萬惡淫為首

開工唔夠兩個禮拜已經被催促去米蘭.

十月剛剛完去意大利十一月又去, 唔係有舖癮, 而係上任撇咗直到我就任, 有 3 個月真空期, 因為佢走嘅時候不歡而散, 所以好多嘢故意冇交帶清楚, 黑箱作業, 冇人知佢做乜.   

返工成個禮拜, 香港 office 都冇人可以實質說明公司對項目管理 ( 部門 ) 有乜祈望要求, 同 HQ 點交流呢 ?  有乜講得 - 做得 - 唔講得, 完全 0 資訊 !  真係唔知點入手.  日日做嘢窒住窒住, 唔係路, 要儘快去 HQ 搞情楚.

終於可以衝出鄉下, 轉到時裝之都米蘭, 應該值得開心.  可惜米蘭十一月天氣唔生性, 絕對可以用 [ 糜爛 ] [ 一 pet 屎 ] 形容, 去咁多日又凍又寒又濕, 大風仲不停落雨, 帶去嘅鞋都不敵, 完全入水 total lost.

連日污天黑地, 一個人 4C 低溫下米蘭街道穿梭, 著住對入水鞋加埋濕襪, 秤住個成斤重嘅電腦, 風大雨大 😩😩😩, 不禁諗起新曾馬師曾首 [萬惡淫為首 . 乞食 ]  ( 唔好笑, 我真係識唱㗎 ! )


" 🎼 嗨 ~~ 冷得我沌沌震

真係震到入啊心 ~ 啊 ~~ 🎵

心啊酸 ~ 我重發緊冷

🎶  都好似腳軟難行 ...... "

詞填得真好 !!

好彩每朝早上街頭嘅冰冷, 都可以喺米蘭 office 裡面極速溶化, 同事非常熱情, 成班人除咗 professional 仲生猛同好有 energy, 點解咁正 ?  因為有個好 leader 囉 !  

身高 195 cm, 個勢已經贏晒啦 !  見意大利同事都非常之 respect 佢, 最最最 impressive 就係佢 time-keeping technique - 永遠準時, 100% precise, 超堅.

佢百忙中搞 surprise welcome party 比我, office 平時唔飲酒, 知我鍾意劈就跑落樓下超市買咗 4 支 bubbles 一齊劈, 仲播我鍾意嘅歌, 好感動. 

呢啲老闆邊度搵 ?

好心人

今朝打長途的, 同的士佬談論近期路面狀況, 各區徹底淪陷危機四伏, 兵荒馬亂, 根本同內戰冇分別.

上星期四朝早原本 book 咗騎馬, 點知必經之路全封, 但又非常心掛掛想探吓隻馬, 結果轉接地打的去荃灣西 --> 搭西鐵入元朗 --> 之後再打的 --> 去八鄉.    點解唔喺錦上路直接去 ?  我都想, 可惜架西鐵行行吓突然宣佈錦上路站收皮, 吹 L 漲.

好戲在後頭, 9:15am 睇完馬要出尖沙咀返工, 出到騎術學校門口, 成條粉錦根本塞死晒郁都唔郁 ! ( highway 唔通, 啲人個個諗住行荃錦公路出九龍, 但又自不量力, 上斜架車唔夠力, 搞到跟尾成條隊個個變龜行囉 ).  Call 的士 apps 同 Uber 加成 $100 都冇人應機, 唔對路, 唯有出粉錦公路邊行邊截,.

咁當然冇車啦, 9 點半喇, 點算呢 ?  忽然間心裡祈求 :  [ 天呀, 麻煩比條生路行吓, 比架車我走啦...... ] ( exact wordings 😆)

成隻無主孤魂咁喺路邊行嚟行去揾車搭,  行咗 3 分鐘左右, 突然有架黑色 van 停低, 裡面好心司機竟然 offer 順路載我一程去上水 😮😮😮😮.   

你話係咪極度神奇呢 !!!!!!!!!!!!!!!!!!!!!!!!!!!!!!!!!!!

上水去大欖 3 號幹線雖然塞咗成兩粒幾鐘車, 但全靠好心司機幫忙, 我先可以途出生天, 中午前回到 office.  真心祝願佢事事順利, 好心有好報 !

貪新忘舊

無驚無險新工踏入第二週, 雖未至如魚得水, 但都算漸入佳景, 起碼仲未有想立即走人嘅感覺.    

返幾日就唔撈我當然有往績 😆   之前雞毛 HR 同事成日咆哮, 話啲新人玩嘢做幾日就劈炮 ; 我反而認為合情合理, 唔 like 不如趁早閃, 冇得夾硬嚟委屈自己, end up 浪費大家時間同心機.  

喺雞毛長期被灌輸 [ 因為 under staff 所以唔 efficient ] 嘅概念, 但入咗新公司, 先知品牌生死存亡, 唔係人多人少, 根本係關乎產品, 管理層決策同 staff 質數囉.

早幾日 product training 嘆為觀止, 太耐冇見啲咁華麗嘅貨品, 鹿撞心情比如二奶攞住張附屬咭去任碌一樣 = X 咁 high 😂😂😂.    附屬咭我就冇份喇, 靚舖都 ok 嘅, 新公司品牌對店舖設計好有要求, 睇番 budget 竟然貴雞毛唔多, 但效果同氣勢差好遠.  點解呢 ? 

新公司品牌 Venice shop

新公司品牌 Miami shop

雞毛 Beijing China World shop

適應進行中

享受完短暫的 in-between jobs ( unemployment 代名詞 😂 ) 12 日美好時光, 終於返回現實.
唔好誤會, 我唔係吃回頭草, 上圖只係用嚟顯示新工上班地點 : 喺廣東道比 LV Chanel 夾住, 相對舊公司黃竹坑鬼地方, 天堂與地獄, 剩係個勢都唔同啦 !

First day 前嗰晚雖未至失眠, 但瞓得非常唔好.  幾日前已經不停催眠 / 調較 / 安慰自己 : " 新環境之嘛, 又唔係未見過大蛇嘔水, 驚乜啫 ? ", 點知週末返屋企食飯, 老豆一句 : " 你大年紀喇, 仲有人請, 要比心機做嘢啦 ...... "  比佢一嘢嚇爆, 壓力由 0 火速飆升至 100.   好彩有預早踩線, 綵排咗返工一次, 掌握到點樣 / 要幾多時間由屋企去廣東道, 如果唔係, 情況真係會變得極度糟糕.

心跳加速踏入公司門口之際, receptionist 笑容親切, 跟住茶水阿姐殷勤招待, 並非因為我職位, 記得見工嗰陣都係一樣咁好招呼, 令人感覺超 warm 喎.  呵 ~ 新舊公司大家都係意粉嚟啫, 點解個 mood 差咁遠 ?    ( 答 : 人工差別 😂 )

第一日都係嗰啲啦 : HR 好 Q 多 forms 要填, 各類 access card 交收, 介紹 office 設施, 同全人類握手 ( 基本上介紹完 5 秒內就會忘記咗人哋個名 😆 ), 同條 team 食 welcome lunch, 執拾吓房間啲嘢, 跟住 send 電郵同海外同事打招呼, 無驚無險 6pm 準時收工.

第二日返 office 途中竟然仲緊張過第一日, 皆因要面對自己最大死穴 : 勁驚一條友自己出街食飯 ( 早餐除外 ), 連飲嘢都唔得.   好白痴, 好低能, 不過由細到大都係咁, 控制唔到, 就算出 trip 我都只會叫 room service 或買嘢返酒店房食.   最後, 有幸同事邀請一齊食, 可惜要拒絕, 因為 lunchtime 要飛撲去花墟買風水植物, 風水呢啲, 愈早搞愈好啦.

事原咁啱得咁橋, 新舊公司都係請同一個風水師傅, 佢好人地免費教我間房要點樣擺, 仲話我坐咗喺 office 其中風水最佳位置之一, 咁個心都安樂啲 ......

不過聽聞老闆諗住改動 office 間隔 ( 項目當然係由我負責 ), 完成後我就要搬去坐近老闆嗰邊了.