不要惹我

上禮拜比 (做嘢) 隻馬激親, 詳情唔講, 免得再扯火.

總之呢個人冇禮貌, EQ 低. 佢要攞答案嗰陣, 一嘢衝入嚟, 完全唔理你係咪忙緊, 霸王硬上弓.

倒番轉頭, 輪到你有嘢問佢, 咁啱佢 "認為" 自己 <忙緊>, 就會黑口黑面, 用好悔氣嘅語調回答 : "我好忙, 好多嘢做呀", 繼續望住個芒, 唔睬你.

咁即係點? 比說話我聽? 神教㗎?! 
如果有拍低, 睇番重播, 擔保佢都會覺得自己副咀臉極臭! 

同同事講起啲勞氣嘢, 原來條友恃住自己係老臣子, 喺公司出名寸臭, 係人都怕咗同佢做嘢 / 合作.  
最好笑係啲人話我嚟咗之後, 佢已經改善咗好多, 吓~~~????

好, 過完個 weekend, 算數.

今個禮拜我特登請假, 想過個 work-free Xmas, 尋日出 email 比 project team (包括佢), 話明除非特別緊急情況, 否則唔好搵我.

點知佢完全漠視我嘅 email, 由尋日下晝兩點開始直到夜晚九點, 不斷 whatsapp 我講公事, 廿幾個!!! 仲要係啲無關疼癢,  完全唔趕嘅議題.

今朝騎完馬, 妖!  火都嚟, 又 send 幾個 whatsapp 叫我 check email, 答佢啲嘢! 

佢咁搞真係好討厭, 同你住酒店, 明明掛咗個 <do not disturb> 牌, 啲人都唔理你照拍門 / 開門入嚟一樣咁恐怖.

香水 DIY

 
今日公司搞咗個別開生面嘅 team building 項目 : 自製香水工作坊.  辦公時間, 明正言順唔駛做成兩粒鐘, 唔參加就笨. 

除咗香水 DIY, 仲介紹咗香水世界嘅演變同歷史, 原來世上可調配香水嘅氣味, 有成 2500 種!

要成為專業香水師, 一定要完全清楚辨認同掌握到呢 2500 隻味道, 依據公司或客人要求, 調配出各種香氣, 認真利害.

咁我哋兩個鐘頭貨仔速成班, 同人哋香水師苦讀 3 年嘅專業培訓, 當然不可以相題並論啦.

但係個 course 又真係好有趣, 阿 Sir 教各人 step by step 咁, 因應個人喜好, 喺 50 多種味道中, 選出5 - 9 種香味, 用唔同嘅份量, 混合出獨一無二, 自己喜歡嘅香薰.

過程中, 有選擇困難症嘅同事, 自己鍾意乜都唔知, 睇見佢哋望住嗰 50 幾支香水 base, 方寸大亂個慘樣, 真係笑爆咀.

坐隔離同事, 溝溝吓仲黑面添, 因為愈溝愈臭喎, 哈哈!  而我, 就溝咗隻 <旺角花墟 . 繽紛園藝花店> 味, 正!

聖誕派對

喺黃竹坑返工, 對我嚟講, 同大嶼山寶蓮寺冇乜分別.

放工 happy hour 唔駛諗, 就連食晏, 如果唔想舟車勞頓出銅鑼灣或者香港仔食, 喺 office 附近嘅餐廳食肆, 5 隻手指數得晒.

有次喺公司樓下嘅 GCX (Grappas 分店) 外賣沙律. 妖~ 
西蘭花 + 椰菜花撈埋, 整幾片罐頭蕃茄干同 artichoke, 落啲橄欖油, 鹽都冇粒, 咁就賣 65 蚊!  難食到爆, 成盒嘢完全冇味嘅,肯定大嶼山啲齋都好食過佢.  我食咗兩叉, 已經哽唔落, 食餅乾算.

一年一度, 又到聖誕, 日前公司喺隔離街廠廈私房菜搞咗個 Xmas lunch,  去之前諗..... 日光白白開 P, 酒都冇滴, 好寡啫, 點知一入門口, 見到呢個surprise , 當堂生猛晒!

廚師係意大利人, 老闆啲 friend, 間餐廳其實就係廚師屋企, 當日煮嘅嘢, 同平時香港餐廳嘅意菜, 有好大分別, 簡單講句, 就係好住家嘅做法. 所以難怪有啲同事覺得唔係咁好食. 
而我呢? 嘻嘻...... 一般啦, 都可以嘅, 但要介紹人去? 會猶豫.

呢個唔係餐廳經理, 係我老闆. 佢喺度切肉 serve 我哋, 哈哈.








 
下面呢個係餐廳好出名嘅 chocolate tart, 好似 chocolate truffle 濕濕哋嘅 texture 但又唔係太甜, 好味.

救命恩人

平時打的坐後座唔鍾意帶安全帶, 轉幾個街口就到嘅車程, 一定唔扣. 

但從今日起, 我以後坐車, 都一定會帶安全帶, 因為今日差啲癩嘢.

食完飯, 兩點幾, 要出灣仔開會.  滂沱大雨, 喺黃竹行呢個鬼地方, 我哋竟然截到的士, 以為好好彩.

上車 5 分鐘, 摺嚟摺去, 都摺唔掂把縮骨遮. 摺好, 已經入到香港仔隧道, 行一陣, 突然醒覺冇扣安全帶, 立刻帶.  當時仲口噏噏 : "唉也, 唔記得帶安全帶喎......" 

說時遲, 那時快, 唔夠 3 秒, 後面 '澎' 一聲, 尾隨架的士比 171 巴士追撞, 再撞埋嚟!!  

嗰吓衝擊力頗勁, 我哋成個身拋前, 好彩有安全帶綁住, 如果唔係實飛撞前面椅背, 爆硬光!   不過都 chok 到背脊好痛, 司機話衝力好猛, 佢跌晒落錶板前面同擋風玻璃之間條罅, liu 極都 liu 唔到嗰啲陳年舊物都飛晒出嚟.

咁嘅形勢, 叫隻馬 call 人, 話我哋炒車 stuck 咗喺隧道, 唔嚟開會.   佢冇call 不特止, 仲想打開車門, 行隧道落灣仔開會.   

妖~~  唔係嘛..... 駛唔駛咁事業心重呀?! 

我同佢講, 隧道裡面唔可以行人, 犯法㗎, 佢先收手. 正一痴 Q 線!

見光死

舊公司有個女同事, 成日話喺街有人望佢, 言下之意, 係覺得自己好正, 比人望咁話. 

女同事實在大高估自己喇, 人哋望你嘅原因只有兩種 :

1. 你好靚;
2. 你好怪.

佢, 一定係 2 囉!

如果比着我發現喺街比人望, 會心虛, 第一時間我會檢查吓塊面有冇污蹧咗, 或者有冇流緊鼻血之類. 

今朝搭車返工, 邋眼一望, 對面有個鼻高高嘅女仔.  心諗...... 個鼻都幾直喎...... 就喺呢刻, 火車出隧道, 窗外一度強光! 

哈~  見光死! 佢 2/3 個鼻樑係半透明㗎. 

跟住嘅 10 分鐘車程, 我真係控制唔到自己, 不停望佢, 想像佢未加工之前個鼻係點, 同埋 check 吓佢仲有冇其他地方整過, 真衰!

空肚食早餐

秋高氣爽, 戶外活動好時機.

同事搞咗個小圈子 BBQ, 原本 8 月舉行, 後尾因為怕熱, 一改改到 11月.

地點係大潭水塘水霸底,  一間叫 '翠華' 嘅燒烤場. 
嗰度如果之前未去過, 實在係超級難搵.

明明約咗一點銅鑼灣集合上車, 有人離譜到兩點幾先蒲頭, 賴晒佔中.  加上迷途, 結果去到已經成 3 點!  

我朝早騎完馬, 冇食嘢, 又口乾, 前一晚又學人哈囉喂, 真係精疲力竭, 燒烤叉都 lik 唔起.  

好彩食過同事燒好嘅雞翼同香腸後, 情況好轉, 有氣力欣賞環抱四周僻靜小海灣, 同村落嘅美麗景致.

'翠華' 嘅燒烤食物水準好高, 肉類新鮮, 完全食唔到味精味, 每人百幾, 無限任食, 環境乾淨, 仲有位泊車. 今年內一定要再嚟一次.

返來了

Florence Arno River by iPhone

前後 10 日嘅意國之旅, 終於結束.

我而家已經坐定定, 喺 friend whatsapp 我話 '凍' 咗好多嘅香港, 汗流浹背咁寫 blog.

前兩日, 意大利就真係忽然變凍, 朝早得 9 度.  明明禮拜日仲成廿幾 30 度, 真係估佢唔到.

米蘭 by iPhone

米蘭仲打大風添, 吹到頭都甩.
好彩冇落雨, 如果唔係, 我又冇 The North Face, 一定凍病.



我返歸班機夜晚 7 點, 酒店又 fully booked, 唔可以late check out, 唔通要喺 Florence D 街行嚟行去 heah 足成個下晝?

由一點開始行, 行到兩點幾, 有少少腳軟之際, 忽然眼前一亮 : Wow~ buggy, 遊客高爾夫卡車!

29 Euros 個半鐘, 唔係平, 但當你真係唔想再行, 坐定定就可以去晒 Florence 十幾個景點, 又 ok 喎.
 
噢~  原來呢啲車好受歡迎, 成班人喺度爭上車, 因為我一個人, 可以執死雞坐司機位旁邊, 上唔到車嘅, 要等一個鐘頭後嘅下一班喇.

咁啱全車除咗我同個好 sweet 嘅靚女導遊/司機, 全部都係法國人.  玩到冇嘢好玩, 就開始玩唱國歌, 唱完意大利,法國, 到我! 
佢哋叫我唱中國國歌, 死喇, 腦海一片空白, 大劑! 第一句歌詞 "起來, 不願做奴隸的人們" 之後係乜???

 我唔識唱呀!

同鄉

THE NORTH FACE  

呢個戶外運動品牌, 唔知幾時開始, 成為咗香港人外遊嘅制服.

今朝落樓下食早餐, 難得有亞洲人面孔.    
喺零點零一秒內, 已經肯定佢哋係香港人.  點解......?   因為佢哋着住情侶 THE NORTH FACE 囉.

對中年 couple, 一人一手機, 各有各把玩, 形同陌路, 全無交流.  其間, 老婆睇完個口訊 , 噏咗句 : 佢哋話可以上去間  'chur 廚' (church) 睇吓喎......

老公望都冇望, 零反應.    

Dead air 5 秒, 完全冇事發生, 老婆繼續低頭玩手機, 果然係夫妻默契.

跟住, 我開始思考  :  佛羅倫斯, 係個小鎮, 又冇冰川又冇得滑雪, 廿幾度, 著晒 THE NORTH FACE, 唔係愛嚟行街嘛?   再 'pan' 落去......  又腰包又手袋, 真係奇裝異服!  

著到咁, 周圍走, 唔覺怪咩?

舊地重遊

人老, 自然要懷舊.
今次去羅馬, 都係想懷緬過去, 尤其係啲捉不住嘅美好回憶.

一早定好行程, 堅決要去從前讀過嘅學校, 住過嘅地方, 走一趟.

咪睇我咁懶, 其實我曾經好勤力, 當年讀意文凈係返下晝我覺得唔夠緊湊, 所以報咗兩間學校, 上下夾擊全包圍.

上晝班啲同學全部法國妹, 君子之交淡如水, 如果係仔, 可能會好玩啲...

上晝班間學校

下晝班嗰間, 一行到街口轉角已經好大感觸, 百般滋味在心頭, 因為喺度識咗班好真摰嘅朋友, 做咗好多無聊嘅事.
間學校正一冇掩雞籠, 我自出自入, 影相影到 chak chak 聲, 都冇人理.

下圖右邊孭住橙色袋嗰個, 就係我班主任 Loredana.  好想同佢打招呼, 掙扎咗一陣, 最後都冇, 話晒都係 15 年前嘅事, 如果人哋唔記得我, 咪好戇居?

第日. 去咗我住嗰度𥄫, 四周一啲都冇變, 只係我一直冇留意, 大廈個門口原來係咁!

講起呢度, 認真搞笑. 我其實係寄居舊同學屋企, 佢環境唔錯, 係複式, 我住天台屋連花園, 勁正.

記得第一日入住, 佢阿媽比左個電筒我, 咩料?! 哦...... 原來係比我去夜街用, 係怕我晚黑返歸嗰陣, 開燈會整醒人, 所以要我開電筒摸黑上樓上. 哈哈, 咁都有!

尋根之旅

羅馬係個好舊嘅城市, 行街踏住嘅石級, 分分鐘有過千年歷史.

去之前比人棍, 話羅馬進步咗好多, 等我信以為真, expect 好進步啦, 點知都冇!

以往去羅馬旅遊, 住酒店嘅經驗都唔係咁好, 有兩次仲有鬼添.

今次住嗰間, 一開房門, 真係嚇死. 啲擺設陳舊不堪, 廁所冇窗, 啲水滴到答答聲. 就算打開窗開晒燈, 成間房都係黑掹掹!  後尾索性熄晒佢, 費時照晒啲異像出嚟. 

間房愈坐就愈覺得天旋地轉, 周身唔聚財, 睇吓個 brochure, 嘩, 原來間嘢曾經風光一時, 啲當代名人, 明星都住過, 不過而家已經死晒喇. 

好辛苦先捱完三晚, 好彩最後都冇恐怖事件發生. 呢間酒店其實一啲都唔平, 要成2000 幾蚊晚, 下次真係比番錢都唔住.

羅馬生存之道, 就係要識變通.

若果有留意, 你會發覺羅馬馬路好少會有比行人睇嘅紅綠燈, 因為羅馬人過馬路係唔駛睇燈嘅.

呢個絕技, 係我以前喺羅馬學嘅, 一生受用 :
你只要敢踏隻腳出馬路, 唔好閃閃縮縮, 啲車自然就會停比你 (咁你當然唔好喺啲六線行車嘅馬路試啦!)

話晒十年冇去, 要啲時間重組記憶, 由一個景點去另一個景點, 真係唔易. 羅馬地鐵得嗰兩條線, 唔想行, 最好就係搭巴士, 買張 3 日票, 轉嚟轉去真係幾過癮.

翡冷翠

上次嚟意大利已經係 2003 年.

出發前, "姐姐形" 男同事同我講, 去意大利要低調啲, 尤其是羅馬, 因為啲人以為中國人好有錢, 會打我哋主意.  但講完後, 佢笑笑口, 話其實自己未去過羅馬. 咁都得?

當刻好想同佢講, 我以前喺羅馬讀書, 嚇大㗎! 不過人哋咁有心, 當然冇出聲啦.

今朝喺 Florence 落機, 發生咗件瘀事. 
冇諗過個機場會咁細, 落咗機行去 arrival, 一路跟住啲人行, 點知行唔夠 10 步, 不經不覺已經咗出閘!  
噢 shit ~~~ 冇攞行李喎!

結果樣衰到爆, 走去 immigration 要人帶我入番禁區攞. 

打的去酒店途中好迷網, 怕早得滯冇得 check-in. 因試過喺巴黎冇得 check-in, 晨早溜溜落大雪要喺街 heah 足 5 粒鐘, 真陰影.

哈, 好彩今次有房, 仲有河景, 太正了!  打開窗聽住教堂鐘聲, 寫blog, 感覺好文藝. 比起香港呢期啲佔中塞車, 呢度應該算係樂園吧.

扮乖

唔知你哋細路嗰陣, 有冇扮過乖呢?

"扮乖" :  即係平時曳絕全場, 但一有大人 (尤其家長, 老師) 在場, 就立即變得文靜害羞, 扮懂事, 惹人喜愛.

經典一幕, 係 8 歲嗰陣同幾個小朋友一齊去同學屋企, 人哋家長一行開, 我就開始曳, 入人房逐間睇, 又搞燈制, 又開又關. 

其他小朋友見到, 有樣學樣, 有條懵炳, 可能玩到 high 咗, 竟然開人梳妝枱個首飾箱!   當刻我見到, 立即喝止! 

遲唔會遲, 早唔會早, 時間啱啱好.  喝止呢幕, 竟然比 auntie 見到, 不過佢當時冇出聲, 之後就同我家長講, 話我乖, 有家教.

哈哈哈, auntie 真係搞錯晒......


我而家公司啲人真係乖到冇人有, 成個 office, 簡直要用民風馴樸 / 保守嚟形容. 

出街食飯, 佢哋寧願繞道行100 米 + 50 幾級樓梯過行人天橋, 都唔肯行一條 10 幾步就過完嘅平路捷徑.

有次紅燈, 我見方原九里都冇車, 咪快快過囉, 點知過完拎轉頭, 發現佢成班人原封不動喺度等綠燈!!!

Oh no...... 當刻覺得自己實在太壞! 直情係黑五類! 毒瘤!!

唔掂, 我要立即啟動 "扮乖" mode,  將真我掩藏.

寶刀未老, 我成功 "扮乖", 啲同事同我隻馬講, 覺得我好施文呀!  

笑爆咀, 同舊同事講我施文, 佢哋笑到眼凸, 叫我千祈唔好攞本馬經出嚟, 嚇死新同事呀!

多口

今朝覆緊 friend 個 whatsapp 嗰陣, 隻馬 (做嘢嗰隻) 走埋嚟.

多口話佢知有 friend 會喺嚟緊嘅 weekend 受洗, 請我去, 不過我唔得閒.

哇, 一聽到 <受洗> 兩個字, 佢立即雙眼放光, 話好戥我 friend 開心.  

當刻...... 我知道已經 "賴" 咗嘢.

果然...... 吃完飯, 佢真的乘機狂講耶穌.  話所有做人嘅啟示, 都可以喺聖經搵到. 

根據聖經, 每個人嘅 <上家> : 即父母, 老闆, 都係神派嚟指引你行正路嘅, 所以應該聽佢哋話;   又話對人好, 應該係無條件, 唔好望回報;  仲話聖經有叫人唔可以搞 gay 同唔好借錢比人 (哈~ 咁得意?!).

之後開始講返教會, 讀經, 靈修, etc.

講講講...... 天花亂墜, 不經不覺已經返到 office,  企喺走廊, 佢個勢有排講, 好似仲想行去我位, 坐低繼續講.

不妙!  即刻施展渾身解數, 用盡一切肢體語言, 引開注意, 趁佢唔覺, 9 秒 9 飛甩佢閃埋位坐低做嘢.

fly me to the moon

舊公司班同事, 有個 whatsapp group chat 開咗成 3 年都仲 run 緊,  利害.

前年 2012 中秋, 有同事用部靚相機, 影咗個又大又圓嘅月亮 (下圖 : 月亮一號), send 比我哋.  開咗個頭, 就一發不可收拾!

月亮一號

大家都照板煮碗用 iPhone 影埋一份, 立即喺身處之地影月光, send 出嚟比大家分享, 慶團圓, 感覺非常溫馨.

2012 嗰輯搵唔到.

2013 分別有 : 西貢, 深井, 火炭, 跑馬地, 香港仔, 馬鞍山, 旺角同西安.

2013

 2014 就有 : 東涌, 青衣, 火炭, 灣仔, 北角, 龍鼓灘,同台灣金門.

希望呢個咁 romantic 嘅 practice, 可以每年繼續落去!

2014

路霸

 

呢輪做嘢好多阻滯, 個人特別燥.  今朝晨早溜溜, 八點三都未到, 就已經講咗第一句粗口.

事緣揸車去騎馬途中, 前面嗰架大種 Mini,  行緊成 70km, 喺毫無先兆下, 竟然突然勁 brake, 之後施施然轉入路口,  我已經跟車唔貼, 都耷到成架車彈起, 如果後面嗰架係大貨櫃, 一早轆扁佢!

比起大陸, 香港人開車都算施文.  但有啲人嘅駕駛態度, 真係好有問題.

最討厭嘅係轉線唔打燈, 話 cut 就 cut, 老馮要人避佢嗰啲粉皮.   其次係開得慢, 有中線唔行, 一味死 <迓> 住條快線嘅 '極品', 喺東九龍走廊最多, 而且九成九係女人, 真係映衰晒.

一物治一物.   對付呢啲阻住地球轉嘅 '極品', 好多時會係啲 <釘尾霸>.  佢哋會開到架車好貼前車, 一路推, 一路用大燈好似鐳射激光咁狂閃, 閃到 '極品'頂唔順, 走返去中線為止.

另一類, 係喺隧道裡面開高燈嘅人渣.  喺倒後鏡比嗰啲強光 <撜> 親, 直情好似比人攞支電筒照完你對眼, 跟住要你開車咁危險.  每次遇到呢啲人渣, 都好想喺自己車尾裝對高燈, <撜> 番佢轉頭!

 不過有次我都做咗人渣, 因為唔覺意開咗高燈開車, 直到返屋企停車場先發現.

搵食難

不經不覺, 喺新公司做夠三個月, 試用期滿.   大步檻過, 梗係要慶祝吓.

星期一, 搵食真難, 因為好多特式西餐星期一都唔開. 我哋 shortlisted 嗰幾間, 唔係 fully booked 就係關門休息, 頂~

用咗成個 lunch time 上網查探, 好不容易先找到間似樣啲嘅, 叫 NUR.





中國人識滋補, 原來老外都曉, 嗰度 sell 
"nourishing gastronomy".   講真, 都唔知係乜?  
不過見下面網頁出 cap 嚟張構圖, 幾靚吖, 應該係好嘢掛...

大鄉里出城, 好耐冇行街, 食之前仲喺 PMQ 走咗轉, 嗰度幾得意喎! 

餐廳環境氣氛唔錯, 我哋六點半上到去, 係第一枱客, 班廚師企晒喺 open kitchen 度等開工.

諗住快快趣趣叫支酒慢慢 dap , 點知竟然比 waiter mark 住, 冤魂不散喺周邊徘徊, 好似好想我哋快啲落 order 咁.  

好吧, 就 order 吧, 你哋快啲過主喇...

鬼節都過咗, 但介紹每度菜嘅時候, 啲 waiter 講嘢細聲過鬼食泥, 直情要讀唇先知佢哋噏乜.

好彩啲嘢食得, 賣相精緻, 用料優質新鮮,  層次鮮明.   既能彰顯個別食材特性, 同時又可以令佢哋水雨交溶, 軟硬兼施, 互相磨合.

唯一要彈嘅, 係上菜速度奇快.  浪接浪, 七度菜竟可以喺一個鐘內上晒.  雖然係咁, 下次有公數出, 一定會再嚟!

不恥下問

尋日千載難逢, 可以參觀神秘嘅馬醫院, 有我覺得至 man 嘅馬會獸醫, 六呎幾嘅 '阿發' 做嚮導, 仲要喺正屋企樓下, 唔去就真係對唔住自己.

馬醫院面積唔大, 應該只有一萬呎左右, 設備同醫人嘅差唔多, 有內窺鏡, 心電圖, X 光, MRI, 藥房, 手術室, 麻醉室, 甦醒室, 解剖室, etc.         

不過啲房就寬敞好多, 要預獸醫, 馬, 同一班捉住佢嘅人, 一齊塞晒入去.

馬唔似人咁, 識講自己有乜唔舒服, 所以斷症方面, 要花好多功夫.  

馬醫院要服務全香港一共 1800 隻馬匹 (1200 隻現役競賽馬 + 600 隻退役馬), workload 都唔嘢少.

全程英文講解, 加上 '阿發' 嘅澳洲口音同啲醫學名詞, 好迷幻, 有時講乜, 真係要靠估.

論語有句 :  <不恥下問>.

同行有對 couple, 不停咁問啲白痴無聊問題, 阻住晒啲進度.   問啲蠢問題, 曝露低智, 又完全不覺羞恥. 呵~  呢啲就係 <不恥下問> 嘅另類演繹.

除咗醫院, 我哋仲參觀埋騎師學堂馬房, 馬泳池同釘甲房.

 

釘甲房係同馬訂做馬蹄鐵嘅地方, 裡面冇冷氣, 幾個熔爐, 加上熊熊烈火, 派咗個肥仔釘甲師傅, 大汗疊細汗同我哋講解.

正當肥仔施展渾身解數, 示範點將條火紅紅嘅直鐵打成馬蹄形咁款嘅與此同時, 有條帶住黑超嘅中女問 :  "哇~  呢度咁熱成個 sauna 咁, 點解你仲可以咁肥嘅?"

我覺得呢啲又係 <不恥下問> 囉!