到位

新屋唔想用衣櫃咁悶, 所以'懶'有心思,  design 咗幾個掛衣架.

點知廠好忙, 唔得閒整, 搬咗嚟成兩個幾禮拜, 啲衫都係劈埋一堆, 成個廢墟咁.

前日, 啲架終於都到喇!

啲架其實係屏風concept, 用鏡面不銹鋼造, 掛好啲衫後, 成間boutique 咁.

上得架嘅衫都係'行'嘢, 而家唔駛返工, 又冇大場面去, 著嘅機會, 小之又小.

熱帶氣旋... 你終於都嚟喇?

尋日天文台仲言之鑿鑿, 話唔會打八號, 今朝未到五點, 就掛啦.

由細到大, 一打風就覺得好興奮!!   細個覺得突然可以同家人聚首一堂, 開大電視食罐頭 (因為通常都買唔切餸), 好熱鬧, 好有氣氛.   

而家人到中年, 唔同玩法.  飲住酒聽音樂, 細看窗外風雲色變, 簫簫風聲, 別有一番情趣.

我搬入嚟嘅第一個T8, 表面一切平靜......

出城

幾十年嚟, 我都係住港島, 除咗錦田八鄉騎馬嗰頭, 新界真係唔係咁熟.

不過搬咗入火炭成個禮拜, 係時候面對現實, 周圍行吓, 熟習環境.

尋日去咗成廿年都冇去過嘅<新城市廣場>, 原來而家靚咗咁多.  除咗超級大名牌, 所有應該有嘅舖頭都有.   最大喜訊, 係<一田百貨>嘅壽司/魚生好味同平過以前買開嘅Gourmet, Sogo, Citysuper好多!

今日試搭東鐵出旺角花墟, 快到爆, 唔駛15分鐘 (以前喺跑馬地, 要成九個字㗎)!   以後買花同去<譚財記>, 真係好方便.   (圖片係我發老姣買嘅嘅花)


阻住

搬咗成個禮拜, 大部份嘢都settled down...... 除咗個wifi.   搞搞搞, 裝極都裝唔到, 今日, 已經係PCCW第三次上嚟. 

騎完馬同師兄講, 約咗PCCW駁線要趕住走, 點知佢叫我算把啦, 因為唔會係陳豪上嚟囉.  笑死.


今日先嚟穿線, 阻住晒我落(馬)欖, 整佢!

只可以間歇性睇馬, 冇得場場睇......


好彩, 有兩個好令我振奮嘅消息 : 

第一 :  係我follow開嘅"危險一族" 新馬 <危險大軍 Blue Caviar> 嬴到佢喺香港出賽嘅第一場頭馬.
http://all-my-horses.blogspot.com/

第二 : 就係我至愛嘅騎師梁家俊, 今日好厲害!! 嬴到三場頭馬.

搬屋樂

搞咗排, 終於到搬屋大日子. 

大智慧friend同我擇咗911大吉日, 但係同開鑼撞到正, 冇得入場......  

自不量力, 安排幾瓣嘢同步進行, 結果其中一瓣 slide 咗, 就搞到成個timetable overlap晒!   好在最後有義氣friend幫忙疏導, 先至冇一鑊泡.

值得一提嘅係搬屋公司, 態度好, 交帶又快手, 最掂嘅係班人夠後生!   Team leader成個翻版羅仲謙咁, 身型又fit, 睇住佢搬, 簡直係享受. 

入伙當晚瞓唔着, 因為好心急, 想快啲執好啲嘢.  結果一路執一路劈, 第日已經將所有箱unpacked.

啲衫一房都係!   因為定造嘅掛衫架未到, 希望唔會heah太耐啦.

冷靜與熱情

   久唔久喺屋企heah, 都會播吓啲陳年舊戲, 其中一套播足10年嘅, 係陳慧琳同竹野內豐主演嘅 <冷靜與熱情之間 calmi cuori appassionati>.

套片大部份喺意大利取景, 拍得好有文藝氣質, 竹野內豐嘅意文, 發音竟然好正.  

可能日本人講意文比較著數, 皆因日文同意文嘅尾音, 都係a-e-i-o-u.   不同嘅, 係意文有R字, 要勁捲脷.



一直覺得套戲配樂好好聽, 但唔覺出過碟, 去唱片舖搵又冇.    上禮拜又睇完, 突然心血來潮, 喺amazon jp搵, 竟然有, 即刻落order!  日本人嘅效率真係高得厲害, 隻CD兩日後已經到手!


開學日

九月一, 我都學人開學, 隅飲酒於進修, 讀wine appreciation.     同學男多女少, 大部份係香港教育制度下培育嘅精英典範 : 超被動, 怕事, 對導師講解/發問零反應.     其實阿sir已經有先見之明, 攞咗幾支佢下晝飲嘅白酒, 諗住一路教一路飲, warm up我哋.     點知酒飲晒, 啲人把金口都仲係唔開.    講完tasting & evaluating理論, 阿sir問明唔明, 我忍唔住答咗個'明'字.

卒之有人應佢喇......   阿sir好感動, 話我係<天籟之音>.

笑死

"吽"咗兩粒鐘, 戲肉嚟喇 ~~ 品酒, 有6隻, 氣酒, 紅白酒, 甜酒有齊.

我以為係飲完啷吓口"bit"番出嚟嗰隻tasting, 點知原來要打真軍, 飲落肚!   嘩, 溝晒酒, 飲完high high哋, 真係少啲食力都唔得.