搵唔到食

一連三日喺會展擺嘅Vinexpo, 尋日開始.   攞咗入場證, 以為可以免費試盡世界各國美酒, 不醉無歸. 

去到, 先知個會係為業界人士而設 (同埋一啲龍友, 影吓場內嘅靚女).  

諗住攞個杯走去檔灘講句 thank you 就有得試?   No la.  想飲? 要留步同酒商交談.

所謂嚴師出高徒, 我呢啲咁 '勁' 嘅學生, 一開口就知我冇料到兼阻住做生意啦!   就算比我吹得呃到人, 咁到時人哋問你入幾多, 唔通你話一支咩! 

身為無業游民, 人哋問攞卡片, 我話 : "唔好意思, 派晒."

幾樣衰!

有得睇, 冇得食, 喺場內打咗幾個轉就走人.  臨走同酒樽家族影相留念 (哈哈, 好耐之前, 喺巴黎都影咗張類似嘅相)

2012 HK - Vinexpo Asia-Pacific

2003 Paris - Le Bon Marche'

笨人品酒

尋晚上品酒blind tasting完, 跟住為預備考試做pass paper. 一睇份卷, 當場眼火爆, 成身滾晒.

我覺得筆試嘅評審標準好有問題, 啲題目看似straight forward, 譬如 : 請說明某種天氣對葡萄種植嘅影響 , 個model answer竟然係要講埋 酒農嘅金錢損失!

咁同人問你尋晚食乜, 你就連今朝幾點屙屎都講埋出嚟, 有乜分別?!   呢啲咁濫, 咁浮, 遊花園式嘅答題準則, 同我廢話少說, 黑白分明嘅作風背道而馳.

粉腸(阿sir)見我停晒手玄壇咁嘅面口, 問我有乜問題, 我話冇, 係自己配合唔到啫, 接住佢個超級fans女學生搭咀, 好嗲咁話, "hmm...... 我覺得呢啲題目都係common sense 嚟啫~~~~~~".  

妖佢吖, 我唔係冇common fxxking sense, 係條氣唔順啫~~~~~~~~

粉腸之後好得戚, 話個試都係考common sense 同英文啫~~~~~~ What? 英文?!    仲話唔駛咁認真, 考唔到咪算囉~~~   
嘩, 唔係嘛, 比成八千幾, 唔通淨係想見你一面?

自稱係個ardent(狂熱)嘅wine teacher, 但同學求救, 話tasting試唔到其他人試到嘅味, 佢就話之佢.   有次我有類似問題, 佢竟然當眾話 : "唔係嘛, 你而家應該要識個lu喎", 唔通呢啲又係common sense? 乜都係common sense, 咁呢個世界唔駛有學校啦.

嗰個時常被佢冷落嘅同學, 當佢偶像咁拜, 我覺得openU應該同個course改名, 叫笨人品酒班仲貼切, 不過我唔會再報.

金鐘炮房

尋晚上品酒堂前走咗金鐘一轉, 試吓喺正義道舊軍火庫, Asia Society現址裡面嘅一間新餐廳.

呢個喺80年代被荒廢嘅炮房, 有幸地被馬會大力加持(科水), 經美國建築師Tod Williams & Billie Tsien 改造下, 活化成一組既摩登, 又有建築感, 亦能同原有樓房及四周茂密叢林夾到痺嘅建築群.





同一件事, 如果落喺香港政府班迂腐精英手上, 必定會浪費幾百個億, 惡搞成另一 [中央圖書館] 咁令人眼冤嘅建築怪物!

第一眼見到間餐廳不禁wow咗聲, 因為好靚, 十足個透明手飾箱, 裡面啲燈 bling bling.

間嘢原來唔大, 唔怪得咁難 book 啦.  我哋 happy hour 叫咗啲小食, 賣相同味道唔錯.

有個貌似葉麗儀嘅 waitress, 唔知點解猛同我哋傾偈, 話題無啦啦 "辣" 到啲大陸人, 話佢哋講嘢大聲, 粗魯, 香港周街都係但冇佢哋符, 因為佢哋有米肯洗錢.

佢唔搞清楚啲客身份就亂噏, 真係找死, 分分鐘比人草泥馬 "chou - ni - ma".

AMMO Cafe

試食日

尋日有食神, 一次過試兩間新餐廳, 而且都係好地方.

中環 LUPA 而家好 hit, 露天位置 vertical garden中間有塊神似墓碑嘅牌 (啋~~), 水蛇春講出 lupa (羅馬母狼) 嘅典故.

喺中環鬧市有個咁正嘅露天場地, 真係luxury!  可惜隔離枱有兩件豬扒喺度煲煙, 影響環境.



旋轉66

跟住去朋友開嘅新餐廳 View 62 閉門試菜, 喺灣仔合和中心62/F, 即 [旋轉66] 原址.  

以前香港冇乜高樓大廈, 去R66食自坐餐, 搭子彈𨋢望落街, 係我童年嘅特備節目. 

巧合地, 我阿媽, 細佬, 同埋我,都喺合和中心返過工. 

我人生第一次食野味, 係喺 "合和城大酒樓".

真係唔明點解我阿媽咁激, 會帶一條幾歲細路 (我) 去食蛇, 穿山甲, 同果子狸呢啲咁重口味嘅嘢.

講番餐飯, 最搞笑係我問帶位小姐間餐廳食乜, 佢答 : "set dinner", 哈哈哈...... 笑爆咀!   咁lunch 去都係食set dinner?

我話 : "唔係, 我意思係...... 呢度食邊個國家嘅菜式?"

佢好猶疑咁話 : "好似德國菜......"



Chilean Sea Bass with Green Bean Sauce and Iberico Air

Salmon cooked at 40C with Tartar Sauce in Desconstruction

坐低問主人家, 原來係西班牙菜, 個廚仲攞米芝蓮**㗎, 最叻份子料理.

Tasting menu 嘅snacks & tapas份量的式, 好似食雀粟咁, 啲名又鬼咁刁鑽, 我覺得普通啦.

食咗個幾鐘, 終於到主菜 (圖)喇, 好在主人家帶咗靚酒頂肚, 唔係餓暈.

噢, 原來佢哋主菜好味好多, 賣相前衛, 泡沫豐富, 連唔吃甜品嘅我, 都將碟嘢食晒.

Carbonara Egg Nest

Chocolate Coulant Nitro

個廚臨收工走咗出嚟同在場食客打朝呼, 唔知係咪眼瞓, '唧'都唔笑.

百鳥歸巢

紅黃藍三原色 + 幾何 呢啲室內設計, 我廿幾年前讀嗰陣, 都已經唔興.

Landmark Harvey Nichols "4th Floor" 餐廳, 樓底矮, 空間窄又長成條煙通咁, 好心就唔好自曝其短, 用啲咁out 咁busy 嘅設計啦. 

加埋地板天花不斷轉色嘅fiberoptics燈光, 正一豬乸帶耳環, 醜人多八怪.

話雖如此, 間唔中我都會去happy hour, 貪佢就腳, 喺正中環但永遠冇人, 夠靜. 

但聽完friend尋日講佢嘅嚇人經歷, 我唔會再幫襯.

佢坐坐吓發覺對腳比蝨咬, 好痕, 問嗰度啲人有冇蚊怕水, 佢哋竟然叫我friend去廁所搵水濕吓對腳, 咁就唔會痕.

Order white wine by the glass, 侍應攞支飲剩一杯左右嘅酒, 準備斟比佢.  Friend 當然唔收貨啦, 間嘢都冇客嘅, 支賣剩蔗都唔知擺咗幾耐.

喺要求下, 侍應當面開咗支新, 但就比掃把(supervisor)詐型.  之後, 佢哋竟然喺水吧將支賣剩蔗, 再斟落支新酒度! 

咁溝法, 你估屋企支豉油咩?!  所以, 喺啲人流低嘅食肆, 千祈咪叫wine by the glass, 應該係, 最好唔好去.

食唔飽

今朝出城, 返歸途經沙田第一城, 諗住食個早飯, 喺大快活外賣咗個"叉燒 + 燒鴨"燒味雙拼.

返屋企打開, 極度震撼.

妖, 唔係嘛? 得嗰兩舊鴨?! 痴線㗎, 簡直係世紀大呃秤!

其實比 $ 嗰陣都覺得有蠱惑㗎喇......  人哋美心大家樂燒味雙拼坐底 $40-50, 有乜理由大快活會 $31咁平? 

好彩問佢攞咗薑油, 食晒啲餸都仲可以攞嚟送飯, 但係隊埋都仲係唔夠飽喎. 

太極中佬演唱會

鍾意band sound, 後生嗰陣人哋個個Alan, Leslie, 我聽Beyond, 太極, 仲入埋佢哋歌迷會. 

太極fans club好搞鬼, 唔知點解入會要面試, 由佢哋早期填詞人因葵(陸謙遊) "接見".

記得有次歌迷會活動, 係同太極七子一齊去已經執咗成世嘅 <橋咀島北海漁村> 燒烤一日遊, 而家諗番起都覺得搞笑. 

當日去嘅, 除咗佢哋七個同埋因葵之外, 清一色女人!  最慘仲要係"絕色"嗰隻, 個個好似蜜蜂嘍蜜糖咁mark住佢哋, 咬實唔放, 連去屙尿都有女喺廁所門口等, 勁癡纏.

困喺個島度同班"靚女"對足一日, 呢個巨大陰影, 廿年後嘅今日, 相信佢哋七子絕對唔會忘記.

上星期五睇佢哋演唱會, 當年班𡃁仔變晒阿叔喺台上jam歌, 諗起同過呢班阿叔去橋咀島燒烤, 加上周圍嘅中女歌迷, 感覺好奇趣.

Hi & Bye

"......悄悄的我走了，
正如我悄悄的來；
我揮一揮衣袖，
不帶走一片雲彩"

係咪好有文彩呢?

呢首徐志摩新詩, 正好形容馬場嗰四匹拉車馬,  4月頭悄悄的來, 尋日搬去愉景灣新竇, 悄悄的走了...... 

如果唔係咁啱去騎馬, 走咗佬都唔知.

佢哋啲名好難記, 記嚟記去, 都剩係記得"Tank"一隻 (咁多隻之中, 最sceptical, 最唔親近人嘅).

啲人成日話做牛做馬好辛苦, 我覺得照顧佢哋嗰個仲甘啦!  每日朝8晚7, 車輪手打理佢哋, 梳毛擦身搽太陽油, 忙到爆.  啲屎尿又大篤過人, 冇咁上下臂力, 一定嗶唔起.

遲啲等佢哋settle down, 會去愉景灣探訪.