html ). 

No objection !  因為佢做嘢完全冇交帶, 冇 heart, 死魚一條, 最㷫就係佢永遠都唔覆公事嘅 whatsapp, 我做咗一年, 成功同到佢交流到僅僅嘅 20 個 whatsapp 對話中, 有 18 次係佢要請病假或突然想請 annual leave, 仲要係晨早七八點左右就 send, 平時返工又冇見佢咁準時.

頂佢個肺當正係 [ 請假熱線 ] 😡😡 , 有圖為證, 冇屈佢 !

唔知係咪自己諗多咗, 大部份病假都咁啱星期一或者五個喎, 好得意.

不過最最最差係連自己老闆 : 我個名都串錯 !  知唔知咁樣代表你做人幾𠵿, 幾冇要求 ?!  真係連做隻 avatar 都不如 !

同埋睇番佢不斷 copy, copy, copy & paste 嘅請假 whatsapp......  Sorry for the inconvenience caused, 我都有啲 feeling sick  😤  

不過公司其中一個最能夠令我 feeling sick 嘅, 終於收皮.

 

未係老鼠, 雖然佢都時日無多, 係邊個 ? 咪係條 " 廢柴人力資源亞太區總監 " 囉 !  

時序 :

1 Dec 10:15, " 廢柴總監 " 同我講佢辭咗職, 農曆年後 last day.  心中暗喜 👏👏, 因條八婆同老鼠鬥氣已經間接令職員工失去好多應有福利.  身為 HR 最高領導人, 唔以身作則, 成日高調拉條 team 去食 long lunch, 下午茶.  要人清晒啲年假, 原來自己都冇放, 極度不知所謂.

2 Dec 09:35, 老鼠單方面同大陸同事宣佈現役 " 廢柴總監 " 將會離職, 而新請嘅 HR director 會即日到任, base 喺上海 ; 而 " 廢柴總監 " 呢個空缺唔會再有 replacement.

吓 ! 亞太區總監咁大嘅職位都冇 replacement ? 潛台詞即係公司認同條 " 廢柴總監 " 係廢嘅囉.  更加肯定佢係被請走嘅理據係 : 無可能今日辭職, 第日就有新人頂替, 成件事, 根本係一早 plan 定啦.

致命一擊, 應該係十一月頭大陸 office 有個非常非常重要嘅港女要員離職, 因埋數問題同 " 廢柴總監 " 爭拗, 玩到好大搞到上 HQ, 廢柴除咗被踢爆失職, 對國內勞工法一無所知外, 仲原來連少少普通話都唔識講, 同自己大陸條 team 一直溝通不良.  做亞太總監做成咁, 死得啦, 條友有幾唔掂 ? 一 click 就明 :

http://shirliek.blogspot.com/2020/05/mothers-day.html

" 廢柴總監 " 問我意見, 搵工好 ? 定讀書好 ? 

讀書啦, 學普通話先啦 !  唔好出嚟做嘢, 去害人害物.

唔聲唔聲嚇你一驚

上個禮拜為咗單舊公司嘢搞到心情好一般.

舊公司裁員炒成廿人, 即差不多香港 office 三分一 !

正當各大品牌 2020 年中大開殺戒之際, 舊公司一條 🐔 毛都冇拔, 仲無條件比全寫字樓日日 WFH 成個幾月, 正當我十分羨慕之際, 舊公司驚爆炒人消息 !  Merchandising 同 Marketing 兩個 team 完全瓦解, 最厲害係連個 GM 都剁埋.

家陣裁員唔出奇, 奇就奇在明知會十二月頭出手, 十一月中仲搞 regional meeting, 重金禮聘外籍 coach 一連兩日教班高層 positive thinking, 點樣用正面態度思維去影響期他人.  但事隔不到兩週, 就郁手炒人, 兜走幾個其中有份參與嘅 positive thinkers !  成個安排, 好變態囉.

聽聞會議仲有段小插曲 : 上海有個唔係 regional role 嘅 merchandising director ( ABC 港女 ) 突然現身 VC 歇斯底里一輪咀批評公司冇比國內同事應得報酬, 態度囂張但 CEO 同 HR 竟然冇制止, coach 想插口緩和氣氛之際, 條女高聲大叫, " Hey ! Let me finish first ! " 😱😱😱  全場嘩然 !  

事後各人議論紛紛, 認為佢唔 respect 個會同完全唔睇佢大佬 ( regional director ) 台戲.  哈, 而家水落石出了, 原來呢條女會名正言順坐正頂替自己大佬囉, 唔怪得咁串啦.

舊同事又八咗另一單料我知 : 話說 GM 不經不覺已經做咗 24 年, 下年 25 年應該有金牌攞, 而家臨尾香比人兜咗心有不甘, 要求公司酌情提早比個金牌佢.

結果星期五佢 last day, CEO 下晝叫齊 office 所有人去會議室, 當眾宣佈現任 COO 為 GM 接班人, 跟住叫 COO ( 一條更廢嘅廢柴 ) 去頒個金牌比 GM !  哇, 呢舖仲唔係擺明玩侮辱 ?!  唉, 條 GM 又係嘅, 人哋都唔要你, 仲死𦧲個牌嚟做乜 ? 又唔值錢, 家陣搞到咁難睇, 走得咁鬼肉酸.

心理非常變態, 發生件咁嘅事第一時間諗起 " 繡花拖鞋 " ( 詳情可以睇吓呢兩個 blog ) , 唔知佢近況如何呢 ?  佢而家間公司, 請唔請 GM 呢 ? 

 

 

http://shirliek.blogspot.com/2016/11/blog-post_28.html

http://shirliek.blogspot.com/2017/03/blog-post.html

好 Q 煩的 VC 原來也有好處

VC...... 好驚驚呢 !

快將過去嘅 11月幾乎日日同 HQ 開 VC, 因為 HQ 啲人話想同全亞洲嘅判頭 ( contractors ) 認真見個面, 情實係起底, 問埋啲刁鑽問題, 陰佢哋 chok 吓堅定流.

為咗遷就意粉時間, 下晝成五六點開視像, 連續幾個禮拜都係咁, 阻住阿姐 happy hour. 

原本好唔 like, 不過開開吓竟然又覺得幾過癮. 點解 ? 因為學到嘢.

1. 運氣

成日話 " 行先死先 ".

Headhunter friend 講, 做 top executive search 如果同一日要 interview 幾個 candidates, 佢哋會喺朝早見啲 " 精華 " 先 ( 精華 = 機會高者 ), 原因屬商業秘密, 在此不便透露 😆 , 總之行先一定有 jetso 啦.

今次 VC 更加深切體會乜嘢係 early bird 著數, 第一個開會嘅判頭, 實力同規模比起跟住開嗰班其實係最弱, 能夠順利過關, 皆因好彩可以飲頭啖湯.  HQ 啲問題一個 VC 比一個深, 愈問愈 detail, 如果玩十幾廿轉 VC 見完啲大判先輪到呢個判頭, 佢實行 die hard.

2. 聆聽 & 表達

平時風花雪月 show off 自己外國留學浸鹹水, 出去食飯扮晒鬼聲鬼氣, 見鬼佬 waiter 就 fans " 米 " fans " 米 " ( 澳洲音 thanks mate ), 到頭來竟然被一個 VC 打沉 !  完全唔識用英文去 sell 同 present 間公司, 最慘烈係 get 唔到問題要點所在不突止, 仲連用一句完整英文去答都唔掂.

真心祈盼, 家陣攞住 BNO 移民嘅家屬子弟可以幫幫忙, 喺英倫學好英文, 他朝衣錦還鄉, 起碼聽得明講得好, 唔好失禮死人.

3. 忌作大

明白 sell 客有時要死充, 裝假狗, 但唔可以太離譜, 將啲唔係自己做 / 擁有嘅嘢放喺公司 portfolio 度 !  加上智障, 作大到一個點, 話自己上年做咗廿單工程, joint venture 間廠成幾十萬呎咁大, 但全年 turnover 竟然只得千幾萬人仔, 完全不成正比, 結果比人 chok 到口啞啞.  

原來啲所謂工程, 大部份係之前做舊公司自己有份 " 跟 " 嘅 project.  幾十萬呎工廠 ? 只不過搭單人哋廠做嘢, 搭單可以講成 joint venture, 佢真係天下第一人 😂

個判頭我好熟, 平日好鍾意作大, 唔係個 VC 我都唔知佢原來可以吹到咁誇張, 直逼詐騙程度 !  呢鑊如果我係佢, 當面被人踢爆講大話, 會覺得世紀好瘀囉, 不過見佢又好似冇乜所謂喎, 犀利 👏👏👏