逃亡記 3.0 之老年陰影

[童年陰影] 係 0 至18 歲期間經歷虐待、忽視、家庭暴力或重大變故, 造成長期心理創傷, 我諗喺香港, 係人都會有啲.  

好人一世平安, 果然, 我有幸可以集埋 [老年陰影] 呢個郵 😆  

上回講到, office 啲人永遠閂陷晒窗簾, 而家終於有圖為證, 我冇講大話.   

呢張烏天黑地不見天日嘅相唔係晚黑開 OT 影, 而係我今朝 7:26am 影嘅 (出面完全天光㗎大佬 😒), 枱面咁乾淨唔係整潔, 係公司炒 Q 啲人根本冇人坐 !  要喺咁 depress 嘅吉場做嘢, 仲對住啲劣質人嘅咀臉, 就算心臟強大都會頂唔順, 橫掂劈咗炮, 就索性唔返話 x 之佢.  

最搞笑同事話早前有人上門追數, 每次收數佬都見烏燈黑火, 撳鐘又冇人應, 無計可施 send email 俾條 account 女人問公司係咪執咗笠 😂😂😂  

話時話, 點解星期六晨咁早 7 點幾返 office ? 因為要收番走個酒櫃轉送俾人囉 😝  

逃亡最終章, 見過鬼怕黑, 以後打死都唔會再做啲 "貴賓" 系列嘅工.

逃亡記 2.0

聽網台鬼故, 不時有人 phone-in 話住緊間屋太猛要搬走, 但又唔可以俾啲 '朋友' 知道, 所以要完全封口, 有組織同預謀喺極短時間內漏夜逃亡, 仲要非常小心, 千萬不可以喺屋內談及 / 透露新住址.

公司冇鬼, 但情況比鬼屋更惡劣, 搞到我都要偷偷摸摸, 鬼祟逃亡 😂😂

一件不留 ! 未飲完嘅都照擸走 

一場同事, 正常情況下辭職會必定交代一聲, 但諗起班人成日詐死唔做嘢, 有鑊即卸, 老馮咁乜都旨意我包底 😤, 仲要有一男一女同事態度特別惡劣, 寸臭挑機 !  所以決定整個 [一鑊翹起之不辭而別] 系列 😂😂😂, 唔通知佢哋我已經劈咗炮, 同埋唔做 handover 兼夾玩失蹤, 放長雙眼睇佢哋點收科.

個篋重到爆 . 裡面裝咗 10 支檳

自以為灑脫之際, 忽然醒起仲有好多酒擺咗係 office 😒  唔得, 要快快去收番走 !  

辦公時間搬會太明顯, 同埋我都唔想再見到班人啲咀臉, 所以尋朝 6:30am 出車, 神不知鬼不覺, 7 點幾已經將所有酒從 office 車番晒返屋企.

打開雪櫃, 望住啲酒, 心都涼埋 🥳🥳🥳🥳🥳🥳

 

逃亡記 1.0

記憶中, 人生大逃亡, 兩次都喺意大利. 原因, 真係講都冇人信.

第一回逃亡

日期 : 1999 年 2 月14 日

地點 : 意大利西西里島 . 某小鎮民宿 

原因 : 鹹濕太子爺 

美籍印度女同學失戀, 陪佢去西西里島旅行散心, 當年島民應該冇見過扁口扁面嘅亞洲人, 個個當我公仔咁玩, 啲老人家仲會走埋嚟摸我塊面, 話 carina ~~ [唔係劉嘉玲, 係意文 '得意' 咁解]. 

EP1 - Lunch 喺街邊檔食魚, 下晝嚟料胃痛, 要返民宿作嘔, 女同學想打俾舊菜, 話要落街搵電話亭 (當年歐洲未流行手機), 喺廁所盡情噴發之際, 隱約聽到屎塔上方傳出一吓吓急速呼吸聲 😲😲  一望, 原來牆上有個窿, 有對眼喺個窿度𥄫我 😱😱😱😱😱😱😱  CLS, 真係冇諗過拍戲先有嘅情節, 會發生喺我身上 ! 我冇尖叫, 只係立即衝出廁所.

EP2 - 衝出廁所一刻女同學咁啱返嚟, 開房門嗰陣, 更驚心動魄嘅一幕呈現 : 同一個男人 (50 幾歲阿叔), 打斜 '躝' 喺條樓梯度, 單手托頭望住我笑 [註 : 房門對正條上落樓嘅樓梯].

EP3 - 同學都比呢個景象嚇到, 話留喺房唔係辦法, 不如出街. 食完飯返民宿, 阿叔 (原來係太子爺) 同佢媽已經喺 lobby '守候' 我哋, 又請食餅乾又請飲酒, 開到個電視鬼死咁大聲, 大聲到根本連對方講乜都聽唔到 😩.  最鬼魅, 係老母突然閃咗, 剩低我哋兩條女同阿叔共處一室 ! 勢色唔對, 立即請辭, 阿叔話要 cheek kissing say goodnight 喎, 好啦, 同女同學正常錫面, 點知到我條鹹濕佬竟然一嘢咀落嚟 ! 

EP4 - 返回房間以為安全啦, 準備瞓覺之際, 竟然有人用門匙開房門 ! 我哋以最快速度飛撲去頂住度門, 原來係老母, 話要入嚟睇吓個仔喺咪房度 (即係有前科, 阿叔會搞啲客啦) 😳😳😳😳😳😳   發神經, 成件事簡直痴線到一個點 ! 半夜三更, 出面落大雪我哋走唔到, 唯有兩條友通宵坐喺度頂住房門等天光. 

原本打算住兩晚, 咁恐怖, 第朝天一光就 check-out 冇鞋輓屐走, 俾咗第二晚嘅房租都唔要喇. 經歷過呢件事, 我決定以後永遠都唔會再住民宿.

第二回逃亡

日期 : 2002 年 6月 23日

地點 : 羅馬 . Airbnb 

原因 : 猛鬼 (惡嗰隻)

真實圖片 : 綠百頁窗就係有鬼嘅房同廚房

同 friend 租住羅馬市中心著名地標附近一個 apartment 嘅其中兩間房, friend 同佢老公向大街, 我同我妹就向內庭 (對角係廚房).  房東係個老婆婆, 入住當日感覺已經有啲唔妥, 雖然間屋好多窗, 出面仲風和日麗, 但屋內氣氛極度陰沉, 最奇怪係浴室, 枱面同浴缸四周擺滿幾百個不同品牌洗頭水樣板樽仔, 場面非常壯觀 !

真實圖片 : 大樓入口 . 條街車水馬龍

飲飽食醉, 晚黑返房倒頭大睡, 瞓到半夜大約 1:30am 有人開廚房燈𥋇醒咗我, 實在太光搞到瞓唔番, 輾轉反側反到三點幾, 唔係路, 唯有喺篋摷個眼罩戴, 唔戴由自可, 一戴九秒九出事 : 立即俾鬼砸 !!  都係例牌嗰啲, 完全清醒 (摷完篋啱啱先瞓番落床), 聽到四周環境聲音但個身唔郁得. 唯一唔同, 係戴咗眼罩睇唔到嘢, 砸砸吓, 有隻好大力嘅手揞住我個鼻 😮😮😮  用力掙扎, 唔知搞咗幾耐先成功掙脫, 因為太用力, 所以一鬆開成個人彈起, 除低眼罩見到我妹已經起咗身. 

真實圖片 :內庭地下永遠有灘水 . 但周圍冇水源

睇錶時間係 5:30am, 我妹唔係早起嘅人, 問佢做乜, 佢話有 '嘢' 摙佢條頸, 一望, 條頸真係有兩個好大隻嘅手指印 😕  哇, 不得了, 同 friend 商量後決定 check-out 大逃亡, 馬上搬去另一酒店 ! 

而家整棟大樓已經改裝成酒店 https://www.hotelnavona.com/, 有仇家可以介紹佢哋去瞓吓 😆😆😆

可能係最多'鬧'字嘅一篇

公司請人 (我的 replacement 😂), 如果覺得自己可以接受下列條件, 請聯絡 : 

1) 辦公室位處觀塘 80 年代建成工商大廈, 泊車每小時 HKD36, 貴過中環 IFC ;

2) 唔明點解公司長期落簾, 永遠不見天日, 啲窗形同虛設, 無論我點樣去打開啲簾, 第日必定有人去閂番陷 ; 

3) 自從上年裁員, 辦公室氣氛變得緊張, 同事個個木口木面, 各自修行零互動 ;

4) 辦公室隔鄰為某福音傳道堂, 晚上不時有聚會, 信徒會非常激動, 高聲唱頌 / 呼喊兩小時或以上 ;

5) 只用微信溝通, 除非海外客戶特別要求, 否則公司個 email 係廢嘅 !  一個 project 開十 9 幾個羣, 一個羣十幾廿人 join, 亂到 9 彩 !  啲人又個個唔出真名, 什麼 [初夏的雨] [平凡人] [影子] [怡然自得], 齋聽以為係馬名 😂😂  做完啲 projects, 都唔知佢哋係男定女, 邊個打邊個.

6) HQ 覺得香港 office 山高皇帝遠, 員工蛇王兼偷懶, 最近要各人電話安裝 [釘釘] app, 接受嚴密監控, 超級 CLS 😡😡😡😡  

7) 公司要求農曆年香港員工跟國內同期休假, 以為好著數啦, 點知原來要強制性刻扣番 4 日 AL 😡😡😡😡😡😡 

心想, 市道咁, 都係暫時忍忍吧...... 

點知, 老板自從上年十二月心情變差, 日日密集式搵人出氣不停鬧, 每隔幾個鐘佢就 wechat 嚟料, 留言鬧鬧鬧鬧鬧鬧鬧鬧鬧鬧鬧鬧鬧鬧鬧鬧鬧 x infinity !  鬧嘅內容, 其實係關於某同事嘅 performance 令香港公司蝕錢 !  大佬呀, 冤有頭債有主, 你喺度嘈我做乜春啫, 直接小當事人囉, 同埋完全冇去理解過事情來龍去脈, 就一口咬定係員工做錯.

Ok, 以為硬食幾嘢算, 前幾日 2 月 4 日立春, 諗住新一年好開始啦, 點知朝早 10 點幾, 又開始殺聲震天喺度鬧鬧鬧 !  心諗, 其實你日鬧夜鬧搞到咁負能量, 財神都俾你鬧走啦. 

2 月 5 日一早 call 個會媽叉完同事一輪後, 仲要補 wechat 再喺度小 😠, 精神虐待 !  DLS ~ 2025 年尾鬧足成個幾月鬧到今年二月, 咁玩法, 容乜易俾佢再繼續鬧鬧到年尾㗎 ?!  實在唔可以再喺呢個咁劣質嘅環境下過活, 所以簡單回咗句 : 我唔撈喇 !  

通知期一個月, 扣埋年假, last day 啱啱好係 3 月 5 日驚蟄 😆