緣份夠嗎 ?

識我嘅人, 都知我對一切有關占卜命理星相嘅事物十分有興趣, 有時會同相熟嘅師傅偷吓師, 又或者喺 youtube / 網上亂摷資料, 自學一番一知半解亂咁嚟.

醞釀多年, 卒之的起心肝正識上堂. 報工聯會, 12 堂, 每堂個半鐘除開都唔駛 80 蚊, 真係抵到爛.  點解唔比貴啲搵個出名師傅學 ?  因為搵唔到囉 !  覺得勁嗰啲, 唔係仙遊咗就係收山唔教, 其餘嗰啲唔係過晒氣就係好流吓.  而家平平地報工聯會, 就算讀讀吓冇興趣 drop out, 都唔駛咁蝕.

全包圍分別報咗風水同八字, 星期六學風水 + 星期日學八字, 好勤力吓.  

尋日星期六下晝人生第一堂風水課, 感覺還可以, 老師/師傅 吹水講古, 臨尾半粒鐘先教點睇 2021 九宮飛星. 不過都唔係冇得著, 因為佢透露咗香港 3 個風水差嘅地區, 有乜特徵呢 ?  就係鄰近嘅山岩岩巉巉好似金沙朱古力咁 😆  同學們紛紛發問, 想知自己住嗰區有冇份, 哎吔有呀 ~ 其中一個 : 屯 X, 中咗 !

今日學八字遲到 8 分鐘, 入到班房, 老師/師傅 已經教完 10 天干 ( 甲、乙、丙、丁、戊、己、庚、辛、壬、癸 ), 正在如火如荼地教緊 12 地支 ( 子、丑、寅、卯、辰、巳、午、未、申、酉、戌、亥 ) , 老實講我都未識讀晒呢堆字, 好彩不嬲對八字有些微認識, 先未至出師未捷身先死 😅.  跟住, 老師/師傅 好高速咁再教咗幾個開盤技巧, 反應轉數慢啲分分鐘甩轆, 跟唔上大隊. 

好不容易捱到落堂 !  唔好誤會, 其實課堂內容相當有趣, 只係我稍缺慧根覺得有啲吃力啫, 正當諗緊應該 ok 可以繼續學落去之際, 老師/師傅 話同學若然緣份未夠, 覺得太難嘅話, 上第二堂之前可以去寫字樓要求調班.  

吓 ~  係咪講緊我呢 ? 😂

移動的龍門

大家對 1354 呢組號碼有乜睇法 ? 

結構組合同讀音, 有冇任何 ' 幸運 ' 嘅意味 / 原素 ?

我覺得 1354 一定好過 5354 嘅, 但點睇唔算係靚冧把啦, 不過有人竟然認為 1354 靚, 係 [ 一生唔死 ] 嘅諧音 ( ??? ), 鑑粗嚟十分牽強.  可能道行未夠, 加上年紀大想像力流失, 真係搲爆頭都聯想唔到 1354 點樣可以演繹成 [ 一生唔死 ] 囉.

Seriously [ 一生唔死 ] 係咪一件好事 ?  對我嚟講, 肯定唔係.  要永無止境咁生存, 無限 loop 地過日子, 諗起都心寒, 唔知係祝福定詛咒.  不過我絕對尊重別人追求 " 永生 " 嘅概念, 自己唔要啫, 唔代表人哋唔可以要嘛.

呢位 1354 叫我儲錢, 我話講齋儲錢冇用, 擺喺銀行冇息收, 要攞啲嚟賣藍籌炒股票, 佢聽後嗤之以鼻, 不表認同.  

尋日食晏 1354 眉飛色舞, 皆因早排買嘅金近期大升, 八吓佢邊間買啦, 佢話 [ 2840 ] ......  正當努力拆解 [ 2840 ] 喺咪另一幸運密碼之際, 1354 尷尬地話 [ 2840 ] 其實係金嘅 ETF ( 股票型基金 ) 😂😂😂😂 

車 ~~~ 乜唔係唔 buy 炒股咩 ?

同場另一趣事, 1354 兩個禮拜前表達過好有興趣一齊報讀某個 course, 學費 $7,000.  上星期 whatsapp 上課日期資料佢, 佢回覆話想慳錢, 都係唔報喇, 點知尋日就同我宣佈佢 full pay 三十幾萬出咗部 Model 3 😒

哇 ~  簡直係 " 慳 to the next level " !

真心, 我冇嘢可以再講喇 😂😂