唔識聽就睇餐牌啦

 

上海臨時臨急約食飯, 除咗對食物有要求, 仲要靚裝 ( 修 ), 好難先搵到間又未去過, 又風評唔錯, 位於 UCCA Edge 尤倫斯當代藝術中心 3 樓嘅一星 New Wave by Da Vittorio. 

高樓底簡約玻璃屋設計, 我覺得日頭去會再靚啲.

主打住家風味意大利菜, 開胃菜 番茄蜆肉麵包屑濃湯, 好飲到爆, 加埋熱烘烘脆皮 意式香草麵包, 頭盤都未上就已經肯定今次冇揀錯地方.  

因為太耐冇去大陸, 普通話聆聽能力大不如前, 服務員介紹餐牌聽得一頭霧水. 我唔食菜, 不過諗住叫啲菜俾其他人食, 點知就嚟咗碟同菜差十萬九千里, 上到枱全人類 O 咀, 仲要成千六蚊碟嘅 " 碳烤海鲜 " 😂😂😂😂😂😂😂  

啲菜呢 ? 原來係我擺烏龍聽漏咗菜名嘅前半截 -- 碟嘢全名原來係 碳烤海鲜搭配時令蔬菜, 人哋主打碳烤海鲜, 唔係時令蔬菜囉大佬 😂😂😂😂😂😂😂😂😂😂😂😂😂😂😂😂😂😂😂😂😂  好彩啲海鮮非常新鮮, 眾人十分滿意.

笑餐飽, 跟住嚟嘅 魚子醬 . 焗薯蓉 . 酸忌廉 同當造 白松露 . 水蒸蛋配榛子, 一黑一白, 天上人間.

但最驚艷, 竟然係賣相平平無奇嘅 肉醬千層麵 ( Lasagne ), 啲麵皮好似雲吞皮又薄又滑, 實在太非一般, 美味到唔識形容, 暫時係喺意大利境外食過最好嘅.

食到尾聲, 餐廳喺對面佢哋間 cafe 擸咗七碟 gelato,  七種唔同味道請我哋試食, very nice.

千祈唔好攞最面嗰塊

上海除咗係我亞洲去得最多嘅地方, 仲係我第一個搭飛機飛降落嘅大陸城市.  但無論去過幾多次, 每次去完都失憶, 好似俾人 reset 過咁, 到今時今日街道東西南北完全搞唔通.

尋日快閃飛上海搵朋友食晚飯, 今日下午已經飛返番嚟香港, 好癲.

 

上海夜生活精彩到不得了 !  諗起班愛國愛港高官自我感覺良好, 搞埋啲晚黑 10 點已經全民返晒屋企嘅死城夜繽紛 😆, 笑死.

因為成三年冇去, 所以特別安排住番喺浦東陸家嘴一個幾有代表性嘅地方.  有乜咁代表性 ?  就係疫情前連續兩年聖誕時期入住, 食早餐嗰度狂 loop 洗腦聖誕音樂. 今次特登返去住, 目的係想聽吓嗰度仲係唔係播緊同一個 playlist. 成件事係咪非常 obsess 兼變態呢 😂😂😂

今次房租不 "含" 早餐 ( 大陸 "包括" 叫 "含" 😂 ), 非常有誠意地俾成 RMB178 坐低食, 結果聖誕音樂已經換咗, 但驚喜就係同一班服務員, 依然健在.

正當沈醉於別來無恙, 尋回失去日子之當刻, 俾我親眼目擊一個駭人場面 : 有個客夾 salami 嗰陣跌咗塊喺枱面, 經理行過, 以為神不知鬼不覺, 竟然 徒手 揦番塊喺枱面攤唞咗幾分鐘嘅肉入個盤度 😱😱😱😱😱😱😱😱😱 

事發後衝去案發現場影個大特寫, 左手邊第二行最前面嗰塊, 就係經理親手擺番上去嘅 salami.

 

食髓知味 II

曼谷暴食第二晚, 重遊熒火蟲餐廳  http://shirliek.blogspot.com/2020/02/blog-post.html, 上次去環境太暗揸機手震乜蟲都影唔到, 今次有備而戰, 帶埋腳架慢慢曝光, 終於得手 💪 

疫情洗禮竟然捱得住, 不過餐廳面積縮水不少, 入口泥牆吊吊揈藝術裝置今日已經冇咗.   

當年園林實景高樓底用餐區,現在變咗個十足 backstage 四周圍起黑布簾嘅黑房, 乜景都冇, 好齋. 心諗, 搞錯呀, 唔係咁慳皮嘛......

好彩嘢食仍然保持水準, 材料豐富海陸空齊全, 10 道菜 tasting menu 唔駛 8 百蚊港紙, 價錢實惠. 同埋見過鬼怕黑, 每道菜我會望清望楚, 確定冇恐怖蜜蜂幼蟲先吃 😆

食咗成個鐘頭盤, 差不多上主菜嘅時候, 忽然熄燈眼前一黑 👀  布簾打開, 簾背後係玻璃房, 裡面無數熒火蟲空中飄浮, 時暗時亮, 浪漫奇景, 好虛幻 ( 有片 ) !  

 

 

 

伸手不見五指大約再多 5 分鐘, 餐廳亮起綠色天花燈, 等客人可以邊食邊睇, presentation 同幾年前唔同, 因為上次係要食完先走去另一間黑房睇. 

 

井底蛙, 唔清楚世界上仲有冇其他熒火蟲主題餐廳, 但呢間非常值得一去, 尤其係冧女, 一定要去.

食髓知味 I

哇, 好懶呀, 成個半月冇寫 blog, 今日卒之寫喇. 

相隔半年, 泰國暴食之旅又再出發 !  

整佢個制, 原來好地地, 但每當要出 trip 著泳衣露肉嘅前幾日, 肚腩就會突然脹爆, 上次 5 月係咁, 今次又係 😠.  記得廿幾歲嗰陣老豆見我愈嚟愈肥, 兜口兜面話我, 叫我唔好自暴自棄 😂  而家照鏡望住鏡入面嘅自己, 肥腫難分連胃腩都凸 Q 埋出嚟, 真係想唔自暴自棄都唔得.

朋友遠道而來回港探親, 一排冇見瘦到隻蜢咁, 同佢去曼谷, 要整啲激嘢佢食吓鋤番肥佢先得.  

落機喺酒店擺低行李差不多兩點, 第一時間跑去地道炭爐牛什火鍋 http://shirliek.blogspot.com/2023/05/ii.html, 其實 5 月已經食過, 今次再食都仍然覺得非常美味, 尤其個用牛骨肉熬製而成嘅湯底, 確實一絕 ! 下次去曼谷, 一定要再幫襯.

食飽飽火鍋再走下場, 打算喺老城區河邊 Rongros https://rongros.com/ 嚟個 happy hour + 簡單晚飯暨睇日落, 點知忘記咗係星期五旁晚繁忙時間, 原本最頂籠半粒鐘嘅車程結果塞咗成個幾鐘, 塞到懷疑人生, 仲要到達目的地當刻突然風雲色變, 落起巨雨 ⛆⛆⛆⛆⛆⛆⛆⛆⛆⛆⛆  注意 : 唔係大雨, 係巨雨.  由落車衝去餐廳門口唔過 4 米路程, 我哋就算有遮都淋到成身濕晒, 加上踩中地上水氹搞到兩隻鞋裝晒水 😆, 黐線 !

兩隻落湯雞被安排坐窗邊靚位, 外面風雷雨電, 窗邊腳下水流洶湧澎湃, 可能做得虧心事多, 實在有啲驚, 不過望住河對面 Wat Arun 鄭王廟喺狂風曝雨下散發出陣陣金光, 相當夢幻, 跟住感覺又好似好番啲.

不愧係米芝蓮同 Roger Wu 推介, 食物同服務水準都唔錯.  個人非常欣賞佢哋個青咖喱雞 + roti 香脆煎餅, 回味諗番嗰種辛辣 after taste, 口水真係滴咗兩滴出嚟.

呢間性價比高又可以飽覽河濱靚景嘅 Rongros 我會再嚟, 不過下次要試吓日光白白坐天台食 lunch, 同埋要早啲訂位啦, 呢個地方實在超難 book.

郊遊遊

 

世紀暴雨再加個小犬, 搞到香港差啲收皮, 但又因如此呢排天氣清爽不少, 起碼日夜耐唔耐都有幾陣風吹吓, 久違了的舒適感覺.  

尋日閒情逸緻, 約咗來自香港市區嘅朋友入大埔滘白鷺湖 Billow 食 lunch.  呢間純白渡假風西餐廳其實之前未幫襯過, 今次純粹搵朋友較飛 😆😆😆    

餐廳有室內同室外坐位, 因為精神分裂怕熱怕曬又怕落雨, 所以穩陣啲 book 咗坐室內.  

到達餐廳之時, 職員話室內已經冇哂窗口位枱問會唔會想改坐室外, 我問 : ' 熱唔熱先 ? '  佢答 : ' 唔熱啦 '.   

咁唔熱就坐室外吧.

張枱靠正大窗果然冇跣我哋, 兩人坐四人枱, 開揚湖景 + 陣陣微風, 涼浸浸坐咗幾個鐘連風扇都唔駛開, 爽呀 😍

唔覺餐廳有大 6 客, 來者都係帶住狗狗 / 成籠雀嚟嘅 local 街坊, 人獸同枱食飯新界 feel, 好 raw 呢.

食物方面, 當然唔會期待米芝蓮質素啦, 但其實論味道價錢同份量, 我覺得 CP 值有 70 分. 

至於後尾整體體驗, 我會俾 80.  點解會突然飆升至 80 ?  哈 ~  就係留意咗好耐, 發現招呼室外嗰幾個 staff 個個笑容可掬, 耐心服務, 極有 heart , 真係好得所以加佢 10 分 😎

1A 甜頭

尋日 Sydney 返港, 上機之前嗰晚收到魚翅航空 message 話調我坐 1A.

唔明點解唔言正名順 upgrade 而係 seat change, 咁曖昧. 去到機場終於真相大白, 原來係坐頭等位但食商務餐, 可能近年少飛, 呢個新玩法真係第一次.  完全唔駛加錢 / 用分換, 開心都嚟唔切冇投訴啦.  

數一數, 連埋今次, 人生 8 次搭頭等自己都冇俾過錢 : 4 次用 asiamiles / bookable upgrade + 4 次係魚翅爆滿自動升艙, 仲要全部長途機, 諗落真係賺凸 !  啲人成日鬧爆魚翅航空, 我就覺得真係冇特別唔好 ( 注意 : lounge service 除外, 6 out of 10 次差, 尤其 HKIA ).

果然不出所料, 頭等艙除咗我同另一個鬼婆, 其餘 4 個位都係普通話人坐 😂, 好彩佢哋冇行嚟行去嘈生晒.

日光白白冇可能瞓得到, 眼光光唯有出招連環劈, 可惜沿途氣流強勁安全帶燈號長著冇人嚟 refill, 搞到 9 粒鐘機程只能飲到 8 杯檳, 唔夠喉 😆 

除咗飲, 食飛機餐係打發無聊時間嘅另一途徑, 如果唔怕辣, 以我 20+ 年空中飛人經驗, 無論乜艙有咖喱口味嘅飛機餐必定冇得輸.  見餐牌有泰式青咖喱雞飯, 正 ! 立即叫.

賣相樣衰似碟頭飯, 查實飯餸分兩兜上感覺可以精緻啲.  但真心, 碟嘢真係好味.

貪字得個𤓓

 

尋日終於都有人陪我顛, 上咗半島 x 天星小輪食 tea.   

呢排天氣同我心情一樣非常之唔穩定, 好在最後天公造美冇落雨, 藍天白雲欣賞維港景色, 喺開天窗嘅小輪裡面涼住冷氣聽 live band, 扮晒優雅嘆下午茶, 原來幾爽.

訂枱二人起跳, 每位 $825, 唔平, 但我覺得又唔算好貴, 半島喎. 

出發前朋友懶緊張問我著咩衫, 駛唔駛呀...... 我話搭船呀而家, 著泳衣啦 😂😂😂 !

 

上到船眾人超 hyper 個個大擘喉嚨講嘢, 真係嘈到頭痛, 好彩一有得食啲人就收聲.

我唔係英式下午茶 fan 屎, 因為三層有兩層我唔食好嘥嘢, 尤其頂層甜點, 不過今次破例, 因為啲水泡、船錨同小輪造型嘅糕餅, 實在太 cute 😍    

底層半島名物 scone ( 英式烘葡萄鬆餅 ) 加埋香檳, 肚內麵包發水, 食一個已經飽咗 9 成 😆.  

四款鹹點其中嘅青瓜三文治, 可能冇肉我覺得普通, 反而吞拿魚 + 鹽漬鯷魚 + 義大利包組合, 好鮮香, yum !

飲飽食醉唔係等屎屙, 而係茶舞時間 😂, 歌手現場演唱多首老歌, 唱 Can't take my eyes off you 嗰陣搞到班老嘢走晒出嚟齊唱齊跳, 三唔識七攬埋一舊係咁 I love u baby !  呢個畫面令我打咗個冷震, 簡直係郵輪困獸之鬥預演, 幸好就快可以落船.

是日 highlight, 竟然係遠在天邊近在眼前嘅 friend, 坐低冇幾耐已經諗點樣可以撻走梳化個綠色 cushion, 話早知攞個大啲嘅袋嚟 😨   雖然現實中做唔到, 但我知佢真心想實踐呢個行為, 因為佢試過扐個 500ml 空樽入酒店 spa 泵晒人哋成支沐浴露走. 

都知佢冇咁易罷休㗎喇, 唔食啲甜品原來係打算臨尾攞走, 點知經理話因為糕點會溶所以唔得, 好肉酸同人拗堅持要 pack 走, 經理一句酒店 policy KO 佢. 唉...... 真係自己搵嚟𤓓.

西九韓食

尋晚靠朋友嘅朋友嘅關係, 走後門 book 到一枱難求嘅二星 Mosu, 同小食神預祝生日. 期待已久, 好彩整個體驗都冇令人失望.

 

Mosu 位處 M+ 三樓平台, 設計時尚, 最鍾意佢完全冇多餘裝飾, 落地玻璃盡覽西九景致, 空間感十足, 符合個人口味可以俾幾個 like 👍 .  

踏進餐廳門口, 要經過金魚缸 show kitchen 先可以進入用餐區, 奇怪地, 廚師們個個都戴住耳機嘅 ? 應該唔該係俾總廚遙控緊掛 ?!

主廚發辦餐單只得一個選擇, 冇標價, 剩睇 service 同排場都 sense 到收費應該唔嘢少, 最後連埋飲酒, 張單果然真係超級甘 😁

話就話韓國菜, 其實係韓式材料用法國 haute cuisine 手法烹調.  講過多次唔 buy fushion 菜, 除咗 Ando 呢間可以算係例外, 仲例外到可以再返轉頭嗰隻, 除咗其中兩個主食啦 : Sweet corn tofu in ajoblanco ( 甜粟米豆腐海膽 ) 同 Ember roasted acorn noodle ( 黑松露橡子麵 )...... 唔係唔好味, 只係唔啱個人口味.

Small Bites - ( 順時針左上至右下 ) 紅菜頭鵝肝醬 . 腐皮鮑魚 . mushroom tart . 甜生蝦薯仔沙律紫菜卷

前者海膽本身冇問題, 但用粟米豆腐嚟包住就似甜品多啲, 奇怪組合.

後者橡子麵非常慷慨超大量黑松露鋪面, 俾著一般人應該會十分欣賞, 但不幸地我最驚黑松露味, 試咗啖麵, 陣味實在太濃郁, 有怪莫怪, 之後成碟冇掂過完全食唔落.  黑松露令我聯想起夏天做完運動臭狐人嘅強烈臭狐, 仲要係人已經離開但陣味都迴盪不散嗰隻.

Main Courses - ( 順時針左下至右下 ) 黑芝麻海鰻 . 風乾 1++韓牛 focaccia . 甜粟米豆腐海膽 . 蜆肉 1++韓牛 striploin . 黑松露橡子麵

主菜同最後嘅甜品當然樣樣都超水準啦, 但成晚印象最深刻最能夠令我回味, 反而係頭盤 ( 4 個 small bites ) : 甜生蝦薯仔沙律紫菜卷, mushroom tart, 紅菜頭鵝肝醬 同 個炭燒腐皮鮑魚 ! 我唔食鮑魚, 諗住俾吓面咬啖就算, 點知佢哋做到鮑魚外脆內軟, 最後都忍唔住食晒.

Sweet Bites

別來無恙的一餐

今次真係寫食嘢喇 ! 

餐廳面積不大 . 只做 8 枱客

香港好多米芝蓮都好味嘅, 但大部份食完一行出餐廳就已經冇印象, 能令我念念不忘, 中環威靈頓街 Ando 同 PMQ Louise 一定冇走雞.

tasting menu . 好彩冇再加嘢食

兩間都唔平, 但 Ando 比較少去, 因為佢哋冇 a la carte, 如果一大班人個個都食一模一樣 tasting menu 好似有啲悶.

5 道菜 lunch tasting menu . 飽到痴肺

上禮拜五, 難得有人唔駛 do 得閒 ' 和我 lunch 😆 ', 久別重逢成兩年冇去, 好在都未至於人面全非, 起碼之前認識嘅廚師 Augustin 同餐廳經理兼侍酒師 C. Chiu 都仲健在.  

阿根廷 x 日本, 一濃一淡竟然可以和諧配搭, 粗幼有序, 上菜過程儀式感十足, 除咗樣靚仲有內涵, 無論 texture 味道同層次都非常鮮明, 味覺衝激浪接浪 !  絕對唔係而家啲所謂高級餐廳整嗰啲嘩眾取寵, 紅橙黃綠青藍紫十幾廿種材料, 又生又熟撈埋一碟, 食完會係肚裡面爆炸嘅合成品.

至愛 caldoso rice

去 Ando 最大誘因, 當然為我的至愛 : Caldoso Rice ( 湯飯 )💗💗. 今次配搭新鮮彈牙 baby squid + 切成 3mm 小粒西班牙辣肉腸 + 海鮮濃湯底, 上枱時淋上一茶匙羹雪莉桶熟成日本清酒, 錦上添花. 天堂的味道, 諗起都想尖叫 ! 

argentinian beef

阿根廷牛肉香味四逸, 不過份量實在太大, 一塊俾我直頭夠分 5 餐 : 早 . 午 . 茶餐. 晚餐同消夜嚟食 😂  

除咗食物, Ando 點解會連續 3 年攞到米芝蓮呢 ? 應該係優質服務, 佢哋員工係我喺香港見過比較細心盡力嘅.  最近例子 : 食客掛係椅背件褸跌咗落地, C. Chiu 見到, 唔係通知客人件衫跌咗落地 / 執起俾番佢, 而係不動聲色用衣架掛起後直接放入衣櫃, 完全冇打擾到客人.

侍酒師 C. Chiu

C. Chiu 呢個 action 應該冇其他食客發現, 但我就親眼見證乜嘢叫 added value.