不知者不怪 ?

肉醬意粉不要又牛又豬 . 要求係咪有啲堅離地 ?

原本打算寫另一題目, 點知今朝上 youtube 睇鬼王 '潘聰', 佢喺節目尾聲嘅一番話觸動到我神經, 所以要打尖小吓 !

事緣鬼王一行人喺 MK 某街坊手工意粉店開餐, 叫咗個 [肉醬意粉], 餐廳做法係將豬撈埋牛肉一齊落, 搞到唔食牛嘅 '潘聰' 得個睇字, 深深不忿向全港餐廳作出呼籲, 叫人將 [肉醬意粉] 嘅肉醬同意粉分開上, 等唔食牛嘅人有選擇 😂😂😂  

不如下次又試吓 order [麻婆豆腐] 嗰陣, 叫人將啲肉碎同豆腐分開上;  [魚香茄子] 就叫碟油炸茄子魚香醬另上, 睇吓廚師會唔會擸刀喺廚房衝出嚟斬你 ?!

真正 ragù alla bolognese

佢同事仲騎呢, 話覺得闊條麵同肉醬唔係咁夾, 廚師落 spaghetti 煮會好食啲 😂😂😂   其實豬肉 + 牛肉 + 闊條麵先係 [肉醬意粉] 意大利正宗做法, 根本係班友自己唔識嘢井底蛙啫 😤   

唔好信字幕, '周洪賓' 喺度玩嘢講反話 😆

巧合地, 早幾日睇講講廣東話勁搞笑嘅意大利佬 Jacopo '周洪賓' https://www.youtube.com/watch?v=zX5n6_rUEto&t=222s 同老豆去新蒲崗茶記, 叫咗個乾炒黑椒牛肉意粉, 兩條友玩嘢用匙羹同叉食話係標準食法, 後尾 '周洪賓' 補充話如果佢哋喺意大利咁樣食, 應該連本 passport 都被人沒收埋 😂😂😂  

不過我覺得 (非意大利) 外國人用匙羹同叉食意粉可以接受, 因唔係個個識單手攞隻叉去捲起啲麵條嚟食啦, 當年喺意國, 我都練習咗一段時間先掌握到呢個本領. 

Jokes apart, 接近片尾 '周洪賓' 特別提及, 食意粉確實有一件事真係萬萬不能 : 用刀切碎 !  哈, 正好係梁詠琪小姐 2013 年上電視節目 [May 姐有請] 親自示範嘅食法, 不過冇嘢嘅, 梁小姐咁有功力, 個醜字佢一向都唔知點寫㗎啦 !  https://shirliek.blogspot.com/2013/07/blog-post.html  正所謂...... 只要你唔尷尬. 尷尬嘅就係人哋.

建築師房菜

前晚喺花墟樓上住宅大廈食私房菜 https://www.pestoandlab.com/, 同一般私房不同, 廚師同家人真係喺度住, 客人食到晚黑十點就要散水, 因廚師個 B 女夠鐘要返屋企瞓覺 😄 

一個有細路住嘅屋企, 竟然可以咁整齊

廚師美國人, 建築師出身轉做煮餸, serve "Pescatarian" (食魚同海鮮唔食肉) 餐牌.

同一般美國佬不同, 廚師好施文, 講嘢陰聲細氣, 介紹餐牌嗰陣, 真係要閉氣忍住唔呼吸先聽到佢講乜 😜  

9 個人每人 7 度菜, 全部係喺個完全冇專業爐具嘅住家廚房出品, 廚師一條友又要煮菜又要洗碗, 都咪話唔厲害.

AMUSE BOUCHE . 番茄味全精華 !

 

 

POACHED SMOKED OYSTER . 微熱嘅海藻生蠔配凍冰冰 oyster 雪糕, 新奇又好食 !

TUNA RYE . 吞拿魚生黑麥夾心鰹魚乾, 三重口感, 鮮味大爆發 !

SOURDOUGH & BUTTER

私房菜名物sourdough 酸面包, 新鮮出爐, 配搭黑莓味牛油, 酸酸甜甜超正 ! 

朋友講笑問廚師, 咁蚊型嘅廚房都出到咁大個包, 係咪真係自己整㗎 ? 😂  廚師又真夠幽默, 話個包其實喺樓下 Maria's (超群餅店) 買嘅 😂😂😂

CHESTNUT BISQUE . 栗子洋蔥濃湯啱晒秋天飲, 面頭塊炭燒威化會唔會靚得太過份呢 ?!

飲飽食醉, 席上各人都非常享受同欣賞整個用餐體驗, 個個都同廚師抄定牌. 食物方面, 無論味道同賣相都係我香港食私房菜, 暫時覺得至出色嘅 !  今次食嘅係 Autumn Menu, 等佢一轉季, 一定會立即 book 枱再吃 💪💪💪
 

ROASTED SWORDFISH . 烤劍魚, 配搭濃醬汁蘿蔔蘋果蓉, so yummy !

S'MORES . 綿花糖可可夾餅甜品, 口感輕型, 食完 0 罪惡感 !

連尾燈都見唔到

十月飛埋上海呢轉, 今年自費 travel 應該收爐了 ( 莫財啦 😂 ).  

繼陽澄湖大閘蟹, 其實上海 trip 仲有件特別事想分享, 點知近期公司突然接到幾單新嘢冧晒檔, 等到而家先可以定神坐低寫個 blog.  

想講嘅係, 每次去大陸, 雖然都遇到啲令到人勁反白眼嘅騎呢人 - 事 - 物, 但相比之下, 覺得而家嘅香港, 其實落後過人哋好多, 就連圖書館都輸人幾條街.

香港中央圖書館 💩

香港建築 [代表作] : 銅鑼灣中央圖書館, 一個超 '娘' 嘅設計, 一舊超肉酸, 令人慘不忍睹嘅垃圾 ! 由起好嗰秒我就睇佢唔順眼, 無論內在同外觀都徹底地醜, 顏色 - 物料 - 燈光 - 比例都完全錯晒. 

啲風水神棍仲成日吹噓中央圖書館外形似官印, 住喺附近對住就會升官發財, diu ~ 我屋企夠望住下面成個火炭工業區, 啲廠夠係幾十百舊官印啦, 發條毛 😂😂 !

徐家匯書院大堂

我係早起鳥, 喺上海趁 friend 仲瞓緊, 加個快閃行程自己出街走走, 一人前參觀 [徐家匯書院] https://sphere-art.com/zh/architecture/363/%E5%BE%90%E5%AE%B6%E5%8C%AF%E6%9B%B8%E9%99%A2%E5%9C%A8Wutopia-Lab%E7%9A%84%E5%89%B5%E9%80%A0%E4%B8%8B%E6%BC%94%E6%B4%BB%E4%B8%8A%E6%B5%B7%E8%AE%93%E4%BA%BA%E5%8B%95%E5%AE%B9%E7%9A%84%E9%AD%94%E6%B3%95

徐家匯大教堂

書院其實係間社區圖書館, 設計極美, 向旁邊嘅徐家匯大教堂致敬, 入到地面書院大堂不禁 '哇' 咗聲, OMG 真係好靚呀 😍😍😍  

成件事非常之有格調, 後尾先 find out 原來係大師設計, 唔怪得咁型啦.

走上樓上各層𥄫吓, 設計簡潔明亮以人為用, 巨型落地玻璃大窗將徐家匯大教堂周邊綠油油景緻帶到室內, 身處當下, 突然覺得自己都好似好有氣質咁 😂.  

仲發現四樓有海量雜誌免費睇 👍 下次公幹, meeting 同 meeting 之間有空檔嘅話, 唔駛再周街行行到腳軟, 徐家匯書院絕對喺我 '攝' 時間嘅好地方, 整個保溫壺裝啲酒一路飲一路睇, 沉澱吓, 感染一吓啲書卷氣 😆😆😆, 人生樂事 ! 

講到圖書館超級打咭位 : 當然係兩層樓高, 用 3D 打印, 靚到飛街嘅透明 '牌樓' 莫屬 ! 望住, 真係....... high 到唔識講.