羅馬巧驚驚 2.0

雖然我極之迷戀羅馬成日話正, 但諗深一層, 呢個地方其實相當重口味兼唔 user-friendly, 如果冇熟人帶住, 唔係人人頂得順.

今次去仲撞啱一天突發大罷工, 所有公共事務包括公車全部停, 打亂晒我啲行程, 嬲 😡  同香港 T8 一樣, 唔係完全冇生路行嘅...... 俾錢咪有囉 😆😆  好奇 check 吓 uber, 同路線收 double 仲要大把人 call, 一車難求 !

之前因為要俾 $ 而唔入嘅 museum --> 今次終於入到 !

倫敦 non-stop 行足幾日對腳變半傷殘, 喺羅馬不想再努力了, 但又不甘呆坐酒店一日, 深深不忿之下最終都係出擊周圍𥄫吓.  

其實已經唔行得郁, 慢慢移動之際, 驚覺平時要收錢嘅博物館門戶大開 free entry !  哈, 原來看門啲人罷工冇人管啲場變冇掩雞籠 😆😆😆, 遊客半信半疑唔敢入, 車 ~ 驚乜吖, 俾人嘈咪詐死扮唔識聽囉 !

不經不覺又行咗兩萬步, 好攰, 執好行李瞓瞓吓凌晨 4:26am 同步收到 CX sms + email, 話第日班機因香港颱風要延誤 7 粒鐘 (由原先 1:00pm 改到 8:45pm), 當堂醒晒成個人好 hyper, 反覆思考第日夠竟點消磨呢 7 粒鐘呢......?

既然 8:45pm 先飛, 朝早一於嘆慢板 hea 吓先. 

CX 真陰濕, 原來喺 9:35am 再補發咗個 Special update 電郵, 叫乘客要依舊喺原本航班起飛前一個鐘 (即中午 12:00pm 前) 到機場 check-in !!!!!!!!!!!

Diu...... 冼我 ?!!!!  知道 delay 咁耐係人都會鬆懈啦, 點會 timely check email 啫 ?!  同埋咁重要嘅 message 點解唔 send sms ?  

睇到嗰陣已經10:45am 😨 直情嚇到 "bill 尿" 囉大佬, 羅馬城市中心去機場起碼成 40-45 分鐘㗎 !

Call 的士冇的士, 最終要 call uber (頂佢, 中途仲塞車添 !), 好彩最後都可以 12:00pm deadline 前 6 分鐘 11:54am 趕到, 落車狂奔 check-in counter 成個瘋婦咁 😡😡😡😡😡😡😡😡, 真險 !  (不過喺羅馬機場狂奔, 又唔係第一次嘅 😂😂😂😂 shirliek.blogspot.com/2017/12/cx.html) 

 

英倫農家菜

前幾次去親倫敦都烏天黑地, 又大風, 有次住嗰度仲好猛 👻, 現身企喺度望實我, 好清楚見到佢對藍眼睛, 嗰嘢, 實在驚咗 !   

老闆背影 . 橙色潮 look 

今次有舊老闆做響度, 非常榮幸, 因為 1993 年人生第一次飛歐洲去倫敦都係佢帶我去, 所以呢個行程對我嚟講特別有意義.

老闆變咗, 以前永遠車出車入, 可能而家有樂悠咭搭公車唔駛錢, 所以行程都以步行同地鐵為主.  只有一晚食完飯太飽加埋 jetlag 完全行唔郁, 坐地鐵又要轉 3 次車, 佢先肯就範俾我搭咗一程 Uber 咁多 😆.  

基本上每日行兩萬幾起標, 連日總共行咗超過 9 萬步, 老闆好勁呀 70 歲人摩打腳日日行健步如飛, 一啲疲態都冇.  反而我就行咗頭兩日對腳已經收皮 total lost 😛, 下半身失靈.

出發前驚人話我喺倫敦虐老, 而家好似係我俾老人虐待緊 😂😂😂

倫敦有好多地方我其實未去過, 例如 Marylebone, 聞名不如見面終於有幸可以到此一遊, 可能天氣好, 覺得個小區真係幾靚 😍.   

食 lunch 老闆推荐一間叫 St. JOHN 嘅英國農家菜小館 https://www.instagram.com/st.john.restaurant/, 地方裝修簡樸, 一睇佢個 menu 就知係好嘢, 哇大佬 ~ 有 Pig's head '豬頭' 食呀 👍👍👍 

個 Daily Specials 仲串, 有 Cod cheek '魚面珠' ~ 痴線㗎 ! 

我哋諗都冇諗就叫晒 '豬頭' & '魚面珠', 再加 :

• 兩隻 '生蠔'
• 一份 '免治牛多士'
• 一個枱枱客都叫嘅餐廳名物, 侍應解釋完都唔明係乜嘅 '炸 Rarebit' 😂

右上角順時針 : 魚面珠 | 免治牛多士 | 生蠔 | 豬頭 | Rarebit

蠔有蠔味海水味極重, 免治牛係燜牛肉做, 香濃湯渣 feel.

Pig's head '豬頭' 食落有啲似牛什, 可惜已經起好晒一片片肉, 如果可以完整成個豬頭上, 跟住自己 '片' 嚟食, 應該仲過癮 !   

Rarebit 原來係舊用芝士同麵包搓成再去油炸嘅物體, 最搞嘢係要落啲 Lea & Perrins 李派林 "give me that 汁" 嚟食 😆😆, 勁香口, 冬天食應該超正.

成個 lunch 最驚喜係碟 '魚面珠', 有成廿塊 5 蚊銀咁大嘅面珠 (來自 10 個大魚頭), 香口彈牙肉質結實, 大癲 ! 

呢間 St. JOHN 係今次去倫敦第二名好食嘅餐廳, 唔寫第一位係因為嗰間已經黃咗, 食緊嗰陣四周好多小紅書喺度擾攘, 不停拍片直播, 好 Q 煩 😡.  

時光機

原本打算九月尾同朋友去葡萄牙玩, 香港冇直航要喺倫敦轉機 (事先張揚, 話咗俾 30 年前做室內設計嗰陣個舊老闆知會路過倫敦, 睇佢有冇時間食飯), 點知最終朋友嫌逗留葡萄牙時間太短 (唉...... 7 日都話短 😒), 計劃擱置. 

同舊老闆講葡萄牙去唔成了, 佢叫我照飛倫敦啦, 話帶我周圍玩, 仲有間屋吉咗出嚟可以俾我住 (註 : 佢係富貴退休人士).  吓, 世上竟然有咁夢幻嘅事 ? 咁就一於唔同佢客氣喇. 

間屋係百年歷史貨倉改建, 磚牆加木橫樑, 鐵框玻璃窗, 個 feel 勁正, 但怕黑怕冇電視機人士免問 😂.

不過最正係啲傢俱同擺設, 除咗有品味, 件件仲熟口熟面, 因為全部都係老闆以前香港 studio 嘅舊物. 佢話幾年前移民英國嗰陣已經抌咗大部份或送咗俾人, 而剩低呢啲就真係唔捨得, 但啲嘢又同新屋設計風格唔襯, 所以就買多間屋嚟擺, 平時多個地方可以用嚟招呼朋友 😮  

穿洞古董櫈

So easy 😆 !!! 只能說 : 貧窮限制想像💡

相隔 30 年, 同呢啲擺設再遇, 百感交集, 佢哋別來無恙都係咁嘅樣, 而我塊面啲肉就鬆晒, 成隻沙皮咁 😂😂😂😂😂😂😂😂😂

不過, 我想講, 有一件古物係有瑕疵, 而呢個瑕疵, 係我當年一手造成 ! 

香煙廣告 poster 古典美女右眼噠白色, 係我貪玩用 masking tape 將男同事個樣貼咗上去, 點知搣出嚟嗰陣就連幅畫原來啲漆都搣甩埋 😱😱😱

好記得老闆返嚟見到呢個慘況, 欲哭無淚, 絕對相信, 佢當刻會非常想煎巴我 ! 

我右眼白咗笪

舊事重提, 同老闆再講 sorry, 佢笑笑口話 : "算啦, 我身邊啲女人都整爛我啲嘢㗎啦", 原來......

• 

  125 磅肥妹 30 年前同破相前古典美女合照

  佢老婆落雨入屋收遮嗰陣, 把遮一篤就篤穿咗門口旁邊張古董櫈 😅   

• 工人姐姐見幅油畫 (據說身價幾球) 有塵, 攞洗潔精一抹, 搞到一笪笪, 幅畫被秒殺立即玩完 😅😅 

 

做乜一笪笪架 ?!!