年尾跑數

2021 年 blog 生產力唔高, 今日年尾 23:30pm 再盡力整多個短篇 : 一個好多人聽過, 但又有好多人未聽過, 我喺 HKU 嘅靈異經歷.

當年我聽 discman 等夠鐘上堂位置

本部大樓 Main Building, 1993 年夏天尾聲黃昏某日大約 6:30pm, 當年非常好學報讀港大夜校學日文 😆.  早到, 班房門未開, 所以一條友坐喺內園張石櫈 [ 黃圈 ] 雙目無神地聽住 discman 等開門.

慘白少年現身位置

無意識地周圍望吓, 突然察覺隔個水池打對面左手邊第二條柱 [ 紅圈 ] 有個 ' 四眼仔 ' 𥄫住自己 ! 造型十足小說常用字眼 : 慘白少年 - 面無血色, 粗框眼鏡, 白恤衫黑西褲, 好瘦好瘦好瘦......  最後, 當然冇一見終情啦, 因為大家互望約 5 秒後瘦仔就由肚開始由下至上漸變透明, 跟住成個 ' 人 ' 完全消失咗.

案發現場 ( 橙圈 )

前日下午去 HKU 一遊, 趁機拍下當年留下陰影 / 倩影位置, 做個記錄.

投訴之王

最近俾朋友起咗新朵叫 [ 惡得起 ], 無須多作解釋, 自覺當之無愧.  除咗 [ 惡 ], 其實我都有鋪投訴同告發癮, 之前寫過兩三個 case, 今日 2021 大除夕係時候更新.

巨響現場

事發地點騎術學校旁邊, 啲木咀唔知做乜春呢輪日日晨早就開始用風炮 ' 乒鈴嘭唥 ' 鑿地, 係巨響, 仲要係唔停嗰隻.  上星期日 boxing day 公眾假期班仆街竟然 8:25am 就開始鑿, 忍無可忍打 1823 投訴, 點知等極都冇人接, 唯有留言.  [ 1823 網頁自稱留言 3 小時內回覆率達 90%, 事實係半日都冇人覆 !  ]

1823 app 投訴

電話冇人接留言冇人覆, 我唔會罷休囉, 一於 download 埋 1823 個 app, online upload 埋 video 投訴 !  

結果兩日之後, 星期二下晝, 先收到個語氣勁 hea 來自環保署 ( 古洞區 ) 嘅馮生致電, 講成 10 分鐘都係一味喺度推庄, 話冇可能 24 小時埋伏, 就算真係有嘈音一定要當場斷正, 用有關部門嘅專業儀器量度聲浪超標先可以正式處理 !  我同馮生講, 點斷正呀 ?! 如果再有巨響, 真係唔知要等幾耐至可以邀請到你哋大駕光臨 😓, 既然受理門檻咁高, 無謂嘥大家時間, 麻煩 close file 唔好再跟進喇.

事隔一日, 環保署竟然又打嚟找死, 明明話咗唔駛 follow up 囉 😠 ! 正想破口大罵之際, 忽然察覺對話中嘅陸生 ( 元朗區 ) 講嘢有啲紋路似乎有心跟進, 好, 比啲時間佢做嘢. 

翌日星期四早上, 收到陸生 update 條 team 喺現場搵緊正確投訴地點 ( 因為我提供唔到門牌號碼 ) ;  今朝 31 Dec 陸生打嚟 heads up, 話已經同咗涉事人作出警告星期六日唔可以再發出任何巨響, 如果嚟緊週末再鑿地我可以打來電顯示手提號碼通知佢, 因為咁啱條 team 會喺附近做嘢. 

我冇聽錯吧 ?  太夢幻喇, 咁盡責又有交帶 ?  唔似政府作風喎, 所以忍唔住祝陸生 ' 新年快樂 ', 佢聽後反應有啲 surprise ( 可能平時多數都係俾人 diu  😂 ) 好開心地同我講番 ' 新年快樂 ' ! 

咁 happy, 不如喺度祝大家 HAPPY NEW YEAR 🎉🎉🎉 Cya next year !!!

中伏 . 蠢

好多時喺同事或朋友心目中我變成咗法國 / 意大利代言人, 比人問得最多嘅, 係香港邊度有法國 / 意大利好嘢食介紹.

答案係 : 冇. 如果有期望, 最搵陣都係食日本嘢.

香港, 其實曾經有好好食嘅法國餐廳, 個人口味記憶中有 3 間 :

• 九十年代金鐘香記 Petrus ( 仲健在, 不過我已經冇錢食了 ) ;  
• 2000+ 中環亞畢諾路 Chez Moi ( 執咗 ) ; 
• 2010+ 灣仔頹 look 嘅 Serge et le Phoque ( 執咗 - 唔好再問我點讀唔該 😂 ) ; 

而家超紅要 N 個月前 book 仲要事先比哂 deposit 懶巴閉嘅 Jxxx May, Bxtxxd, 食完, 都係覺得名過其實不外如事啫.

在港法國人 operate 嘅法國餐廳還可以, 香港嘅意大利餐廳就真係好不堪, 連意大利人開嘅都唔掂. 老實講, 廿幾三十年覓食經驗最值得一提只有 Da Domenico 一間.

Da Domenico 最初坐落新寧道, 曾經風光一時, 可惜搬竇後食物質素一落千仗. 回想開業初期嘅意粉確實唔錯, 有 90 % 意大利地度口味, 不過要 $580 碟真係有啲過份 ! 但若然比較番佢哋青豆 ( 配菜 ) 都要 $250, $580 有成碟意粉又一啲都唔貴喎.

講咁多其實想帶出今次主題 : 一間令我非常非常之失望嘅米芝蓮* Oxxxxxxm.  幾個月前第一擊完全冇驚喜, 已經講過冇下次. 今次再去皆因有人請客, 加上另一朋友話餐廳係佢 wishlist, 所以成全佢啦.

冇味紫色 Amuse Bouche

鹹到苦芝士波

靚 = 好食 ? 事實係呢兩碟嘢都一樣咁難食. 紫色碟 amuse bouche 得個樣啲餡完全冇味嘅, 仲要個酥皮油掖到爆, 食完個口好似飲咗抽油煙機隔淨啲油咁 ! 

有聖誕樹葉伴碟嘅芝士波鹹到苦, 鹹過飲咗十啖海水 ! 同侍應反映, 話可能因為啲 anchovy ( 鯷魚 ) 鹹喎 😵  唉, 抵死啦, 根本就錯晒, 明明係聖誕裝飾, 做乜攞嚟食.

其貌不揚的 chef

大廚親自出馬嘅白松露日本米特式煲仔飯我冇試, 其實超鐘意白松露, 但一聽到什麼日式 fushion 興趣立即由 100 急降到 0.  朋友反應係食唔到白松露味, 應該係之前啲芝士波太鹹, 搞到味覺失調所致. 

蝦 & 意粉, don't touch !

我個大蝦意粉味道 ok, 但唔明點解要河水不犯井水, 蝦還蝦, 意粉還意粉分開上囉, 騎呢.

呢間嘢太伏了, 有人請都唔會再去了, bye~

🌈 七色鬧劇 🌈

 

部門同事 11 月 8 日公司新寫字樓開工大合照, 唔好以為人多, 其實有 1/6 同事缺席.  阿姐 ( 黃圈 1 : 部門主管 ) 事前講明 office 入伙第一日一定要出席, 結果啲人都係完全唔睇佢台戲, 照 WFH 照放假.

[ 方丈 ] 份人好小器㗎！

話咁快, 搬好剛剛一個月阿姐就俾 CEO 收皮, 12 月 8 日下晝 5pm 公司出 announcement 宣佈阿姐兩星期後離職. 因為 WFH, 我冇機會親眼目擊現場精彩實況, 聽聞部門第二把膠椅 ( 紅圈 5 : old seafood, 花名 [ 方仗 ], 同阿姐有牙齒印互不理睬 ) 當日下晝開會勁風騷, 扮晒講笑問有冇 fireworks 🎆, 未放工就拉大隊落樓下 happy hour, 嘩真開心 ~~ 㩒都㩒唔住.

第九層撥舌、穿腮地獄 : 生前惡口罵人, 唆弄是非者, 死后便要在此受挑脷筋, 鐵枝穿腮之刑

阿姐's PA ( 綠圈 2 : 天下第一長舌婦, 突眼, 紋眉, 照夫額 ), 返工一日 6 個鐘講是非, 其餘時間鬧人, 嗰頭同人 diu 緊自己阿姐點煩點 cheap, 一見阿姐埋位就即刻溫柔上身關懷備至.  阿姐被炒佢打電話八晒俾啲同行知, 離晒譜一啲職業操守都冇 ! 未見過咁西嘅 PA.

超級擦鞋仔 ( 橙圈 6 : 漏口, 千度近視 ), 自以為係阿姐嘅左右手, 代言人. 阿姐每次開會發言佢唱雙簧, 問問題眾人反應冷淡佢衝出嚟答打完場; 平時有人講阿姐壞話佢第一時間報寸, 估唔到今次超級擦鞋仔竟然仆到去加入慶祝行列, 部門各人非常 surprise 成地眼鏡碎.

乞兒 ( 白圈 7 : 我頂頭上司, 廢 L 一條 ), 之前寫過唔駛多介紹, 全 team 都知阿姐一走佢最高危, 因為唔會再有人包庇佢. 

條擦鞋狗平時黐住阿姐跟出跟入, 阿姐人都未走乞兒已經去埋方仗身想過塘 ! 真係唔知個 [ 義 ] 字同個 [ 醜 ] 字點寫, 好在方仗份人真係好小器, 初頭乞兒入公司嗰陣以為自己有阿姐撐腰好勁, 擺晒款 non-stop 地去得罪方仗. 哈, 抵 L 死喇而家方仗完全當佢透明視而不見.

未講阿海 ( 桃紅圈 3 ) 前, 講吓比較 mild 嘅意大利同鄉 ( 粉藍圈 4 ), 雖然係意大利人但唔知點解阿姐對佢非常差, 成日欺凌佢. 意大利同鄉憎到阿姐入骨, 仲同人聯名去過 HR 投訴添 !  點知超級擦鞋仔爆料, 當日阿姐宣佈離職之際, 意大利同鄉竟然好大反應講, " this is totally shocking, I need some time to digest ", 不愧倫敦戲劇學院畢業, 好戲 😂 !  跟住仲喺送比阿姐嗰件一啲都唔值錢嘅 tee 上面, 寫什麼以為冇人識睇嘅意文 ( 意謂 ) : " 你是我們的貴寶 - 我們的榜樣 ! "好嘢 😂😂😂.

阿海點解係阿海 ?  因為佢有本事帶個女上船同阿姐+阿姐個仔出海 3 日 2 夜, 關係非常之密切呢.  部門冇原本人知, 係阿姐有日唔覺意同我爆响口, 咁我當然周圍唱啦 ! 

平時叫八婆太易比佢識穿, 出海嘛, 叫阿海一定聯想唔到啦.  

女人咁熱衷擦鞋都係第一次見, 阿海無時無刻都喺度擦阿姐, 扮晒忠心. 關 L 我事 ? 係喎, 不過有時真係唔抵得條八婆假傳聖旨, 講大話欺凌下屬, 所以得間就串 Q 佢. 吹咩 ?! 佢唔敢搞我㗎, 我行內識好多人, 佢唔驚我唱晒佢之前 / 而家啲衰嘢出嚟 ?

物以類聚, 阿海同乞兒一樣咁反骨, 但比乞兒更進取 !  目中無人, 阿姐隻腳都未踏出公司門口半步, 竟然宣佈自己升呢暫代阿姐管理成條 design team, 好搞笑囉, 有冇問准過方仗呀 ? 果然, 方仗毫不客氣發火叫佢坐番低做掂自己嘢先算 😂😂😂  

寫完, 發現最失敗係阿姐, 有眼無珠錯信班表面阿谀奉承, 暗裡各懷鬼胎嘅心腹, 而家失勢就俾人反咬一口踩住上, so sad.