學無止境

英語天地寫字樓, 竟然可以學識幾個有趣又到肉嘅詞.

讓子彈飛   [ 意謂 : 當 office 任何組合 ( 同事 vs. 同事, 同事 vs. 上司, 上司 vs. 上司 ) 發生互毆攻擊, 槍林彈雨之際, 我們必須閃避, 靜觀其變, 千萬不可出聲插手, 以免無辜當災, 惹屎上身. ]

踢出公海   [ 意謂 : 老闆為求自保不惜將責任完全瀉落自己隻馬度.  撈咗廿年, 一腳被伸出大海, 炒魷 ! 慘變無主孤魂. ] 

隻馬瀨嘢, 落錯注, 諗住 share 公司 ' 高度機密 ' 去擦老闆鞋, 點知轉頭老闆唔生性攞住啲 ' 機密 ' 走去 challenge CEO 決策 !  結果 CEO 大為震怒, 質問老闆 ' 高度機密 ' 嘅來源, 結果隻馬即時被擺上枱, 做咗祭旗.

仆出嚟𨳍 ( 音 : 柒 cat⁶ )  [ 同事用此詞嚟形容我頂頭上司唔識又扮識, 慌死人唔知自己冇料到而做出極度無謂, 笨拙, 肉酸, 丟架同當眾出醜嘅言行. ]

侏儒 / 乞兒  [ 中文系同事對我頂頭上司之別稱, 影射佢短小身材同 ' 思思縮縮 ' 嘅氣質 ]  ( 註 : 無意冒犯真正的侏儒 / 乞兒 )

Urgentina   [ 外語系同事對我頂頭上司之別稱 : Urgent + Argentina 嘅混成詞. ]

侏儒係意大利種, 喺阿根廷出生長大, 所以言行同口音帶有非常濃烈 Argentina 色彩, 條友做嘢完全冇步驟, 剩係識 mirco-manage 一味催人做嘢, 乜 Q 都話係 urgent, 所以老外同事恥笑佢做 Urgentina 😂.

Debrief  [ 呢個係 Urgentina 非常喜歡用嘅詞, 中文應該解釋為 ' 會報 '. ]

同其他部門開完會, Urgentina 必定會喺 5 分鐘內叫我入房同佢 debrief 剛才開會發生乜事, 最弔詭係佢明明自己都有份一齊開會個喎, 真係唔明條大種垃圾有乜唔明要我再會報囉 ! 等如一個會要開兩次, 浪費晒我啲時間.

如果一早算到咁就唔上呢堂

幾廿歲人, 好地地上八字班都會畀人賣豬仔 !  

明明學多 3 堂就 BB 班畢業, 頂佢個肺, 星期日差啲遲到跑幾條街, 趕到身水身汗仆入班房, 發現阿 Sir 竟然換咗人.  代課老師話自己係阿 Sir 嘅徒弟, 阿 Sir 有事所以嚟緊 3 堂將會由佢補上.  Orrrr...... 即係葉問唔得閒, 搵李小龍.

上咗陣堂同學竊竊私語, 話徒弟仲勁過師傅.  勁乜鬼吖 ?  其實係徒弟不識抬舉, 將阿 Sir 平時 hold 住唔教, 儲埋嚟吊大魚等學生課金報讀自己私家堂先教嘅 " 餌 ", 毫無保留地早洩咗出嚟啫. 

上多大約 10 分鐘, 徒弟問班上同學明唔明, 坐最前排幾位異口同聲話明. 唔好意思, 我實在完全聽明唔佢噏乜, 所以舉手話有啲 terms 未學過.  跟住徒弟問 : " 呢啲未教 ? 乜呢班唔係中班咩 ? "

中班 ?! 差啲 哈~一聲笑咗出嚟 ! 我哋 BB 班咋, 最前排幾位玄學天才, 收皮啦唔該, 扮晒明.

徒弟果然唔夠經驗, 找死, 問有冇人想攞自己八字出嚟做 case study.  前排兩女一男玄學天才爭崩頭, 二話不說仆去白板搶筆霸位, 男嘅當然不敵爭輸啦.  

接落嚟惡夢開始, 亦係我人生無數學習過程最討厭嘅其中 1 小時, 兩條細我幾年中女 ( 即係唔細啦 ! ) 根本冇心學八字, 只係想自肥喺工聯會攞著數搵人免費算 !  問嚟問去都係 : 幾時有男人 ? 幾時有人養 ? 幾時有錢...... ?  ❌ infinity    

黐 Q 線, 發錢寒發姣發到出晒面, 算到冇男人冇人養冇錢, 又話接受唔到唔準繼續 chur 住問, 想點呢 ?

有男人 => 有人養 => 有錢 💰

或者係嘅, 不過冇你哋份囉, 冇啲貴氣. 

望住徒弟畀女圍, 突然諗起套 N 年前梁朝偉做 [ 流氓醫生 ] ( 電影 ) 喺診所呢幕, 自己睇啦 :

' 巧 ' 多 '支' 呀~