去得大陸愈密, 愈覺得當地可以無限想像, 啲人乜都冇, 剩係有 💲💲💲💲💲💲💲💲💲💲💲💲💲 同 膽量 !
嗰啲大企業老闆, 唔係人咁品, 做事唔單止 < 狠 >, 仲要 < 狼 >.
去完 " 富豪馬樂園 ", 回程老闆嫌司機開得慢, 自己揸. 以前聽鬼故, 靈體可以穿牆過壁, 但為人身嘅老闆, 都得 !
夜晚高速 ( 公路 ) 已經冇街燈㗎啦, 仲喺啲大貨車之間左穿右插, 係咁攞大燈閃前面啲車, 一路覆 wechat 一路摷搵叉電器, 又同旁邊其他細車爭位鬥快, 生死時速, 大小通殺, 160km 路段一粒鐘跑完, 全程 x 4 快鏡, 成世人未試過覺得咁 intense, 咁危險, 最後安全到達, 真係要還神.
 |
| 私家廂房 |
跑完呢轉, 知道自己咁 L 怕死, 一啲都唔係做大老闆 / 企業家材料 😂 唯有...... 繼續死死氣打份工囉.
嚇完有回報, 有得食好嘢.
餐廳喺上海浦東, 叫 < 廂 · 人文雅席 >. 因為係臨時土地, 冇將來, 所以玩乜都得. 由一個喺非洲旅居咗 10 幾年嘅中國建築師, 用 22 個貨櫃箱加上建築廢棄物料, 組合而成, 話將來走佬嗰陣, 大部份物料都可以循環再用.
 |
| 庭園 |
搞成點 ? 當然要寫個 ' 服 ' 字 !
香港開口埋口講環保, 講創意, 但啲人又怕孭飛又怕問責, 幾時先可以做番啲像樣少少嘅嘢出嚟呢 ?
間餐廳唔做 walk-in, 想食就要自己打電話去定位 lu......
嘢食 ? 又係好好味, 冇得輸嗰啲啦, 在此不作多講.
不過最想 highlight 佢個洗手間 ( 每間包廂設私家廁一個 ), 大約 100 呎, 打晒燈, " 竹林 " 設計, 完全冇異味, 入去坐低欣賞嘅與此同時, 回想 10 幾年前去大陸廁所嗰種恐怖嘔心, 真係不可同日而語.
齋睇呢兩張相, 會覺得呢個地方係乜呢 ?
酒店大堂 ? 賭場 ??
錯 ! 呢個, 係一個馬房 !!
地點 ?
中國大陸.
馬主係中國其中一個富豪, 自從幾年前喺歐洲睇過馬術表演, 覺得幾得意買咗兩隻番屋企, 點知買買吓買上癮, 愈買愈多, 咁就唔爭在搞壇勁, 索性買埋笪地整個馬城出嚟玩吓.
唔係講笑, 嗰度真係有成個香港 disney 咁大, 睇到我目瞪口呆 !
實在好浮誇, 成世人講 " 嘩 ~~~ 😱 " , 次數最多係呢次 !
乜都用馬做主題, 包括 : 馬文化博物館, 全中國最大 paddock ( 騎馬場地 ), 江蘇省馬術隊基地, 仲有自己嘅馬醫院添 !
一共有馬 405 匹, 超過 70 個品種, 富豪係全世界擁有最多馬匹品種嘅收藏家.
馬房中央空調, 天地牆豪裝, 一陣馬味都冇.
諗起 Marky ( 我隻馬 ) 個竇, 逗口兜面烏蠅, 熱到爆都淨係得把大風扇吹住, 吹起啲糠仲搞到成頭塵. 千祈唔可以比 Marky 知, 人哋住得咁富貴, 咁好環境 😜
大陸人果然好敢接受新事物, 乜都夠膽死, 搞到啲馬鬼五馬六, 姣屍扽篤, 但效果又幾得喎 😄
我旁邊黑色一舊嘅, 係 " 汗血寶馬 ", 聽講身價 RMB 1200 萬 ! 不過唔敢行咁埋, 因為佢縮耳 ( 代表馬唔 likey ).
睇完馬, 估唔到有 surprise, 可以試騎溫血馬, 完全冇心理準備要上馬, 好彩冇著裙同埋食 lunch 冇劈好多啫.
我哋三個人騎, 佢哋攞咗三隻馬出嚟, 問我揀邊隻, 我揀咗最高大有型 - 教練拖住嗰隻 😂😂😂😂😂
隻馬身型龐大, 不過比想像中 ok , 起碼騎得郁, 可惜裝備 唔啱 size, 有啲阻住.
教練話隻馬 40 幾歲 ( 即乘 3 = 人嘅百幾歲 ) , 咁係 < 馬瑞 > lu wor 😃 佢叫我下次騎用馬刺 ( spur ) 好啲, 因為隻馬老所以好慢, 要落好重腳.
好 ! 如果我下次去上海, 又有人肯開個幾鐘頭車, 車我去無錫, 一定會帶馬刺, 再騎 !
( 註 : < 開眼 > = 大陸話 < 大開眼界 > )
都係嗰句, 做人, 要識有風駛盡𢃇. 有人請客, 就要尊重, 唔得揀啲太一般嘅地方, 以免令主人家誤會, 以為你覺得佢請你唔起 😆
舊地重遊, 去咗京劇大師梅蘭芳當年主廚傳人主理嘅私房菜 -- < 梅府家宴 >.
嗰度呢埋喺啲胡同裡面, 九曲十三灣, 唔明點解 10 幾年前我可以喺冇 google map 嘅情況吓搵到.
廚王壽山先生的傳人
廚王壽山先生的傳人梅府家宴
去到, 已經差不多日落, 係最佳時分, 影相特別有氣氛.
間嘢一啲都唔平, 每人平均消費 RMB 1,200 +, 但都全院滿座, 你話而家啲人幾有錢 ! 同埋真係文明咗好多, 記得以前食飯, 為咗去廁所, 事前要作出準備, 有 5 大守則 :
1. 閉氣 ( 唔駛講到咁白啦 )
2. 紮穩馬 ( 因為痞廁 )
3. 自己帶廁紙 ( 就算有供應, 啲紙都硬到可以用嚟寫字 )
4. 唔可以著闊腳褲同長裙 ( 怕揩到地上啲 💰💰💰 )
5. 唔可以注視地面 / 牆身 ( 驚見到啲好震撼, 令你唔可以再繼續食嘅景象 )
家陣, 人哋個廁所都唔知豪華過香港嗰啲幾多啦.
餐廳展覽咗好多梅蘭芳生前用過嘅物件, 成間小型博物館咁, 仲有佢演 < 貴妃醉酒 > 著過嘅戲服, details 好靚 😍😍😍
餐牌係一把扇, 由 < 梅府 > 總管親筆書寫, 書法秀麗, 我極速九秒九, 據為己有 !
嘢食都係 東星斑, 海參, 龍蝦, 鮑魚 嗰啲好嘢啦,.
而家諗起都流晒口水.
不過最欣賞, 竟然係 < 鴛鴦雞粥 > .
慢火將雞肉熬兩日兩夜成蓉, 再根據不同時令用青菜調成菜汁, 搞到一白一綠太極圖狀.
係梅蘭芳登台前同完 show 後必食, 老實講, 佢真識食 !
食完今次, 我認為呢間 < 梅府家宴 > 係可以再去第 3 次, 第 4 次, 第 5 次 ......
唔飛唔知身體好 😆 今個禮拜驛馬繼續星動, 又飛北京.
神奇地, 來回兩班機竟然完全冇 delay, 不過最震撼, 就係北京萬里無雲, 天朗氣清.
 |
| CCTV 大樓 |
同某大業主開會, 佢哋話比隔離座 CCTV 大樓隻尖角劈到正, 而家個商場要搞風水, 好頭痛. 望真, 又係喎...... 個著名建築師 ( 張曼玉條舊菜 Ole Scheeren ) 同佢哋好大仇口 😂
啲人話之前嗰晚食得太多, lunch 不如清淡啲, 問我想食乜 ? 我話, 涮羊肉啦 !
我係客, 班佬奈我唔何, 唯有 call 北京 friend 搵間地道嘢.
 |
| 滿恒記涮羊肉 |
估唔到, 正宗涮羊肉原來用清水烚, 好清淡㗎 ! 話咁先食到羊嘅肉味, 所有羊烚 18 秒就食得. 不過我哋姣婆守唔到寡, 驚死唔夠味, 叫咗鴛鴦鍋.
 |
| 銅爐 - 燒炭㗎 |
5 種醬料選擇, ' 自己顧自己 ' ( 即你點麻醬, 麻醬唔係同枱 share, 麻醬個碗就係你用嚟食嘢個碗 ).
好貪心, 叫咗 3 個醬 : 辣油, 麻醬, 海鮮醬油.
 |
| 醬料菜單 |
 |
| 兩種半肥瘦羊肉 + 牛骨髓 |
< 深海魚 > 同 < 大陸午餐肉 > 比較驚嚇.
北京離海咁遠, < 深海魚 > 要運送幾耐先去到呢 ? 午餐肉完全實色, 成舊擦紙膠咁, 但啲佬食得好滋味, 我諗應該幾正.
不過最堅就係碗辣油 ( 下圖左下角 ), 搵啲辣都冇, 根本就係一碗生油. 啲羊點落去, 直情就係將片羊肉浸生油跟住直接食落口, 感覺極度肥 x infinity !
 |
| 牛柏葉, 深海魚, 午餐肉 |
唔好以為寫成咁, 個涮羊肉唔掂, 相反, 我非常欣賞, 覺得好有風味, 相信冬天好 Q 冷嘅時候一班人圍住個炭爐烚吓烚吓, 劈吓酒, 會極度有 feel.
我哋過晒食晏時間先去, 自備香檳, 大吃大喝, 最後埋單只係 4 百幾人仔, 抵食到爆.
