空肚食早餐

秋高氣爽, 戶外活動好時機.

同事搞咗個小圈子 BBQ, 原本 8 月舉行, 後尾因為怕熱, 一改改到 11月.

地點係大潭水塘水霸底,  一間叫 '翠華' 嘅燒烤場. 
嗰度如果之前未去過, 實在係超級難搵.

明明約咗一點銅鑼灣集合上車, 有人離譜到兩點幾先蒲頭, 賴晒佔中.  加上迷途, 結果去到已經成 3 點!  

我朝早騎完馬, 冇食嘢, 又口乾, 前一晚又學人哈囉喂, 真係精疲力竭, 燒烤叉都 lik 唔起.  

好彩食過同事燒好嘅雞翼同香腸後, 情況好轉, 有氣力欣賞環抱四周僻靜小海灣, 同村落嘅美麗景致.

'翠華' 嘅燒烤食物水準好高, 肉類新鮮, 完全食唔到味精味, 每人百幾, 無限任食, 環境乾淨, 仲有位泊車. 今年內一定要再嚟一次.